1-2. Kansi Yehova etisegulila tyani njila kuti tinkhale mbali ya banja yake?

YEHOVA etileta m’banja ya olambila ŵake. Izi n’zokondwelesha ngako! M’banja iyi muli ŵanthu amene ezitwala kwa Mulungu koma soti oonesha cikhululupililo mu nsembe ya Mwana wake. Tili m’banja yacimwemwe. Tili na moyo watanthauzo lomba, koma soti tukondwela na ciyembekezo ca kuyonkhala na moyo wosasila kaya kululu olo m’paladaiso pacalo.

² Cifukwa cacikondi cake cikulu, Yehova etisegulila njila kuti tinkhale mbali ya banja yake. (Yohane 3:16) Tetyo “teguliwa pa mtengo wodula.” (1 Akor. 6:20) Kupitila mu nsembe ya dipo, Yehova ecitisha kuti zinkhale zokwanishika kunkhala pa ushamwali uweme na yove. Olo kuti ni mkulu ngako m’cilengedwe conse, tingamuite kuti ni Ausuwasu. Monga mwetiphunzilila mutu wapita, Yehova ni Ausuwasu muweme.

3. Kansi tingazikonshe makonsho otyani? (Onani bokosi yakuti “ Kansi Yehova Oniziŵa?”)

³ Monga ni mwecikonshela wolemba Baibo muyakine, nase tingazikonshe kuti: “Ningamuwezhyele cinji Yehova pa vinthu vonse viweme vawanicitila?” (Sal. 116:12) Yankho ni yakuti tingakwanishe lini kumuwezhyela. Koma cikondi cake pali seo cuticitisha kuti tikomukonda. Mtumwi Yohane elemba kuti: “Tumukonda, cifukwa yove niye eyamba kutikonda.” (1 Yohane 4:19) Kansi tingaoneshe tyani kuti tukonda Ausuwasu akululu?

4. Molingana na Yakobo 4:8, ndaŵa yanji tufunika kuyesayesa kuvwendela pafupi na Yehova?

⁴ Yehova ofuna kuti tivwendele pafupi na yove koma soti kuti tikolaŵila naye. (Ŵelengani Yakobo 4:8.) Otilimbikisha kuti, “limbikilani kupemphela.” (Aro 12:12) Otimvwishila nthawi zonse. Tumvwishila kuli yove mwa kuŵelenga Mau ŵake Baibo na zofalisa zamene zingatiyavye kuimvwisha luweme Baibo. Tumumvwishila soti mwa kumvwishila mosamala pa misonkhano Yacikhristu. Ngati makolo na ŵana olaŵizhyana nthawi zonse onkhala okatizhyana ngako. Nase ngati tulaŵizhyana na Yehova nthawi zonse tingankhale naye pafupi koma soti tinkhale okatizhyana.

5. Kansi tingacite cinji kuti Yehova avomelezhye mapemphelo ŵasu?

⁵ Kansi tingacite cinji kuti Mulungu avomelezhye mapemphelo ŵasu? Yehova ofuna kuti tikomuuzhya za mumtima mwasu m’pemphelo. (Sal. 62:8) Tingacite luweme kuzikonsha kuti: Ko mapemphelo yangu ni ya mwambo tyala olo ni yocokela pansi pamtima? Mosakaikila mum’konda ngako Yehova, ndipo mufuna kuti ushamwali wanu na yove unkhale wotang’a. Kuti mucite zamene izi , mufunika kulaŵila naye nthawi zonse. Mukomuuzhya zili mumtima mwanu. Mukomuuzhya zinthu zamwakondwela nazo na mavuto yanu. Nkhalani na cidalilo cakuti akuyavyeni.

