Nkhani Yophunzila 33
Mukosangalala na Mautumiki Yamucita m’Gulu ya Yehova
“Kuona tyala na menso kuli bwino kupambana kulakalaka mumtima.”—MLA. 6:9.
NYIMBO 111 Tili na Vifukwa Vinyinji Vonkhalila Acimwemwe
ZATI TIPHUNZILE *
1. Kansi ayakine apanga zolinga zotyani pofuna kuyangizhyila utumiki wao?
MONGA atumiki a Yehova, tili na zinyinji zatufunika kucita makamaka nthawi ino pamene masilizhyilo a dongosolo ino asala pafupi. (Mat. 24:14; Luka 10:2; 1 Pet. 5:2) Tonse tufuna kucita zilizonse zatingakwanishe potumikila Yehova. Pofuna kuyangizhyila utumiki wao, ayakine ofuna kuyamba upainiya wanthawi zonse, kuyotumikila pa Beteli olo kuyavya pa nchito za cimango. Ndipo akwasu anyinji oyesayesa kukwanilisha ziyeneleso kuti ayenelele kunkhala atumiki oyavya olo akulu. (1 Tim. 3:1, 8) Mosakaikila, Yehova osangalala ngako akaona khama na mzimu wozipeleka wakuonesha atumiki ŵake.—Sal. 110:3; Yes. 6:8.
2. Kansi tingamvwe tyani ngati tukwanilisha lini zolinga zasu?
2 Nthawi ziyakine, tingafooke poona kuti nthawi yungoluta koma tukwanilisha lini zolinga zasu. Olo payakine tingafooke poona kuti tingakwanishe lini kucitako mautumiki ayakine m’gulu ya Yehova cifukwa ca ukulukazi olo zocitika ziyakine za pa umoyo. (Miy. 13:12) Umu niye mwecimvwila kalongosi Melissa * wamene enzofuna kuyotumikilako pa Beteli olo kuloŵako Sukulu ya Alengezi a Ufumu. Koma yove eciti: “Vyaka vangu vepitapo pa msinkhu wakuti ningaciteko mautumiki aŵa. Ndipo izi zunifookesha nthawi ziyakine.”
3. Kansi akwasu acilumbwana ofunika kukulisha minkhalidwe yotyani kuti ayenelele mautumiki ayakine m’gulu ya Yehova?
3 Akhristu acilumbwana angafunike kukulisha minkhalidwe iyakine kuti ayenelele kucitako mautumiki ayakine m’gulu ya Mulungu. Mwacisanzo, ayakine angopanga zosankha mwanzelu, angankhale na ciziŵiso ndipo angozipeleka kucita nchito iliyonse yaapasiwa. Koma angafunike kukulisha minkhalidwe iyakine monga kuleza mtima, kucita zinthu mwadongosolo nolemekeza ayakine. Ngati muyesayesa kukulisha minkhalidwe iyi, mungalandile udindo wamufuna pa nthawi yakuti muyembekezela lini. Ganizilani cisanzo ca mkwasu Nick. Peenze na vyaka 20, ekhumudwa ngako cifukwa aliyomuyamikile kunkhala mtumiki woyavya. Yove elaŵila kuti, “Neziona kuti n’ne wokangiwa.” Koma aliyotaye mtima. M’malomwake, epitilizhya kucita zilizonse zangakwanishe pa nchito yolalikila na mumpingo. Lomba, mkwasu uyu otumikila m’Komiti ya Msambo.
4. Kansi tilaŵizhyane cinji m’nkhani ino?
4 Nthawi ziyakine, tingafooke cifukwa tukwanilisha lini colinga ceteziikila. Ngati umu niye mwazilili zinthu pa umoyo wanu, mukopemphela kwa Yehova nomuuzhya mwamumvwila. (Sal. 37:5-7) Kuyangizhyila apo, mukosenga Akhristu acikulile mwauzimu kuti akuyavyeni kuziŵa zamungacite kuti muyangizhyile utumiki wanu. Pavuli pake, mukoyesayesa kuseŵenzesha malangizo yangakupaseni. Kucita izi kungakuyavyeni kuti mukwanilishe colinga canu. Koma monga ni mwezenzele kwa kalongosi Melissa watomolewa koyambilila, nthawi ziyakine tingokwanilisha lini ziyeneleso kuti ticiteko utumiki watufuna. Ngati umu niye mwazilili zinthu mu umoyo wanu, kansi mungacitenji kuti mupitilizhye kutumikila Yehova mwacimwemwe? Kuti tiyankhe konsho iyi, m’nkhani ino tikambilane (1) zatingacite kuti tinkhale acimwemwe, (2) zinthu zingatiyavye kuti tipitilizhye kunkhala acimwemwe na (3) zolinga zatingapange zamene zingatiyavye kuti tipitilizhye kunkhala acimwemwe.
