NKHANI YOPHUNZILA 43
NYIMBO 90 Tilimbikishane
Kansi Tingagonjese Tyani Maganizo Ozikaikila?
“Mukofufuza zinthu zonse nosimikizhyila zamene ni zabwino.”—1 ATES. 5:21.
ZATI TIPHUNZILE
M’nkhani ino, tiphunzile zatingacite ngati tukaikila kuti Yehova osamala za seo. Tione zatingacite ngati tuona kuti cosankha cetepanga cotumikila Yehova n’colakwika, koma soti ngati tuona kuti tucita lini zinyinji pomutumikila monga ni mwetenzocitila kale.
1-2. (a) Kansi atumiki a Yehova angozikonsha makonsho ayakine otyani? (b) Kansi tiphunzile cinji m’nkhani ino?
TONSE, mosasamala kanthu kuti nise ŵana olo akulu, nthawi ziyakine tunkhala na zinthu zatukaikila. a Mwacisanzo, wofalisa wacilumbwana angokaikila ngati Yehova osamala cendi za yove. Cifukwa ca izi, payakine angakaikile ngati ofunika kubatizika. Cisanzo ciyakine ni ca mkwasu wamene peenze wacilumbwana, esankha kuika Yehova pasogolo mu umoyo wake m’malo mosankha kupanga ndalama zinyinji. Koma lomba pawakula ndipo ali na ndalama zitontho zocilikizila banja yake, payakine angayambe kukaikila ngati cosankha cecipanga peenze wacilumbwana cenze canzelu. Ganizilani soti za kalongosi wamene ni wacikulile. Cifukwa cakuti ni wacikulile, yove oona kuti ocita lini zinyinji monga ni mweenzocitila kale. Kansi mweo mwezikonshako kale makonsho monga aya: ‘Kansi Yehova oniona cendi? Kansi zosankha zenepanga zakuti nitumikile Yehova n’zopindulisha cendi? Kansi nikali wofunika kwa Yehova?’
2 Ngati tupeza lini mayankho ya makonsho monga aya, zingacitishe kuti cikhulupililo casu cifooke olo tingaleke kutumikila Yehova. M’nkhani ino, tilaŵizhyane mfundo za m’Baibo zamene zingatiyavye ngati tukaikila kuti (1) Yehova osamala za seo, (2) zosankha zetepanga kuvuli zenze zoyenela, olo (3) tikali ofunika kwa Yehova.
MWATINGAGONJESELE MAGANIZO OZIKAIKILA
3. Kansi ni njila imozi yotyani yatingagonjeselemo maganizo ozikaikila?
3 Njila imozi mwatingagonjesele maganizo ozikaikila, ni mwa kupeza mayankho m’Mau a Mulungu pa makonsho yatingankhale nayo. Ngati tingacite izi, tinkhale otang’a, tikule mwauzimu ndipo ‘tinkhale na cikhulupililo cotang’a.’—1 Akor. 16:13.
4. Kansi ‘tufufuza tyani zinthu zonse nosimikizhyila zamene ni zabwino’? (1 Atesalonika 5:21)
4 Ŵelengani 1 Atesalonika 5:21. Onani kuti Baibo yutilimbikisha ‘kufufuza zinthu zonse nosimikizhyila zamene ni zabwino.’ Koma kansi tingacite tyani izi? Ngati mukaikila zinthu ziyakine, mufunika kuona zayulaŵila Baibo pa zinthu zamene izo. Mwacisanzo, ganizilani za wacilumbwana wamene okaikila ngati Yehova osamala cendi za yove. Kansi mlumbwana uyu ofunika kunkhala tyala osasakila yankho ya konsho iyi? Yai. Ofunika ‘kufufuza zinthu zonse nosimikizhyila zamene ni zabwino,’ mwa kuŵelenga Baibo kuti aziŵe maganizo a Yehova pa nkhani yamene iyo.
5. Kansi tingaziŵe tyani maganizo a Yehova pa makonsho yatingankhale nayo?
5 Ngati tuŵelenga Baibo, zunkhala monga kuti Yehova olaŵila nase. Koma kuti tiziŵe maganizo yake pa konsho iyakine, tufunika kucita khama. Pa kuŵelenga kwasu Baibo, tufunika kuika maganizo pa nkhani yamene yutikhuza. Tingafufuze nkhani iyi poseŵenzesha zida zayupeleka gulu yasu. (Miy. 2:3-6) Tingapemphele kwa Yehova kuti atisogolele patufufuza notiyavya kuziŵa maganizo yake pa konsho yatili nayo. Pavuli pake, tingaone mfundo za m’Baibo koma soti nkhani ziyakine zamene zulingana na mwazilili zinthu mu umoyo wasu. Tingapindule soti mwa kuphunzila visanzo va m’Baibo va ŵanthu ekumanapo na mavuto monga ni yatukumana nayo.
