Mabisiketi ya Tuimbwa Twangu
NICK wamene onkhala ku Oregon, U.S.A, elemba kuti: “Cakoyambilila kwa caka ca 2014, neyamba kuyenda na tuimbwa twangu tuŵili mu tauni ya kwasu. Kanyinji-kanyinji, a Mboni za Yehova enzonkhala pa malo a zamalonda apo n’kuti apanama pafupi na kashelufu ka mabuku. Enzovwala bwino ndipo enzopasa moni munthu aliyense mwaubwenzi.
“A Mboni aŵa, enzoonesha kuwama mtima osati ku ŵanthu tyala, koma na ku tuimbwa twangu. Siku iyakine, Elaine wamene enze epanama pafupi na kashelufu ka mabuku, epasa tuimbwa twangu mabisiketi. Kufumila siku yamene iyo, tuimbwa twangu twenzocita kuti nthawi zonse tikafwika pafupi na malo aŵa, twenzoutukila kuli a Mboni kuti tukalye mabisiketi.
“Miyezi inyinji yepitapo. Tuimbwa twangu twenzosangalala kulya mabisiketi. Nane nenzosangalala kukambisilana mwacidule zokhuza Baibo na a Mboni za Yehova. Koma nenzofuna lini kulaŵizhyana nao zinyinji. Nenze na vyaka vopitilila pa 70, ndipo nenzoziŵa lini zakukhulupilila a Mboni. Pofwana kuti nenze wokhumudwa na zocita za machechi acikhristu, nenzoona kuti cenze bwino kuti nikophunzila Baibo paneka.
“Pa nthawi iyi, nenzokumana soti na a Mboni za Yehova ayakine m’malo osiyanasiyana a tauni yasu apo n’kuti apanama pafupi na kashelufu ka mabuku. Nao enzooneka aubwenzi. Ndipo nthawi zonse nikaŵakonsha konsho, enzoniyankha poseŵenzesha Baibo. Izi zecitisha kuti niyambe kuŵakhulupilila ngako.
“Siku iyakine, Elaine enikonsha kuti: ‘Kansi mukhulupilila kuti vinyama ni mphaso yofumila kwa Mulungu?’ Neyankha kuti: ‘Eee nukhulupilila.’ Pavuli pake, Elaine eniŵelengela Yesaya 11:6-9. Kufumila siku iyi, nenkhala na cifuno cophunzila zinyinji zokhuza Baibo, olo kuti nenzokana kulandila zofalisa.
“M’masiku okonkhapo nenzosangalala kulaŵizhyana mwacidule nkhani za m’Baibo na Elaine koma soti mulume wake Brent. Enilimbikisha kuti nikaŵelenge Baibo kuyambila pa lemba ya Mateyu mpaka Machitidwe kuti niziŵe zanufunika kucita kuti ninkhale Mkhristu wacendi. Tetyo, izi niye zenecita. Pofwika mu cisalo ca caka ca 2016, nevomela kuyamba kuphunzila Baibo na Brent koma soti Elaine.
“Nthawi zonse nenzoyembekezela mwacidwi kuphunzila Baibo koma soti kupezeka pa misonkhano ku Ng’anda ya Ufumu. Nenzosangalala ngako kuphunzila cendi ca m’Baibo. Ndipo pavuli pa caka cimozi, nebatizika. Lomba nili na vyaka 79, ndipo nuyamikila ngako Yehova poniyavya kupeza cipembezo cacendi. Yehova wanidalisa mwa kuniyavya kunkhala mbali ya banja yake ya atumiki okhulupilika.”
