1-2. Kansi tufunika kucitanji patuyembekeza calo calomba?

 TUSANGALALA ngako na lonjezo ya Yehova yakuti akaononge calo cino ciipa noleta calo calomba colungama. (2 Pet. 3:13) Olo kuti tuziŵa lini kuti ni lini pati ikakwanilishiwe lonjezo iyi, tili na umboni wamene utionesha kuti kwasala patontho kuti ikwanilishiwe.​—Mat. 24:32-34, 36; Mac. 1:7.

² Mosasamala kanthu kuti tankhala m’cendi kwa nthawi itali tyani, tonse tufunika kutang’isha cikhulupililo casu pa lonjezo iyi. Ndaŵa yanji? N’cifukwa cakuti olo cikhulupililo cotang’a, nthawi ziyakine cingafooke. Paulo elaŵila kuti kusoŵa cikhulupililo ni “cimo yamene yutikasha mosavuta.” (Aheb. 12:1) Kuti cikhulupililo casu cisafooke, tufunika kusinkhasinkha pa maumboni yotionesha kuti calo calomba casala patontho kuti ciwele.​—Aheb. 11:1.

3. Kansi tilaŵizhyane cinji m’nkhani ino?

³ M’nkhani ino, tilaŵizhyane njila zitatu mwatingatang’ishile cikhulupililo casu pa lonjezo ya Yehova ya calo calomba: (1) mwa kusinkhasinkha pa dipo, (2) mwa kusinkhasinkha pa mphamvu za Yehova na (3) mwa kucita zinthu zauzimu. Pavuli pake, tilaŵizhyane mwamene uthenga wamene Yehova euzhya Habakuku ungatang’ishile cikhulupililo casu masiku ŵano. Koma tiyeni tiyambe mwa kulaŵizhyana vinthu vatingakumane navo pali lomba vamene vingafune kuti tinkhale na cikhulupililo cotang’a pa lonjezo ya calo calomba.

 VINTHU VAMENE VINGAFUNE KUTI TINKHALE NA CIKHULUPILILO COTANG’A

4. Ni zosankha zotyani zamene zufuna cikhulupililo cotang’a?

⁴ Siku iliyonse, tupanga zosankha zamene zufuna cikhulupililo cotang’a. Mwacisanzo, tupanga zosankha pa nkhani yokhuza mayanjano, zosangulusha, maphunzilo, cikwati, ŵana na nchito. Tingacite bwino kuzikonsha kuti, ‘Kansi zosankha zangu zuonesha kuti nuziŵa kuti lombapano calo cino cionongewe noloŵewa m’malo na calo calomba ca Mulungu? Olo kansi nusonkhezelewa na ŵanthu amene okhulupilila lini kuti angankhale na moyo mpaka kale-kale?’ (Mat. 6:19, 20; Luka 12:16-21) Tingapange zosankha zanzelu ngati tutang’isha cikhulupililo casu pa lonjezo yakuti calo calomba cili pafupi.

5-6. Ndaŵa yanji tufunika cikhulupililo cotang’a pa nthawi ya mavuto? Fotokozani cisanzo.

⁵ Tukumana soti na mayeselo yamene yangafune kuti tinkhale na cikhulupililo cotang’a. Tingakumane na cinzunzo, matenda akulu koma soti zinthu ziyakine zamene zingatifookeshe. Poyamba, tingaone monga kuti tingakwanishe kupilila mavuto yasu. Koma kanyinji-kanyinji, mavuto aŵa otola nthawi itali kuti yasile. Tetyo, tufunika kunkhala na cikhulupililo cotang’a kuti tikwanishe kupilila nopitilizhya kutumikila Yehova mwacimwemwe.​—Aro. 12:12; 1 Pet. 1:6, 7.

⁶ Patukumana na mayeselo, tingaone monga kuti calo calomba cikawele lini. Kansi izi zutanthauza kuti cikhulupililo casu n’cofooka? Yai. Ganizilani cisanzo ici. M’nthawi yamphepo, nthawi ziyakine tingaone monga kuti nthawi yakupya iwele lini. Koma m’kuluta kwa nthawi yuwela. Molingana na izi, ngati tafooka tingaone monga kuti calo calomba cikawele lini. Koma ngati cikhulupililo casu n’cotang’a, tuziŵa kuti malonjezo onse a Mulungu akakwanilishiwe. (Sal. 94:3, 14, 15; Aheb. 6:17-19) Ngati tili na cidalilo ici, tingapitilizhye kuika kulambila kwasu pasogolo mu umoyo wasu.

