1. Ni makonsho otyani yatingazikonshe tikalolesha vinthu vonse vecilenga Yehova?

 TIKAGANIZILA zinthu zonse zecilenga Yehova, tingalaŵile mau monga ni yecilaŵila Davide akuti: “Nikalolesha kululu, nchito ya manja ŵanu, mwezi na nyenyezi zemwepanga, nuzikonsha kuti: Munthu ni ŵani kuti mukomuganizila, ndipo mwana wa munthu wofumila ku lito ni ŵani kuti mukomusamalila?” (Sal. 8:3, 4) Molingana na Davide, tikazilinganizhya na vinthu vikulu-vikulu vecilenga Yehova monga mwezi na nyenyezi, payakine tingadabwe kuziŵa kuti yove otiona kuti nise ofunika. Koma monga ni mwati tionele m’nkhani ino, Yehova enzosamalila Adamu na Eva ndipo enzoŵacitisha kumvwa kuti ni ofunika.

2. Kansi Yehova enzofuna kuti Adamu na Eva acite cinji?

² Poyamba, Yehova elenga Adamu na Eva ndipo eŵauzhya kuti: “Muvyalane, mupake, muzuzhye calo ndipo muciyanganile.” (Gen. 1:28) Tetyo, Yehova enzofuna kuti ove avyale ŵana nosamalila calo. Kuti enze ecita zinthu mokatizhyana na cifunilo ca Yehova, Adamu na Eva, kuyangizhyilapo ŵana ŵao sembe enkhala m’banja ya Yehova mpaka kale-kale.

3. Ndaŵa yanji tingalaŵile kuti Adamu na Eva enze ofunika ngako m’banja ya Yehova?

³ Adamu na Eva enze ofunika ngako m’banja ya Yehova. Pofotokoza mwamene Yehova elengela ŵanthu, pa Salimo 8:5 na mau amunyansi, Davide elaŵila kuti: “Mwemucepesha patontho polinganizhya na angelo, ndipo mwemuvwalika ulemelelo na ulemu monga cisote cacifumu.” N’cendi kuti angelo ali na mphamvu, nzelu koma soti maluso kupambana yaali nayo ŵanthu. (Sal. 103:20) Koma ŵanthu eŵasiyanishako tyala  “patontho” na angelo. Izi n’zocitisha cidwi ngako. Ndipo Yehova pecilenga makolo ŵasu oyambilila eŵapasa moyo uweme ngako.

4. N’cinji cecitikila Adamu na Eva cifukwa cosamvwila Yehova, ndipo tilaŵizhyane cinji m’nkhani ino?

 ⁴ N’zomvwisha cisoni kuti Adamu na Eva aliyoyamikile malo yeenze nayo m’banja ya Yehova. Monga ni mwati tionele m’nkhani ino, izi zecitisha mavuto anyinji ku ŵana ŵecivyala. Koma colinga ca Yehova ciliyocinje. Yove ofuna kuti ŵanthu amene omumvwila ankhale ŵana ŵake mpaka kale-kale. M’nkhani ino, tilaŵizhyane zawacita Yehova pofuna kutionesha kuti nise ofunika ngako. Tione soti zatingacite kuti tioneshe kuti tufuna kunkhala m’gulu yake. Posilizhyila, tione madaliso yati akasangalale nayo atumiki a Yehova.

5. Kansi tingaoneshe tyani kuti tuyamikila Mulungu potilenga m’cifanizilo cake?

⁵ Yehova etilenga m’cifanizilo cake. (Gen. 1:26, 27) Cifukwa ca izi, tukwanisha kuonesha minkhalidwe yake monga cikondi, cifundo, kukhulupilika na cilungamo. (Sal. 86:15; 145:17) Ngati tuonesha minkhalidwe iyi mu umoyo wasu wa siku na siku, tuonesha kuti tuyamikila Yehova potilenga m’cifanizilo cake. (1 Pet. 1:14-16) Kuyangizhyila apo, ngati tucita zinthu zokondwelesha Ausuwasu akululu, tunkhala na umoyo wacimwemwe koma soti wokhutilisha. Ndipo cifukwa cakuti Yehova etilenga m’cifanizilo cake, tingakwanishe kucinja minkhalidwe yasu kuti tiyenelele kunkhala m’gulu yake.

