1. Ndaŵa yanji Yehova ezilinganizhya na amama onyonsha?

“KANSI amama angaluŵe mwana wao onyonkha?” Iyi ni konsho yecikonsha Yehova m’masiku a mneneli Yesaya. Yehova euzhya ŵanthu kuti, “Olo kuti amama aŵa angaluŵe, koma neo ningakuluŵe lini.” (Yes. 49:15) Ni nthawi lini zonse Yehova pakuzilinganizhya na amama. Koma ni panthawi iyi tyala pecizilinganizhya na amama. Yehova elinganizhya ushamwali wa pakati pa yove na atumiki ŵake, na wa amama na mwana wao pofuna kuyavya atumiki ŵake kuzindikila kuti oŵakonda. Azimai anyinji okumvwa monga ni mwecimvwila kalongosi Jasmin, wamene eciti: “Ngati unyonsha mwana wako, upanga ushamwali wapadela ngako wamene usila lini.”

2. Kansi Yehova akumvwa tyani ngati m’mozi mwa atumiki ŵake wafooka?

² Yehova oziŵa ngati m’mozi mwa atumiki ŵake waleka kulalikila na kupezeka pa misonkhano. Yove akumvwa caipa kuona atumiki ŵake masauzande ofooka * caka ciliconse.

3. Ko Yehova ofuna cinji?

³ Anyinji mwa akwasu na azilongosi okondeka amene enze efooka, okatizhyana soti na mpingo, ndipo tuŵalondela na manja aŵili. Yehova ofuna kuti ove ayambe soti kukatizhyana na gulu yake, ndipo nase niye zatufuna. (1 Pet. 2:25) Kansi tingaŵayavye tyani? Tikaliyoyankha konsho iyi, tufunika kuziŵa cifukwa cake ayakine oleka kupezeka pa misonkhano nolalikila.

4. Ko n’cinji cacitikila ŵanthu ayakine pankhani ya nchito?

⁴ Ayakine oona nchito yao kunkhala yofunika ngako pa umoyo wao. Mkwasu Hung * wamene onkhala ku Southeast Asia elaŵila kuti, “Nenzotaila nthawi yangu ikulu na mphamvu pa nchito yangu. Mosaganiza bwino, mumtima nenzoganiza kuti ngati nankhala na cuma, niye paningatumikile bwino Yehova. Tetyo, nenzoseŵenza maawazi anyinji cakuti neyamba kuphonya misonkhano mpaka posilizhyila nelekelatu kusonkhana. Nezindikila kuti Satana oseŵenzesha calo pocitisha ŵanthu kuti aleke kutumikila Mulungu.”

5. Kansi kalongosi Anne ekhuziwa tyani na mavuto yecikumana nayo?

⁵ Ayakine mwa akwasu na azilongosi okumana na mavuto amene oŵafookesha. Kalongosi Anne wa ku Britain wamene ni kolo ya ŵana 5 eciti, “M’mozi mwa ŵana ŵangu evyalika na matenda akulu. M’kuluta kwa nthawi mwana wangu muyakine munakazi ecosewa mumpingo, ndipo mwana muyakine munalume eyamba kulwala matenda amaganizo. Izi zecitisha kuti nikonkhala wosasangalala cakuti neleka kusonkhana na kulalikila. Posilizhyila pake nefooka.” Tumumvwila cifundo Anne pamozi na banja yake koma soti na ayakine okumana na mavuto oteti.

