1. Kansi Yehova oona cinji muli ŵanthu ŵake?

YEHOVA MULUNGU “osangalala na ŵanthu ŵake.” (Sal. 149:4) Izi zutisangalasa ngako. Yehova oona minkhalidwe iweme yatili nayo. Oziŵa kuti tingankhale ŵanthu aweme, ndipo otiyavya kunkhala naye pa ushamwali. Tikapitilizhya kunkhala okhulupilika kwa yove, naye apitilizhye kunkhala nase pafupi mpaka kale-kale.​—Yoh. 6:44.

2. Ndaŵa yanji ayakine zuŵavuta kukhulupilila kuti Yehova oŵakonda?

² Ayakine angazikonshe kuti, ‘Nuziŵa kuti Yehova okonda ŵanthu ŵake monga gulu, koma kansi ningasimikizhye tyani kuti onikonda neo paneka?’ Kansi ni cinji cingacitishe ayakine kuzikonsha konsho yamene iyi? Kalongosi Oksana * peenze mwana, evutika ngako. Yove elaŵila kuti: “Nesangalala ngako penebatizika noyamba upainiya. Koma pavuli pa vyaka 15 neyamba kukumbukila vinthu viipa venepitamo nikali mtontho. Neyamba kuganizila kuti Yehova onikonda lini ndipo neyamba kuona kuti n’ne lini munthu woyenelela kukondewa na Yehova.” Kalongosi Yua wamene ekumana soti na mavuto anyinji peenze akali mtontho, elaŵila kuti: “Nezitwala kwa Yehova cifukwa nenzofuna kum’kondwelesha, koma nenze wosimikizhya kuti anganikonde lini.”

3. Kansi tilaŵizhyane cinji m’nkhani ino?

³ Molingana na Akhristu okhulupilika ŵatatomola, namwe mukonda Yehova. Koma payakine mungokaikila kuti naye okukondani. Ndaŵa yanji mufunika kunkhala osimikizhya kuti okukondani? Kansi n’cinji cingakuyavyeni ngati mwayamba kuganiza kuti Yehova okukondani lini? Lomba, tiyeni tipeze mayankho a makonsho aŵa.

4. Ndaŵa yanji kukaikila kuti Yehova otikonda ni kuipa?

⁴ Cikondi cili na mphamvu. Ngati nise osimikizhya kuti Yehova otikonda noticilikiza, tinkhale ofunishisha kumutumikila na mtima wasu wonse olo kuti tukumana na mavuto. Koma ngati tukaikila kuti Mulungu otikonda, “mphamvu zasu zinkhale zitontho.” (Miy. 24:10) Ndipo ngati tingafooke noyamba kuganiza kuti Mulungu otikonda lini, niye kuti tingakwanishe lini kulimbana na mayeselo a Satana.​—Aef. 6:16.

5. Kansi n’cinji cecitikila akwasu na azilongosi ayakine amene enzokhulupilila lini kuti Yehova oŵakonda?

⁵ Ayakine mwa akwasu na azilongosi eyamba kukaikila kuti Yehova oŵakonda, ndipo izi zecitisha kuti cikhulupililo cao cifooke. Mkwasu James wamene ni mkulu, elaŵila kuti: “Olo kuti nenzosangalala kutumikila pa Beteli koma soti kutumikila mumpingo wacilaŵilo ciyakine, nenzokaikila ngati Yehova enzokondwela na zenenzocita. Pa nthawi iyakine neyamba kukaikila ngati Yehova enzoyankha mapemphelo ŵangu.” Kalongosi Eva wamene ali soti mu utumiki wanthawi zonse, elaŵila kuti: “Neona kuti kuganizila kuti Yehova otikonda lini ni kuipa ngako cifukwa kukhuza zonse zatucita pomutumikila. Izi zingacitishe kuti tileke kukonda zinthu zauzimu koma soti zingaticitishe kuleka kusangalala patutumikila Yehova.” Mkwasu Michael, wamene ni mpainiya wanthawi zonse koma soti mkulu, elaŵila kuti: “Ngati tukhulupilila lini kuti Mulungu otikonda, tingayambe kutoleka patontho-patontho nosiya cikhulupililo.”