6. Kansi Yehova eonesha tyani kuti oona ŵanthu kunkhala ofunika pecilenga calo?

⁶ Yehova elenga calo kuti tikonkhalamo. (Yobu 38:4-6; Yer. 10:12) Cifukwa cakuti oziŵa zatufunikila ndipo ni wawanzi, yove elenga vinthu vinyinji viweme kuti tikosangalala. (Sal. 104:14, 15, 24) Baibo yulaŵila kuti pecilenga vinthu vosiyanasiyana, Yehova “eona kuti vonse vili bwino.” (Gen. 1:10, 12, 31) Ndipo eonesha kuti oona ŵanthu kunkhala ofunika mwa kuŵauzhya kuti ‘akolamulila noyanganila’ vinthu vonse va pacalo. (Sal. 8:6) Colinga ca Mulungu ciliyocinje. Yove walonjeza kuti msogolo ŵanthu akasangalale posamalila vinthu vonse vecilenga. Kansi mumuyamikila Yehova cifukwa ca lonjezo iyi?

7. Kansi Yoswa 24:15 yuonesha tyani kuti ŵanthu ali na ufulu wosankha?

⁷ Yehova etipasa ufulu wosankha. Tetyo, munthu aliyense ali na ufulu wosankha zakufuna kucita mu umoyo wake. (Ŵelengani Yoswa 24:15.) Mulungu wasu wacikondi okondwela ngako ngati tasankha kumutumikila. (Sal. 84:11; Miy. 27:11) Tingaoneshe kuti tuyamikila ufulu wosankha ngati tupanga zosankha mwanzelu mu umoyo wasu. Peenze pacalo, Yesu eseŵenzesha mwanzelu ufulu wosankha. Kansi tingatolele tyani cisanzo cake?

8. Fotokozani cisanzo coonesha mwamene Yesu eseŵenzeshela ufulu wake wosankha.

⁸ Tingaoneshe kuti tutolela cisanzo ca Yesu ngati tuika zofuna za ŵanthu ayakine pasogolo mu umoyo wasu. Siku iyakine, Yesu na atumwi ŵake enze eŵeŵa ngako cifukwa elalikila kwa siku yonse. Tetyo, epeza malo abwino kuti apumuleko. Koma gulu ya ŵanthu yeŵakonkha ndipo ŵanthu aŵa enze ofunishisha kuphunzisiwa na Yesu. Yove aliyokhumudwe olo kuŵakalipila. M’malomwake, eŵamvwila cifundo ndipo “eyamba kuŵaphunzisa zinthu zinyinji.” (Mko. 6:30-34) Ngati tutolela cisanzo ca Yesu mwa kuseŵenzesha nthawi na mphamvu zasu poyavya ayakine, tucitisha kuti Ausuwasu akululu alemekezeke. (Mat. 5:14-16) Ndipo ngati tucita izi,  tuonesha Yehova kuti tufuna kunkhala m’gulu yake mpaka kale-kale.

9. Kansi makolo ofunika kucita cinji?

⁹ Yehova epasa ŵanthu mwai wonkhala na ŵana koma soti udindo woŵaphunzisa kuti akomukonda nomutumikila. Ngati nimwe kolo, kansi muyamikila mphaso iyi yamtengo wapatali? Olo kuti angelo ni odalisika ngako, Yehova aliyoŵapase mwai wonkhala na ŵana. Tetyo, makolo mukoyamikila mwai uyu. Yehova okudalilani ngako ndipo ekupasani udindo wolela ŵana ‘m’malangizo ŵake noŵaphunzisa kaganizidwe kake.’ (Aef. 6:4; Deut. 6:5-7; Sal. 127:3) Pofuna kuyavya makolo kukwanilisha udindo uyu, gulu ya Mulungu yukonza zofalisa, mavidyo, nyimbo na nkhani ziyakine za pa intaneti. Uyu ni umboni wakuti Yehova oŵakonda ngako ŵana. (Luka 18:15-17) Yehova okondwela ngako ngati makolo omudalila nocita zilizonse zaangakwanishe posamalila ŵana ŵao. Ndipo ngati ocita izi, oyavya ŵana ŵao kuti ankhale m’gulu ya Yehova mpaka kale-kale.

10-11. Kansi dipo yutipasa mwai wotyani?

¹⁰ Yehova epeleka mwana wake wokondeka kuti tikokwanisha kunkhala pa ushamwali na yove. Monga ni mwataonela  m’ndime 4, Adamu na Eva aliyoyamikile malo ŵao m’banja ya Yehova, ndipo izi zekhuza soti ŵana ŵao. (Aro. 5:12) Mwadala, Adamu na Eva ecimwila Mulungu. Tetyo, enzofunika lini kupitilizhya kunkhala m’banja yake. Nanga tyani ponena za ŵana ŵao? Mwacikondi, Yehova epeleka mwana wake wokondeka kuti apeleke nsembe ya dipo. Izi zecitisha kuti ŵanthu onse amene ali na maganizo oyenelela ankhale na mwai wonkhala m’banja yake. (Yoh. 3:16; Aro. 5:19) Cifukwa ca nsembe ya Yesu, ŵanthu okwanila 144,000 ali na mwai wakuyolamulila pamozi na yove kululu.—Aro. 8:15-17; Chiv. 14:1.

