1. Ndaŵa yanji tuyankhapo pa misonkhano?

 NDAŴA yanji tupezeka pa misonkhano ya mpingo? Cifukwa cikulu n’cakuti tufuna kutamanda Yehova. (Sal. 26:12; 111:1) Tupezeka soti pa misonkhano kuti tilimbikishane m’nthawi zino zovuta. (1 Ates. 5:11) Ngati tanyamula kwanja kuti tiyankhepo niye kuti tutolamo mbali m’zocitika zonse ziŵili.

2. Kansi tili na mipata yotyani yatingatwalilemo ndemanga pa misonkhano?

² Wiki iliyonse tunkhala na mwai wotwala ndemanga pa misonkhano. Mwacisanzo, kosilizhyila kwa wiki tingatolemo mbali m’Phunzilo ya Nsanja ya Mulonda. Pa misonkhano ya mkati mwa wiki tingayankhepo pa Kufufuza Cuma Cauzimu, pa Phunzilo ya Baibo ya Mpingo koma soti pa nkhani ziyakine zolaŵizhyana.

3. Kansi tingakumane na mavuto otyani patuyesayesa kuti tipeleke ndemanga pa misonkhano, ndipo Aheberi 10:24, 25 yutiyavya tyani?

³ Tonse tufuna kutamanda Yehova nolimbikisha olambila ayasu. Koma patupeleka ndemanga, tingakumane na mavuto. Payakine tingocita wowa kupeleka ndemanga. Olo tingankhale na cifuno cakuti titolemo mbali koma tingopasiwa lini mwai monga ni mwatufunila. Koma kansi n’cinji cingatiyavye kugonjesa mavuto aŵa? Yankho tuipeza m’kalata yamene mtumwi Paulo elembela Akhristu aciheberi. Pofotokoza kufunika kopezeka pa misonkhano, yove elaŵila kuti tufunika kuika nzelu pa ‘kulimbikishana.’ (Ŵelengani Aheberi 10:24, 25.) Tingaleke kumvwa wowa kuti tiyankhepo pa misonkhano ngati tukumbukila kuti ndemanga yasu ingalimbikishe ayakine olo kuti ni ifupi. Ndipo ngati tupasiwa lini mpata kuti tiyankhepo monga ni mwatufunila, tingasangalale poziŵa kuti ayakine mumpingo opasiwa mwai uyu.​—1 Pet. 3:8.

4. Kansi tilaŵizhyane mfundo zitatu zotyani m’nkhani ino?

⁴ M’nkhani ino, coyamba tilaŵizhyane mwatingalimbikishilane  mumpingo utontho mwamene muli ofalisa atontho amene opeleka ndemanga. Ndipo caciŵili, tilaŵizhyane mwatingalimbikishilane mumpingo ukulu mwamene muli ofalisa anyinji amene opanamika manja kuti apeleke ndemanga. Cosilizhyila, tilaŵizhyane mwatingalimbikishile ayakine m’zokamba zasu patupeleka ndemanga.

5. Kansi tingalimbikishane tyani ngati ciŵelengelo ca ŵanthu opezeka pa misonkhano ni citontho?

⁵ Mumpingo utontho olo kagulu, munkhala muliye ŵanthu anyinji onyamula manja kuti wosogoza asankhepo. Nthawi ziyakine wosogoza angafunikile kuyembekezako kuti munthu muyakine anyamule kwanja. Ngati zili teti, misonkhano yunkhala yosasangalasa koma soti yosalimbikisha. Lomba kansi mungacite tyani kuti misonkhano inkhale yosangalasa? Mukonkhala ofunishisha kunyamula kwanja kaŵili-kaŵili. Ngati mucita izi, muyavye ayakine kuti nao ankhale na cifuno coyankhapo kanyinji.

6-7. Kansi tingacepeshe tyani wowa ngati tufuna kuyankhapo pa misonkhano?

