Comvwisha cisoni n’cakuti nili na vyaka pafupifupi 15, ushamwali wangu na Yehova weyamba kufooka. Nenzoona kuti ayangu a ku sukulu enze na ufulu ngako, ndipo nane nenzofuna ufulu wamene uyo. Neyamba kuona kuti malamulo a makolo ŵangu na kukonkha mfundo za minkhaliwe yacikhristu zenze zovuta ngako. Ndipo neyamba kuona kuti kutumikila Yehova kwenze koŵeŵesha. Nenzokhulupilila kuti Yehova aliko koma nenzokumvwa lini kuti nili naye pafupi.

Niliyolekeletu kulalikila, koma nenzolalikilako tyala patontho. Nenzokonzekela lini poluta mu ulaliki ndipo izi zenzocitisha kuti zikonivuta kuyambisha makambilano olo kuyapitilizhya. Cifukwa ca izi, nenzonkhala lini na maulwendo owelelako olo maphunzilo a Baibo, ndipo nenzosangalala lini na utumiki. Izi zecitisha kuti nikozonda ngako kulalikila. Nenzozikonsha kuti, ‘Kansi ŵanthu okwanisha tyani kulalikila wiki iliyonse olo mwezi ulionse?’

Penekwanisha vyaka 17 nenzofuna kunkhala na ufulu. Tetyo, nelonga vyola vangu, nofuma pang’anda noluta ku Australia. Makolo  ŵangu ekhwinyilila ngako penefuma pang’anda. Enze na nkhaŵa, ndipo enzofunishisha kuti nipitilizhye kutumikila Yehova.

Penefwika ku Australia nefookelatu mwauzimu. Neyamba kuphonya misonkhano. Ndipo nepeza ayangu amene enzocita monga ni neo kuti lelo apezeka pa misonkhano, siku iyakine aluta kuyokumwa walwa novina mu manaiti kilabu. Nikaganizila za nthawi yamene iyo, nuzindikila kuti nenze m’cendi koma soti nenzocita zinthu za m’calo, koma zonse ziŵili zenzonipasa lini cimwemwe.

Pavuli pa vyaka pafupifupi viŵili, nekumana na kalongosi muyakine wamene enicitisha kuyamba kuganizila za umoyo wangu, koma yove aliyoziŵe. Nenzonkhala na azilongosi ayakine ali 5 ndipo teitila woyanganila dela na mkazi wake Tamara kuti ankhale nase kwa wiki imozi. Ngati mulume wake osamalila nchito za mpingo, kalongosi Tamara enzotandala nase. Nenzosangalala na maceza amene aŵa. Enze munthu wofwikilika koma soti wosavuta kulaŵila naye. Nesangalala kuona munthu wauzimu teti opeza nthawi yotandala nase.

Kalongosi Tamara enze munthu waubwenzi. Yove enzokonda ngako cendi na utumiki. Enze na cimwemwe cifukwa cakuti enzopasa Yehova zonse zaangakwanishe, koma neo nenzosangalala lini cifukwa nenzocita zitontho potumikila Yehova. Zocita zake na cimwemwe ceenze naco zenikhuza ngako. Cisanzo cake cenikumbusha mfundo yacendi ya m’Malemba yakuti: “Yehova ofuna kuti tonse tikomutumikila mokondwela.”​—Sal. 100:2

Nenzofunishisha kunkhala wokondwela monga ni kalongosi Tamara. Koma kuti zamene izi zikwanishike, nenzofunika kucinja zinthu ziyakine pa umoyo wangu. Izi zenitolela vyaka pafupifupi vitatu, cifukwa niliyocinjiletu pa nthawi imozi koma neyamba kucinja patontho-patontho. Neyamba kukonzekela pakuya mu utumiki. Ndipo neyamba kucitako upainiya woyavya. Izi zeniyavya kusilizhya wowa ndipo neyamba kusangalala na utumiki. Cifukwa  cakuti nenzoseŵenzesha Baibo kanyinji mu utumiki, nenzosangalala ngako. Pakaliyopita nthawi itali neyamba kucita upainiya woyavya mosalekezhya.

Neyamba kunkhala na ashamwali amisinkhu yosiyanasiyana amene enzocita luweme mwauzimu ndipo enzosangalala na utumiki wao. Cisanzo cao ciweme ceniyavya kuganizila zinthu zofunika ngako pa umoyo, ndipo neyamba kuŵelenga Baibo siku iliyonse. Izi zenicitisha kuti niyambe kusangalala ngako na utumiki cakuti neyamba kucita upainiya wanthawi zonse. Kwa nthawi yoyamba pavuli pa vyaka, nezimvwa kunkhala wotetezeka koma soti wosangalala mumpingo.