7. Kansi tufunika kusamala na cinji?

⁷ Tufunika soti kunkhala na cikhulupililo cotang’a patucita nchito yolalikila. Ŵanthu anyinji ŵatulalikila oona kuti “uthenga uweme” wokhuza calo calomba ca Mulungu, ni nthano tyala. (Mat. 24:14; Ezek. 33:32) Tufunika kunkhala osamala kuti osati tikokaikila vinthu vakutiphunzisa Yehova monga ni mwakucitila ŵanthu aŵa. Kuti izi zisaticitikile, tufunika kupitilizhya kutang’isha cikhulupililo casu. Lomba, tiyeni tilaŵizhyane njila zitatu mwatingacitile izi.

MUKOSINKHASINKHA PA DIPO

8-9. Kansi kusinkhasinkha pa dipo kungatang’ishe tyani cikhulupililo casu?

⁸ Njila imozi mwatingatang’ishile cikhulupililo casu ni mwa kusinkhasinkha pa nsembe ya dipo. Dipo yutisimikizhyila kuti malonjezo a Mulungu akakwanilishiwe. Ngati tuganizila mosamala cifukwa cake dipo yepelekewa koma soti zecicita Mulungu kuti nsembe iyi ipelekewe, tutang’isha cikhulupililo casu cakuti lonjezo ya Mulungu ya calo ciweme ikakwanilishiwe. Ndaŵa yanji talaŵila teti?

⁹ Kansi Yehova ecitanji kuti dipo ipelekewe? Yove etuma Mwana wake woyamba wokondeka kufuma kululu kuti azevyalike pacalo monga munthu wangwilo. Peenze pacalo, Yesu epilila mavuto yosiyanasiyana. Pavuli pake, evutika nokufwa imfwa yoŵaŵa. Kulaŵila cendi, Yehova epeleka nsembe yamtengo wapatali. Mulungu wasu wacikondi sembe aliyolole Mwana wake kuti avutike na kufwa kuti tinkhale na umoyo uweme koma ufupi. (Yoh. 3:16; 1 Pet. 1:18, 19) Pofwana kuti Yehova epeleka Mwana wake wokondeka pofuna  kutiyavya, tingankhale osimikizhya kuti akakwanilishe lonjezo yakuti tikankhale na moyo wosasila m’calo calomba.

MUKOSINKHASINKHA PA MPHAMVU ZA YEHOVA

10. Molingana na Aefeso 3:20, kansi Yehova okwanisha kucita cinji?

¹⁰ Njila yaciŵili yatingatang’ishilemo cikhulupililo casu ni mwa kusinkhasinkha pa mphamvu za Yehova. Yove ali na mphamvu zokwanilisha malonjezo ŵake onse. N’cendi kuti ŵanthu anyinji masiku ŵano oona kuti lonjezo ya calo calomba ingakwanilishiwe lini. Koma kanyinji-kanyinji, Yehova olonjeza kuti acite vinthu vamene ŵanthu angavikwanishe lini kucita. Okwanisha kucita izi cifukwa ni Mulungu Wamphamvuzonse. (Yobu 42:2; Mko. 10:27) Tetyo, tudabwa lini ngati watilonjeza vinthu vamene vingaoneke monga vingacitike lini.​—Ŵelengani Aefeso 3:20.

11. Fotokozani ayakine mwa malonjezo a Yehova amene enzooneka monga angakwanilishiwe lini. (Onani kabokosi kakuti  “Malonjezo Ayakine Amene Enzooneka Monga Angakwanilishiwe Lini, Ekwanilishiwa.”)

¹¹ Ganizilani vinthu viyakine vamene Yehova elonjeza atumiki ŵake a m’nthawi zakuvuli vamene venzooneka monga vingakwanishike lini. Yove euzhya Abulahamu na Sara kuti enze kuzonkhala na mwana olo kuti enze akulukazi. (Gen. 17:15-17) Euzhya soti Abulahamu kuti mbadwa zake enze kuzozipasa calo ca Kanani. Aisiraeli amene enze mbadwa za Abulahamu peenze akapolo ku Iguputo, payakine zenzooneka monga kuti lonjezo iyi ingakwanilishiwe lini. Koma Yehova eikwanilisha. M’kuluta kwa nthawi, Yehova elaŵila kuti Elizabeti enze kuzonkhala na mwana olo kuti enze mkulukazi. Euzhya soti Mariya wamene enze ndola kuti enze kuzovyala Mwana wa Mulungu. Izi zenze kuzokwanilisha lonjezo ya Yehova yecipanga vyaka masauzande kuvuli m’munda wa Edeni.​— Gen. 3:15.

