NKHANI YOPHUNZILA 42
NYIMBO 103 Aciŵeta ni Mphaso mwa Analume
Mukoonesha Kuti Muyamikila Mphaso ‘Mwa Analume’
“Pecikwela pa malo apalulu . . . , epeleka analume kuti ankhale mphaso.”—AEF. 4:8.
ZATI TIPHUNZILE
M’nkhani ino, tione mwamene atumiki oyavya, akulu na oyanganila a madela otiyavyila koma soti mwatingaoneshele kuti tuyamikila zakucita analume aŵa okhulupilika.
1. Kansi ni mphaso ziyakine zotyani zawatipasa Yesu?
PALIYE munthu wamene ni wawanzi kupambana Yesu. Peenze pacalo, kanyinji-kanyinji enzoyavya ŵanthu mwa kucita zozizwisa. (Luka 9:12-17) Koma mphaso ikulu yecipasa ŵanthu onse ni kupeleka moyo wake. (Yoh. 15:13) Kufumila pa nthawi yeciukishiwa, Yesu wapitilizhya kunkhala wawanzi. Monga ni mwecilonjezela, yove ocondelela Yehova kuti atipase mzimu utuŵa kuti ukotiphunzisa notitonthoza. (Yoh. 14:16, 17, ftn.; 16:13) Ndipo kupitila m’misonkhano ya mpingo, Yesu opitilizhya kutiphunzisa kuti tipange ophunzila pacalo conse.—Mat. 28:18-20.
2. Kansi ni ŵani oitiwa kuti ‘mphaso’ ofotokozewa pa Aefeso 4:7, 8?
2 Ganizilani mphaso iyakine yawatipasa Yesu. Mtumwi Paulo elemba kuti pavuli pakuti Yesu waluta kululu, “epeleka analume kuti ankhale mphaso.” (Ŵelengani Aefeso 4:7, 8.) Mtumwi Paulo efotokoza kuti Yesu epeleka mphaso izi na colinga cakuti acilikize mpingo m’njila zosiyanasiyana. (Aef. 1:22, 23; 4:11-13) Masiku ŵano, mphaso izi zuyangizhyilapo atumiki oyavya, akulu mumpingo koma soti oyanganila a madela. a N’cendi kuti analume aŵa aliye ungwilo. Tetyo olakwisa zinthu. (Yak. 3:2) Koma Asikulu ŵasu Yesu Khristu oŵaseŵenzesha kuti atiyavye cifukwa ni mphaso yawatipasa yove.
3. Fotokozani mwamene tonse tingacilikizile nchito yakucita analume amene ni mphaso.
3 Yesu wapasa analume aŵa nchito yapadela yamene ni kutang’isha mpingo. (Aef. 4:12) Koma tonse tingaŵayavye kucita nchito iyi yamene ni yofunika ngako. Ganizilani izi: Ayakine a seo, tutolamo mbali mwacindunji mu nchito yomanga Mang’anda ya Ufumu. Ayakine ocilikiza nchito iyi mwa kupeleka vakulya, mayendedwe koma soti zinthu ziyakine zocilikiza nchito iyi. Molingana na izi, seo tonse tingacilikize zoyesayesa za atumiki oyavya, akulu koma soti oyanganila a madela mwa zolaŵila na zocita zasu. Ganizilani mwatupindulila cifukwa ca khama yao koma soti mwatingaoneshele kuti tuŵayamikila pamozi na Yesu, wamene watipasa analume aŵa monga mphaso.
ATUMIKI OYAVYA OCITA “UTUMIKI WOYAVYA ŴANTHU”
4. Kansi ni m’njila ziyakine zotyani mwamene atumiki oyavya enzoyavyila ayakine m’vyaka 100 voyambilila?
4 M’vyaka 100 voyambilila, akwasu ayakine enzotumikila monga atumiki oyavya. (1 Tim. 3:8) Cuoneka kuti ove niye enzocita “utumiki woyavya ŵanthu,” wecifotokoza Paulo pa 1 Akorinto 12:28. Tetyo, cuoneka kuti atumiki oyavya enzocita nchito zinyinji zofunika ngako na colinga cakuti akulu akoika maganizo ŵao pa kuphunzisa nocita maulwendo aubusa. Mwacisanzo, payakine atumiki oyavya enzoyavya pa nchito yopanga makope ya Malemba olo payakine enzogula vinthu vofunikila popanga makope aŵa.
