TONSE tukhulupilila kuti Yehova osogolela nosamalila atumiki ŵake mwauzimu ‘m’masiku ŵano osilizhya.’ (2 Tim. 3:1) Tetyo, tufunika kumvwishila kwa Yehova. Tingalinganizhye mwazilili zinthu masiku ŵano na mwezenzele m’nthawi ya Aisiraeli m’cipululu. Enzofunika kumvwishila kulila kwa mitolilo.

Yehova euzhya Mose kuti apange mitolilo iŵili ya siliva kuti akoiseŵenzesha “poitila ŵanthu na pokuka” pa msasa. (Num. 10:2) Ansembe enzofunika kulizhya mitolilo m’njila zosiyanasiyana poziŵisha ŵanthu zeenzofunika kucita. (Num. 10:3-8) Masiku ŵano, atumiki a Mulungu olondela malangizo m’njila zosiyanasiyana. Nkhani ino ifotokoze njila zitatu zatulondelela malangizo polinganizhya na mweyenzolilila mitolilo m’nthawi ya Aisiraeli. Masiku ŵano atumiki a Mulungu oitiwa ku misonkhano ikulu-ikulu, oyanganila m’gulu ya Mulungu ophunzisiwa koma soti pankhala kucinja kwa zinthu m’gulu ya Mulungu.

Yehova akafuna kuti “gulu yonse” ya Aisiraeli ikumane pamozi pamulyango kum’mawa kwa cihema, ansembe enzolizhya mitolilo. (Num. 10:3) Mafuko yonse yenzonkhala m’misasa mozungulila cihema yenzokumvwa kulila kwamene uku. Ŵala enzonkhala m’misasa yenze pafupi ngako na mulyango, enzokumvwa kamangu kulila kwa mitolilo. Ayakine enzonkhala m’misasa yenze patali na cihema, enzofunika nthawi ikulu noyesayesa kufwika kamangu. Mulimonse mwezenzele, Yehova enzofuna kuti onse asonkhane pamozi nomvwishila malangizo ŵake.

Masiku ŵano tusonkhana lini pa cihema, koma tuitiwa ku misonkhano ya atumiki a Mulungu. Izi zuyangizhyilapo misonkhano ya cigawo na zocitika ziyakine zapadela, kwamene tulondela malangizo ofunika ngako. Pacalo conse atumiki a Yehova osangalala na misonkhano yamene iyi. Tetyo, ŵala opezekapo opindula ngako. Ayakine oyenda misenga itali-itali kupambana ayakine. Nangu n’tetyo, ŵala omvwishila ku ciitano camene ici opindula ngako.

Nanga tyani za ŵala ali kutali ngako na malo kucitikila misonkhano ikulu-ikulu? Cifukwa ca kuluta pasogolo kwa sayansi na zopangapanga, akwasu amene aŵa ali na mwai wopindula na pulogilamu yonse ndipo ozimvwa kuti ali mbali ya gulu yamene yucita msonkhano. Mwacisanzo, pakuyendela kwa wopanamila likulu ya Mboni za Yehova, akwasu ku msambo wa ku Benin ekwanisha kulumikizhya akwasu na azilongosi na okondwelela. Onse pamozi enze okwanila 21. Ŵanthu aŵa enze m’tauni iyakine yakukumbako miyala m’cipululu  ca Sahara yoitiwa kuti Arlit, ku Niger. Esonkhana kuti amvwishile ku pulogilamu yamene iyi. Olo kuti enzonkhala kutali ngako, ezimvwa kuti nao enze pamozi na akwasu na azilongosi okwanila 44,131 amene enze pa msonkhano. Mkwasu muyakine elemba kuti: “Tuyamikila mofumila pansi pa mtima cifukwa cotilumikizhya kuti tikwanishe kuonelela pulogilamu iyi. Mwationesha kuti mutikonda ngako.”

Ngati ansembe Aciisiraeli alizhya tyala mtolilo umozi, “akulu-akulu a magulu masauzande” enzofunika kuwela ku cihema. (Num. 10:4) Enzokumana ku cihema kuti alondele malangizo kwa Mose. Izi zenzoŵayavya kuti akosamalila luweme maudindo ŵao. Ngati kuti mwenze m’mozi mwa asogoleli pa nthawi iyo, ko sembe muliyocite zilizonse zamungakwanishe kuti mupezekepo nopindula na malangizo?

