Akwasu pa Beteli eseŵenza kwa nthawi yopitilila caka cimozi kuti amange wailesi ya WBBR pa cisumbu ca Staten, mu mzinda wa New York. Pavuli pake, ekonza malo yakuti amangepo ng’anda ikulu na colinga cakuti anyanchito akonkhalamo. Emanga soti ng’anda yosungilamo zida zofunikila poseŵenza. Pavuli posilizhya nchito iyi, akwasu eyamba kusonkhanisha zida “zolengezela pa wailesi.” Koma enzofunika kulimbana na mavuto ayakine.

Zenze zovuta ngako kwa akwasu kuti aike cida cikulu ca netiweki. Cida ici cenzofunika kunkhala citali mamita 91 ndipo cenzofunika kuikiwa pakati pa vimiti viŵili vamene cimuti ciliconse, cenzofunika kunkhala citali mamita 61. Peciyesa kucita izi kwa nthawi yoyamba, ekangiwa. Koma pavuli pake, ekwanisha na thandizo ya Yehova. Mkwasu Calvin Prosser, wamene eseŵenzako nchito iyi, elaŵila kuti: “Kuti tekwanisha kucita izi peteyesa kwa nthawi yoyamba sembe tezitamanda mwa kulaŵila kuti, ‘Onani zatakwanisha kucita!’” Akwasu aŵa epeleka ulemelelo kwa Yehova. Koma penze soti mavuto ayakine.

Wailesi iyi yolengezela yenze yengoyambiwa calombapano ndipo cenze lini cipepu kugula zinthu zofunikila. Olo n’tetyo, akwasu epeza zida zoseŵenzeshewako kale pafupi na malo aŵa. M’malo mogula maikolofoni, ove eseŵenzesha yakale. Usiku uyakine mu February, eganiza zoyesa zida zonse. Colinga cao cenze kulengeza pulogilamu. Tetyo eyamba kuimba nyimbo za Ufumu. M’mozi mwa akwasu aŵa wamene ni mkwasu Ernest Lowe, efotokoza cinthu cocitisha nsoni cecitika pa siku iyi. Yove elaŵila kuti akwasu aŵa penzoimba, elandila foni kufumila kuli Woweluza Rutherford, b wamene  enzokumvwa kuimba kwao kupitila pa wailesi ku Brooklyn. Mzinda uyu wenze pa msenga wa makilomita 25 kufumila kwenze akwasu enzoimba.

Mkwasu Rutherford eŵauzhya kuti, “Lekani kuimba, mupanga congo!” Akwasu aŵa ecita nsoni ndipo kamangu-kamangu elekezhya pulogilamu iyi. Olo n’tetyo, ove eziŵa kuti wailesi yenzoseŵenza ndipo enze okonzeka kuyamba kulengeza.

Pa February 24, 1924, yamene yenze siku yao yoyamba kulengeza, mkwasu Rutherford elaŵila kuti wailesi iyi yenze kuzoseŵenzeshewa pocita nchito yamene Khristu Mfumu eŵapasa kuti acite. Elaŵila soti kuti colinga ca wailesi iyi cenze “kuyavya ŵanthu kumvwisha Baibo koma soti kufunika kwa nthawi yatunkhalamo.”

Kulengeza kwao koyamba kweyenda bwino ngako. Wailesi iyi yeseŵenzeshewa kwa vyaka 33 polengeza mapulogilamu ya atumiki a Yehova.

Mu July 1924, Ophunzila Baibo esonkhana pamozi kuti acite msonkhano wacigao ku Columbus, Ohio. Ophunzila Baibo aŵa efumila m’mbali zosiyanasiyana za calo ndipo emvwishila ku nkhani zamene zekambiwa mu vilaŵilo monga Ciarabu, Cizungu, Cifulenchi, Cilaŵilo ca ku German, Cigiriki, Cihangare, Cilaŵilo ca ku Itali, Cilithuania, Cipolish, Cilaŵilo ca ku Russia, vilaŵilo va ku Scandinavia, na cilaŵilo ca ku Ukraine. Ŵanthu emvwishila ku nkhani ziyakine kupitila pa wailesi, ndipo akwasu esenga wolemba nyuzipepa muyakine wa ku dela kwamene uku kuti akolemba nkhani za pulogilamu ya msonkhano uyu siku iliyonse.

Pa Cinai July 24, akwasu na azilongosi opitilila 5,000 eluta kuyolalikila mu mzinda mwamene mwenzocitikila msonkhano. Ove eyaŵila mabuku pafupifupi 30,000 ndipo eyambisha maphunzilo a Baibo anyinji. Nsanja ya Mulonda yefotokoza kuti siku iyi “yenze mbali yosangalasa ngako ya msonkhano wacigao.”