6. Kansi misonkhano ingatiyavye tyani kupeza mayankho pa makonsho yatingankhale nayo?
6 Ngati tuphunzila Baibo pa misonkhano, zunkhala soti monga kuti Yehova olaŵila nase. Tetyo ngati tupezeka pa misonkhano nthawi zonse, tingamvwe mfundo iyakine mu nkhani olo m’ndemanga yaangapeleke mkwasu olo kalongosi m’gulu, yamene ingankhale yankho ya konsho yatili nayo. (Miy. 27:17) Lomba, tiyeni tilaŵizhyane mwatingagonjesele maganizo ozikaikila.
NGATI MUKAIKILA KUTI YEHOVA OSAMALA ZA MWEO
7. Kansi ayakine angazikonshe konsho yotyani?
7 Kansi mwezikonshako kale kuti, ‘Kansi Yehova oniona cendi?’ Ngati muona kuti nimwe osafunika, payakine mungaone kuti n’zosakwanishika kunkhala pa ushamwali na Nyamalenga wacilengedwe conse. Naye Mfumu Davide enkhalako na maganizo oteti. Yove elaŵila kuti: “Mweo Yehova, munthu ni ŵani kuti mukomuganizila, kansi mwana wa munthu ni ŵani kuti mukomuŵelengela?” (Sal. 144:3) Kansi ni kuni kwamungapeze yankho ya konsho iyi?
8. Molingana na 1 Samueli 16:6, 7, 10-12, kansi Yehova oona cinji muli ŵanthu?
8 Kufumila m’Baibo, tuphunzila kuti Yehova oona onse amene ooneka kuti ni osafunika kuli ayakine. Mwacisanzo, Yehova etuma Samueli ku ng’anda kwa Jese kuti akazoze m’mozi mwa ŵana ŵake analume monga mfumu ya msogolo ya Isiraeli. Jese eita ŵana ŵake 7 kuti aonane na Samueli kucoselako Davide wamene enze mtontho ngako. b Olo n’tetyo, Yehova esankha Davide. (Ŵelengani 1 Samueli 16:6, 7, 10-12.) Yehova eona mu mtima mwa Davide ndipo eona kuti mlumbwana uyu enzomukonda ngako.
9. Ndaŵa yanji mungankhale osimikizhya kuti Yehova osamala za mweo? (Onani soti cithunzithunzi.)
9 Mukoganizila mwamene Yehova waoneshela kale kuti okuonani. Yove okupasani malangizo abwino ngako amene angakuyavyeni kulingana na mwazilili zinthu mu umoyo wanu. (Sal. 32:8) Waonesha kuti okuziŵani bwino. (Sal. 139:1) Ngati museŵenzesha malangizo a Yehova noona mwayokuyavyilani, munkhale osimikizhya kuti osamala za mweo. (1 Mbi. 28:9; Mac. 17:26, 27) Yehova oona zonse zamucita kuti mukomutumikila nomumvwila. Oona soti minkhalidwe yanu iweme ndipo ofuna kunkhala shamwali wanu. (Yer. 17:10) Kuyangizhyila apo, yove angasangalale ngako ngati namwe mungafune kunkhala shamwali wake.—1 Yoh. 4:19.
“Mukasakilasakila [Yehova], alole kuti mum’peze.”—1 Mbi. 28:9 (Onani ndime 9) c
ZAMUNGACITE NGATI MUONA KUTI COSANKHA CEMWEPANGA COTUMIKILA YEHOVA NI COLAKWIKA
10. Tikaganizila zosankha zetepanga kuvuli, kansi tingazikonshe makonsho otyani?
10 Ayakine angaganize kuti zosankha zecipanga kuvuli zenze lini zoyenela. Payakine esiya nchito ya malipilo abwino olo esankha kusayamba bizinesi na colinga cakuti atumikile Yehova mokwanila. Koma izi zecitika vyaka vinyinji kuvuli. Tetyo, payakine ove angoganizila za ŵanthu ayakine amene epanga zosankha zosiyana na zecipanga ove. Ndipo cuoneka monga kuti ŵanthu aŵa opeza ndalama zinyinji na kuti ali na umoyo wabwino. Cifukwa ca izi, ove angazikonshe kuti: ‘Kansi zosankha zenepanga kuti nitumikile Yehova zenze zoyenela? Olo kansi zenipangisha kuti nitaye mwai wopeza ndalama zinyinji?’