6. Kansi tufunika kucita cinji ngati tayamba kuganizila kuti Yehova otikonda lini?

⁶ Zecilaŵila kalongosi Eva, zuonesha mwamene kukaikila kuti Yehova otikonda kungakhuzile umoyo wasu wauzimu. Kansi tufunika kucita cinji ngati tayamba kuganiza kuti Yehova otikonda lini? Tufunika kuyacosa maganizo oteti nthawi yamene iyo. Tufunika soti kusenga Yehova kuti aticosele “maganizo aipa” notipasa ‘mtendele wa Mulungu wamene uteteza mitima yasu na maganizo ŵasu.’ (Sal. 139:23; Afil. 4:6, 7) Mukokumbukila kuti ni mweo lini mweka muli na maganizo oteti. Akwasu na azilongosi ayakine nao olimbana na maganizo amene aŵa. Olo atumiki a Yehova akuvuli nao enkhalako na maganizo oteti. Ganizilani zatingaphunzile pa cisanzo ca mtumwi Paulo.

7. Kansi Paulo ekumana na mavuto otyani?

⁷ Kansi nthawi ziyakine muona kuti muli na maudindo anyinji ndipo zukuvutani kucita zonse zamufunikila kucita? Ngati n’tetyo, mungamvwishe mweenzomvwila Paulo. Yove enzodela nkhaŵa osati mpingo umozi, koma “mipingo yonse.” (2 Akor. 11:23-28) Kansi muli na vuto ya thanzi yamene yukulondani cimwemwe? Paulo enze na vuto yamene yenzomuvutisha ngako, payakine yenze vuto ya thanzi ndipo enzofunishisha kuti isile. (2 Akor. 12:7-10) Kansi nthawi ziyakine mukumvwa kufooka cifukwa cosoŵa ungwilo? Naye Paulo enzokumvwa teti nthawi ziyakine. Eziita kuti “munthu wovutika” cifukwa nthawi zonse enzolimbana na kusoŵa ungwilo.​—Aro. 7:21-24.

8. Kansi n’cinji ceyavya Paulo kupilila mavuto yecikumana nayo?

⁸ Olo kuti ekumana na mayeselo koma soti zofookesha zinyinji, Paulo epitilizhya kutumikila Yehova. Kansi n’cinji cemuyavya? Olo kuti enzoziŵa luweme kusoŵa ungwilo kwake, yove enzokhulupilila nsembe ya dipo. Enzoziŵa lonjezo ya Yesu yakuti “aliyense wokhulupilila [Yesu] akankhale na moyo wosasila.” (Yoh. 3:16; Aro. 6:23) Kulaŵila cendi, Paulo enzokhulupilila nsembe ya dipo ya Yesu. Enzokhulupilila soti kuti Yehova ni wofunishisha kukhululukila olo ŵala amene acita macimo akulu, koma alapa.​—Sal. 86:5.

9. Kansi tingaphunzilepo cinji pa mau a Paulo opezeka pa Agalatiya 2:20?

⁹ Paulo enzokhulupilila kuti Mulungu omukonda ngako cifukwa cakuti enzoziŵa kuti etumizhya Yesu kuti amufwile. (Ŵelengani Agalatiya 2:20.) Onani mau olimbikisha amene ali kosilizhyila kwa vesi yamene iyi. Paulo elaŵila kuti: “Mwana wa Mulungu enikonda nozipeleka yeka cifukwa ca neo.” Paulo aliyoone kuti enze munthu muipa ngako cakuti Yehova angamukonde lini. ‘Aliyoganize kuti Mulungu okonda ngako akwake, osati yove.’ Paulo ekumbusha Akhristu a ku Roma kuti: “Petenze ocimwa, Khristu etifwila.” (Aro. 5:8) Cikondi ca Mulungu ciliye malile.

