1. N’cinji cutipasa cimwemwe cikulu?

 YEHOVA ofuna kuti tikonkhala osangalala. Tuziŵa mfundo iyi cifukwa cakuti cimwemwe ni mbali ya minkhalidwe ya mzimu utuŵa. (Aga. 5:22) Pofwana kuti kupasa kuleta cimwemwe cikulu kupambana kulandila, tupeza cimwemwe cikulu ngati tutolako mbali pa nchito yolalikila noyavya Akhristu ayasu m’njila zosiyanasiyana.​—Mac. 20:35.

2-3. (a) Molingana na Agalatiya 6:4, kansi ni mfundo ziŵili zotyani zamene zingatiyavye kupitilizhya kutumikila Yehova mwacimwemwe? (b) Kansi tilaŵizhyane cinji m’nkhani ino?

² Pa Agalatiya 6:4, mtumwi Paulo efotokoza mfundo ziŵili zamene zingatiyavye kupitilizhya kunkhala acimwemwe. (Ŵelengani.) Yoyamba, tufunika kucita zonse zatingakwanishe potumikila Yehova. (Mat. 22:36-38) Yaciŵili, tufunika kupewa kuzilinganizhya na ŵanthu ayakine. Tufunika kuyamikila Yehova pa zilizonse zatukwanisha kucita m’gulu yake cifukwa ca thanzi, maphunzilo olo maluso yatili nayo. Ndipo mfundo iyi niyomvwika cifukwa zilizonse zatukwanisha kucita ni mphaso yofumila kwa yove. Kuyangizhyila apo, ngati ayakine ocita bwino mbali ziyakine za utumiki kupambana seo, tufunika kusangalala poziŵa kuti oseŵenzesha maluso ŵao potamanda Yehova osati pofuna kuti achuke. Tetyo, m’malo mopikishana nao, tufunika kutolela cisanzo cao.

³ M’nkhani ino, tione zatingacite ngati tuzimvwa kuti tucita lini zinyinji potumikila Yehova. Tione soti mwatingaseŵenzeshele maluso yaliyonse yatili nayo na zatingaphunzile kufumila pa cisanzo ca ayakine.

4. Kansi ni zocitika zotyani zamene zingatifookeshe? Fotokozani cisanzo.

⁴ Akhristu ayakine okwanisha lini kucita zinyinji potumikila Yehova cifukwa ca ukulukazi olo matenda. Ndipo izi zuŵacitisha kuti afooke. Izi niye zecitikila kalongosi Carol. Pa nthawi iyakine, yove enze na mwai wotumikila mumpingo mwamene mwenzofunikila alaliki anyinji a uthenga uweme. Pa nthawi iyo, enzosogoza maphunzilo a Baibo okwanila 35, ndipo anyinji mwa maphunzilo aŵa ezipeleka kwa Yehova nobatizika. Koma mosapita nthawi, eyamba kulwala ndipo enzokwanisha lini kucoka pa ng’anda. Kalongosi Carol elaŵila kuti: “Nuziŵa kuti nukwanisha lini kucita zinyinji monga ni mwakucitila ayakine cifukwa cakuti nulwala. Koma nthawi ziyakine nuzimvwa kuti niliye cikhulupililo cotang’a monga ni caali naco ayangu. Nukwanisha lini kucita zonse zanufuna kucita potumikila Yehova, ndipo izi zunifookesha.” Monga ni mwataonela, kalongosi uyu ofuna kucita zonse zaangakwanishe potumikila Yehova. Ndipo tukaikila lini kuti Yehova oyamikila ngako cifukwa ca mzimu waali nao.

5. (a) Kansi tufunika kukumbukila cinji ngati tuona kuti tucita lini zinyinji potumikila Yehova? (b) Molingana na vithunzithunzi, n’cinji cuonesha kuti mkwasu aliyoleke kucita zonse zaangakwanishe potumikila Yehova?