11. Kansi ni maganizo olakwika otyani yeenze nayo wolemba Salimo 73?
11 Ngati namwe muvutika na makonsho oteti, ganizilani za wolemba Salimo 73. Yove eona ŵanthu amene enzotumikila lini Yehova kuti enze athanzi, acuma koma soti enzooneka kuti aliye mavuto alionse. (Sal. 73:3-5, 12) Izi zemupangisha kuona kuti zoyesayesa zake potumikila Yehova zenzeve phindu. Yove “enzovutika siku yonse” cifukwa ca maganizo yake yolakwika. (Sal. 73:13, 14) Kansi n’cinji cemuyavya kugonjesa maganizo aya?
12. Molingana na Salimo 73:16-18, kansi wamasalimo egonjesa tyani maganizo yolakwika yeenze nayo?
12 Ŵelengani Salimo 73:16-18. Wamasalimo eluta m’malo opatulika aulemelelo wa Yehova. Kunkhala m’malo aŵa, pamene ni pakati pa atumiki a Yehova, kwemuyavya kuti acinje kaganizidwe kake. Tetyo, emvwisha kuti olo kuti ayakine zinthu zenzoŵayendela bwino pa umoyo, enzeve ciyembekezo ca msogolo. Izi zemuyavya kunkhala na mtendele wa m’maganizo poziŵa kuti cosankha cecipanga coika Yehova pasogolo mu umoyo wake, cenze cabwino ngako. Tetyo, enze wofunishisha kupitilizhya kutumikila Yehova.—Sal. 73:23-28.
13. Kansi mungacitenji ngati muona kuti zosankha zemwepanga kuvuli zenze zolakwika? (Onani soti cithunzithunzi.)
13 Monga ni mwecicitila wamasalimo, namwe mungakwanishe kulimbana na maganizo ozikaikila. Motyani? Mukokumbukila zinthu zabwino zamuli nazo kuyangizhyilapo madaliso a Yehova. Ndipo mukokumbukila kuti ŵanthu amene otumikila lini Yehova olandila lini thandizo yake. Tetyo kuli ŵanthu anyinji amene otumikila lini Yehova, kunkhala na umoyo wabwino pali lomba niye cinthu cofunika ngako kwa ove cifukwa aliye ciyembekezo ca msogolo. Koma mweo, muli lini tyala na mphaso zofumila kwa Yehova pali lomba, koma yove wakulonjezani kuti akakupaseni soti vinthu vinyinji msogolo. (Sal. 145:16) Kuyangizhyila apo, ganizilani izi. Mungankhale lini osimikizhya kuti umoyo wanu sembe wenze monga ni mwaulili pali lomba kuti muliyopange zosankha zosiyanako. Koma pali cinthu cimozi camungankhale osimikizhya: Ngati mupanga cosankha cifukwa ca cikondi canu pa Mulungu na ŵanthu ayakine, nthawi zonse mukonkhala na zinthu zati zikokucitishani kunkhala osangalala.
Mukololesha pa madaliso yawakulonjezani Yehova msogolo (Onani ndime 13) d
ZAMUNGACITE NGATI MUKAIKILA KUTI NIMWE OFUNIKA KWA YEHOVA
14. Kansi ayakine mwa atumiki a Mulungu okumana na mavuto otyani, ndipo izi zuŵapangisha kuzikonsha konsho yotyani?
14 Ayakine mwa atumiki a Yehova okumana na mavuto ya ukulukazi, mavuto ya thanzi olo kulemala. Izi zingaŵapangishe kuziona kuti ni osafunika kwa Yehova. Ndipo angazikonshe kuti, ‘Kansi nikali ofunika kwa Yehova?’
15. Kansi wolemba Salimo 71 enze wosimikizhya za cinji?
15 Wolemba Salimo 71 naye emvwapo teti. Yove epemphela kuti: “Musanisiye pa nthawi pazasila mphamvu zangu.” (Sal. 71:9, 18) Olo n’tetyo, wamasalimo epitilizhya kunkhala wosimikizhya kuti ngati angatumikile Yehova mokhulupilika, amusogolele nomucilikiza. Wamasalimo ephunzila kuti Yehova osangalala na ŵala amene ocita zilizonse zaangakwanishe kuti amutumikile, mosasamala kanthu za zinthu zamene angakwanishe lini kucita.—Sal. 37:23-25.