10. Kansi tuphunzilapo cinji pa lemba ya Aroma 8:38, 39?

¹⁰ Ŵelengani Aroma 8:38, 39. Paulo enzoziŵa kuti Mulungu okonda ngako ŵanthu. Yove elemba kuti, “Paliye cingatilekanishe na cikondi ca Mulungu.” Paulo enzoziŵa kuti Yehova enzocita zinthu moleza mtima na Aisiraeli. Enzoziŵa soti mwamene Yehova  emuoneshela cifundo. M’mau ayakine tinganene kuti Paulo enzolaŵila kuti, ‘Ngati Yehova etuma mwana wake kuzonifwila, niye kuti nufunika lini kukaikila kuti onikonda.’​—Aro. 8:32.

11. Olo kuti Paulo ecita macimo monga yotomolewa pa 1 Timoteyo 1:12-15, ndaŵa yanji enze wosimikizhya kuti Mulungu enzomukonda?

¹¹ Ŵelengani 1 Timoteyo 1:12-15. Payakine Paulo enzokumvwa caipa akaganizila zeenzocita kuvuli. N’zosadabwisa kuti eziita kuti niye “wocimwa ngako.” Akaliyophunzila cendi, Paulo enzonzunza Akhristu m’mizinda yosiyanasiyana, kuika ayakine m’jele nocilikiza khoti ngati yatwala cigamulo cakuti ayakine apaiwe. (Mac. 26:10, 11) Cuoneka kuti Paulo enzokumvwa caipa akakumana na Mkhristu wacilumbwana wamene makolo ŵake epaiwa cifukwa ca yove. Paulo enzoziimba mlandu pa vinthu vecicita. Koma enzoziŵa kuti paliye caangacite kuti acinje vinthu vecitika kale. Yove evomelezhya kuti Khristu emufwila ndipo elemba kuti: “Kupitila mu kuwama mtima kukulu kwa Mulungu, nenkhala mwanilili.” (1 Akor. 15:3, 10) Kansi tuphunzilapo cinji? Tikokhulupilila kuti Yesu etifwila ndipo izi zecitisha kuti zinkhale zokwanishika kunkhala pa ushamwali wotang’a na Yehova. (Mac. 3:19) Cofunika ngako kwa Mulungu ni zatukwanisha kucita pali lomba na zati tikacite msogolo, osati zetecita kuvuli olo kuti pa nthawi yamene iyo tenze Mboni ya Yehova kapena yai.​—Yes. 1:18.

12. Kansi mau opezeka pa 1 Yohane 3:19, 20 angatiyavye tyani ngati tulimvwa kuti nise atyalatyala?

¹² Tikaganizila kuti Yesu efwila macimo ŵasu, tingaganize kuti, ‘nise lini oyenelela kulandila mphaso yamtengo wapatali teti.’ Ndaŵa yanji tingamvwe teti? Mtima wasu ungatitalizhye wenye ndipo ungacitishe kuti tikolimvwa kuti nise atyalatyala koma soti osakondewa. (Ŵelengani 1 Yohane 3:19, 20.)  Pa nthawi zoteti, tufunika kukumbukila kuti “Mulungu ni mkulu kupambana mitima yasu.” Olo kuti nthawi ziyakine tingazimvwe kuti Yehova otikonda lini olo kuti angatikhululukile lini, Ausuwasu akululu otikonda ngako ndipo apitilizhye kutikumbukila. Tufunika kukhulupilila kuti Yehova otikonda. Kuti tikwanishe kucita izi, tufunika kuphunzila Mau a Mulungu, kupemphela nthawi zonse nokatizhyana na atumiki a Yehova. Ndaŵa yanji kucita izi n’kofunika?

13. Kansi kuphunzila Mau a Mulungu kungatiyavye tyani? (Onani bokosi yakuti “ Mwamene Mau a Mulungu Oŵayavyila.”)

¹³ Mukophunzila Mau a Mulungu siku iliyonse, ndipo kucita izi kukuyavyeni kuziŵa minkhalidwe iweme inyinji ya Yehova. Muyambe kumvwisha kuti Yehova okukondani ngako. Ngati musinkhasinkha mwakuya zamuŵelenga m’Baibo siku iliyonse, zikuyavyeni “kuongolela zinthu” m’maganizo na mumtima mwanu. (2 Tim. 3:16) Mkwasu Kevin wamene ni mkulu ndipo enzoziona kuti ni watyalatyala, elaŵila kuti: “Kuŵelenga Salimo 103 nosinkhasinkha kweniyavya kuongolela maganizo nomvwishisha mwakunionela Yehova.” Kalongosi Eva, watatomola koyambilila, elaŵila kuti: “Kosilizhyila kwa siku nupatula nthawi yoganizila mwakumvwila Yehova. Izi zunipasa mtendele wa mumtima notang’isha cikhulupililo cangu.”