ZATINGACITE KUTI TINKHALE ACIMWEMWE
5. Kuti tinkhale acimwemwe, kansi tufunika kuika maganizo ŵasu pa cinji? (Mlaliki 6:9)
5 Lemba ya Mlaliki 6:9, yufotokoza zatingacite kuti tinkhale acimwemwe. (Ŵelengani.) Munthu wamene oika maganizo ŵake pa ‘zakuona na menso’ onkhala wokhutila na vinthu vaali navo koma soti zakukwanisha kucita pa nthawi yamene iyo. Mosiyana na izi, munthu wamene ongolakalaka mumtima okumbwila vinthu vamene angavipeze lini. Kansi izi zutiphunzisa cinji? Kuti tikonkhala acimwemwe, tufunika kuika maganizo ŵasu pa vinthu vatili navo koma soti vatingakwanishe kucita, osati pa vinthu vamene tingakwanishe lini kuvipeza.
6. Kansi tilaŵizhyane fanizo yotyani, ndipo itiyavye tyani?
6 Koma nthawi ziyakine tingazikonshe kuti, “Kansi n’zokwanishika kunkhala okhutila na vinthu vatili navo?” Ŵanthu anyinji oona kuti n’zosakwanishika, cifukwa kanyinji-kanyinji tukondofuna kuphunzila olo kunkhala na vinthu valomba. Koma zacendi n’zakuti tingakwanishe kunkhala okhutila na vinthu vatili navo nopewa kulakalaka vinthu ‘vatuona tyala na menso’. Kansi tingacite tyani zamene izi? Kuti tipeze yankho, tiyeni tilaŵizhyane fanizo ya matalente yecifotokoza Yesu, yamene yupezeka pa Mateyu 25:14-30. Tione mwamene fanizo iyi ingatiyavyile kunkhala acimwemwe nopitilizhya kusangalala na utumiki uliwonse watucita m’gulu ya Yehova.
ZINTHU ZINGATIYAVYE KUTI TIPITILIZHYE KUNKHALA ACIMWEMWE
7. Mwacidule, fotokozani fanizo ya Yesu ya matalente.
7 M’fanizo iyi, munthu wolemela enzofuna kuluta pa ulwendo. Akaliyonyamuka, eita akapolo ŵake atatu noŵapasa matalente kuti akacitile malonda. * Cifukwa cakuti enzoziŵa maluso yeenze nayo kapolo aliyense, munthu wolemela uyu epasa kapolo woyamba matalente 5, waciŵili em’pasa aŵili ndipo wacitatu em’pasa imozi. Akapolo aŵili eseŵenza mwakhama cakuti ndalama zeciŵapasa zeyangizhyilika. Izi zecitisha kuti abosi ŵao akondwele ngako. Koma kapolo wacitatu aliyoseŵenzeshe ndalama zecimupasa, ndipo izi zecitisha kuti amucose nchito.
8. Ndaŵa yanji kapolo woyamba esangalala ngako?
8 Mosakaikila, kapolo woyamba esangalala ngako cifukwa abosi ŵake em’pasa matalente 5. Izi zenze ndalama zinyinji ndipo zeonesha kuti abosi ŵake enzomukhulupilila ngako. Kansi sembe izi zemukhuza tyani kapolo waciŵili? Sembe efooka cifukwa aliyomupase matalente anyinji polinganizhya na yecipasa kapolo woyamba. Koma kansi yove ecitanji?
Kansi tingaphunzilepo cinji pa zecicita kapolo waciŵili wa m’fanizo ya Yesu? (1) Abosi ŵake em’pasa tyala matalente aŵili. (2) Eseŵenza mwakhama kuti apezelepo ndalama ziyakine. (3) Abosi ŵake ekondwela ngako cifukwa ekwanisha kupezelapo matalente ayakine aŵili (Onani ndime 9-11)
9. Kansi kapolo waciŵili aliyocite cinji olo kuti em’pasa ndalama zitontho? (Mateyu 25:22, 23)
9 Ŵelengani Mateyu 25:22, 23. Yesu aliyolaŵile kuti kapolo waciŵili ekhumudwa cifukwa em’pasa tyala matalente aŵili. Ndipo aliyolaŵile kuti kapolo uyu eyamba kudandaula kuti: ‘Ndaŵa yanji abosi anipasa ndalama zitontho? Nane nuseŵenza mwakhama monga ni mwakucitila muyangu waapasa matalente 5. Ngati abosi oona kuti nuseŵenza lini mwakhama, cilibwino nikafwikile pansi ndalama izi noyamba kuseŵenza nchito zangu.’