¹¹ Kuyangizhyila apo, pali ŵanthu mamiliyoni anyinji amene ocita cifunilo ca Mulungu masiku ŵano. Ove ali na ciyembekezo cakuyonkhala angwilo pavuli pa ulamulilo wa Yesu wa vyaka 1,000. (Sal. 25:14; Aro. 8:20, 21) Cifukwa ca ciyembekezo ici, ŵanthu aŵa oona Yehova kunkhala ‘Ausuwao.’ (Mat. 6:9) Ŵanthu ati akaukishiwe akankhale na mwai wophunzila za Yehova. Ndipo ŵala ati akamvwile malangizo ŵake, akankhale na moyo wosasila.

12. Kansi lomba tilaŵizhyane konsho yotyani?

¹² Monga ni mwataphunzilila, Yehova wacita zinthu zinyinji pofuna kuonesha ŵanthu kuti oŵaona kunkhala ofunika ngako. Yehova esankha Akhristu ozozewa kuti akalamulile na Yesu kululu. Ndipo walonjeza kuti gulu ikulu ya ŵanthu ikankhale na moyo wosasila pacalo. (Chiv. 7:9) Lomba, tiyeni tilaŵizhyane konsho yakuti: Kansi tufunika kucitanji kuti tioneshe kuti tufuna kunkhala m’gulu ya Yehova mpaka kale-kale?

13. Kansi tufunika kucitanji kuti tipitilizhye kunkhala m’gulu ya Yehova? (Maliko 12:30)

¹³ Mukoonesha kuti mukonda Yehova mwa kum’tumikila na mtima wonse. (Ŵelengani Maliko 12:30.) Mulungu watipasa mphaso zinyinji ngako. Ndipo imozi mwa mphaso izi ni mwai womulambila. Tuonesha kuti tukonda Yehova ngati ‘tusunga malamulo ŵake.’ (1 Yoh. 5:3) Yehova ofuna kuti tikomvwila lamulo yecitipasa Yesu yakuti tikopanga ophunzila noŵabatiza. (Mat. 28:19) Yove ofuna soti kuti tikomvwila lamulo yecitipasa yakuti tikokondana. (Yoh. 13:35) Ngati tumvwila  malamulo yakutipasa Yehova, tipitilizhye kunkhala m’banja yake ya pacalo conse.—Sal. 15:1, 2.

14. Kansi tingaoneshe tyani kuti tukonda ayakine? (Mateyu 9:36-38; Aroma 12:10)

¹⁴ Mukoonesha kuti mukonda ŵanthu ayakine. Cikondi niye nkhalidwe ikulu ya Yehova. (1 Yoh. 4:8) Yove etionesha cikondi cake olo petenze tikaliyomuziŵa. (1 Yoh. 4:9, 10) Tingaoneshe kuti tutolela cisanzo cake ngati tuonesha kuti tukonda ŵanthu ayakine. (Aef. 5:1) Njila imozi yatingaoneshele kuti tukonda ŵanthu ni mwa kuŵayavya kuziŵa Yehova masilizhyilo akaliyofwika. (Ŵelengani Mateyu 9:36-38.) Ngati tucita izi, tingaŵayavye kuziŵa zakufunika kucita kuti ankhale m’gulu ya Yehova. Ngati munthu wetenzophunzila naye wabatizika, tufunika kupitilizhya kumuonesha cikondi nomulemekeza. (1 Yoh. 4:20, 21) Tingacite izi mwa kupewa kumukaikila. Mwacisanzo, ngati wacita cinthu ciyakine catiliyomvwishishe, tufunika kupewa kuganiza kuti wacitila lona. M’malomwake, tufunika kumulemekeza noona kuti otipambana.—Ŵelengani Aroma 12:10; Afil. 2:3.