14. Kansi pemphelo ingatiyavye tyani?

¹⁴ Mukopemphela nthawi zonse. (1 Ates. 5:17) Ngati mufuna kunkhala pa ushamwali na munthu muyakine, mulaŵizhyana naye nthawi zonse nomuuzhya mwamumvwila. N’cimozimozi na ushamwali wasu na Yehova. Ngati tumuuzhya mwatumvwila koma soti maganizo ŵasu m’pemphelo, tuonesha kuti tumudalila koma soti tukhulupilila kuti otikonda. (Sal. 94:17-19; 1 Yoh. 5:14, 15) Kalongosi Yua watatomola koyambilila, elaŵila kuti: “Popemphela nuuzhya Yehova zinyinji osati tyala zacitika pa siku yamene iyo. Numuuzhya zanuganiza na mwanumvwila. Izi zacitisha kuti osati nikoona Yehova monga ni bosi wa pa kampani, koma nikomuona monga Atata amene okonda ŵana ŵake.”​—Onani kabokosi kakuti “ Kansi Mweiŵelengako?”

15. Kansi Yehova oonesha tyani kuti otikonda?

¹⁵ Mukokatizhyana na ashamwali okhulupilika; ove ni mphaso yofumila kwa Yehova. (Yak. 1:17) Ausuwasu akululu oonesha kuti otikonda mwa kutipasa akwasu na azilongosi mumpingo amene “otikonda nthawi zonse.” (Miy. 17:17) M’kalata yake kwa Akolose Paulo etomola mazina ya Akhristu ayakine amene emucilikiza ndipo elaŵila kuti “enzomuyavya nomulimbikisa.” (Akol. 4:10, 11) Naye Yesu Khristu eyamikila thandizo yecilandila kufumila kuli ayake  amene ni angelo koma soti ŵanthu.​—Luka 22:28, 43.

16. Kansi ashamwali okhulupilika angatiyavye tyani kunkhala pa ushamwali wotang’a na Yehova?

¹⁶ Kansi mulandila olo kusenga thandizo kufumila kuli ayanu mumpingo? Kuuzhyako Akhristu ofwikapo mwauzimu za mavuto ŵasu, kutanthauza lini kuti cikhulupililo casu n’cofooka. M’malomwake, kungatiteteze. Ganizilani zecilaŵila mkwasu James watatomola koyambilila. Yove elaŵila kuti: “Kunkhala pa ushamwali wotang’a na Akhristu ofwikapo mwauzimu, kwaniyavya ngako. Ngati nkhaŵa zanipakila, ayangu amene aŵa onimvwishila mosamala noniuzhya kuti onikonda. Izi zuniyavya kuona kuti Yehova onikonda nosamala za neo.” Tetyo, tufunika kunkhala pa ushamwali wotang’a na akwasu na azilongosi.

17-18. Kansi ni ŵani watufunika kumvwila, ndipo ndaŵa yanji?

¹⁷ Satana ofuna kuti tileke kunkhala okhulupilika. Yove ofuna kuti tikokhulupilila kuti Yehova otikonda lini koma soti kuti nise osayenelela kupulumusiwa na Yehova. Monga ni mwataphunzilila m’nkhani ino, tuziŵa kuti zakulaŵila Satana ni zawenye.

¹⁸ Yehova okukondani, ndipo nimwe amtengo wapatali ngako kuli yove. Ngati mumumvwila mupitilizhye “kunkhala m’cikondi cake”mpaka kale-kale monga ni mwecicitila Yesu. (Yoh. 15:10) Osati mukomvwila Satana olo mtima wanu wamene ni wonyenga. M’malomwake mukomvwila Yehova wamene oona ziweme muli seo. Mukokhulupilila kuti “osangalala na ŵanthu ŵake” kuyangizhyilapo mweo.