1-2. Kansi Mlaliki 11:6 yukatizhyana tyani na nchito yolalikila?

M’VYALO viyakine ŵanthu ocita cidwi kumvwishila ku uthenga uweme. Koma m’vyalo viyakine ŵanthu aliye ngako cidwi pa nkhani zokhuza Mulungu koma soti Baibo. Nanga tyani kwamunkhala? Mulimonse mwazilili, Yehova ofuna kuti tipitilizhye kulalikila mpaka pati akalaŵile kuti lekani.

² Yehova oziŵa nthawi pati ikasile nchito yolalikila ndipo pavuli pake “masilizhyilo akafwike.” (Mat. 24:14, 36) Nthawi iyi ikaliyofwika, kansi tingaoneshe tyani kuti tumvwila mau akuti “kwanja yako isapumule”? *​—Ŵelengani Mlaliki 11:6.

3. Kansi tilaŵizhyane cinji m’nkhani ino?

³ Nkhani yapita yefotokoza vinthu 4 vatufunika kucita kuti tinkhale “okasha ŵanthu” aluso. (Mat. 4:19) Nkhani ino ifotokoze njila zitatu zingatiyavye kupitilizhya kulalikila olo kuti tikumane na mavuto otyani. Tiphunzile kufunika (1) koika nchito yolalikila pasogolo mu umoyo wasu, (2) konkhala oleza mtima, koma soti (3) konkhala na cikhulupililo cotang’a.

4. Ndaŵa yanji tufunika kuika maganizo ŵasu pa nchito yawatipasa Yehova?

⁴ Yesu eloselelatu vinthu vucitika masiku ŵano osilizhya. Vinthu vamene ivi vingapangishe ophunzila ŵake kuleka kuika nchito yolalikila pasogolo. Niye cifukwa cake eŵalimbikisha “kunkhala menso.” (Mat. 24:42) M’nthawi ya  Nowa, kwenze vinthu vinyinji vamene vekangisha ŵanthu kumvwila cenjezo. Olo masiku ŵano vinthu vamene ivi vingatisokoneze. (Mat. 24:37-39; 2 Pet. 2:5) Tetyo, tufunika kuika maganizo ŵasu pa nchito yawatipasa Yehova.

5. Kansi Machitidwe 1:6-8 yufotokoza kuti nchito yolalikila ikacitike pa m’lingo ukulu tyani?

⁵ Masiku ŵano, tufunika kuika maganizo ŵasu pa nchito yolalikila uthenga wa Ufumu. Yesu elosela kuti nchito yolalikila ikapitilizhye kucitika olo pavuli pa imfwa yake. (Yoh. 14:12) Pavuli pakuti Yesu wafwa, ayakine mwa ophunzila ŵake ewelela ku nchito yao yokansha nsomba. Pavuli pakuti Yesu waukishiwa, ecita cozizwisa camene cecitisha ophunzila ŵake kukata nsomba zinyinji. Eseŵenzesha cocitika ici poŵasimikizhyila kuti nchito yokasha ŵanthu yenze yofunika ngako. (Yoh. 21:15-17) Yesu akaliyoluta kululu, euzhya ophunzila ŵake kuti nchito yolalikila yeciyambisha ikalalikiliwe mpaka ku madela ayakine. (Ŵelengani Machitidwe 1:6-8.) Vyaka vinyinji pavuli pake, Yesu eonesha mtumwi Yohane mensomphenya okhuza zati zikacitike mu “siku ya Asikulu.” * Cimozi mwa vinthu vosangalasa veciona Yohane enze mngelo. Yove “enze na uthenga uweme wosasila wakuti aulengeze ku fuko iliyonse, cilaŵilo ciliconse na mtundu uliwonse.” (Chiv 1:10; 14:6) N’zoonekelatu kuti Yehova ofuna kuti tikokata nchito yolalikila mpaka akalaŵile kuti lekani.

6. N’cinji cingatiyavye kuika maganizo yasu pa nchito yolalikila?

⁶ Tingapitilizhye kuika maganizo ŵasu pa nchito yolalikila ngati tuganizila zinthu zonse zakuticitila Yehova. Mwacisanzo, otipasa cakulya cauzimu ca mwana alilenji monga zofalisa zopulintiwa, za pa intaneti, zomvwishila tyala, mavidyo na  pulogilamu ya broadcasting. Ganizilani izi: Pa webusaiti yasu pali zofalisa mu vilaŵilo vopitilila 1,000. (Mat. 24:45-47) Ŵanthu m’calo cino ni oyaŵanika cifukwa cosiyana maganizo pa nkhani za ndale, cipembezo na pa nkhani za cuma, koma atumiki a Yehova opitilila 8 miliyoni ni okatizhyana. Mwacisanzo, pa Cisanu pa 19 April, 2019, a Mboni za Yehova pacalo conse ekatizhyana kuonelela vidyo ya kulambila kwa m’mawa. Pasiku yamene iyo m’cingulo gulu ya ŵanthu okwanila 20,919,041 esonkhana kuti akumbukile imfwa ya Yesu. Tulimbikishiwa kupitilizhya kuika maganizo yasu pa nchito yolalikila tikaganizila mwai watilinao woona zocitika izi notolamo mbali.

