Nebadwila ku St. Paul, Minnesota, U.S.A., mu 1954. Banja yasu yenze Yacikatolika, tenze na zonse zofunikila pa umoyo. M’banja mwasu tevyalika 5 ndipo neo nine waciŵili. Nenzophunzila pa sukulu Yacikatolika, ndipo nenze m’gulu ya alumbwana amene enzotumikila ku guwa m’chechi. Nangu n’tetyo, nenzeve ciziŵiso ciliconse pa nkhani ya Baibo. Nangu kuti nenzokhulupilila kuti Mulungu niye epanga vinthu vonse, neleka kukhulupilila cipembezo.

Penenze m’caka coyamba pa koleji yophunzila zamalamulo pa William Mitchell, a Mboni za Yehova ewela pa ng’anda. Nenze wotangwanika cifukwa nenzowasha, tetyo banja ila ya Mboni yelonjeza kuti ikawele soti. Peeciwela neŵakonsha makonsho aŵili aŵa, “Ndaŵa yanji ŵanthu aweme vinthu vuŵayendela lini luweme m’calo? Kansi munthu ofunika kucitanji kuti ankhale wosangalala?” Nelondela buku yakuti “Coonadi Cimene Cimatsogolera ku Moyo Wamuyaya na Baibulo la Dziko Latsopano la Malemba Opatulika, yamene yenze na cikuto ca gilini. Nevomela kuphunzila Baibo, ndipo izi zecitisha  kuti niziŵe vinthu vinyinji. Nekondwela ngako penephunzila kuti Ufumu wa Mulungu niye boma yati ikalamulile mtundu wa ŵanthu pacalo. Neona kuti ulamulilo wa ŵanthu wakanga ndipo wacitisha ŵanthu kuti akumane na mavuto monga kusoŵa cilungamo na masoka.

Koyambilila kwa caka ca 1982, nezitwala kwa Yehova, ndipo caka camene ico nebatizika pa msonkhano wacigawo wa mutu wakuti “Coonadi ca Ufumu,” wamene wecitikila mu holo ikulu mu mzinda wa St. Paul. Wiki yokonkhapo neluta kuyolemba mayeso ya zamalamulo. Koyambilila kwa mwezi wa October, nezindikila kuti naphasa mayeso, ndipo neyenelela kunkhala loya.

Pa msonkhano wamene uyu, nekumana na mkwasu Mike Richardson wamene otumikila ku Brooklyn, ndipo enifotokozela kuti ku likulu ya Mboni za Yehova enkhazikisha ofesi ya zamalamulo. Nekumbukila mau ya nduna ya ku Itiyopiya yotomolewa pa Mac. 8:36, ndipo nezikonsha kuti, ‘Kansi n’cinji cunilesha kuti nane nikonshele kuyotumikila ku Dipatimenti ya zamalamulo ku ofesi ya Msambo?’ Tetyo nekonshela utumiki wa pa Beteli.

Makolo ŵangu aliyokondwele kuti nenkhala wa Mboni. Atata enikonsha kuti, kansi kuseŵenza na a Mboni kukatizhyana tyani na za uloya, koma soti kuli na phindu yanji? Neŵafotokozela kuti nikocita utumiki wozifunila, neŵauzhya kuti akonipasa ndalama itontho yogulila zofunikila monga ni yakupasa atumiki ayakine a pa Beteli.

Cifukwa cakuti nenze nevomela kuyamba kuseŵenza pa khoti, niliyokwanishe kuluta ku Beteli panthawi yamene iyo, tetyo neyamba utumiki wa pa Beteli ku Brooklyn, New York, mu 1984. Ndipo neuzhyiwa kuti nikoseŵenzela ku dipatimenti ya zamalamulo. Panthawi iyi kuli neo yenze lini nthawi iweme.

Mu November 1983, gulu yasu yegula malo oitiwa kuti Stanley mu mzinda wa New Jersey. Akwasu esenga cilolezo cakuti akonze soti malaiti na mapaipi ya manzi. Peciyoonana na akulu-akulu aboma, akwasu efotokoza kuti ofuna kuseŵenzesha malo aya kucitilapo misonkhano ikulu-ikulu ya Mboni za Yehova. Koma izi zeyambisha mavuto. Malamulo a mu mzinda wa Jersey yenzolola tyala kuti malo olambilila akonkhala kumalo kunkhala ŵanthu. Pofwana kuti malo amene aŵa enze ku malo amalonda, aboma ekana kutwala cilolezo. Akwasu ecita apilu koma eŵakanila.