12. Kansi Yoswa 23:14 na Yesaya 55:10, 11, yutisimikizhyila cinji ponena za mphamvu za Yehova?

¹² Tikaganizila za malonjezo yonse yecipanga Yehova na mweciyakwanilishila, zutisimikizhyila kuti ali na mphamvu zikulu. Izi zutang’isha cikhulupililo casu cakuti akalete calo calomba. (Ŵelengani Yoswa 23:14; Yesaya 55:10, 11.) Ndipo zutiyavya kunkhala okonzeka kuyavya ayakine kuti akokhulupilila kuti lonjezo ya calo calomba ni nthano lini tyala. Ponena za kululu kwalomba na calo calomba, Yehova elaŵila kuti: “Mau aŵa ni odalilika koma soti acendi.”​—Chiv. 21:1, 5.

MUKOCITA ZINTHU ZAUZIMU

13. Kansi misonkhano ya mpingo ingatang’ishe tyani cikhulupililo casu? Fotokozani.

¹³ Njila yacitatu yatingatang’ishilemo cikhulupililo casu ni mwa kucita zinthu zauzimu. Mwacisanzo, ganizilani mwatupindulila na misonkhano ya mpingo. Kalongosi Anna, wamene wacitako mautumiki anthawi zonse osiyanasiyana kwa vyaka vinyinji, elaŵila kuti: “Misonkhano yuniyavya kutang’isha cikhulupililo cangu. Olo kuti wokamba nkhani angankhale aliye luso yophunzisa olo aliyolaŵile mfundo iliyonse yalomba, nthawi zinyinji numvwishila mphela ku mfundo ziyakine zamene zuniyavya kumvwisha bwino cendi ca m’Baibo. Izi zutang’isha cikhulupililo cangu.” b Kuyangizhyila apo, cikhulupililo casu cutang’ilako tikamvwishila ndemanga zakufotokoza akwasu na azilongosi pa misonkhano.​—Aro. 1:11, 12; 10:17.

14. Kansi nchito yolalikila yutang’isha tyani cikhulupililo casu?

¹⁴ Tingatang’ishe soti cikhulupililo casu ngati tutolamo mbali mu nchito yolalikila.  (Aheb. 10:23) Kalongosi Barbara wamene wankhala otumikila Yehova kwa vyaka vopitilila 70, elaŵila kuti: “Nthawi zonse nuona kuti nchito yolalikila yutang’isha cikhulupililo cangu. Ngati nuuzhyako ayakine malonjezo a Yehova, cikhulupililo cangu cutang’ilako.”

15. Kansi phunzilo ya paseka yutang’isha tyani cikhulupililo casu? (Onani soti vithunzithunzi.)

¹⁵ Cinthu ciyakine camene cingatiyavye kutang’isha cikhulupililo casu ni kucita phunzilo ya paseka. Kalongosi Susan oona kuti kukonkha ndandanda yocita phunzilo ya payeka kwamuyavya ngako. Yove elaŵila kuti: “Pa Sondo, nukonzekela Phunzilo ya Nsanja ya Mulonda ya wiki ikuza. Pa Mande na pa Ciŵili nukonzekela misonkhano ya mkati mwa wiki. Ndipo masiku osala nucita phunzilo ya paneka.” Cifukwa cakuti okonkha ndandanda yake yocita phunzilo ya payeka, kalongosi Susan opitilizhya kutang’isha cikhulupililo cake. Kalongosi Irene wamene watumikila ku likulu yasu kwa vyaka vinyinji, elaŵila kuti kuphunzila maulosi a m’Baibo kutang’isha cikhulupililo cake. Eciti: “Nucita cidwi ngako poona kuti maulosi a Yehova okwanilishiwa olo mbali zitontho-zitontho.” c

“YAKWANILISHIWE”