Pavuli pa caka cimozi, nekumana na mkwasu Alex wamene enze munthu wacifundo ndipo enzokonda Yehova na utumiki. Pa nthawi iyi, enzotumikila monga mtumiki woyavya apo n’kuti wankhala otumikila monga mpainiya kwa vyaka 6. Mkwasu Alex etumikilako ku malo osoŵa ku Malawi kwa miyezi pafupifupi 8. Kwamene uko, enzosangalala kutandala na amishonale acisanzo ciweme. Ndipo emulimbikisha kupitilizhya kuika Ufumu pa malo oyamba mu umoyo.

Telungulana mu 2003, ndipo tapitilizhya kutumikila mu utumiki wanthawi zonse mpaka lelo. Taphunzila zinthu zinyinji ndipo Yehova watidalisa m’njila zinyinji.

Mu 2009 etituma kuti tikatumikile monga amishonale pa cisumbu ca Timor-Leste m’calo citontho ca Indonesia. Tedabwa ngako, tekondwela nocita nkhaŵa pa nthawi imozi. Pavuli pa miyezi 5 tefwika ku Dili wamene ni mzinda ukulu wa calo ici.

Umoyo wasu wecinja ngako. Tenzofunika kujaila cinkhalidwe calomba, cilaŵilo koma soti vakulya. Mu utumiki, kanyinji tenzopeza ŵanthu osauka, osaphunzila koma soti ovutika  maganizo. Tenzopeza soti ŵanthu ayakine amene enze na viŵanga koma soti mavuto ayakine cifukwa ca nkhondo na zaciwawa. *

Utumiki wenzosangalasa ngako! Mwacisanzo, nekumana na msimbi wa vyaka 13 wamene enze wacisoni, zina yake Maria. * Pa nthawi iyi, n’kuti amai ŵake emwalila lombapano ndipo enzoonana lini ngako na ausuwake. Molingana na ŵana anyinji amsinkhu wake, Maria enzoziŵa lini zeenzofunika kucita na umoyo wake. Nukumbuka nthawi iyakine elila peenzonifotokozela mweenzomvwila. Olo n’tetyo, nenze niliyomvwishishe zeenzolaŵila cifukwa nenzoziŵa lini luweme cilaŵilo cao. Nesenga Yehova kuti aniyavye kuti nimulimbikishe, ndipo neyamba kuŵelenga naye Malemba olimbikisha. Pavuli pa vyaka vitontho, neona mwamene cendi cecinjila umoyo wa Maria. Ebatizika ndipo lomba osogoza maphunzilo ŵake-ŵake a Baibo. Lomba Maria ali na banja ikulu yauzimu ndipo akumvwa kuti ni wokondewa.

Yehova odalisa nchito yolalikila ku Timor-Leste. Olo kuti ofalisa anyinji ebatizika mkati mwa vyaka 10 vapita, anyinji otumikila monga apainiya, atumiki oyavya koma soti akulu. Ayakine otumikila pa ofesi yomasulila ndipo oyavya kutwala cakulya cauzimu m’vilaŵilo va kwao. Nusangalala ngako kuŵamvwa kuti oimba pa misonkhano, kuona kuti omwetulila koma soti mwakupitila pasogolo mwauzimu.

Umoyo ku Timor-Leste wenze wosiyana ngako na mwewenzele ku Australia, koma wenze wosangalasa ngako. Nthawi ziyakine tenzokwela kabasi katontho kozula na ŵanthu apo n’kuti akwezekamo nsomba ziyumu na ndiyo zamatepo zinyinji. Nthawi ziyakine soti tenzosogoza phunzilo m’kang’anda katontho, kakupya koma soti kalito apo n’kuti nkhuku zupitanapitana. Olo kuti tenzokumana na mavuto aŵa, umoyo uyu wenze ‘wosangalasa ngako!’

Nikakumbukila zakuvuli, nuyamikila ngako makolo ŵangu poyesayesa kuniphunzisa za Yehova nonicilikiza olo pa nthawi yamene ushamwali wangu na Yehova wenze wefooka. Lemba ya Miyambo 22:6 yekwanilishiwa pali neo. Amama na atata osangalala kuona kuti neo na mkwasu Alex tupitilizhya kutumikila Yehova. Kuyambila mu 2016 tankhala tutumikila m’dela ya ofesi ya msambo ya Australasia.

N’covuta kukhulupilila kuti pa nthawi iyakine nenzoona kuti nchito yolalikila ni yovuta ngako. Lomba nukonda kulalikila! Nazindikila kuti mosasamala kanthu mwaungankhalile umoyo wasu, cimwemwe cenecene cuwela cifukwa cotumikila Yehova na mtima wonse. Kulaŵila cendi, vyaka 18 vatatumikila Yehova pamozi na mkwasu Alex, venze vosangalasa ngako pa umoyo wangu. Lomba, numvwisha mau yecilaŵila wamasalimo Davide kuuzhya Yehova akuti: “Onse outukila kuli mweo, akondwele, akuwe mokondwela mpaka kale-kale. . . . Okonda zina yanu akondwele cifukwa ca mweo.”​—Sal. 5:11.