10. Kansi kapolo waciŵili eseŵenzesha tyani ndalama zecimupasa?
10 Molingana na mwecicitila kapolo woyamba, kapolo waciŵili eyamikila ndalama zecimupasa ndipo eziseŵenzesha mwanzelu. Cifukwa ca izi, yove ekwanisha kupezelapo matalente ayakine aŵili. Ndipo abosi ŵake emuyamikila nomupasa udindo uyakine.
11. Kansi tingacitenji kuti tipitilizhye kunkhala acimwemwe?
11 Molingana na izi, nase tingapitilizhye kunkhala acimwemwe ngati tucita khama pocita utumiki uliwonse watingapasiwe m’gulu ya Yehova. Mukocita khama pa nchito yolalikila noyesayesa kupezeka pa misonkhano yonse ya mpingo. (Mac. 18:5; Aheb. 10:24, 25) Mukokonzekela misonkhano yonse, ndipo izi zikuyavyeni kuti mukopeleka ndemanga zokata mtima. Kuyangizhyila apo, mukokonzekela mokwanila ngati mwapasiwa mbali pa misonkhano ya mkati mwa wiki. Ndipo ngati akupasani nchito iyakine mumpingo, mukoyesayesa kusunga nthawi nonkhala wodalilika. Mukoona nchito iliyonse yangakusengeni kuti mucite kunkhala yofunika ngako. Ndipo mukoyesayesa kuicita mwaluso. (Miy. 22:29) Ngati mucita izi, ushamwali wanu na Yehova utang’e ndipo mupitilizhye kunkhala wacimwemwe. (Agal. 6:4) Kuyangizhyila apo, kucita izi kukuyavyeni kuti osati mukokhumudwa ngati ayakine apasiwa udindo wemwenzofuna.—Aro. 12:15; Agal. 5:26.
12. Kansi kalongosi Melissa na mkwasu Nick, ecitanji kuti apitilizhye kunkhala acimwemwe potumikila Yehova?
12 Kansi n’cinji ceyavya kalongosi Melissa watatomola m’ndime 2 kupitilizhya kunkhala wacimwemwe? Olo kuti epitilila pa vyaka vakuti angaciteko utumiki wa pa Beteli olo kuloŵako Sukulu ya Alengezi a Ufumu, yove elaŵila kuti: “Nuyesayesa kucita zilizonse zaningakwanishe pocita upainiya. Ndipo nuyesako njila zosiyanasiyana za ulaliki. Izi zanipangisha kunkhala wacimwemwe.” Nanga n’cinji ceyavya mkwasu Nick kuti apitilizhye kunkhala wacimwemwe paaliyoyamikiliwe kunkhala mtumiki woyavya? Yove elaŵila kuti, “Neika maganizo ŵangu pa zinthu zaningakwanishe kucita monga kutolamo mbali mokwanila m’nchito yolalikila nopeleka ndemanga zokata mtima pa misonkhano. Kuyangizhyila apo, nekonshela utumiki wa pa Beteli ndipo neitiwa caka cokonkhapo.”
13. Kansi pangankhale zofumapo zotyani ngati tucita khama pa utumiki watucita pali lomba? (Mlaliki 2:24)
13 Ngati mucita khama kucita utumiki wamucita pali lomba, kansi zutanthauza kuti mulimonse mwazingankhalile mulandile mautumiki ayakine msogolo? Monga ni mwezecitikila kuli mkwasu Nick, nthawi ziyakine izi zingacitike. Koma ngati zingacitike lini, monga ni mwezenzele kuli kalongosi Melissa, mufunika lini kufooka. M’malomwake, mufunika kupitilizhya kucita utumiki wanu mwakhama. Izi zikuyavyeni kuti mukonkhala wacimwemwe nthawi zonse. (Ŵelengani Mlaliki 2:24.) Zikuyavyeni soti kuti mukosangalala poziŵa kuti zamucita zukondwelesha Asikulu wasu, Yesu Khristu.
ZOLINGA ZATINGAPANGE ZAMENE ZINGATIYAVYE KUTI TIPITILIZHYE KUNKHALA ACIMWEMWE
14. Kansi n’cinji cingatiyavye kukwanilisha zolinga zatingaziikile?
14 Ngati tucita zinyinji potumikila Yehova pali lomba, kansi zutanthauza kuti tufunika lini kuyangizhyila utumiki wasu? Yai, pali zolinga ziyakine zatingapange. Mwacisanzo, tingaziikile colinga cakuti tiyangizhyile luso yophunzisa tikankhala mu utumiki olo pa pulatifomu. Tingakwanilishe zolinga izi ngati nise olicefya nonkhala okonzeka kutumikila akwasu na azilongosi.—Miy. 11:2; Mac. 20:35.
