Vesi iyi ni yocitisha cidwi, ikuti: “Ukaona munthu wosauka okandikizhyiwa, ndipo zinthu zaciwawa koma soti ziliye cilungamo zucitika m’cigawo ca calo, usadabwe nazo. Pakuti mkulu kupambana amene ocita zamene izo oona, ndipo palulu pa akulu-akulu amene ao pali soti akulu-akulu ayakine kupambana ove.”—Mlal. 5:8.

Malinga ni kaonedwe ka umunthu, vesi iyi yunena za olamulila aumunthu. Koma tikaiganizila ngako vesi iyi, yunena soti za Yehova, ndipo izi n’zotonthoza koma soti zolimbikisha.

Mlaliki 5:8 yunena za olamulila amene okandikizhya ŵanthu osauka noŵacitila vinthu viliye cilungamo. Olamulila ofunika kukumbukila kuti pali munthu muyakine oŵaona wamene ali na udindo wapalulu ngako kupambana ove. Ndipo pali soti ayakine ali na maudindo apalulu ngako. N’zacisoni kuti olamulila aumunthu ni aciphuphu ndipo ŵanthu ovutika cifukwa ca vinthu viliye cilungamo.

Tetyo, olo kuti zioneke monga tiliye ciyembekezo, tulimbikishiwa poziŵa kuti Yehova oona zakucita olamulila akulu-akulu a maboma ya ŵanthu. Tingapemphele kwa Yehova nomutulila nkhaŵa zasu zonse kuti atiyavye. (Sal. 55:22; Afil. 4:6, 7) Tuziŵa kuti “menso a Yehova oyendayenda pacalo conse kuti aoneshe mphamvu zake kuli ŵanthu amene mtima wao ni wamphumbulu kuli yove.”—2 Mbi. 16:9.

Tetyo, Mlaliki 5:8 yutikumbusha za calo catunkhalamo koma soti kuti pali muyakine ali na mphamvu ngako. Cofunika ngako n’cakuti vesi iyi yutikumbusha kuti Yehova ni wapalulu ngako. Lomba olamulila kupitila muli Mwana wake Yesu Khristu wamene ni Mfumu ya Ufumu wake. Wamphamvuzonse wamene oona vonse ni wacilungamo, ndipo naye Mwana wake niye mwalili.