15. Kansi ni ŵani ŵatufunika kuonesha cifundo na kuwama mtima?

¹⁵ Mukoonesha cifundo na kuwama mtima ku ŵanthu onse. Kuti tinkhale m’gulu ya Yehova mpaka kale-kale, tufunika kuseŵenzesha zayolaŵila Mau ŵake mu umoyo wasu. Mwacisanzo, Yesu elaŵila kuti tufunika kuonesha cifundo na kuwama mtima ku ŵanthu onse, kuyangizhyilapo adani ŵasu. (Luka 6:32-36) Koma nthawi ziyakine tingacione kunkhala covuta kucita izi. Ngati n’tetyo, tufunika kuphunzila Mau a Mulungu. Kucita izi, kungatiyavye kuti tikoganiza nocita zinthu monga ni mweenzocitila Yesu. Ngati tucita zonse zatingakwanishe pomvwila Yehova notolela cisanzo ca Yesu, tuonesha Ausuwasu akululu kuti tufuna kunkhala m’gulu yake mpaka kale-kale.

16. Kansi tingateteze tyani mbili ya gulu ya Yehova?

¹⁶ Mukoteteza mbili ya gulu ya Yehova. M’banja, ŵana okonda kutolela cisanzo ca akulu ŵao. Ngati ŵana akulu-akulu oseŵenzesha mfundo za m’Baibo mu umoyo wao, onkhala cisanzo ciweme kuli azisaza ŵao. Koma ngati ocita zinthu ziipa, azisaza ŵao otolela soti cisanzo cao ciipa. N’cimozimozi na m’gulu ya Yehova. Ngati Mkhristu wamene watumikila Yehova kwa nthawi itali wankhala wampatuko olo wayamba kucita minkhalidwe iyakine iipa, ayakine mumpingo angayambe kutolela cisanzo cake. Ŵanthu amene ocita izi, oipisha mbili ya gulu ya Yehova. (1 Ates. 4:3-8) Tufunika kupewa kutolela minkhalidwe iipa ya ŵanthu ayakine kuti tisaononge ushamwali wasu na Yehova.

17. Kansi tufunika kupewa maganizo otyani, ndipo ndaŵa yanji?

¹⁷ Mukodalila Yehova m’malo modalila zinthu zamuŵili. Yehova etilonjeza kuti akotipasa vinthu vonse vofunikila monga vakulya, vovwala na polala ngati tusunga malamulo ŵake noika Ufumu wake pa malo oyamba. (Sal. 55:22; Mat. 6:33) Ngati tukhulupilila lonjezo iyi, tikopewa kuganiza kuti zinthu zamuŵili niye zingatiteteze notiyavya kunkhala na umoyo wacimwemwe m’calo cino. M’malomwake, tikokumbukila kuti tingapeze cimwemwe cenecene ngati tucita cifunilo ca Yehova. (Afil. 4:6, 7) Olo kuti tingankhale na ndalama zinyinji zogulila vinthu, tufunika kuona ngati tikonkhala na nthawi yoviseŵenzesha novisamalila. Kucita izi kungatiyavye kuti tikopewa kukondeshesha zinthu zamuŵili. Tufunika soti kukumbukila kuti Mulungu watipasa nchito yatufunika kucita m’gulu  yake. Tetyo, tufunika lini kulola cinthu ciliconse kuti citisokoneze . Tufuna lini kunkhala monga ni munalume wamene ekana kunkhala wophunzila wa Yesu cifukwa cokondeshesha cuma. Yove etaya mwai wotumikila Yehova na kuyolamulila na Yesu.—Mko. 10:17-22.

18. Kansi atumiki a Yehova akalandile madaliso otyani?

¹⁸ Ŵanthu amene ni okhulupilika akankhale na mwai wolambila Yehova nomukonda mpaka kale-kale. Ŵala amene ali na ciyembekezo cakuyonkhala pacalo akasangalale na nchito yosamalila calo, yamene ni malo yeciŵapasa Yehova kuti akonkhalamo. Lombapano, Ufumu wa Mulungu ukakonze calo koma soti vinthu vonse kunkhala valomba. Yesu akasilizhye mavuto yonse yamene yewela cifukwa ca ucimo wa Adamu na Eva. Yehova akaukishe ŵanthu mamiliyoni anyinji amene ecifwa kuti akasangalale na moyo m’paladaiso. (Luka 23:42, 43) Ndipo atumiki onse a Yehova akayonkhala angwilo, akankhale na “ulemelelo na ulemu” wecilaŵila Davide.—Sal. 8:5.

19. Kansi tufunika kuganizila cinji nthawi zonse?

¹⁹ Ngati nimwe a “gulu ikulu,” ziŵani kuti Yehova wakusungilani zabwino msogolo. Yove okukondani ngako ndipo ofuna kuti munkhale m’gulu yake mpaka kale-kale. Tetyo, mukocita zinthu zomukondwelesha noganizila zinthu zawatilonjeza nthawi zonse. Ndipo mukomuyamikila cifukwa ca mwai wawatipasa wakuti tikomulambila nomutamanda mpaka kale-kale.