7. Kansi cisanzo ca Yesu cingatiyavye tyani kuika maganizo yasu pa zinthu za Ufumu?

⁷ Njila iyakine ingatiyavye kuika maganizo yasu pa nchito yolalikila ni kukonkha cisanzo ca Yesu. Yove aliyolole ciliconse kumukangisha kulalikila. (Yoh. 18:37) Yove aliyogonje Satana pecimuuzhya kuti am’pase “maufumu onse a pacalo na ulemelelo wake.” Aliyogonje soti ŵanthu ayakine peenzofuna kum’pasa ufumu. (Mat. 4:8, 9; Yoh. 6:15) Aliyotoleke na vinthu va m’calo olo kucita wowa na ŵanthu osusha. (Luka 9:58; Yoh. 8:59) Ngati takumana na vinthu voyesa cikhulupililo casu, tingapitilizhye kuika zinthu za Ufumu pasogolo ngati tukumbukila malangizo yecitwala mtumwi Paulo. Yove elimbikisha Akhristu kukonkha cisanzo ca Yesu kuti ‘asaŵeŵe notaya mtima.’​—Aheb. 12:3.

8. Kansi kuleza mtima kutanthauzanji, ndipo ndaŵa yanji n’kofunika?

⁸ Kuleza mtima ni nkhalidwe yonkhala odekha patuyembekezela kuti vinthu viyakine vicitike. Tufunika kunkhala oleza mtima patuyembekezela kuti vinthu viipa visile olo vinthu viyakine vabwino vicitike. Mneneli Habakuku enzofunishisha kuti vinthu viipa mu Yuda visile. (Hab. 1:2) Ophunzila a Yesu enzoyembekeza kuti Ufumu wa Mulungu uwele pa “nthawi yamene iyo.” Enzoganiza tetyo cifukwa enzofuna kuti uŵapulumuse ku ulamulilo wankhanza wa Aroma. (Luka 19:11) Tufunishisha kuti Ufumu wa Mulungu ucosepo vinthu viipa noleta calo calomba mwati mukankhale ŵanthu olungama. (2 Pet. 3:13) Tetyo, tufunika kunkhala oleza mtima patuyembekezela nthawi yamene iyo. Ganizilani njila ziyakine zakutiphunzisila Yehova kuti tinkhale oleza mtima.

9. Kansi ni visanzo votyani vuonesha kuti Yehova ni woleza mtima?

⁹ Yehova ni cisanzo ciweme ngako pa nkhani yoleza mtima. Epasa Nowa nthawi ikulu kuti amange cingalawa nonkhala soti “mlaliki wacilungamo.” (2 Pet. 2:5; 1 Pet. 3:20) Yehova emvwishila Abulahamu peenzom’konsha makonsho okhuza cosankha cake cakuti aononge mizinda ya Sodomu na Gomora. (Gen. 18:20-33) Kwa vyaka mahandiledi, Yehova eonesha kuleza mtima ku mtundu wa Isiraeli wosakhulupilika. (Neh. 9:30, 31) Masiku ŵano tuona umboni wakuti Yehova ni woleza mtima tikaona nthawi yawapasa ŵanthu “kuti alape.” (2 Pet. 3:9; Yoh. 6:44; 1 Tim. 2:3, 4) Cisanzo ca Yehova cutiyavya kunkhala oleza mtima patupitilizhya kukata nchito yolalikila nophunzisa. Otiyavya soti kunkhala oleza mtima kupitila m’visanzo vopezeka m’Mau ŵake.

10. Molingana na Yakobo 5:7, 8, kansi cisanzo ca mlimi cutiphunzisanji?

 ¹⁰ Ŵelengani Yakobo 5:7, 8. Cisanzo ca mlimi cutiphunzisa kufunika konkhala oleza mtima. Kulaŵila cendi mbeu ziyakine zukula kamangu. Koma mbeu ziyakine makamaka zila zutwala votwala zutola nthawi itali kuti zipye. Nthawi yolima mu Isiraeli yenzotola miyezi 6. Mlimi okomola mbeu zake mvula yoyamba ikapona nowezhya m’cisalo. (Mko. 4:28) Tingacite bwino kutolela cisanzo ca mlimi coleza mtima. Koma kucita izi n’kovuta.