16. Ndaŵa yanji mau amene Yehova euzhya Habakuku okata soti nchito kuli seo masiku ŵano? (Aheberi 10:36, 37)

¹⁶ Ayakine mwa atumiki a Yehova, ankhala oyembekezela masilizhyilo a calo cino ciipa kwa nthawi itali. M’kaonedwe ka umunthu, payakine tingaone monga kuti Mulungu ocelwa kukwanilisha malonjezo ŵake. Koma Yehova oziŵa mwatumvwila. Niye cifukwa cake esimikizhyila mneneli Habakuku kuti: “Mensomphenya aya yoyembekezela nthawi yake yoikiwilatu koma soti youtukila kosilizhyila kwake, ndipo yatale lini wenye. Olo kuti mensomphenya aya yacelwe, pitilizhya kuyayembekezela cifukwa yakwanilishiwe. Yacelwe  lini.” (Hab. 2:3) Kansi Mulungu elaŵila mau aŵa kuti alimbikishe tyala Habakuku? Olo kansi mau aŵa okata soti nchito kuli seo masiku ŵano? Mouzhyiliwa, mtumwi Paulo eonesha kuti mau aŵa okata soti nchito kuli Akhristu amene oyembekezela calo calomba. (Ŵelengani Aheberi 10:36, 37.) Tetyo, tingankhale osimikizhya kuti olo kuti lonjezo ya Yehova yakuti akatipulumuse ingaoneke monga yucelwa, ‘ikwanilishiwe. Icelwe lini.’

17. Kansi kalongosi muyakine eseŵenzesha tyani malangizo amene Yehova euzhya Habakuku?

¹⁷ Atumiki a Yehova anyinji aseŵenzesha malangizo a Yehova akuti “pitilizhya kuyayembekezela.” Ayakine acita izi kwa vyaka vinyinji. Mwacisanzo, kalongosi Louise eyamba kutumikila Yehova mu 1939. Yove elaŵila kuti: “Pa nthawi iyi, nenzoona monga kuti Aramagedo iwele nikaliyosilizhya sukulu. Koma izi ziliyocitike. Kwa vyaka, nankhala nuŵelenga nkhani za m’Baibo zokhuza ŵanthu amene eyembekezela Yehova kuti akwanilishe malonjezo ŵake. Nuŵelenga nkhani ya Nowa, Abulahamu, Yosefe na ayakine amene eyembekezela nthawi itali kuti alandile mphoto yeciŵalonjeza Yehova. Izi zaniyavya kuti nipitilizhye kuyembekezela Yehova kuti akwanilishe malonjezo ŵake. Kukhulupilila kuti malonjezo a Yehova akakwanilishiwe kwayavya neo na ayakine kunkhala osimikizhya kuti calo calomba cili pafupi.” Atumiki a Yehova anyinji amene atumikila kwa nthawi itali okatizhyana nayo mfundo iyi.

18. Kansi kulolesha vinthu va m’cilengedwe kungatang’ishe tyani cikhulupililo casu cokhuza calo calomba?

¹⁸ N’cendi kuti calo calomba cikaliyowela. Koma ganizilani vinthu vamene vilipo monga nyenyezi, vimiti, vinyama na ŵanthu. Paliye munthu angakaikile kuti vinthu ivi vilipo mosasamala kanthu kuti pa nthawi iyakine venzepo lini. Vilipo tyala, cifukwa cakuti Yehova niye evilenga. (Gen. 1:1, 26, 27) Mulungu wasu walonjeza soti kuti akalete calo calomba. Yove akakwanilishe lonjezo iyi. M’calo calomba, ŵanthu akasangalale na moyo wosasila koma soti thanzi yangwilo. Tingankhale osimikizhya kuti calo calomba cikawele pa nthawi yoikiwilatu ya Mulungu.​—Yes. 65:17; Chiv. 21:3, 4.

19. Kansi mungatang’ishe tyani cikhulupililo canu?

¹⁹ Pali lomba, mukocita zonse zamungakwanishe kuti mutang’ishe cikhulupililo canu. Nthawi zonse mukoyamikila nsembe ya dipo. Mukosinkhasinkha pa mphamvu za Yehova. Ndipo mukocita zinthu zauzimu. Ngati mucita izi, munkhale pa gulu ya “ŵanthu amene mwacikhulupililo na kuleza mtima olandila zinthu zecilonjeza Mulungu monga coloŵa cao.”​—Aheb. 6:11, 12; Aro. 5:5.