5. Kansi ni nchito ziyakine zotyani zakucita atumiki oyavya masiku ŵano?
5 Ganizilani nchito ziyakine zakucita atumiki oyavya mumpingo mwanu. (1 Pet. 4:10) Payakine angapasiwe nchito yoyanganila za maakaunti, magao, kuoda mabuku olo kuseŵenzela ku saundi. Angapasiwe soti nchito yakuti atumikile monga akalinde olo kuyavya pa nchito yokonza soti Ng’anda ya Ufumu. Zonse izi, n’zofunika kuti mpingo uyende bwino. (1 Akor. 14:40) Kuyangizhyila apo, atumiki oyavya ayakine osamalila mbali pa misonkhano ya Umoyo na Utumiki nokamba nkhani za onse. Mtumiki woyavya angaikiwe soti kuti akoyavya woyanganila kagulu. Ndipo nthawi ziyakine, mkulu angasenge mtumiki woyavya kuti alute naye kuyocita maulwendo aubusa.
6. Kansi ni vifukwa viyakine votyani vatuyamikilila atumiki oyavya amene oseŵenza mwakhama?
6 Kansi nchito ya atumiki oyavya yupindulisha tyani mpingo? Kalongosi muyakine wa zina yakuti Beberly b wa ku Bolivia elaŵila kuti, “Nuyamikila ngako atumiki oyavya. Nusangalala na misonkhano. Cifukwa ca nchito yao, nukwanisha kuimba, kupeleka ndemanga, kumvwishila ku nkhani nophunzila kufumila mu mavidyo na vithunzithunzi.” Ove oyavya mwa kuoneshesha kuti ŵala amene apezeka pa misonkhano ni otetezeka. Ndipo oyavya soti ŵala amene aliyopezeke pa misonkhano kuonelela pulogilamu ali ku ng’anda. Pavuli pa misonkhano, onkhala pasogolo kutolamo mbali mu nchito yokilina, kuyavya pa nchito ya maakaunti nooneshesha kuti tili na mabuku yatufunikila. Kalongosi Leslie, wa ku Colombia wamene mulume wake otumikila monga mkulu, elaŵila kuti: “Nuyamikila ngako atumiki oyavya. Alume ŵangu odalila ove kuti akwanishe kucita nchito zosiyanasiyana. Kuti ove kuliye, sembe alume ŵangu onkhala otangwanika ngako. Tetyo, nuyamikila ngako khama yao koma soti kufunishisha kwao kutumikila ayakine.” Mosakaikila, namwe mukumvwa tetyo.—1 Tim. 3:13.
7. Kansi tingaoneshe tyani kuti tuyamikila atumiki oyavya? (Onani soti cithunzithunzi.)
7 Olo kuti tingamvwe kuti tuyamikila atumiki oyavya, Baibo yutilimbikisha: “Kuonesha kuti nise oyamikila.” (Akol. 3:15) Ponena za mwaakuyamikilila, mkulu muyakine wa zina yakuti Krzysztof wamene onkhala ku Finland elaŵila kuti: “Nutumizhya khadi olo meseji ndipo nulembamo zinthu zecicita mtumiki woyavya olo kulaŵila zamene zenilimbikisha, olo cifukwa cake nuyamikila utumiki wakucita.” Pascal na Jael amene onkhala ku New Caledonia, elaŵila kuti: “Kanyinji-kanyinji, tukonda kupemphelela atumiki oyavya.” Pascal efotokoza kuti, “calombapano tankhala tupemphelela atumiki oyavya, kuyamikila Yehova cifukwa cotipasa atumiki oyavya oteti nomusenga kuti akoŵayavya.” Yehova akumvwa mapemphelo oteti ndipo cifukwa ca izi, mpingo wonse upindula.—2 Akor. 1:11.