11. Kansi kuleza mtima kungatiyavye tyani pa nchito yopanga ophunzila?

¹¹ Ŵanthu aliye ungwilo ofuna kuona zofumapo za nchito yao panthawi yamene iyo. Ngati tufuna kuti mbeu zasu zicite luweme kudimba, tufunika kucita khama kutipa, kukomola, kulimilila notilila. Nchito yopanga ophunzila yufuna khama. Pofunika nthawi kuti tiyavye ophunzila Baibo kuti acose mtima wasankho na kuti ayambe kukonda ayakine. Kuleza mtima kungatiyavye kuti tisafooke ngati ŵanthu omvwishila lini uthenga wasu. Olo kuti ŵanthu omvwishila uthenga ŵasu, tufunika mphela kunkhala oleza mtima. Tingakakamizhye lini wophunzila Baibo kuti ankhale na cikhulupililo. Nthawi ziyakine ophunzila a Yesu nao enzovutika kumvwisha zenzoŵaphunzisa. (Yoh. 14:9) Tikokumbukila kuti tingakomole notilila koma okulisha ni Mulungu.​—1 Akor. 3:6.

12. Kansi tingaoneshe tyani kuleza mtima patulalikila abanja ŵasu amene ni osakhulupilila?

¹² Kuleza mtima kungankhale kovuta ngati tulalikila abanja amene ni osakhulupilila. Mfundo yopezeka pa Mlaliki 3:1, 7 ingatiyavye ngako. Ikuti: “Pali . . . nthawi yonkhala celele na nthawi yolaŵila.” Nkhalidwe yasu iweme ingayavye abanja ŵasu kumvwishila uthenga wasu. Panthawi imozimozi, tufunika kunkhala okonzeka kuŵauzhya zokhuza  Yehova. (1 Pet. 3:1, 2) Patulalikila nophunzisa, tufunika kunkhala oleza mtima ku ŵanthu onse, kuyangizhyilapo abanja ŵasu.

13-14. Ni visanzo votyani va kuleza mtima vatingatolele?

¹³ Tingaphunzile kunkhala oleza mtima kufumila ku visanzo va atumiki a Yehova okhulupilika otomolewa m’Baibo koma soti a m’masiku ŵano. Habakuku enzofunishisha kuti kuipa kusile, ndipo eonesha kuleza mtima pecilaŵila kuti: “Nipitilizhye kupanama pa malo a mulonda.” (Hab. 2:1) Naye mtumwi Paulo elaŵila kuti enzofunishisha “kusilizhya” utumiki wake. Tetyo, moleza mtima epitilizhya “kucitila umboni mokwanila uthenga uweme.”​—Mac. 20:24.

¹⁴ Ganizilani cisanzo ca banja iyakine yamene yesilizhya maphunzilo a sukulu ya Giliyadi. Banja iyi yetumiwa kuyotumikila kucalo kwamene kwenzeve Mboni zinyinji koma soti kwamene ŵanthu anyinji enze lini Akhristu. Ŵanthu anyinji enzofuna lini kuphunzila Baibo. Mosiyana na izi, ayao ŵeenze nao m’kilasi imozi ya Giliyadi, enzoŵatumizhyila malipoti okhuza zofumapo ziweme za nchito yolalikila koma soti maphunzilo opita pasogolo yeenzosogoza. Mosasamala kanthu kuti gawo yao yenze iyumu, banja iyi yepitilizhya kulalikila moleza mtima. Pavuli polalikila kwa vyaka 8 m’gawo yamene iyi, banja iyi yesangalala ngako soti peyeona kuti m’mozi mwa ophunzila wao wabatizika. Kansi tingaphunzilenji pa visanzo vakale na va masiku ŵano va atumiki a Yehova vamene ivi? Atumiki okhulupilika aŵa, epitilizhya kunkhala acangu ndipo kwanja yao iliyopumule. Tetyo, cifukwa ca kuleza mtima kwao Yehova eŵadalisa. Tiyeni tonse ‘titolele cisanzo ca ŵanthu amene mwa cikhulupililo na kuleza mtima, olondela zinthu zecilonjeza Mulungu.’​—Aheb. 6:10-12.

