Makonsho Ofumila Kuli Oŵelenga
Ndaŵa yanji Yesu akaliye kufwa ekata mau a Davide opezeka pa Salimo 22:1?
Ayakine mwa mau osilizhyila yecilaŵila Yesu akaliyokufwa, opezeka pa Mateyu 27:46, akuti: “Mulungu wangu, Mulungu wangu, ndaŵa yanji mwanisiya?” Mwa kulaŵila mau aŵa, Yesu ekwanilisha mau a wamasalimo Davide opezeka pa Salimo 22:1. (Mko. 15:34) Kungankhale kulakwa kuganiza kuti Yesu elaŵila mau aŵa cifukwa cakuti ekhumudwa na Yehova olo cifukwa cakuti cikhulupililo cake cefooka. Yesu enzoziŵa cifukwa cake enzofunika kufwa, ndipo enze wokonzeka kucita zamene izo. (Mat. 16:21; 20:28) Yove enzoziŵa soti kuti pa nthawi ya imfwa yake Yehova akaleke “kumuteteza.” (Yobu 1:10) Tetyo, Yehova eleka kuteteza Yesu kuti yove aoneshe kuti angankhale wokhulupilika olo pa nthawi yakuti wakumana na imfwa yoŵaŵa.—Mko. 14:35, 36.
Ndaŵa yanji Yesu elaŵila mau opezeka mu salimo iyi? Olo kuti tuziŵa lini zenezene, lekani kuti tilaŵizhyane vifukwa vamene payakine niye vecitisha kuti alaŵile mau amene aŵa. *
Kansi mau yecilaŵila Yesu yoonesha kuti Yehova enze kuzoloŵelelapo lini pa imfwa yake? Yesu enzofunika kulipila dipo mosayavyiwa na Yehova. Yove enze munthu ndipo enzofunika kufwa kuti “alaŵe imfwa cifukwa ca munthu aliyense.”—Aheb. 2:9.
Mwa kukata mau atontho a pa lemba ya salimo, kansi Yesu enzofuna kuti ŵanthu ayakine ayambe kuganizila za salimo yonse iyi? Cenze cowanda ngako m’masiku amene ŵala kwa Ayuda kusunga pa mtima mau a masalimo. Akamvwa mau a pa vesi imozi ya salimo, enzokwanisha kukumbukila salimo yonse. Ngati izi niye zeenzofuna kucita Yesu, niye kuti eyavya Ayuda kukumbukila maulosi anyinji opezeka mu salimo yamene iyi onena za imfwa yake. (Sal. 22:7, 8, 15, 16, 18, 24) Ndipo mavesi osilizhyila a salimo iyi otamanda Yehova nofotokoza kuti yove niye Mfumu pacalo conse.—Sal. 22:27-31.
Mwa kukata mau a Davide amene aŵa, kansi Yesu enzoonesha kuti enzeve mlandu? Akaliyopaiwa, Khoti Ikulu ya Ayuda yegamula kuti Yesu enze na mlandu wonyoza Mulungu. (Mat. 26:65, 66) Khoti Ikulu ya Ayuda yekumana kamangu usiku noweluza mlandu wake pamene izi zenze zosaloleka na malamulo a boma. (Mat. 26:59; Mko. 14:56-59) Mwa kulaŵila mau akuti: “Mulungu wangu, Mulungu wangu, ndaŵa yanji mwanisiya?” payakine Yesu enzofuna kuti ŵanthu azindikile kuti aliyocite mlandu wakuti enzofunika kupaiwa.
Kansi Yesu enzokumbusha ayakine kuti olo kuti Davide, wamene elemba salimo iyi, evutika, izi zenzotanthauza lini kuti Yehova eleka kumukonda? Konsho ya Davide yenzoonesha lini kuti cikhulupililo cake cenze cefooka. Pavuli pokonsha konsho iyi, yove elaŵila kuti enzokhulupilila kuti Yehova opulumusa ŵanthu ŵake, ndipo yove epitilizhya kumudalisa. (Sal. 22:23, 24, 27) Molingana na izi, olo kuti Yesu, “Mwana wa Davide,” evutika pa cimuti conzunzikilapo izi zenzotanthauza lini kuti Yehova enzomukonda lini.—Mat. 21:9.
Kansi Yesu enzoonesha cisoni ceenze naco cifukwa cakuti Yehova eleka kumuteteza kuti aoneshe kuti ni wokhulupilika? Cenze lini colinga ca Yehova kuti Mwana wake avutike na kufwa. Koma izi zecitika cifukwa ca kusamvwila kwa Adam na Eva. Yesu aliyocite colakwa ciliconse koma enzofunika kuvutika na kufwa kuti aoneshe kuti Satana ni wawenye koma soti kuti atwale dipo yolipilila vinthu vecitaya munthu woyambilila. (Mko. 8:31; 1 Pet. 2:21-24) Izi sembe zekwanilishiwa tyala ngati Yehova eleka kuteteza Yesu koyamba mu umoyo wake.
Kansi Yesu enzoyesa kuyavya ophunzila ŵake kuti aganizile cifukwa cake Yehova elola kuti yove afwe imfwa yoteti? * Yesu enzoziŵa kuti imfwa yake ya pa cimuti conzunzikilapo monga ni nyankapondo, ikakhumudwishe ŵanthu anyinji. (1 Akor. 1:23) Ngati ophunzila ŵake enze eika maganizo ŵao pa cifukwa cake yove ecifwa, enze kuzomvwishisha tanthauzo ya imfwa yake. (Agal. 3:13, 14) Enze kuzomvwisha kuti yove ni Mpulumusi wao osati nyankapondo.
Mosasamala kanthu za cifukwa cecikatila mau aŵa, Yesu enzoziŵa kuti enzocita cifunilo ca Yehova. Nthawi itontho pavuli pokata mau a mu salimo iyi, Yesu elaŵila kuti: “Nakwanilisha cifunilo canu!” (Yoh. 19:30; Luka 22:37) Kulaŵila cendi, kuziŵa kuti Yehova eleka kuteteza Yesu kwa nthawi itontho, kwemuyavya kukwanilisha cifunilo ca Mulungu cecimutumila pacalo. Izi zemupasa soti mwai wokwanilisha zonse zelembewa zokhuza yove “m’Cilamulo ca Mose, m’zolemba za aneneli na m’Masalimo.”—Luka 24:44
^ par. 2 Onani soti ndime 9 na 10 m’nkhani yakuti “Zatingaphunzile pa Mau a Yesu Osilizhyila” yamene ili m’magazini ino.
^ par. 4 Pa utumiki wake, Yesu payakine enzolaŵila olo kukonsha makonsho amene enzoonesha lini mweenzomvwila. Enzocita izi pofuna kupasa ophunzila ŵake mwai wofotokoza maganizo ŵao.—Mko. 7:24-27; Yoh. 6:1-5; onani Nsanja ya Olonda ya Chichewa ya , October 15, 2010, peji 4 na 5.