 Wiki yoyamba ya utumiki wangu pa Beteli, gulu yasu yetwala nkhani yamene iyi ku khoti kuti aŵapase cilolezo. Cifukwa cakuti neseŵenza vyaka viŵili ku khoti, mu mzinda wa ku St. Paul, Minnesota, nkhani zamene izi nenzoziziŵa luweme ngako. M’mozi wa maloya ŵasu elaŵila kuti ng’anda yoitiwa kuti Stanley yenzoseŵenzeshewa pa zocitika zosiyanasiyana nocitilamo visangalalo. Ndaŵa yanji ingalekoseŵenzeshewa kucitilamo zacipembezo? Tetyo, khoti yeganizilapo pa nkhani iyi ndipo yegamula kuti akulu-akulu a mu mzinda wa Jersey etiphwanyila ufulu pa nkhani ya cipembezo. Khoti yetwala cilolezo, ndipo neyamba kuona kuti Yehova odalisa gulu yasu poseŵenzesha malamulo kuti acilikize nchito yake. Nesangalala ngako cifukwa cotolako mbali.

Akwasu eyamba nchito ikulu yokonza soti ng’anda yamene iyi, ndipo mwambo wa kilasi ya namba 79 ya osilizhya maphunzilo a Giliyadi, yecitikila mu mzinda wa Jersey mu Holo yamene iyi pa September 8, 1985. Nekondwela ngako kuti neyavya kupitisha pasogolo zinthu za Ufumu potolako mbali pankhani zamalamulo. Izi zenicitisha kunkhala wosangalala kupambana uloya wanenzocita nikaliyowela kuno ku Beteli. Nenzoziŵa lini kuti Yehova anganiseŵenzeshe m’njila yoteti pa nkhani zamalamulo.

M’vyaka va m’ma 1980, madokotala kucipatala enzolemekeza lini ufulu wa Mboni wolondela thandizo iyakine kupatulapo kuikiwa milopa. Azimai amene enze na pakati enzokumana na mavuto cifukwa oweluza enzoona kuti anakazi aliye ufulu wokana kuikiwa milopa. Ove enzoganiza kuti ngati angalekoikiwa milopa niye kuti angafwe, ndipo ŵana angankhale amasiye.

Pa December 29, 1988, milopa ya kalongosi Denise Nicoleau yetaika ngako pavuli popapa. Cifukwa ca izi, himogulobini yake yecepa kufwika pa 5.0. Adokotala emuuzhya kuti ofunika kuikiwa milopa. Kalongosi Nicoleau ekana. M’mawa mwake, acipatala etwala nkhani iyi ku khoti kuti aŵapase cilolezo cakuti amuike milopa. Akaliyokumvwa zenezene olo kuziŵisha kalongosi Nicoleau na mulume wake, oweluza epasa mphamvu acipatala kuti amuike milopa.

Pa Cisanu pa December 30, acipatala eika milopa kalongosi Nicoleau akaliyokumvwa maganizo ya mulume wake na abanja ŵake ayakine enzomulwazika kucipatala. Pa siku yamene iyo m’cingulo, abanja ŵake anyinji koma soti akulu ayakine emangiwa cifukwa conamizhyiliwa kuti enzocingilizhya kuti kalongosi Nicoleau asaikiwe milopa. Pa Ciŵelu m’mawa, pa December 31, m’manyuzipepa, pa T V koma soti pa mawailesi a mu  mzinda wa New York na vilumba viyakine, elengeza za kumangiwa kwamene uku.

Pa Mande m’mawa, nelaŵila na woweluza mkulu wa ku khoti, Milton Mollen. Nemufotokozela mfundo zokhuza nkhani iyi, kuti woweluza evomelezhya kuika milopa akaliyokumvwa zenezene. Mollen eniuzhya kuti nilute ku ofesi kwake pa siku yamene iyo m’cingulo kuti tikalaŵizhyane nkhani yamene iyi na lamulo yake. Philip Brumley wamene enzoyanganila dipatimenti ya zamalamulo enipelekezhya pakuyoonana na woweluza Mollen ku ofesi kwake m’cingulo. Woweluza eita soti loya wa cipatala kuti naye ankhalepo. Nkhani iyi yekula ngako. Panthawi iyakine mkwasu Brumley enilembela pa kabuku kake nonionesha kuti nenzofunika kukamba nao “modekha.” Nikakumbukila, malangizo ŵake enze ofunika ngako cifukwa nenzolaŵila mokalipa kuti nioneshe kuti loya wa acipatala enze wolakwa.

Pavuli polaŵizhyana kwa ola imozi, woweluza Mollen etiuzhya kuti, iyi niye yati ikankhale nkhani yoyamba mailo m’mawa. Petenzofuma mu ofesi yake woweluza Mollen elaŵila kuti loya wacipatala “ikamuvute ngako mailo nkhani.” Kutanthauza kuti loya wacipatala enzofunika kuyofotokoza ngati cipatala cili na ufulu wokakamizhya kalongosi Nicoleau kuti aikiwe milopa. Necimvwa monga kuti Yehova oniuzhya kuti mupambane. Molicefya neona kuti Yehova enzotiseŵenzesha kuti tikwanilishe cifunilo cake.