⁵ Ngati nthawi ziyakine tukumvwa kuti tucita lini zinyinji potumikila Yehova, tingacite bwino kukumbukila mfundo yakuti Yehova ofuna kuti tikocita zonse zatingakwanishe kulingana na mwazilili zinthu pa umoyo wasu. Ganizilani cocitika ici: Kalongosi wamene ali na vyaka va m’ma 80 okumvwa kuti ocita lini zinyinji mu utumiki kulinganizhya na mweenzocitila peenze na vyaka va m’ma 40. Ndipo oganiza kuti olo kuti ocita zilizonse zaangakwanishe mu utumiki, n’zosakwanila kwa Yehova. Koma ganizilani izi: Ngati kalongosi uyu enzocita khama peenze na vyaka va m’ma 40 ndipo opitilizhya kucita khama olo kuti ali na vyaka va m’ma 80, niye kuti aliyoleke kucita zonse zaangakwanishe potumikila Yehova. Tetyo, ngati tuona kuti tucita lini zinyinji potumikila Yehova, tikokumbukila kuti yove oyamikila zilizonse zatucita kulingana na mwazilili zinthu pa umoyo wasu. Ndipo otiuzhya kuti: ‘Ucita bwino.’​—Linganizhyani na Mateyu 25:20-23.

6. Kansi tuphunzilapo cinji pa cisanzo ca kalongosi Maria?

⁶ Tingankhale acimwemwe ngati tuika maganizo ŵasu pa zinthu zatingakwanishe kucita, osati pa zinthu zamene tingakwanishe lini. Ganizilani cisanzo ca kalongosi Maria wamene okwanisha lini kucita zinyinji mu utumiki cifukwa cakuti olwala. Poyamba, izi zenzomucitisha kuti akoziona kuti ni watyalatyala. Koma m’kuluta kwa nthawi ekumbukila kuti mumpingo mwao muli kalongosi wamene okwanisha lini kuuka cifukwa olwala matenda akulu. Tetyo, kalongosi Maria epanga makonzedwe akuti akocita ulaliki wa pa foni na wa makalata na kalongosi wamene uyu. Kalongosi Maria elaŵila kuti: “Nthawi zonse nikasilizhya kulalikila na kalongosi uyu, nusangalala ndipo nunkhala wokhutila poziŵa kuti numuyavya kuti akotolako mbali pa nchito yolalikila.” Nase tingayangizhyile cimwemwe casu ngati tuika maganizo ŵasu pa zinthu zatukwanisha kucita osati pa zinthu zamene tingakwanishe lini. Nanga tyani ngati tili na luso iyakine yamene tingaiseŵenzeshe pocilikiza gulu ya Mulungu?

7. Kansi mtumwi Petulo epeleka malangizo otyani kuli Akhristu ayake?

⁷ M’kalata yake yoyambilila, mtumwi Petulo elimbikisha Akhristu ayake kuti enzofunikila kuseŵenzesha mphaso koma soti maluso alionse yeenze nayo polimbikisha olambila ayao. Yove elemba kuti: “Kulingana  na mphaso yawapasiwa aliyense, iseŵenzesheni potumikilana monga oyanganila abwino amene mwalandila kuwama mtima kukulu kwa Mulungu.” (1 Pet. 4:10) Tetyo, tufunika kuseŵenzesha mphaso koma soti maluso alionse yecitipasa Yehova mofwikapo. Tufunika kupewa maganizo akuti ngati tucita izi, ŵanthu ayakine angayambe kuticitila nsanje olo angafooke. Ngati tingaleke kucita zilizonse zatingakwanishe cifukwa ca maganizo oteti, niye kuti tupasa lini Yehova zonse zatili nazo.