AKULU “OKATA NCHITO MWAKHAMA PAKATI PANU”
8. Ndaŵa yanji Paulo elaŵila kuti akulu ayake “enzoseŵenza mwakhama”? (1 Atesalonika 5:12, 13)
8 Akulu a m’vyaka 100 voyambilila enzokata nchito mwakhama mumpingo. (Ŵelengani 1 Atesalonika 5:12, 13; 1 Tim. 5:17) Ove ‘enzosogolela’ mpingo mwa kucitisha misonkhano nopanga zosankha monga bungwe ya akulu. ‘Enzolangiza’ akwasu na azilongosi mwacikondi, koma mosapita m’mbali kuti ateteze mpingo. (1 Ates. 2:11, 12; 2 Tim. 4:2) Olo n’tetyo, analume aŵa enzoseŵenza mwakhama kuti asamalile mabanja ŵao koma soti kuti apitilizhye kutang’isha cikhulupililo na ushamwali wao na Yehova.—1 Tim. 3:2, 4; Tito 1:6-9.
9. Kansi ni maudindo ayakine otyani yaali nayo akulu masiku ŵano?
9 Masiku ŵano, akulu onkhala otangwanika. Ove ni alaliki. (2 Tim. 4:5) Ndipo mwacangu, osogolela pa nchito yolalikila. Opanga makonzedwe yolalikila m’gao, otiphunzisa kuti tikolalikila nophunzisa mwaluso. Otumikila soti monga oweluza acifundo koma soti aliye sankho. Mwacisanzo, ngati Mkhristu wacita cimo ikulu, ove oyesayesa kumuyavya kuti akonze soti ushamwali wake na Yehova. Pa nthawi imozimozi, onkhala osamala kuti mpingo upitilizhye kunkhala utuŵa. (1 Akor. 5:12, 13; Aga. 6:1) Kupambana zonse, ove ni abusa. (1 Pet. 5:1-3) Okamba nkhani zokonzewa bwino, oyesayesa kuziŵana na aliyense mumpingo ndipo ocita maulwendo aubusa. Akulu ayakine omanga nokonza soti Mang’anda ya Ufumu nopanga makonzedwe ya msonkhano wacigao. Ayakine oseŵenza m’Komiti Yolaŵizhyana na Azacipatala olo m’Tumagulu Toyendela Olwala. Kulaŵila cendi, akulu oseŵenza mwakhama kuti atiyavye.
10. Ndaŵa yanji tuyamikila akulu amene oseŵenza mwakhama?
10 Yehova elosela kuti abusa akatisamalile bwino cakuti ‘tikayope lini soti kanthu olo kucita wowa.’ (Yer. 23:4) Kalongosi Johanna wa ku Finland, eona umboni wa mau aŵa amai ŵake pecilwala ngako. Yove elaŵila kuti: “Nuciona kunkhala covuta kuuzhya ayakine mwanumvwila. Koma mkulu muyakine wamene nenzomuziŵa lini bwino enilezela mtima, kupemphela nane pamozi ndipo enisimikizhyila kuti Yehova onikonda. Nukumbukila lini mau yecilaŵila. Koma canukumbukila n’cakuti nezimvwa kunkhala wotetezeka. Nukhulupilila kuti Yehova niye emutuma pa nthawi yamene ila kuti azeniyavye.” Kansi akulu a mumpingo mwanu okuyavyani tyani?
11. Kansi tingaoneshe tyani kuti tuyamikila akulu? (Onani soti cithunzithunzi.)
11 Yehova ofuna kuti tikoonesha mofumila pansi pa mtima kuti tuyamikila akulu “cifukwa ca nchito yao.” (1 Ates. 5:12, 13) Henrietta wamene onkhala ku Finland, elaŵila kuti: “Akulu oyavya ayakine mofunishisha. Koma izi zutanthauza lini kuti ove ali na nthawi ikulu kupambana ayakine na kuti aliye mavuto mu umoyo wao. Nthawi ziyakine, nukonda kuŵauzhya kuti, ‘Nimwe mkulu wabwino ngako. Nufuna tyala kuti muziŵe.’” Kalongosi muyakine wa zina yakuti Sera wamene onkhala ku Türkiye, c elaŵila kuti: “Akulu ofunikila cilimbikiso kuti apitilizhye kucita nchito yao. Tetyo tingaŵalembele khadi, kuŵaitila ku cakulya, olo kuseŵenzela nao pamozi mu utumiki.” Kansi paliko mkulu wamufuna kuyamikila cifukwa ca zoyesayesa zake? Ngati alipo, mungasakile njila zamungamuoneshelemo kuti mumuyamikila.—1 Akor. 16:18.