⁶ Nanga tyani ngati mucita wowa kuyankhapo pa misonkhano? Anyinji akumvwa teti. Koma kuti mukolimbikisha akwasu na azilongosi, mungacite bwino kusakila njila zamene zingakuyavyeni kusilizhya wowa na colinga cakuti mukoyankhapo. Kansi mungacite tyani izi?

⁷ Mungacite bwino kuŵelenga mfundo zoyavya zefalisiwa mu Nsanja za Mulonda zakuvuli. b Mwacisanzo, mukokonzekela bwino. (Miy. 21:5) Ngati mwaiziŵa bwino nkhani yonse, cikonkhala cosavuta kuyankhapo. Kuyangizhyila apo, mukopeleka ndemanga ifupi. (Miy. 15:23; 17:27) Yankho ifupi ingacitishe kuti osati mukocita wowa. Ndemanga ifupi, payakine ya ciganizo cimozi olo viŵili, yunkhala yosavuta kuti akwasu na azilongosi aimvwishishe kupambana ndemanga itali. Ngati mupeleka ndemanga m’mau ŵanu-ŵanu muonesha kuti mwekonzekela bwino koma soti mweimvwishisha nkhani yonse.

8. Kansi Yehova otisenga lini kucita cinji?

⁸ Nanga tyani ngati mwayesa kuseŵenzesha ziyakine mwa mfundo izi koma mukalucita wowa kuyankhapo kanyinji? Nkhalani osimikizhya kuti Yehova oyamikila kuyesayesa kwanu kuti mucite zamungakwanishe. (Luka 21:1-4) Yehova otisenga lini kucita vinthu vamene tingakwanishe lini. (Afil. 4:5) Mukoona cinthu camungakwanishe kucita, kuziikila colinga cakuti mukwanilishe cinthu camene ico nopemphela kufumila pansi pa mtima. Coyamba, colinga camungaziikile ni kupeleka ndemanga imozi ifupi.

9. Ndaŵa yanji zingankhale zovuta kuyankhapo pa misonkhano mumpingo ukulu?

⁹ Ngati mumpingo mwanu muli ofalisa anyinji, mungakumane na vuto iyakine. Akwasu na azilongosi anyinji angonyamula manja kuti ayankhepo ndipo mungopasiwa lini mipata inyinji yakuti muyankhepo. Mwacisanzo, kalongosi Danielle osangalala ngako kuyankhapo pa misonkhano. c Yove oona kuti kucita izi ni mbali ya kulambila kwake, njila yolimbikishilamo ayakine koma soti njila yamene yumuyavya kutang’isha cikhulupililo cake pa zakuphunzila m’Baibo. Koma pecikukila mumpingo ukulu, enzopasiwa lini mipata inyinji yakuti ayankhepo ndipo nthawi ziyakine enzofumilamo pa misonkhano osayankhapo. Yove elaŵila kuti, “Nekhumudwa. Neona  kuti nenzotaya mwai wolambila ndipo izi zikacitika mowelezhyawelezhya ungaganize kuti ocitila lona.”

10. N’cinji cingatiyavye kuyangizhyila mipata yoyankhapo pa misonkhano?

¹⁰ Kansi mwemvwako kale monga ni mwecimvwila kalongosi Danielle? Ngati n’tetyo, payakine mungaganize zoleka kuyankhapo noyamba kumvwishila tyala misonkhano. Koma mufunika lini kuleka kuyankhapo. Kansi n’cinji cingakuyavyeni? Mungacite bwino kukonzekela ndemanga zosiyanasiyana pa msonkhano ulionse. Izi zingacitishe kuti ngati muliyopasiwe mpata woyankhapo koyambilila kwa msonkhano, mungapasiwe mpata mkati mwa msonkhano. Ngati mukonzekela Phunzilo ya Nsanja ya Mulonda, mukoona mwamene ndime iliyonse yukatizhyilana na mutu wa nkhani. Ngati mucita izi, mupeze mfundo zamungayankhe m’phunzilo yonse. Kuyangizhyila apo, mungakonzekele kuyankhapo mu ndime zamene zufotokoza cendi cozama zamene ni zovuta kuzifotokoza. (1 Akor. 2:10) Ndaŵa yanji? N’cifukwa cakuti mu ndime zoteti ni atontho okonda kunyamula manja kuti ayankhepo. Lomba tyani ngati mupasiwa lini mpata woyankhapo mosasamala kanthu kuti mwaseŵenzesha mfundo izi? Misonkhano ikaliyoyamba mungauzhye wosogoza, ndime yamufuna kuti muyankhepo.