Pa Cisanu July 25, motang’a mtima mkwasu Rutherford peenzokamba nkhani yake, eŵelenga kalata yamene yenzosusha asogoleli acipembezo. Yove elaŵila kuti azandale, acipembezo koma soti azamalonda “enzolesha ŵanthu kuphunzila cendi cokhuza Ufumu wa Mulungu, yamene niye njila yati akaseŵenzeshe Mulungu podalisa ŵanthu.” Kuyangizhyila apo, elaŵila kuti analume aŵa enze olakwa cifukwa “enzocilikiza bungwe ya League of Nations nolaŵila kuti iyi niye yenze njila yamene Mulungu enzolamulila calo.” Ophunzila Baibo enzofunika kunkhala otang’a mtima kuti alengeze uthenga uyu ku ŵanthu.

 M’kuluta kwa nthawi, nkhani iyakine ya mu Nsanja ya Mulonda yefotokoza kuti: “Msonkhano uyu wamene wecitikila ku Columbus, wetang’isha cikhulupililo ca gulu ya akwasu na azilongosi akhama . . . , weŵayavya kunkhala otang’a kuti alalikile mosasamala kanthu za kusushiwa.” Mkwasu Leo Claus, wamene epezekapo pa msonkhano uyu elaŵila kuti: “Pavuli pa msonkhano uyu, tesangalala ngako kuuzhyako ayakine uthenga uyu m’gao yasu.”

Mu October, Ophunzila Baibo eyamba kuyaŵila makope ya tumatrakiti twamene twenze na uthenga wamene wenzoyangizhyilapo uthenga weciŵelenga mkwasu Rutherford. M’katauni katontho ka Oklahoma ku U.S.A, mkwasu Frank Johnson esilizhya kugaŵila tumatrakiti ndipo enzofunika kuyembekeza kwa maminesi 20 kuti akwasu na azilongosi azekumane naye. Cenze lini cipepu kwa yove kuyembekezela pa malo akuti munthu aliyense omuona, cifukwa analume a m’tauni iyi amene enze okalipa cifukwa ca uthenga weenzolalikila, enzomusakila. Mkwasu Johnson eganiza zofisama m’chechi ciyakine camene cenze pafupi. Peciloŵa m’chechi ici, epeza kuti muliye munthu aliyense. Tetyo, esiya tumatrakiti pa mpando ulionse. Yove ecita izi mofulumila ngako. Ndipo pofwana kuti enze akaliko na nthawi yoyembekeza akwasu na azilongosi kuti akumane naye, yove eganiza zocita cimozimozi m’machechi ayakine aŵili.

Pavuli pocita izi, mkwasu Frank ewelela pa malo pamene akwasu na azilongosi enze kuzokumana naye. Yove efisama kuvuli kwa sitesheni yogulisilapo mafuta, apo n’kuti ololesha analume enzomusakila. Analume aŵa epita pafupi na yove koma aliyomuone. Nthawi itontho pavuli pake, akwasu na azilongosi ŵeenzoyembekeza mkwasu Frank efwika ndipo emutola noyambapo.

M’mozi mwa akwasu elaŵila kuti: “Petenzocoka ku malo aŵa, tepita machechi yatatu ndipo pa chechi ciliconse, penze ŵanthu pafupifupi 50 amene enze peneme. Ayakine mwa ŵanthu aŵa enzoŵelenga tumatrakiti ndipo ayakine enzoonesha abusa tumatrakiti utu. Tefumapo kamangu pa malo aŵa na colinga cakuti ŵanthu asatizindikile. Tuyamikila ngako Yehova potiyavya kuziŵa zatingacite kuti tilalikile uthenga uyu, m’njila yakuti tisakatiwe.”

Ophunzila Baibo elalikila soti motang’a mtima m’vyalo viyakine. Mwacisanzo, kumpoto kwa France, mkwasu Józef Krett elalikila anyanchito a ku maini ofumila ku Poland. Yove enzofunika kulaŵila nkhani ya mutu wakuti “The Resurrection of the Dead Soon.” Akwasu na azilongosi pecipasa ŵanthu tumapepa twaciitano m’calo ici, wansembe muyakine wa m’dela iyi ecenjeza ŵanthu a mu chechi cake kuti asakaluteko. Koma zecitika zenze zosiyanako. Ŵanthu opitilila 5,000 epezekapo kuyangizhyilapo wansembe. Mkwasu Krett esenga wansembe kuti afotokoze cikhulupililo cake koma yove ekana. Tetyo pavuli pa nkhani yake, mkwasu Krett epasa ŵanthu onse mabuku yeenze nayo cifukwa ove enze ofunishisha kuziŵa zinyinji zokhuza Mau a Mulungu.—Amo. 8:11.