Pali zamungacite kuti muyavye akulu kupitilizhya kucita nchito yao (Onani ndime 7, 11, 15)
OYANGANILA A MADELA OTANG’ISHA MIPINGO
12. Kansi ni makonzedwe yotyani yamene yetang’isha mpingo m’vyaka 100 voyambilila? (1 Atesalonika 2:7, 8)
12 Yesu wapasa soti analume ayakine utumiki uyakine kuti ayavye mpingo m’njila iyakine. Kupitila mu cisogozo cake, akulu mu Yerusalemu etuma Paulo, Baranaba na ayakine kuti akatumikile monga oyanganila a madela. (Mac. 11:22) Ndaŵa yanji? N’cifukwa cakuti enzofuna kutang’isha mipingo monga ni mweenzocitila atumiki oyavya na akulu. (Mac. 15:40, 41) Analume aŵa ezitana zinthu zinyinji kuti acite utumiki uyu. Nthawi ziyakine, ove enzoika moyo wao pangozi na colinga cakuti aphunzise nolimbikisha ayakine.—Ŵelengani 1 Atesalonika 2:7, 8.
13. Kansi oyanganila a madela ali na maudindo otyani?
13 Oyanganila a madela, oyendayenda ngako. Ayakine oyenda makilomita mahandiledi kufuma pa mpingo umozi kuluta pa uyakine. Wiki iliyonse, okamba nkhani zinyinji, ocita maulwendo aubusa, kucitisha miting’i ya apainiya, akulu na atumiki oyavya koma soti misonkhano yokonzekela utumiki. Ove okonza nkhani nopanga makonzedwe ya misonkhano yadela na yacigao. Ophunzisa pa masukulu ya apainiya nopanga makonzedwe yocita miting’i yapadela na apainiya m’dela yao. Kuyangizhyila apo, ocita nchito zofunika ngako ndipo nchito izi zuyangizhyilapo nchito zosayembekezeleka zaangapasiwe na ofesi ya msambo.
14. Kansi ni vifukwa viyakine votyani vatuyamikilila oyanganila a madela amene oseŵenza mwakhama?
14 Kansi mipingo yupindula tyani na nchito zakucita oyanganila a madela? Pofotokoza za maulwendo ya oyanganila a madela, mkwasu wa ku Türkiye elaŵila kuti: “Ulionse mwa ulwendo wao, unilimbikisha kuti nikoseŵenzesha nthawi yangu ikulu kulimbikisha akwasu na azilongosi. Naonanapo na oyanganila a madela anyinji, koma paliye nangu m’mozi mwa ove wamene enionesha kuti ni wotangwanika ngako kapena kuti ofuna lini kulaŵizhyana nane.” Kalongosi Johanna wafotokozewa koyambilila, enze eluta kuyolalikila na woyanganila dela koma epeza kuti pa ng’anda paliye ŵanthu. Olo n’tetyo, yove elaŵila kuti: “Nikailuŵe lini siku iyi. Pa nthawi iyi, n’kuti azilongosi ŵangu eluta ku malo akutali ndipo nenzoŵayewa ngako. Woyanganila dela uyu enilimbikisha ngako ndipo eniyavya kuona kuti pali lomba, tingankhale kutali na abanja ŵasu olo ashamwali ŵasu. Koma m’calo calomba, tikankhale na mipata inyinji yotandalila pamozi.” Anyinji a seo tuyamikila ngako oyanganila a madela tikaona mwecitiyavyila.—Mac. 20:37–21:1.
15. (a) Molingana na 3 Yohane 5-8, kansi tingaoneshe tyani kuti tuyamikila oyanganila a madela? (Onani soti cithunzithunzi.) (b) Ndaŵa yanji tufunika kuonesha kuti tuyamikila azinakazi ŵa analume amene oseŵenza mwakhama mumpingo, ndipo kansi tingacite tyani izi? (Onani kabokosi kakuti “ Mukokumbukila Azinakazi ŵa Akwasu Amene Oseŵenza Mwakhama Mumpingo.”)