8. Molingana na 1 Akorinto 4:6, 7, ndaŵa yanji tufunika kupewa kuzioneshela na mphaso zatili nazo?

⁸ N’cendi kuti tufunika kuseŵenzesha mphaso na maluso yatili nayo mofwikapo. Koma tufunika kunkhala osamala kuti tisayambe kulikuzhya cifukwa ca maluso ŵasu. (Ŵelengani 1 Akorinto 4:6, 7.) Mwacisanzo, payakine tingankhale na luso yoyambisha maphunzilo a Baibo. Tufunika kuseŵenzesha luso iyi mofwikapo. Koma tufunika kupewa kuyamba kulikuzhya cifukwa ca luso iyi. Tiyelekezele kuti pemweluta mu ulaliki, mwekumana na munthu wacidwi ndipo mweyambisha phunzilo ya Baibo. Mosakaikila, mungankhale wofunishisha kuuzhyako ayakine m’kagulu kanu za cokumana naco ici. Lomba ganizilani kuti pamwaluta ku makambisilano a utumiki, mwapeza kuti kalongosi muyakine ofotokozela ofalisa a m’kagulu kanu kuti ekumana na munthu wacidwi ndipo ekwanisha kumugaŵila magazini. Yove ekwanisha kugaŵila tyala magazini koma mweo mweyambisha phunzilo ya Baibo. Lomba kansi mungacite cinji? N’cendi kuti ayakine angapindule kumvwa cokumana naco canu. Koma mungacite bwino kuyembekeza kuti mukafotokoze cokumana naco canu pa ulwendo uyakine poyopa kuti mungacitishe kalongosi wamene ekwanisha kugaŵila tyala magazini kuzimvwa kuti aliye luso ngako polinganizhya na mweo. Ngati mungacite izi, mungaoneshe kuti nimwe wolicefya koma soti muganizila ayakine. Koma mufunika lini kuleka kuyambisha maphunzilo a Baibo. Yehova ekupasani mphaso, tetyo iseŵenzesheni.

9. Kansi tufunika kuseŵenzesha tyani maluso ŵasu?

⁹ Tikokumbukila kuti maluso alionse atili nao ni mphaso yofumila kwa Mulungu. Tufunika kuseŵenzesha maluso aŵa potang’isha mpingo osati pofuna kuti tichuke. (Afil. 2:3) Ngati tuseŵenzesha maluso ŵasu pocita cifunilo ca Mulungu, tinkhale na cifukwa cosangalalila osati cifukwa cakuti tupambana ayakine, koma cifukwa cakuti tuyaseŵenzesha potamanda Yehova.

10. Ndaŵa yanji n’cinthu lini canzelu kuzilinganizhya na ayakine?

¹⁰ Ngati tingasamale lini, tingayambe kulinganizhya  zinthu zatucita bwino na zifooko za ayakine. Mwacisanzo, tingankhale na luso yokamba bwino nkhani za onse. Ndipo tingayambe kuzilinganizhya na mkwasu muyakine wamene ovutika kukamba bwino nkhani za onse. Koma mkwasu uyu angocita bwino mbali ziyakine monga kuceleza, kuphunzisa bwino ŵana ŵake olo kucita khama pa nchito yolalikila. Tuyamikila ngako cifukwa tili na akwasu na azilongosi anyinji amene oseŵenzesha maluso ŵao potumikila Yehova na Akhristu ayao.

11. Ndaŵa yanji tufunika kuyesayesa kutolela cisanzo ca Yesu?

¹¹ Olo kuti tufunika kupewa kuzilinganizhya na ŵanthu ayakine, tingaphunzile zinyinji kufumila pa cisanzo cao. Mwacisanzo, olo kuti Yesu ni wangwilo, tingapindule ngati tutolela minkhalidwe yake iweme na mweenzocitila zinthu. (1 Pet. 2:21) Ngati tuyesayesa kutolela cisanzo cake, tinkhale na minkhalidwe iweme ndipo tiyangizhyile luso yasu mu utumiki.

12-13. Kansi tuphunzilapo cinji pa cisanzo ca Mfumu Davide?

¹² M’Baibo muli visanzo vinyinji va anakazi na analume okhulupilika amene enzeve ungwilo, koma enzoonesha minkhalidwe iweme yamene nase tingatoleleko. (Aheb. 6:12) Ganizilani cisanzo ca Mfumu Davide wamene Yehova emuita kuti “munthu wa pamtima pangu.” Baibo iyakine, yemasulila mau aŵa kuti “munthu wamene nukondwela naye ngako.” (Mac. 13:22) Koma Davide enzeve ungwilo, ndipo pa nthawi iyakine ecita macimo akulu-akulu. Olo n’tetyo, yove ni cisanzo cabwino ngako catufunika kutolela. Talaŵila teti cifukwa pecipasiwa uphungu, Davide aliyopeleke vifukwa vozikhululukila. M’malo mwake, elandila uphungu wamphamvu wecipasiwa nolapa mofumila pansi pamtima. Cifukwa ca izi, Yehova emukhululukila.​—Sal. 51:3, 4, 10-12.