6. Ndaŵa yanji ayakine asiya gulu ya Yehova cifukwa cosaseŵenzesha malangizo ali pa Akolose 3:13?

⁶ Ŵelengani Akolose 3:13. Ayakine mwa atumiki a Yehova ekhumudwa cifukwa ca vinthu vecicita mkwasu olo kalongosi muyakine. Mtumwi Paulo ezindikila kuti nthawi ziyakine tingankhale na “cifukwa codandaulila” pa mkwasu olo kalongosi. Payakine tingacitiliwe vinthu viliye cilungamo. Koma ngati tusamala lini, tingakhumudwe. Ukali ungacitishe munthu kusiya gulu ya Yehova. Ganizilani cocitika ca mkwasu Pablo wa ku South America. Munthu muyakine emulaŵilila vinthu vawenye, ndipo posilizhyila pake etaya mwai wautumiki mumpingo. Kansi yove ekhuziwa tyani? Pablo eciti: “Nekalipa ngako, ndipo patontho-patontho neyamba kuleka kusonkhana.”

7. N’cinji cingacitike ngati munthu oziimba mlandu?

⁷ Ngati munthu ecita cimo ikulu vyaka vakuvuli, angapitilizhye kuziimba mlandu kwa nthawi itali. Angayambe kuganiza kuti Yehova omukonda lini. Nangu kuti elapa nocitiliwa cifundo, angoziona kuti ni wosayenelela kunkhala mtumiki wa Mulungu. Mkwasu Francisco ecimvwa cimozimozi. Yove eciti: “Nezuzuliwa cifukwa cocita dama. Nangu kuti nepitilizhya kupezeka pa misonkhano, nenzosangalala lini ndipo nenzozimvwa kunkhala wosayenelela kunkhala m’gulu ya Yehova. Cikumbumtima cangu cenzonivutisha ndipo nenzoona kuti Yehova aliyonikhululukile. M’kuluta kwa nthawi neleka kusonkhana.” Kansi mukumvwa tyani ngati mkwasu olo kalongosi okumana na mavuto monga ni yatafotokoza? Ko muŵamvwila cifundo? Ngati n’tetyo, nanga Yehova akumvwa tyani ponena za ove?

8. Kansi Yehova oluŵa ŵanthu enzomutumikila? Fotokozani.

⁸ Yehova oluŵa lini ŵanthu amene enzomutumikila koma aleka kusonkhana. Angaluŵe lini nchito yecicita pomutumikila. (Aheb. 6:10) Mneneli Yesaya elemba fanizo  yoonesha mwamene Yehova osamalilila ŵanthu ŵake. Elemba kuti: “Molingana na m’ciŵeta yove akasamalile mbelele zake. Akasonkhanishe ŵana a mbelele na kwanja yake ndipo akazinyamulile pacifuwa cake.” (Yes. 40:11) Kansi Yehova wamene ni m’ciŵeta mkulu akumvwa tyani ngati m’mozi mwa atumiki ŵake waleka kumutumikila? Yesu efotokoza mwaakumvwila Yehova pecikonsha ophunzila ŵake kuti: “Muganiza tyani? Ngati munthu ali na mbelele 100 ndipo imozi yasoŵa, ko angasiye lini mbelele 99 zili mulupili na kuyosakila imozi yasoŵa? Ngati waipeza, kulaŵila cendi osangalala ngako na mbelele yamene iyo kupambana mwaangasangalalile na mbelele 99 ziliyosoŵe.”​—Mat. 18:12, 13.

9. Kansi aciŵeta a m’nthawi yakuvuli enzosamalila tyani mbelele zao? (Onani cithunzithunzi pa cikuto)

⁹ Ndaŵa yanji ni poyenela kulinganizhya Yehova na m’ciŵeta? Cifukwa aciŵeta a m’nthawi zakuvuli enzosamalila bwino mbelele zao. Mwacisanzo, Davide elimbana na nkhalamu na cimbalangondo kuti ateteze mbelele zake. (1 Sam. 17:34, 35) Ciŵeta muweme ofunika kuziŵa ngati mbelele imozi paliye. (Yoh. 10:3, 14) Ciŵeta woteti niye osiya mbelele zake 99 m’khola olo kusiila ayake kuti akoziona kuti yove akasakile imozi yasoŵa. Yesu eseŵenzesha fanizo ya mbelele yosoŵa kuti aphunzise mfundo yofunika yakuti: “Molingana na izi, Atata akululu ofuna lini kuti m’mozi mwa tuŵana utu akaonongeke.”​—Mat. 18:14.

