M’nkhani iyi, tephunzila kuti pali nkhani imozi yofunika ngako yamene yukhuza ŵanthu onse na angelo. Iyi ni nkhani yokhuza kutuŵishiwa kwa zina ikulu ya Yehova. Ndipo nkhani yokhuza ulamulilo, yukatizhyana ngako na nkhani yokhuza kutuŵishiwa kwa zina ya Yehova. Molingana na izi, nkhani yokhuza kunkhala okhulupilika kwa Yehova, yukatizhyana na nkhani yokhuza kutuŵishiwa kwa zina yake.

Ndaŵa yanji tugogomezela kuti zina ya Yehova na kutuŵishiwa kwake niye nkhani ikulu? Tiyeni tilaŵizhyane vifukwa vitatu.

Coyamba, Satana eipisha zina ya Yehova m’munda wa Edeni. Konsho yamene Satana ekonsha Eva yeonesha kuti Yehova eŵatana zinthu ziyakine zabwino. Yeonesha soti kuti malangizo amene Yehova epasa Adamu na Eva, enze lini abwino. Pavuli pake, Satana elaŵila zosiyana na zecilaŵila Yehova. Yove elaŵila kuti Mulungu ni wawenye. Tetyo, eipisha zina ya Yehova. Ndipo enkhala “Maleŵania” kutanthauza “woneneza.” (Yoh. 8:44) Cifukwa cakuti Eva ekhulupilila wenye wa Satana, yove aliyomvwile Mulungu. Izi zeonesha kuti epandukila ulamulilo wake. (Gen. 3:1-6) Satana opitilizhya kuipisha zina ya Yehova mwa kufalisa nkhani zawenye. Ŵanthu amene okhulupilila nkhani izi, omvwila lini Yehova. Tetyo, kwa atumiki a Mulungu, kuipishiwa kwa zina ituŵa ya Yehova ni kusoŵa cilungamo kukulu ngako. Ndipo niye cifukwa cake pacalo pali mavuto akulu ngako.

Caciŵili, pofuna kupindulisha cilengedwe cake, Yehova ni wosimikizhya kutuŵisha zina yake. Niye cifukwa cake yove olaŵila kuti: “Nikatuŵishe zina yangu ikulu.” (Ezek. 36:23) Yesu eonesha kuti kutuŵishiwa kwa zina ya Yehova niye cinthu coyamba cakufunika kupemphelela atumiki onse a Yehova pecilaŵila kuti: “Zina yanu ituŵishiwe.” (Mat. 6:9) Mowelezhyawelezhya, Baibo yugogomezela kufunika kolemekeza zina ya Yehova. Ganizilani visanzo ivi: “M’paseni Yehova ulemelelo wa zina yake.” (1 Mbi. 16:29; Sal. 96:8) “Imbani nyimbo zotamanda zina yake.” (Sal. 66:2) “Nilemekeze zina yanu mpaka kale-kale.” (Sal. 86:12) Imozi mwa nthawi pamene Yehova elaŵila kufumila kululu, yenze pa nthawi pamene Yesu enze m’kacisi ku Yerusalemu, ndipo esenga kuti: “Atata, lemekezani zina yanu.” Yehova eyankha kuti: “Nailemekeza ndipo niilemekeze soti.”—Yoh. 12:28. a

Cacitatu, colinga ca Yehova cukatizhyana na zina yake nthawi zonse. Ganizilani tyala mwamene zina ya Yehova ikankhalile yofunika pavuli pa ciyeso cosilizhyila, kosilizhyila kwa Ulamulilo wa Vyaka 1,000 wa Khristu. Kansi angelo na ŵanthu akamvwe tyani cifukwa ca zina ya Yehova pa  nthawi iyi? Kuti tiyankhe konsho iyi, tiyeni tikumbukile kukatizhyana kulipo pakati pa kukhulupilika kwa ŵanthu na ulamulilo. Kansi ŵanthu ati akaoneshe kukhulupilika akafunike kupitilizhya kuonesha kukhulupilika pavuli pa ciyeso cosilizhyila? Yai. Talaŵila teti cifukwa pa nthawi iyi akankhale angwilo ndipo akankhale kuti eyesewa kale. Kuyangizhyila apo, akankhale kuti alandila kale moyo wosasila. Pa nthawi iyi, pakafunikile lini soti kuonesha kuti ulamulilo wa Yehova niye wabwino ngako cifukwa zolengewa zonse za kululu na pacalo zikankhale zokatizhyana ndipo zikavomelezhye ulamulilo wa Yehova. Nanga tyani za zina ya Yehova?

Pa nthawi iyi, aliyense akaziŵe cendi cokhuza Yehova ndipo zina yake ikatuŵishiwe mpaka kale-kale. Olo n’tetyo, zina ya Yehova ikapitilizhye kunkhala yofunika ngako kuli atumiki ŵake onse okhulupilika kululu na pacalo. Ndaŵa yanji? Cifukwa akaone Yehova opitilizhya kucita zinthu ziweme. Ganizilani izi: Cifukwa cakuti molicefya Yesu akawezhyele ulamulilo kuli Yehova, Mulungu “akankhale zinthu zonse kuli aliyense.” (1 Akor. 15:28) Pavuli pake, ŵanthu pacalo akasangalale na “ufulu waulemelelo wa ŵana a Mulungu.” (Aro. 8:21) Ndipo Yehova akakwanilishe colinga cake conkhala na banja imozi yokatizhyana ya ŵana ŵake kululu na pacalo.—Aef. 1:10.

Pavuli pa zonse izi, kansi banja ya Yehova ya kululu na pacalo ikamvwe tyani? Mosakaikila, tikapitilizhye kunkhala na cifuno cotamanda zina yokongola ya Yehova. Wamasalimo Davide euzhyiliwa kulemba kuti: “Adalisike Yehova Mulungu . . . Idalisike zina yake yaulemelelo mpaka kale-kale.” (Sal. 72:18, 19) Tetyo, tipitilizhye kusakila vifukwa valomba votamandila Yehova mpaka kale-kale.

Zina ya Yehova yupanamila vinthu vonse vokhuza yove. Tetyo, nthawi zonse tikaganizila zina yake, zutikumbusha za cikondi cake. (1 Yoh. 4:8) Nthawi zonse tikokumbukila cikondi cecitionesha Yehova pecitilenga notipasa nsembe ya dipo. Tikokumbukila soti kuti ulamulilo wake ni wacilungamo koma soti wacikondi. Ndipo tipitilizhye kumvwa kuti tukondewa na Yehova. Tipitilizhye kuvwendela pafupi na Ausuwasu mpaka kale-kale noimba nyimbo zacitamando cifukwa ca zina yake yaulemelelo.—Sal. 73:28.