16. Kansi akulukazi ofunika kuziona tyani? (Salimo 92:12-15)
16 Akulukazi, mukoziona monga ni mwakukuonelani Yehova. Yove angakuyavyeni kuti mupitilizhye kumutumikila mokhulupilika, mosasamala kanthu za zinthu zamene mungakwanishe lini kucita. (Ŵelengani Salimo 92:12-15.) M’malo moika maganizo pa zinthu zamene mungakwanishe lini kucita, mukoika ngako maganizo pa zinthu zamukwanisha kucita. Mwacisanzo, mungatang’ishe ayakine mwa cisanzo canu cabwino conkhala okhulupilika na kuŵaonesha kwanu cidwi. Kuyangizhyila apo, mungauzhyeko ayakine mwawakucilikizilani Yehova kwa vyaka vinyinji koma soti za malonjezo yamuyembekezela mwacidwi kuyoona yokwanilishiwa msogolo. Osati mukoluŵa kuti mapemphelo yamupelekela ayakine ni yoyavya. (1 Pet. 3:12) Mosasamala kanthu na mwazilili zinthu mu umoyo wasu, tonse tili na cinthu catingacitileko Yehova koma soti ŵanthu ayakine.
17. Ndaŵa yanji tufunika kupewa kuzilinganizhya na ayakine?
17 Ngati mukhumudwa cifukwa cakuti mucita lini zinyinji potumikila Yehova, mukonkhala osimikizhya kuti yove oyamikila ngako zamukwanisha kucita. Payakine mungozilinganizhya na zakukwanisha kucita ayakine. Koma mukopewa kuzilinganizhya na ayakine. Ndaŵa yanji? N’cifukwa cakuti Yehova otilinganizhya lini na ayakine. (Aga. 6:4) Mwacisanzo, Mariya epasa Yesu mafuta onunkhila yamene yenze mphaso yodula ngako. (Yoh. 12:3-5) Mosiyana na izi, munakazi wamasiye epeleka tumakoini tuŵili tocepa mphamvu m’kacisi. (Luka 21:1-4) Olo n’tetyo, Yesu eona mphaso zonse monga cizindikilo coonesha cikhulupililo. Ausuwasu Yehova, oyamikila ngako zonse zatumucitila mosonkhezelewa na kuzipeleka na cikondi casu pa yove olo kuti zingaoneke zitontho kwa seo.
18. Kansi n’cinji cingakuyavyeni kugonjesa maganizo ozikaikila? (Onani soti kabokosi kakuti “ Mau a Yehova Angakuyavyeni Kugonjesa Maganizo Ozikaikila.”)
18 Tonse tukaikila zinthu ziyakine nthawi ziyakine. Monga ni mwataphunzilila, Baibo ingatiyavye kulimbana na zinthu izi. Tetyo, mukocita zilizonse zamungakwanishe kuti mupeze mayankho pa makonsho yamungankhale nayo. Mosakaikila, Yehova okuziŵani bwino mweo pa mweka. Yove oyamikila zosankha zonse zamupanga kuti mukomuika pasogolo mu umoyo wanu. Ndipo apitilizhye kusunga lonjezo yakuti akakudaliseni. Tetyo, nkhalani osimikizhya kuti Yehova okukondani ndipo osamala za mtumiki wake aliyense wokhulupilika.
NYIMBO 111 Tili na Vifukwa Vinyinji Vonkhalila Acimwemwe
a TANTHAUZO YA MAU AYAKINE: M’nkhani ino, tulaŵizhyana kuzikaikila kwamene kungacitishe munthu kuona kuti ni wosafunika kwa Yehova, koma soti kwamene kungamucitishe kuona kuti zosankha zecipanga kuvuli ni zolakwika. Kukaikila uku ni kula lini kufotokozewa m’Baibo, kwamene kupeleka umboni wakuti munthu aliye cikhulupililo mwa Yehova na malonjezo ŵake.
b Olo kuti Baibo yufotokoza lini mwacindunji vyaka veenze navo Davide pecimusankha Yehova, catuziŵa n’cakuti enze wacilumbwana.—Onani Nsanja ya Olonda ya m’Chichewa ya September 1, 2011, peji 29, ndime 2.
c MAU OFOTOKOZA CITHUNZITHUNZI Pa peji 26: Wacilumbwana wamene ni wa Mboni osakilasakila Yehova mwa kuŵelenga Malemba kuti apeze malangizo.
d MAU OFOTOKOZA CITHUNZITHUNZI: Mkwasu oseŵenza nchito yamene ingamuyavye kucilikiza banja yake ndipo pa nthawi imozimozi, oganizila pa mwati ukankhalile umoyo m’paladaiso.