10. Molingana na Ezekieli 34:11-16, kansi Yehova walonjeza kucita cinji ku mbelele zesoŵa?

¹⁰ Yehova okonda aliyense wa seo, kuyangizhyilapo “tuŵana utu” twamene twapatuka kufuma pa gulu ya mbelele. Kupitila mwa mneneli Ezekieli, Mulungu olonjeza kuti akasakilesakile mbelele zamene zesoŵa, ndipo akaziyavye kunkhala pa ushamwali na yove. Efotokoza zati akacite kuti akaŵapulumuse molingana na zakucita m’ciŵeta ngati mbelele yasoŵa. (Ŵelengani Ezekieli 34:11-16.) Coyamba, m’ciŵeta  ofunika kusakila mbelele, kucita izi kufuna nthawi na mphamvu. Ngati waipeza owela nayo pagulu ya ziyake. Ngati mbelele yecitiwa olo ngati ili na njala, oisamalila mwacikondi. Ngati ni yofooka oimanga vilonda noinyamula. Akulu amene ni aciŵeta a “mbelele za Mulungu,” nao ofunika kucita cimozimozi kuti ayavye aliyense amene waleka kusonkhana. (1 Pet. 5:2, 3) Akulu ofunika kuyavya ŵanthu amene eleka kusonkhana noŵayavya kuti ankhale pa ushamwali na Yehova. *

11. Kansi m’ciŵeta muweme oziŵa cinji?

¹¹ M’ciŵeta muweme oziŵa kuti mbelele ingasoŵe. Ngati mbelele yafuma pagulu ya ziyake, m’ciŵeta oicitila lini nkhanza. Ganizilani cisanzo cawatipasa Yehova poyavya atumiki ŵake amene panthawi iyakine eleka kumutumikila.

12. Kansi Yehova ecita naye vinthu m’njila yotyani Yona?

¹² Mneneli Yona aliyomvwile Yehova ndipo ekana kuluta ku Nineve. Nangu n’tetyo, Yehova aliyomusiye Yona. Monga m’ciŵeta muweme, Yehova emupulumusa nomuyavya kunkhala na mphamvu zeenzofunikila kuti akwanilishe utumiki wake. (Yona 2:7; 3:1, 2) Pavuli pake, Yehova eseŵenzesha cotwala colingana na mphonda kuti amuyavye kumvwisha kuti moyo ni wamtengo wapatali. (Yona 4:10, 11) Kansi tuphunzilapo cinji? Akulu ofunika lini kuleka kuyavya ŵanthu amene ni ofooka. M’malomwake, ofunika kuziŵa calengesha kuti mbelele ifume pagulu ya ziyake. Ngati mbelele yawelela kwa Yehova, akulu ofunika kupitilizhya kuionesha cikondi.

13. Kansi tingaphunzile cinji kufumila kwa Yehova tikaona mwecicitila vinthu na wolemba Salimo 73?

¹³ Wolemba Salimo 73 enze ekhumudwa cifukwa coona kuti ŵanthu aipa vinthu vuŵayendela luweme. Yove enzokaikila ngati kucita cifunilo ca Mulungu kuli na phindu iliyonse. (Sal. 73:12, 13, 16) Kansi Yehova ekhuziwa tyani? Yove aliyomuone kuti ni munthu wosafunika. M’malomwake, Yehova ecitisha kuti mau ŵake alembewe m’Baibo.  Posilizhyila pake, wamasalimo ezindikila kuti kunkhala pa ushamwali na Yehova niye cinthu cofunika ngako pa umoyo kupambana ciliconse. (Sal. 73:23, 24, 26, 28) Kansi tuphunzilapo cinji? Akulu ofunika lini kufulumila kuweluza ŵala amene ayamba kukaikila ngati kutumikila Yehova kuli na phindu iliyonse. M’malo moŵakaikila, akulu ofunika kuziŵa cifukwa cake olaŵila teti nakucita zinthu m’njila yoteti. Akaziŵa zamene izi, angaseŵenzeshe malemba kuti aŵalimbikishe.