11. Kansi Afilipi 2:4 yutilimbikisha kucita cinji?

¹¹ Ŵelengani Afilipi 2:4. Mouzhyiliwa, mtumwi Paulo elimbikisha Akhristu kuti ofunika kuika zofuna za ayakine pasogolo. Kansi tingaseŵenzeshe tyani malangizo aŵa pa misonkhano? Tingacite izi mwa kukumbukila kuti ayakine nao ofuna kutolako mbali monga ni mwatufunila seo.

12. Kansi ni njila yabwino yotyani yatingalimbikishilemo akwasu na azilongosi pa misonkhano? (Onani soti cithunzithunzi.)

¹² Ganizilani izi. Ngati mulaŵila nkhani na ashamwali ŵanu, kansi mungolaŵila mweka osaŵapasako mpata wakuti nao alaŵileko? Yai. Nao ofunika kulaŵilako. Molingana na izi, pa misonkhano tufunika kupasa akwasu na azilongosi mpata wakuti ayankhepo. Talaŵila teti cifukwa njila yabwino ngako yatulimbikishilamo akwasu na azilongosi ni mwa kuŵapasa mwai wofotokoza cikhulupililo cao. (1 Akor. 10:24) Lomba, tiyeni tilaŵizhyane mwatingacitile izi.

13. Kansi tingacite tyani kuti tikopasa mpata ŵanthu anyinji kuti akoyankhapo pa misonkhano?

 ¹³ Njila imozi ni mwa kupeleka ndemanga zifupi. Izi zingacitishe kuti pankhale nthawi yokwanila yakuti ayakine atolemo mbali mokwanila. Akulu koma soti ofalisa okhwima mwauzimu angapeleke cisanzo cabwino pa mbali iyi. Olo pamupeleka ndemanga ifupi, mukopewa kufotokoza mfundo zinyinji. Ngati mungafotokoze mfundo zonse zili m’ndime, zingacitishe kuti pankhale mipata itontho yakuti ayakine ayankhepo. Mwacisanzo, mu ndime ino muli mfundo ziŵili. Yoyamba, kupeleka ndemanga zifupi, ndipo yaciŵili kupewa kufotokoza mfundo zinyinji. Ngati munkhale woyamba kuyankhapo, mungacite bwino kufotokoza tyala mfundo imozi.

14. N’cinji cingatiyavye kuziŵa kuti tinyamule kangani kwanja? (Onani soti vithunzithunzi.)

¹⁴ Tufunika kunkhala ozindikila kuti tiziŵe kuti tufunika kunyamula kangani kwanja na colinga cakuti tiyankhepo. Ngati tinganyamule kwanja kaŵili-kaŵili, zingakakamizhye wosogoza kuti atipase mpata woyankhapo olo kuti ayakine akaliyoyankhako. Izi zingapangishe ayakine kuti asanyamule manja.​—Mla. 3:7.

15. (a) Kansi tufunika kucita cinji ngati tiliyopasiwe mpata wakuti tiyankhepo? (b) Kansi wosogoza angaoneshe tyani kuti oganizila aliyense? (Onani kabokosi kakuti “ Ngati Musogoza.”)

¹⁵ Ngati ofalisa anyinji opanamika manja pa phunzilo, tingonkhala lini na mpata wakuti tiyankhepo kanyinji monga ni mwatufunila. Nthawi ziyakine wosogoza angakwanishe lini kutipasa mpata. Izi zingatifookeshe. Koma tufunika kupewa kukhumudwa ngati tiliyopasiwe mwai wakuti tiyankhepo.​—Mla. 7:9.