15. Kansi ni zolinga ziyakine zotyani zatingaziikile?
15 Payakine mungazikonshe kuti, “Kansi ni zolinga zauzimu zotyani zaningapange?” Mukosenga Yehova kuti akuyavyeni kuzindikila zolinga zamungakwanilishe. (Miy. 16:3; Yak. 1:5) Mwacisanzo, payakine mungaziikile zolinga zatomolewa m’ndime 1, monga kucitako upainiya woyavya olo wanthawi zonse, kuyotumikila pa Beteli olo kuyavyako nchito za cimango. Payakine mungaphunzile cilaŵilo ciyakine olo mungazipeleke kuti mukatumikile ku malo kwamene kufunikila ofalisa anyinji. Kuti muziŵe zamungacite kuti mukwanilishe zolinga izi, mungaŵelenge mutu 10 m’buku yakuti Gulu Lochita Chifuniro cha Yehova olo mungakonshe akulu a mumpingo mwanu. * Ngati muyesayesa kuti mukwanilishe zolinga izi, ŵanthu ayakine aone kuti muluta pasogolo ndipo cimwemwe canu ciyangizhyilike.
16. Kansi mungacitenji ngati muona kuti pali zolinga ziyakine zamene mungakwanilishe lini?
16 Koma tyani ngati muona kuti mungakwanilishe lini zolinga zafotokozewa m’nkhani ino? Ngati n’tetyo, mungaziikile zolinga ziyakine zamuona kuti mungazikwanilishe. Onani ziyakine mwa zolinga zamungapange.
Kansi ni colinga ciyakine cotyani camungapange? (Onani ndime 17) *
17. Molingana na 1 Timoteyo 4:13, 15, kansi akwasu angacitenji kuti ayangizhyile luso yao yophunzisa?
17 Ŵelengani 1 Timoteyo 4:13, 15. Ngati nimwe mkwasu wobatizika, payakine mungapange colinga cakuti muyangizhyile luso yanu yolaŵila na kuphunzisa. Ndaŵa yanji kucita izi n’kofunika? Cifukwa ngati mucita khama poŵelenga, kulaŵila olo kuphunzisa, zingayavye kuti omvwishila akopindula ngako. Kuti mukwanishe kucita izi, mukoyesayesa kuseŵenzesha malangizo opezeka m’kabuku kakuti Citani Khama pa Kuŵelenga na Kuphunzisa. Pamuphunzila kabuku aka, mukosankha phunzilo imozi yamufuna kuti museŵenzelepo. Ndipo mukoseŵenzesha mfundo zamwapeza ngati mwapasiwa mbali yoŵelenga olo kukamba nkhani. Pavuli pakuti mwalaŵila nkhani, mukosenga mlangizi wothandiza olo akulu ayakine kuti akuyavyeni kuziŵa zamungacite kuti muyangizhyile luso yanu yolaŵila na kuphunzisa. * (1 Tim. 5:17) Ngati mukamba nkhani, colinga canu cikonkhala kutang’isha cikhulupililo ca omvwishila noŵalimbikisha kucitapo kanthu. Kucita izi kukuyavyeni kuti muyangizhyile cimwemwe canu na ca omvwishila.
Kansi ni colinga ciyakine cotyani camungapange? (Onani ndime 18) *
18. Kansi tingacitenji kuti tiyangizhyile maluso ŵasu mu utumiki?
18 Tonse tepasiwa nchito yofunika ngako yamene ni kulalikila nopanga ophunzila. (Mat. 28:19, 20; Aro. 10:14) Kansi mungacitenji kuti muyangizhyile maluso ŵanu kuti mukosangalala pocita nchito iyi? Mukoseŵenzesha malangizo yopezeka m’kabuku ka Citani Khama noona mbali zamufunika kuongolela. Kuyangizhyila apo, mukoyesayesa kuseŵenzesha malangizo yopezeka m’kabuku ka Umoyo Wacikhristu na Utumiki Wasu koma soti mavidyo a visanzo va ulaliki yatuonelela pa misonkhano ya mkati mwa wiki. Ndipo mukoyesayesa kuseŵenzesha njila zosiyanasiyana za ulaliki. Ngati mucita izi, muyangizhyile maluso ŵanu mu utumiki ndipo zikuyavyeni kuti mupitilizhye kunkhala acimwemwe.—2 Tim. 4:5.