14. Ndaŵa yanji Eliya enzofunika kuyavyiwa, nanga Yehova emuyavya tyani?

¹⁴ Mneneli Eliya enzothaŵa Mfumukazi Yezebeli. (1 Maf. 19:1-3) Yove enzoganiza kuti penzeve mneneli aliyense wamene enzotumikila Yehova, ndipo enzoganiza kuti nchito yecicita yeluta patyala. Eliya evutika ngako cakuti enzofuna kufwa. (1 Maf. 19:4, 10) M’malo momukaikila, Yehova emusimikizhyila kuti enze lini yeka. Enzofunika kudalila mphamvu za Mulungu koma soti kuzindikila kuti penze nchito ikulu yofunika kuti acite. Mwacifundo, Yehova emvwishila nkhawa za Eliya ndipo em’pasa nchito iyakine. (1 Maf. 19:11-16, 18) Kansi tuphunzilapo cinji? Seo tonse, makamaka akulu ofunika kucita vinthu mwacifundo na atumiki a Yehova. Ngati wofalisa olaŵila kuti ni wokalipa ndipo oona kuti Yehova angamukhululukile lini, akulu ofunika kumumvwishila paakuŵafotokozela mwaakumvwila. Pavuli pake akulu ofunika kumusimikizhyila kuti Yehova omukonda.

15. Molingana na Yohane 6:39, kansi Yesu enzoziona tyani mbelele za awisi?

¹⁵ Kansi Yehova ofuna kuti tikoŵaona tyani ŵanthu amene esiya gulu yake? Tingaphunzilepo kanthu kufumila ku cisanzo ca Yesu. Enzoziŵa kuti mbelele ni zamtengo wapatali m’menso mwa Mulungu. Tetyo, Yesu ecita zonse zaangakwanishe kuti ayavye “mbelele zotaika za ng’anda ya Isiraeli,” kuti ziwelele kwa Yehova. (Mat. 15:24; Luka 19:9, 10) Monga m’ciŵeta muweme, Yesu ecita zinyinji kuti asataye mbelele iliyonse ya Yehova.​—Ŵelengani Yohane 6:39.

16-17. Kansi akulu ofunika kumvwa tyani ngati oyavya ŵanthu amene eleka kusonkhana? (Onani bokosi yakuti “ Mwaangamvwile Munthu Eleka Kusonkhana.”)

¹⁶ Mtumwi Paulo elimbikisha akulu mumpingo wa ku Efeso kutolela cisanzo ca Yesu. Eciti: “Muyavye ofooka, ndipo mukokumbukila mau ya Asikulu Yesu pecilaŵila kuti: ‘Kupasa kuleta cimwemwe kupambana kulondela.’” (Mac. 20:17, 35) Malemba oonesha kuti akulu ali na udindo wofunika ngako posamalila atumiki a Yehova. Mkwasu Salvador wamene ni mkulu ku Spain elaŵila kuti, “Nikaganizila mwamene Yehova osamalilila ŵanthu amene enze eleka kusonkhana, nulimbikishiwa kucita zilizonse zaningakwanishe kuti niŵayavye. Nuziŵa kuti Yehova ofuna kuti nane nikocita zamene izi.”

¹⁷ Ŵanthu onse afotokozewa m’nkhani ino, enze eleka kusonkhana, koma pavuli pake eyavyiwa kuti awelele kwa Yehova. Tetyo, anyinji amene eleka kusonkhana, nao ofunika kucita cimozimozi. Nkhani yokonkhapo ikafotokoze zinyinji zokhuza mwatingaŵayavyile kuti awelele kwa Yehova.