16. Kansi tingalimbikishe tyani ayakine amene oyankhapo pa misonkhano?

¹⁶ Ngati muliyopasiwe mwai woyankhapo kanyinji monga ni mwemwenzofunila, mungacite bwino kumvwishila mosamala ayakine pakupeleka ndemanga noŵayamikila pavuli pa misonkhano. Ngati muyamikila akwasu na azilongosi, angalimbikishiwe ngako monga ni mwaangalimbikishiwile na ndemanga  zamungapeleke. (Miy. 10:21) Kuyamikila ayakine ni njila iyakine yatulimbikishilanamo.

17. (a) Kansi makolo angayavye tyani ŵana ŵao kukonzekela kuti akapeleke ndemanga zoyenelela pa misokhano? (b) Molingana na vidyo, kansi ni masitepu 4 yotyani yatufunika kutola pokonzekela ndemanga? (Onani soti mau a m’nyansi.)

¹⁷ Kansi ni njila iyakine yotyani yatingalimbikishilemo ayakine pa misonkhano? Ngati nimwe kolo, mukoyavya ŵana ŵanu kukonzekela ndemanga kulingana na msinkhu wao. (Mat. 21:16) Nthawi ziyakine tuphunzila nkhani zikulu-zikulu monga mavuto ya mu ukwati olo nkhani zokhuza cinkhalidwe. Koma pangankhale ndime imozi olo ziŵili zamene ŵana ŵanu angapelekepo ndemanga. Kuyangizhyila apo, mukoyavya ŵana ŵanu kumvwisha cifukwa cake nthawi ziyakine angapasiwe lini mpata kuti ayankhepo olo pavuli pakuti anyamula kwanja. Kuŵafotokozela izi kuŵayavye kuti osati akokhumudwa ngati ayakine apasiwa mpata wakuti ayankhepo.​—1 Tim. 6:18. d

18. Kansi tingapewe tyani kutwala ulemelelo kuli seo patupeleka ndemanga? (Miyambo 27:2)

¹⁸ Tonse tingakonzekele ndemanga zolimbikisha zamene zingatwale ulemelelo kwa Yehova nolimbikisha Akhristu ayasu. (Miy. 25:11) N’cendi kuti nthawi ziyakine tingasengewe kufotokoza zokumana nazo zasu, koma tufunika  kupewa kulaŵila ngako zokhuza seo. (Ŵelengani Miyambo 27:2; 2 Akor. 10:18) M’malo mwake, tufunika kuyesayesa kutwala ulemelelo kwa Yehova, Mau ŵake koma soti atumiki ŵake monga gulu. (Chiv. 4:11) N’cendi kuti m’ndime ziyakine angatisenge kufotokoza zokumana nazo ndipo kucita izi n’kofunika. Tione cisanzo ca izi m’ndime yokonkhapo.

19. (a) Kansi pangankhale zofumapo zotyani ngati tuika zofuna za ayakine pasogolo? (Aroma 1:11, 12) (b) N’cinji cukusangalasani mweo pamweka pa nkhani yopeleka ndemanga pa misonkhano?

¹⁹ N’cendi kuti paliye malamulo oikiwa okhuza mwatingapelekele ndemanga. Koma tonse tingacite zonse zatingakwanishe kuti ndemanga zasu zikonkhala zolimbikisha. Nthawi ziyakine izi zingatanthauze kuyankhapo mowelezhyawelezhya. Ndipo nthawi ziyakine zingatanthauze kunkhala okhutila na mwai watingapasiwe woyankhapo nosangalala ngati ayakine apasiwa mwai woyankhapo. Ngati tuika zofuna za ayakine pasogolo patili pa misonkhano, tonse tingasangalale “nolimbikishana.”​—Ŵelengani Aroma 1:11, 12.