15. Kansi cikhulupililo cutiyavya tyani kulalikila uthenga uweme?

¹⁵ Tiyeni tilaŵizhyane mwamene cikhulupililo cutiyavyila kuti kwanja yasu isapumule. Coyamba, tukhulupilila uthenga watulalikila, tetyo nise ofunishisha kuuzhyako ayakine mwatingakwanishile. Tukhulupilila soti malonjezo opezeka m’Mau ŵake. (Sal. 119:42; Yes. 40:8) Tuona kukwanilishiwa kwa maulosi a m’Baibo m’masiku ŵano. Tuona soti mwamene ŵanthu okwanishila kucinja umoyo wao cifukwa coseŵenzesha mfundo za m’Baibo. Umboni uyu utiyavya kukhulupilila kuti ŵanthu onse ofunika kumvwishila uthenga uweme wa Ufumu.

16. Molingana na Salimo 46:1-3, kansi kukhulupilila Yehova na Yesu kutiyavya tyani kupitilizhya kulalikila?

¹⁶ Caciŵili, tukhulupilila Yehova wamene niye mwineco wa uthenga watulalikila koma soti Yesu wamene esankhiwa kunkhala Mfumu. (Yoh. 14:1) Olo tikumane na mavuto otyani, Yehova apitilizhye kunkhala malo ŵasu acitetezo koma soti mphamvu zasu. (Ŵelengani Salimo 46:1-3.) Kuyangizhyila apo, tili na cidalilo cakuti Yesu osogolela nchito yolalikila poseŵenzesha mphamvu na ulamulilo wecipasiwa na Yehova.​—Mat. 28:18-20.

17. Fotokozani cisanzo coonesha cifukwa cake tufunika kupitilizhya kulalikila.

¹⁷ Cikhulupililo cutiyavya kunkhala na cidalilo cakuti Yehova adalise khama yasu, nthawi ziyakine m’njila yatisayembekezela. (Mlal. 11:6) Mwacisanzo, ŵanthu masauzande anyinji otola zofalisa zasu pa tumashelufu  twa ulaliki. Kansi njila iyi ni yoyavya? Eee! Utumiki Wathu wa Ufumu wa Cinyanja wa November 2014 wefotokoza kuti msimbi muyakine wa pa yuniveziti enzofuna kulemba nkhani yokhuza Mboni za Yehova. Yove aliyokwanishe kupeza Ng’anda ya Ufumu, koma epeza akwasu enzocita ulaliki watumashelufu pa yuniveziti pamene apo ndipo ekwanisha kupeza cofalisa camene cemuyavya kuti alembe nkhani yokhuza Mboni. Posilizhyila pake, ebatizika nonkhala wa Mboni, ndipo lomba otumikila monga mpainiya wa nthawi zonse. Zocitika zoteti, zutilimbikisha kupitilizhya kulalikila cifukwa zuonesha kuti pakali ŵanthu ofuna kumvwishila uthenga wa Ufumu.

18. Ndaŵa yanji tingankhale osimikizhya kuti siku ya Yehova icelwe lini?

¹⁸ Tili na cikhulupililo cakuti nchito yolalikila ikasile panthawi yake. Ganizilani zecitika m’nthawi ya Nowa. Yehova eonesha kuti ocita vinthu panthawi yake. Kukali vyaka pafupifupi 120, eikilatu nthawi pati cikacitike cigumula. Pavuli pa vyaka vinyinji, Yehova euzhya Nowa kuti amange cingalawa. Epitilizhya kukata nchito iyi mwamphamvu. Cuoneka kuti ecita izi kukali vyaka 40 olo 50 cigumula cikaliyoyamba. Nangu kuti ŵanthu enzomvwishila lini, Nowa epitilizhya kulalikila uthenga waciweluzo mpaka Yehova pecimuuzhya kuti aloŵeshe vinyama m’cingalawa. Panthawi yake, “Yehova evala ciseko.”​—Gen. 6:3; 7:1, 2, 16.

19. Tingayembekezele cinji ngati tulola lini kwanja yasu kupumula?

¹⁹ Lombapano Yehova atiuzhye kuti tileke kukata nchito yolalikila. Pavuli pake, akaononge calo ca Satana noleta calo calomba mwati mukankhale ŵanthu omvwila. Tetyo, tiyeni titolele cisanzo ca Nowa, Habakuku na ŵanthu ayakine amene aliyolole kwanja yao kupumula. Tiyeni tipitilizhye kuika maganizo yasu pa nchito yolalikila, kunkhala oleza mtima nopitilizhya kunkhala na cikhulupililo cotang’a mwa Yehova na malonjezo ŵake.