Masiku ŵano, akulu mumpingo ni “asogoleli” lini, ndipo ocita lini ufumu pa mbelele za Mulungu zakusamalila. (1 Pet. 5:1-3) Koma oyesayesa kusamalila luweme mbelele. Ove ni okonzeka kulondela malangizo pa Sukulu ya Utumiki wa Ufumu. Pa sukulu yamene iyi, akulu ophunzila mwaangasamalilile luweme mpingo. Maphunzilo amene aŵa oyavya akulu koma soti ofalisa mumpingo kuti avwendele pafupi na Yehova. Nangu kuti muliyonkhaleko na mwai woloŵako masukulu aŵa, namwe mungapindule cifukwa ca ŵala eloŵako akayamba kuseŵenzesha zeciphunzila.

Ansembe Aciisiraeli nthawi ziyakine enzolizhya mitolilo mocinjanacinjana. Izi zenzoŵaziŵisha kuti Yehova ofuna kuti ove apasule misasa yonse noyambako. (Num. 10:5, 6) Pokuka enzocita vinthu mwadongosolo koma soti mokatizhyana, kucita izi kwenzofunika khama. Nthawi ziyakine Aisiraeli enzofuna lini kukuka kuti alute kuyakine. Ndaŵa yanji?

Ayakine enzoganiza kuti mitolilo yenzolila pafupi-pafupi ngako koma soti mosayembekezela. “Nthawi ziyakine mkumbi wenzonkhalapo kufumila mcingulo mpaka m’mawa.” Nthawi ziyakine wenzonkhapo ‘masiku aŵili, mwezi, olo kupitililapo’ ukaliyoyamba kuyenda. (Num. 9:21, 22) Kansi enzofunika kukuka kangani? Numeri capita 33 yutomola malo okwanila 40 yecimangapo misasa.

Nthawi ziyakine Aisiraeli enzomanga misasa pamalo aweme pamene penze vimfule. Kunkhala pamalo oteti kwenze kosangalasha “m’cipululu cikulu koma soti coyofya.” (Deut. 1:19) Kukuka pamalo aweme amene ao, kwenzooneka kuti ni ciyeso cifukwa enzoganiza kuti angapeze lini soti malo aweme.

Ngati mafuko ayakine anyamuka, ayakine enzofunika kuyembekezela moleza mtima kuti nthawi yao yonyamuka ikwane. Onse enzokumvwa kulila mocinjanacinjana kwa mitolilo, koma enzofunika lini kunyamuka panthawi imozi. Kulila koyamba kwenzoziŵisha mafuko yenze m’misasa ya kum’mawa monga Yuda, Isakara na Zebuloni kuti inyamuke. (Num. 2:3-7; 10:5, 6) Pavuli pakuti mafuko aya yanyamuka, ansembe enzolizhya mitolilo kaciŵili mocinjanacinjana, kuziŵisha mafuko atatu yenze m’misasa ya kum’mwela. Ansembe enzocita zamene izi mpaka mafuko yonse yanyamuka.

Kansi mwevutikapo kuvomelezhya mbali ziyakine zamene zecinja m’gulu ya Mulungu? Ko mweganizapo kuti vinthu vacinja ngako m’gulu yasu? Olo payakine mwenzokondwela na mwevenzele vinthu kale, cakuti mwenzofuna lini kuti vicinje? Ngati mwemvwapo tetyo, niye kuti kuleza mtima kwanu kweyesewa ndipo payakine zekutolelani nthawi kuti muyoŵelele. Mulimonse mwemwemvwila, mwezindikila kuti ngati mwavomelezhya kucinja kulikonse m’gulu ya Mulungu, Yove osangalala namwe.

M’nthawi ya Mose, Yehova esogolela ŵanthu amisinkhu yosiyanasiyana mamiliyoni m’cipululu. Kuti Yehova aliyoŵasogolele noŵasamalila sembe aliyonkhale na moyo. Yehova otisogolela m’masiku ŵano osilizhya. Otiyavya soti kunkhala pafupi na Yove, ndipo izi zucitisha kuti cikhulupililo casu cinkhale cotang’a. Tetyo, tiyeni tipitilizhye kumvwila Yehova monga ni mwecicitila Aisiraeli okhulupilika.