Usiku wamene uyo tenzokonzekela zati tikalaŵile mailo. Khoti iyi yenze pafupi ngako na Beteli ya ku Brooklyn, tetyo akwasu na azilongosi anyinji enzoseŵenza mu ofesi ya zamalamulo, eciyopezekako. Pavuli pakuti oweluza 4 amvwishila nkhani yasu, ecosapo lamulo yoika milopa. Khoti ikulu yegamula nkhani iyi mowamila kalongosi Nicoleau, ndipo yefotokoza kuti ni kulakwa kusaina lamulo akaliyokumvwa maganizo ya munthu wolwala, ndipo kucita tetyo nikuphwanya ufulu wa munthu.

Posilizhyila, khoti ikulu ya ku New York yegamula kuti kalongosi Nicoleau ali na ufulu wolondela thandizo iyakine kupatulapo kuikiwa milopa. Nkhani iyi yenze yoyamba pa nkhani 4 zokhuzana na milopa zamene khoti ikulu yeweluzako ndipo nenze na mwai wotolako mbali. (Onani bokosi yakuti “ Kuwina  Milandu m’Makhoti Akulu-Akulu.”) Nekatizhyana soti na maloya a ku Beteli pankhani yokhuza kulimbilana ŵana, kusila kwa vikwati, na malamulo okhuza malo na mang’anda.

Nekumana na mkazi wangu Dawn, wamene cikwati cake cesila. Enzolela ŵana atatu, koma enzokwanisha kupeza zofunika pa umoyo nocita soti upainiya. Nangu kuti enzokumana na mavuto anyinji, nekopeka naye cifukwa cakuti enze wolimbikila potumikila Yehova. Mu 1992 tepezeka pa Msonkhano Wacigawo ku New York wa mutu wakuti “Oŵalitsa Kuunika,” ndipo nemuuzhya kuti nufuna kuti tiziŵane luweme. Caka cokonkhapo telungulana. Kunkhala na munakazi woganiza luweme koma soti wacikondi yenze daliso yofumila kwa Yehova. Kulaŵila cendi, Dawn enicitila vinthu viweme ngako pa masiku onse amoyo ŵasu.—Miy. 31:12.

Petelungulana, ŵana enze na vyaka 11, 13 na 16. Nenzofunishisha kunkhala kolo iweme, tetyo, mosamala nenzoŵelenga nocita ciliconse canapeza m’zofalisa cokhuza kunkhala kolo yopeza. Penze mavuto anyinji, koma nenzosangalala cifukwa ŵana evomelezhya kuti ninkhale kolo yao, shamwali wao na ausuwao acikondi. Ayao a ŵana ŵasu enzowela kung’anda kwasu ndipo tenzokondwela kunkhala na acilumbwana aŵa pa ng’anda.

Mu 2013 Neo na Dawn tekukila ku Wisconsin kuti tikasamalile makolo. Cenidabwisa ni cakuti utumiki wa pa Beteli uliyosile. Neitiwa kuti nikapitilizhye kuyavya gulu yasu pa nkhani zamalamulo kwa kanthawi.

Mu September 2018, nezindikila kuti nenzofunika kukosomola ngako nikaliyolaŵila. Adokotala ŵasu enipima, koma aliyoziŵe cenzopangisha vuto yamene iyi. Pavuli pake, dokotala ula elaŵila kuti nikaonane na dokotala angaziŵe za matenda aya. Mu January 2019, adokotala eniuzhya kuti nili na matenda akulu amene kusogolo yakakhuze muŵili wangu wonse.

Pavuli pa masiku atatu penenzoseŵela masoŵela ŵanenzokonda ngako nepona ndipo netyoka kwanja yamalendi. Nenzoyakonda ngako masoŵela aya ndipo nankhala nuyacita kwa umoyo wangu wonse ndipo nenzoyaziŵa ngako soti. Penepona neziŵa kuti nayamba kukangiwa kuseŵenzesha luweme ziwalo zangu monga masozi. Nedabwa ngako na mweyekulila matenda aŵa. Neyamba kuvutika kulaŵila, kuyenda koma soti na kulya.

Nine wosangalala ngako kuti nakwanisha kuyavya gulu ya Yehova kupitila mu nchito yangu ya uloya. Nenze na mwai wolemba nkhani zamene zenzoŵelengewa na madokotala, maloya koma soti oweluza. Nenze soti na mwai wopanamilako Mboni za Yehova poteteza ufulu wao pa nkhani yopasiwa cithandizo ca mankhwala paliye kuikiwa milopa. Molingana na mau yali pa Luka 17:10: ‘N’ne kapolo watyalatyala. Nacita Zenenzofunikila Kucita.’