Mkwasu Claude Brown eluta ku Africa, ku calo camene lomba cuziŵika kuti Ghana kuti akalengeze uthenga wabwino. Ŵanthu anyinji emvwishila uthenga cifukwa ca nkhani zinyinji zecikamba koma soti zofalisa zecipasa ŵanthu anyinji. John Blankson, wamene enzocita maphunzilo a ufamasi epezekapo pa imozi mwa nkhani za mkwasu Brown. Kamangu, yove ezindikila kuti wapeza cendi. Elaŵila kuti, “Cendi ici cenisangalasa ngako ndipo neuzhyako ŵanthu anyinji ŵenenzocita nao maphunzilo ya ufamasi.”

 Siku iyakine, John eluta ku chechi ca Anglican na colinga cakuti akakonshe wansembe nkhani yokhuza Utatu. Pa nthawi iyi n’kuti yove waphunzila kale zayulaŵila Baibo pa nkhani iyi. Koma wansembe ekalipa nomuuzhya kuti: “Niwe lini Mkhristu; ufumila kwa Malewania. Coka pano!”

Pecifwika ku ng’anda, John elembela kalata wansembe yomusenga kuti akateteze cikhulupililo cake pa nkhani yokhuza Utatu pamenso pa ŵanthu. Koma wansembe emuuzhya kuti alute ku ofesi ya mphunzisi mkulu. Tetyo peciluta ku ofesi iyi, mphunzisi mkulu emukonsha ngati emulembela cendi kalata wansembe.

John eyankha kuti, “Eee, neŵalembela.”

Mphunzisi mkulu euzhya John kuti alembe kalata yosenga cikhululukilo kuli wansembe. Ndipo John eyankha kuti niŵalembele kuti:

“Mphunzisi mkulu waniuzhya kuti nilembe kalata yacipepeso kuli mweo ndipo n’ne wokonzeka kulemba malinga ngati muvomelezhye kuti vamuphunzisa ni viphunziso vawenye.”

Mphunzisi mkulu pecimvwa zeenzofuna kulemba John emukonsha kuti, “John, kansi izi niye zaufuna kulemba?”

John eyankha kuti “Eee. Niye tyala zaningalembe.”

Mphunzisi mkulu elaŵila kuti, “Ucosewe sukulu. Ungapitilizhye lini kunkhala pa sukulu ino ngati upitilizhya kukamba viipa vokhuza wansembe wa cipembezo camene boma yucilikiza.”

Yove ekonsha kuti: “Koma mphunzisi, . . . Ngati mutiphunzisa ndipo tiliyomvwishe mfundo iyakine, kansi tukonsha lini makonsho?”

Mphunzisi mkulu eyankha kuti, “Eee, mukonsha.”

“Izi niye zecitika. Munalume ula enzophunzisa Baibo ndipo nemukonsha konsho. Ngati yove ekangiwa kuyankha konsho, ndaŵa yanji nufunika kulemba kalata yosenga cikhululukilo?”

Tetyo John epitilizhya kunkhala pa sukulu iyi. Ndipo aliyolembe kalata iliyonse yosenga cikhululukilo.

Pofotokoza zecitika m’caka ici, Nsanja ya Mulonda yelaŵila kuti: “Tukatizhyana na zecilaŵila Davide kuti: “Mweo munipase mphamvu kuti nikwanishe kuchaya nkhondo. Mucitishe kuti adani ŵangu agonje.” (Salimo 18:39) Caka cino cankhala colimbikisha ngako cifukwa taona mwamene Yehova watiyavyila pa nchito yake. . . Atumiki ŵake okhulupilika . . . ankhala olalikila uthenga wa Ufumu mwacimwemwe.”

Cakosilizhyila kwa caka ici, akwasu eganiza zonkhala na wailesi iyakine. Wailesi iyi yemangiwa ku Chicago mu U.S.A. Wailesi iyi yalomba yenzoitiwa kuti “WORD” yamene yutanthauza mau. Izi zenze teti cifukwa enzolalikila Mau a Mulungu pa wailesi. Pa nthawi iyi, ove enzoseŵenzesha zida zamphamvu zamene zenzoyavya ŵanthu kumvwishila uthenga wa Ufumu olo ku malo akutali.

M’caka ca 1925, Yehova eyavya akwasu kumvwisha zinthu zalomba zufotokozewa mu Chivumbulutso caputa 12. Cifukwa ca kamvwidwe aka kalomba, ayakine aliyopitilizhye kutumikila Yehova. Koma ayakine esangalala ngako kumvwisha zecitika kululu koma soti mwezekhuzila atumiki a Mulungu pacalo.