¹³ Kansi tuphunzilapo cinji pa cisanzo ca Davide? Tingacite bwino kuzikonsha kuti: ‘Kansi nucitanji ngati napasiwa uphungu? Kansi nuvomelezhya zinthu zanalakwisa olo nupeleka vifukwa vozikhululukila? Kansi nuimba mlandu ayakine pa zinthu zanalakwisa? Kansi nuyesayesa kuti nisawelezhyepo soti zinthu zaniliyocite bwino?’ Ngati tuŵelenga nkhani za atumiki ayakine okhulupilika amene otomolewa m’Baibo, tufunika kuzikonsha kuti: ‘Kansi ekumana na mavuto monga ni yanukumana nayo neo? Kansi eonesha minkhalidwe iweme yotyani?’ Pa cisanzo ca munthu aliyense watuŵelenga tufunika kuzikonsha kuti: ‘Kansi ningacitenji kuti nitolele cisanzo cake?’

14. Kansi tingapindule tyani na cisanzo ca akwasu na azilongosi?

 ¹⁴ Tingapindule soti ngako ngati tutolela cisanzo ca Akhristu ayasu kaya ni acikulile olo acilumbwana. Tingacite bwino kuzikonsha kuti: ‘Kansi mumpingo mwasu muliko Mkhristu wamene opitilizhya kutumikila Yehova mokhulupilika olo kuti osushiwa na abanja ŵake, ali na thanzi yofooka olo osonkhezelewa na ayake kuti acite vinthu viipa? Kansi ni minkhalidwe yotyani yakuonesha Mkhristu uyu yaningatoleleko?’ Kucita izi kungatiyavye kuti tiziŵe zatingacite ngati nase tingakumane na mavuto monga ni yakukumana nayo Mkhristu wamene uyu. Ndipo tuyamikila ngako cifukwa tili na akwasu na azilongosi amene ni cisanzo ciweme pa nkhani yonkhala okhulupilika.​—Aheb. 13:7; Yak. 1:2, 3.

15. Kansi mtumwi Paulo epeleka malangizo otyani amene angatiyavye kupitilizhya kutumikila Yehova mwacimwemwe?

¹⁵ Kuti mumpingo mupitilizhye kunkhala mtendele na mgwilizano, aliyense wa seo ofunika kucita zonse zaangakwanishe potumikila Yehova. Ganizilani cisanzo ca Akhristu a m’vyaka 100 voyambilila. Ove enze na maluso koma soti mautumiki osiyanasiyana. (1 Akor. 12:4, 7-11) Koma izi ziliyoŵacitishe kuti ayambe mpikishano na magaŵano. Mtumwi Paulo eŵalimbikisha kuti aliyense akocita zofunikila kuti “amange muŵili wa Khristu.” Paulo elembela Akhristu a ku Efeso kuti: “Ngati ciwalo ciliconse cucita nchito yake yoyenelela, muŵili wonse ukula pozimanga weka mwacikondi.” (Aef. 4:1-3, 11, 12, 16) Ŵala amene ekonkha malangizo aya, enzocilikiza mtendele na mgwilizano. Izi niye zakucita akwasu na azilongosi masiku ŵano.

16. Kansi mwasimikizhya mtima kucita cinji? (Aheberi 6:10)

¹⁶ Monga ni mwataonela m’nkhani ino, tufunika kupewa kuzilinganizhya na ŵanthu ayakine. M’malo mwake, tufunika kuphunzila minkhalidwe ya Yesu noyesayesa kutolela cisanzo cake. Tufunika soti kuphunzila visanzo va atumiki okhulupilika otomolewa m’Baibo na a masiku ŵano. Ngati tupitilizhya kucita zilizonse zatingakwanishe, Yehova atidalise cifukwa ‘ni wolungama ndipo angaluŵe lini nchito zasu.’ (Ŵelengani Aheberi 6:10.) Tetyo, pitilizhyani kutumikila Yehova mwacimwemwe poziŵa kuti oyamikila zilizonse zamukwanisha kucita pomutumikila.