15 Mtumwi Yohane elimbikisha Gayo kuonesha wanzi kuli akwasu amene enzowela kuzotang’isha mpingo. Emuuzhya kuti ‘akoyesayesa kuŵayavya m’njila yamene Mulungu angasangalale nayo.’ (Ŵelengani 3 Yohane 5-8.) Njila imozi yatucitilamo izi, ni mwa kuitila woyanganila dela ku cakulya. Njila iyakine ni mwa kupezeka pa msonkhano wokonzekela utumiki ngati ocezesa mpingo wasu. Pofuna kuonesha kuyamikila kwake, kalongosi Leslie watomolewa koyambilila elaŵila kuti: “Nupemphela kwa Yehova kuti akoŵapasa zofunikila. Neo na alume ŵangu, tuŵalembela kalata yoŵauzhya kuti otilimbikisha ngako akawela pa mpingo wasu.” Mukokumbukila kuti oyanganila a madela okumana na zovuta ndipo oŵeŵa monga ni mwatuŵeŵela seo. Nthawi ziyakine okumana na mavuto monga kulwala, nkhaŵa ndipo ofooka. Payakine mau ŵanu acifundo na kamphaso katontho zingankhale yankho ya pemphelo yao yosenga thandizo.—Miy. 12:25.
TUFUNIKILA “ANALUME KUTI ANKHALE MPHASO”
16. Molingana na Miyambo 3:27, kansi ni makonsho yotyani yaangazikonshe akwasu?
16 Pacalo conse, tufunikila akwasu anyinji kuti atumikile monga ‘mphaso.’ Ngati nimwe mkwasu wobatizika, kansi “mungakwanishe kuyavyako mwa njila iyi”? (Ŵelengani Miyambo 3:27.) Kansi nimwe ofunishisha kuseŵenzela pa colinga cakuti muyenelele kunkhala mtumiki woyavya? Ngati nimwe kale mtumiki woyavya, kansi nimwe ofunishisha kutumikila ayakine monga mkulu? d Kansi nimwe okonzeka kucinja zinthu pa umoyo wanu kuti mukonshele Sukulu ya Alengezi a Ufumu? Sukulu iyi ingakuphunziseni nokuyavyani kuti museŵenzeshewe mokwanila na Yesu. Ngati muona kuti nimwe wosayenelela, pemphelani kwa Yehova. Musengeni kuti akupaseni mzimu wake wamene ungakuyavyeni kukwanilisha utumiki ulionse wamungapasiwe.—Luka 11:13; Mac. 20:28.
17. Kansi “analume amene ni mphaso” oonesha cinji zokhuza Mfumu yasu, Yesu Khristu?
17 Akwasu amene Yesu waŵasankha kunkhala mphaso, ni umboni wakuti yove otisogolela m’masiku ŵano osilizhya. (Mat. 28:20) Kansi muyamikila lini Mfumu yasu yamene ni yacikondi, yawanzi koma soti yamene yupeleka analume oyenelela kuti asamalile zosoŵa zasu? Nkhalani osimikizhya kusakila mipata yooneshelamo kuti muyamikila akwasu aŵa amene oseŵenza mwakhama. Ndipo osati mukoluŵa kuyamikila Yehova wamene otipasa mphaso “iliyonse yabwino koma soti yangwilo.”—Yak. 1:17.
NYIMBO 99 Gulu ya Akwasu
a Akulu amene otumikila m’Bungwe Yolamulila, oyavya a m’Bungwe Yolamulila, a m’Komiti ya Msambo na ŵala onse amene ocita mautumiki osiyanasiyana m’gulu ya Yehova, nao ni mphaso.
b Mazina ayakine acinjiwa.
c Calo camene lomba cuziŵika kuti Turkey.
d Kuti muziŵe zinyinji zokhuza zamungacite kuti muyenelele kutumikila monga mtumiki woyavya olo mkulu, Onani nkhani yakuti “Akwasu—Kansi Muyesayesa Kuti Muyenelele Kutumikila Monga Mtumiki Woyavya?” na yakuti “Akwasu—Kansi Muyesayesa Kuti Muyenelele Kutumikila Monga Mkulu?” mu Nsanja ya Mulonda ya November 2024.