6. Kansi tufunika kucita cinji kuti tivwendele pafupi na Ausuwasu akululu?

⁶ Kuti tivwendele pafupi na Ausuwasu akululu, tufunika kunkhala oyamikila. Tukatizhyana na wamasalimo wamene elemba kuti: “Mwaticitila vinthu vinyinji ngako vodabwisha, Yehova Mulungu wangu. Ndipo mutiganizila. Paliye angalingane namwe. Nikafuna kulaŵila za zodabwisha zanu, ni zinyinji ngako cakuti ningakwanishe lini kuzifotokoza!” (Sal. 40:5) Tuonesha kuti tuyamikila Yehova mwa mau na zocita zasu. Izi zuonesha kuti nise osiyana na ŵanthu ayakine. Tunkhala m’calo camene ŵanthu oyamikila lini pa zinthu zakuŵacitila Mulungu. Izi zuonesha kuti tunkhala “m’masiku osilizhya.” (2 Tim. 3:1, 2) Tetyo tufunika kupewa maganizo amene aŵa.

7. Kansi Yehova ofuna kuti tikocita cinji, ndipo ndaŵa yanji?

⁷ Makolo ofuna lini kuti ŵana ŵao akokangana, koma kuti akokatizhyana. Molingana na izi, Yehova ofuna kuti olambila ŵake akonkhala okatizhyana. Tetyo, cikondi catili naco cutiziŵikisha kuti nise Akhristu acendi. (Yohane 13:35) Tukatizhyana na wamasalimo wamene elemba kuti: “Ni zabwino koma soti zokondwelesha ngako akwasu akankhala pamozi mokatizhyana!” (Sal. 133:1) Ngati tukonda akwasu na azilongosi tuonesha kuti tumukonda Yehova. (1 Yohane 4:20). N’zosangalasha kunkhala m’banja yamene iyi yamene ili na akwasu na azilongosi amene “owamilana mtima, koma soti ni acifundo cikulu.”​—Aef. 4:32.

8. Molingana na 1 Yohane 5:3, ni cifukwa cikulu cotyani catukondela Yehova?

⁸ Yehova ofuna kuti ŵana akomvwila makolo ŵao. Molingana na izi oyembekezela kuti nase tikomumvwila. (Aef. 6:1) Tufunika kumumvwila cifukwa ni Nyamalenga wasu, wokwanilisha zofuna zasu, koma soti ni kolo yanzelu ngako kupambana kolo iliyonse. Nangu n’tetyo cifukwa cikulu catufunikila kumvwila Yehova ni cakuti tumukonda. (Ŵelengani 1 Yohane 5:3.) Nangu kuti tili na vifukwa vinyinji vonkhalila omvwila kwa Yehova,  yove otikakamizhya lini. Watipasa ufulu wozisankhila, koma ngati tasankha kumumvwila cifukwa comukonda, yove osangalala ngako.

9-10. Ndaŵa yanji tufunika kuziŵa mfundo za Yehova nozikonkha?

⁹ Makolo ofuna kuti ŵana akonkhala otetezeka. N’cifukwa cake oika malamulo pang’anda kuti aŵateteze. Ngati ŵana okonkha malamulo, oonesha kuti odalila nolemekeza makolo ŵao. Izi zuonesha kuti nase tufunika kuziŵa malamulo na mfundo za Ausuwasu akululu nozikonkha. Ngati tucita zamene izi tuonesha kuti tumukonda nomulemekeza Yehova, ndipo izi zingatipindulishe. (Yes. 48:17, 18) Mosiyana na zamene izi, ŵala amene okana kukonkha mfundo za Yehova okumana na mavuto.​—Agal. 6: 7, 8.

¹⁰ Ngati tukonkha mfundo za Yehova tutetezewa mwamuŵili, mwamaganizo na mwauzimu. Yehova oziŵa zinthu zatufunikila. Kalongosi Aurora wamene onkhala ku United States elaŵila kuti, “Nuziŵa kuti ngati munthu omvwila mfundo za Yehova onkhala na umoyo uweme.” Izi n’zacendi kuli seo tonse. Kansi mweo mwapindula tyani cifukwa cokonda mfundo za Yehova?

11. Kansi pemphelo ingatiyavye tyani?

¹¹ Pemphelo yutiyavya kuti tinkhale omvwila, nangu kuti kucita zamene izi n’kovuta. Nthawi ziyakine zingankhale zovuta kuti timvwile malamulo a Yehova koma tufunika kuyesayesa kuti tipewe cimo. Wamasalimo esenga Mulungu kuti: “Wezhyeleshani cisangalalo muli neo cifukwa ca cipulumuso  canu, niyavyeni kuti ninkhale na mzimu wofunishisha kukumvwilani.” (Sal. 51:12) Kalongosi Denise wamene ni mpainiya elaŵila kuti: “Ngati zunivuta kukonkha lamulo imozi ya Yehova, numusenga kuti aniyavye kuti nikwanishe kucita zoyenela.” Tingankhale osimikizhya kuti Yehova oyankha mapemphelo oteti. ​—Luka 11:9-13.