Kansi ni colinga ciyakine cotyani camungapange? (Onani ndime 19) *
19. Kansi mungacitenji kuti mukulishe minkhalidwe ya mzimu utuŵa?
19 Ngati mufuna kupanga zolinga, mukokumbukila kuti cimozi mwa zolinga zamungaziikile ni kukulisha minkhalidwe ya mzimu utuŵa. (Agal. 5:22, 23; Akol. 3:12; 2 Pet. 1:5-8) Kansi mungacitenji kuti mukwanilishe colinga ici? Mwacisanzo, ngati mufuna kunkhala na cikhulupililo cotang’a, mungaŵelenge nkhani m’zofalisa zasu olo kuonelela mavidyo opezeka pa JW Broadcasting® zamene zuonesha mwamene akwasu na azilongosi ooneshela nkhalidwe iyi olo kuti okumana na mavuto osiyanasiyana. Pavuli pake, mukoganizila zamungacite kuti mutolele cikhulupililo cao.
20. Kansi tingacitenji kuti tipitilizhye kunkhala osangalala potumikila Yehova?
20 Mosakaikila, tonse tufuna kucita zinyinji potumikila Yehova. Koma nthawi ziyakine, cunkhala covuta kucita izi cifukwa ca mavuto ayakine. Tulimbikishiwa ngako poziŵa kuti m’calo calomba tikakwanishe kucita zinyinji potumikila Yehova. Patuyembekezela nthawi yamene iyo, tiyeni tipitilizhye kusangalala nonkhala okhutila na mautumiki yatukwanisha kucita pali lomba. Kucita izi, kutiyavye kuti tisafooke. Ndipo kupambana zonse, titwale ulemu na ulemelelo kwa Yehova, wamene ni “Mulungu wacimwemwe.” (1 Tim. 1:11) Tetyo, tiyeni tipitilizhye kunkhala osangalala na utumiki uliwonse watucita m’gulu ya Yehova.
NYIMBO 82 “Oneshani Kuwala Kwanu”
^ par. 5 Tumukonda ngako Yehova, ndipo tufuna kucita zilizonse zatingakwanishe pomutumikila. Ndiye cifukwa cake anyinji a seo tuyesayesa kuti tikocita zinyinji pa nchito yolalikila olo kukwanilisha ziyeneleso kuti tiyenelele maudindo mumpingo. Nanga tyani ngati tukwanilisha lini zolinga zasu mosasamala kanthu kuti tuyesayesa kuti tizikwanilishe? Nthawi ziyakine, izi zingacitishe kuti tifooke. Lomba tingacitenji kuti tipitilizhye kutumikila Yehova mwacimwemwe? Fanizo ya matalente yecilaŵila Yesu, ingatiyavye kupeza mayankho a makonsho aŵa.
^ par. 2 Mazina ayakine acinjiwa.
^ par. 7 TANTHAUZO YA MAU AYAKINE: Talente imozi yenze na mphamvu yolingana na ndalama zeenzopasiwa munthu pavuli poseŵenza kwa vyaka 20.
^ par. 15 Akwasu amene ni obatizika olimbikishiwa kuti ayeseyese kukwanilisha ziyeneleso kuti ayenelele kunkhala atumiki oyavya olo akulu. Kuti muziŵe zamungacite kuti mukwanilishe ziyeneleso izi, onani mutu 5 na 6 m’buku yakuti Gulu Lochita Chifuniro Cha Yehova.
^ par. 17 TANTHAUZO YA MAU AYAKINE: Mlangizi wothandiza ni mkulu wamene osankhiwa kuti akopeleka malangizo kuli akulu ayake olo atumiki oyavya pavuli pakuti alaŵila nkhani mumpingo.
^ par. 64 MAU OFOTOKOZA CITHUNZITHUNZI: Pofuna kukwanilisha colinga ceciziikila cakuti ayangizhyile luso yake yophunzisa, mkwasu ofufuza mfundo ziyakine m’zofalisa zasu.
^ par. 66 MAU OFOTOKOZA CITHUNZITHUNZI:Pofuna kukwanilisha colinga cecipanga cakuti akocita ulaliki wa mwamwai, kalongosi ogaŵila munakazi wamene oseŵenza mu lesitilanti kakhadi koloŵela pa jw.org.
^ par. 68 MAU OFOTOKOZA CITHUNZITHUNZI:Pofuna kukwanilisha colinga ceciziikila cakuti akoonesha minkhalidwe ya mzimu utuŵa, kalongosi oonesha wanzi mwa kupasako kalongosi muyakine vakulya.
