Yai, paliye paliponse m’Baibo olo m’mabuku a mbili zakale pamene poonesha kuti Akhristu enzobatizikila ŵanthu akufwa.

Kamasulilidwe ka mau aŵa m’mabaibo anyinji, kocitisha ŵanthu kuganiza kuti Akhristu a m’vyaka 100 voyambilila enzobatizikila ŵanthu akufwa. Mwacisanzo, mabaibo ayakine emasulila mau aŵa kuti: “Lomba ngati kuliye ciukililo, kansi ŵala obatizikila ŵanthu akufwa akacitenji?”

Olo n’tetyo, onani zecilaŵila akaswili aŵili azamaphunzilo a m’Baibo. Dr. Gregory Lockwood elaŵila kuti paliye umboni wa m’Baibo olo m’mbili yakale wamene usimikizhyila kuti Akhristu enzobatizikila ŵanthu akufwa. Molingana na izi, pulofesa Gordon D Fee elemba kuti: “Paliye umboni wa m’Baibo olo m’mbili yakale wamene uonesha kuti ubatizo woteti wenzocitika. Ndipo Cipangano Calomba culaŵilapo lini ciliconse pa nkhani yamene iyi. Kuyangizhyila apo, paliye umboni woonesha kuti pali cimozi mwa vipembezo Vacikhristu voyambilila olo vipembezo vepangiwa pavuli pakuti atumwi onse amwalila, cecitako ubatizo uyu.”

Baibo yulaŵila kuti Yesu elamula okonkha ŵake kuti ‘akapange ophunzila ku mitundu yonse, noŵabatiza . . . . Noŵaphunzisa kusunga vinthu vonse’ veciŵalamulila. (Mat. 28:19, 20) Munthu akaliyobatizika monga wophunzila wa Khristu ofunika kuphunzila, kukhulupilila nomvwila Yehova na Yesu. Munthu wakufwa angacite lini zamene izi olo munthu wa moyo kumucitila zamene izi.—Mla. 9:5, 10; Yoh. 4:1; 1 Akor. 1:14-16.

Kansi Paulo enzotanthauza cinji?

Ŵanthu a ku Korinto enzokhulupilila lini kuti ŵanthu akufwa akauke. (1 Akor. 15:12) Paulo eŵaonesha kuti ciphunziso ici cenze cawenye. Motyani? Yove elaŵila kuti ‘siku na siku enzonkhala pangozi yakuti angafwe.’ Nangu n’tetyo, yove enze akali na moyo. Mosasamala kanthu kuti moyo wake wenze pangozi, yove enze na cidalilo cakuti olo angafwe akaukishiwe noluta kululu, monga ni mwecicitila Yesu.—1 Akor. 15:30-32, 42-44.

Akhristu ozozewa a ku Korinto enzofunika kuzindikila kuti akakumane na mayeselo nokufwa akaliyoukishiwa. “Kubatizika mwa Khristu” kwenzoyangizhyilapo “kubatizika mu imfwa yake.” (Aro. 6:3) Izi zutanthauza kuti monga ni mwezecitikila kuli Yesu, nao enzofunika kukumana na mayeselo nokufwa kuti aukishiwe noluta kululu.

Vyaka vopitilila viŵili pavuli pakuti Yesu wabatizika, euzhya ophunzila ŵake aŵili kuti: “Mukabatiziwe na ubatizo wanubatiziwa nao neo.” (Mko. 10:38, 39) Yesu enzotanthauza lini kubatiziwa m’manzi. Yove enzotanthauza kuti kunkhala okhulupilika kwa Mulungu kwenze kuzocitisha kuti apaiwe. Paulo elembela Akhristu ozozewa kuti, “Tuvutikila naye pamozi kuti tikalondele naye ulemelelo.” (Aro. 8:16, 17; 2 Akor. 4:17) Izi zuonesha kuti nao ofunika kufwa kuti akaukishiwe noluta kululu.

Tetyo mau a Paulo angamasuliliwe molondola kuti: “Ngati akufwa akauke lini, ndaŵa yanji obatizika kuti ankhale akufwa? Ngati akufwa akauke lini, ndaŵa yanji obatizika ubatizo uyu?