12. Molingana na Aefeso 5:1, kansi tufunika kucita cinji?

¹² Ŵelengani Aefeso 5:1. Monga ŵana okondeka tufuna kutolela cisanzo cake. Tutolela cisanzo cake mwa kukonda ayakine, kunkhala acifundo koma soti kukhululukila ayakine. Ngati ŵanthu asatumikila Yehova aona minkhalidwe yasu iweme, angasonkhezelewe kuyamba kuphunzila za Yehova. (1 Pet. 2:12) Makolo Acikhristu ali na vifukwa viweme votolela cisanzo ca Yehova pocita vinthu na ŵana. Ngati acita izi, nao ŵana angankhale pa ushamwali na Ausuwasu akululu.

13. Kansi tufunika kucita cinji kuti tinkhale otang’a?

¹³ Ŵana omekela ngako ausuwawo ndipo onkhala okonzeka kulaŵila za ausuwawo. Molingana na izi, tumekela kunkhala na Ausuwasu akululu, Yehova. Mu mitima mwasu tukumvwa monga ni mwecimvwila wamasalimo wamene elaŵila kuti: “Moyo wangu utamande Yehova.” (Sal 34:2.) Koma tyani ngati tukumvwa nsoni? Kansi tingankhale tyani otang’a? Tunkhala otang’a ngati taziŵa kuti Yehova asangalale ngati tulaŵila za Yove.  Yehova atiyavye kunkhala otang’a kuti tikwanishe kucita zamene izi. Eyavya Akhristu a m’vyaka 100 voyambilila kunkhala otang’a mtima ndipo nase angatiyavye. 1 Ates. 2:2.

14. Ndaŵa yanji tufunika kutolamo mbali mu nchito yopanga ophunzila?

¹⁴ Yehova aliye sankho ndipo okondwela ngati tuonesha cikondi ku ŵanthu ayakine, nangu kuti ekulila kumalo otyani. (Machitidwe 10:34, 35) Njila imozi yatingaoneshele cikondi kwa ayakine ni mwa kulalikila uthenga uweme wa Ufumu. (Mat. 28:19, 20) Kansi nchito iyi yayavya tyani ŵanthu? Ŵala omvwishila uthenga uweme angacinje umoyo wawo nonkhala na ciyembekezo cakuyonkhala na moyo wosasila m’Paladaiso.​—1 Tim. 4: 16.

15-16. Kansi tili na vifukwa votyani vonkhalila osangalala?

¹⁵ Yehova ni kolo ya cikondi ndipo ofuna kuti banja yake inkhale ya cimwemwe. (Yes. 65:14) Pali vifukwa vinyinji vatingankhalile acimwemwe lomba nangu kuti tukumana na mavuto. Mwacisanzo, nise osimikizhya kuti ausuwasu akululu otikonda ngako. Taphunzila mfundo zinyinji zokhuza Mulungu m’Baibo. (Yer. 15:16) Tili m’banja yapadela ya ŵanthu amene okonda Yehova, okonda mfundo zake za minkhalidwe iweme ndipo onse okondana.​—Sal. 106:4, 5.

¹⁶ Tingapitilizhye kunkhala okondwela cifukwa tuziŵa kuti umoyo ukankhale luweme kusogolo. Tuziŵa soti kuti lombapano Yehova acosepo viipa vonse kupitila mu Ufumu wake, ndipo calo cikankhale soti paladaiso. Tili soti na ciyembekezo cakuti onse ecifwa akaukishiwe nonkhala soti na moyo pamozi na okondeka ŵao. (Yohane 5:28, 29) Izi zikankhale zokondwelesha ngako! Ndipo kupambana zonse nise osimikizhya kuti tonse pacalo na kululu tikatwale ulemelelo woyenelela kuli Ausuwasu wakululu.