1. Kansi munthu enzofunika kucita cinji ngati ofuna kuyoonana na mfumu ya ku Perisiya?

GANIZILANI kuti mwenzeko vyaka 2,500 vapita ku Perisiya. Mwaganiza kuyoonana na mfumu, ndipo mwaluta ku mzinda wa Susani. Koma mukaliyoonana nayo, mufunika kutola cilolezo. Ngati mungalute paliye cilolezo mungapaiwe.​—Estere 4:11.

2. Kansi Yehova ofuna kuti tikokumvwa tyani ngati tulaŵila naye?

² Nise oyamikila kuti Yehova ali lini monga ni mfumu ya ku Perisiya! Yehova opambana wolamulila aliyense waumunthu, ndipo otilondela panthawi iliyonse. Ofuna kuti tikonkhala omasuka kulaŵila naye. Mwacisanzo, nangu kuti Yehova ali na mazina yaudindo monga Nyamalenga Mkulu, Wamphamvuyonse na Asikulu Mkulu, ofuna kuti tikolaŵila naye poseŵenzesha mau akuti “Atata.” (Mat. 6:9) N’cinthu cokondwelesha ngako kuti Yehova ofuna kuti tikonkhala pafupi na yove.

3. Ndaŵa yanji tufunika kuita Yehova kuti “Atata,” ndipo tilaŵizhyane cinji m’nkhani ino?

³ Pali luweme kuita Yehova kuti “Atata” cifukwa yove niye mwineco wa moyo. (Sal. 36:9) Cifukwa cakuti ni Atata, tufunika kumumvwila. Ngati tucita zakufuna yove, tikasangalale na madaliso. (Aheb. 12:9) Madaliso amene aŵa oyangizhyilapo moyo wosasila, kaya ni kululu olo pacalo. Nangu lomba tupindula na madaliso. Nkhani ino ifotokoze mwamene Yehova ocitila vinthu monga ni Atata wacikondi, koma soti cifukwa  cake tingankhale osimikizhya kuti akatisiye lini msogolo. Koma coyamba tiyeni tilaŵizhyane cifukwa cake tingankhale na cidalilo cakuti Ausuwasu akululu otikonda ngako notisamalila.

4. Ndaŵa yanji ayakine ociona kunkhala cinthu covuta kuona Yehova monga Ausuwao?

⁴ Kansi cukuvutani kuona Yehova monga ausuwanu? Ayakine angaone kuti Yehova ni wapalulu ngako ndipo ove ni osafunika kuli yove. Ndipo okaikila ngati Mulungu Wamphamvuzonse osamala za ove, aliyense payeka. Koma Ausuwasu acikondi ofuna lini kuti tikokumvwa teti. Etipasa moyo ndipo ofuna kuti tinkhale pa ushamwali na yove. Pavuli polaŵila mfundo yacendi yamene iyi, mtumwi Paulo efotokozela omvwishila ŵake ku Atene kuti, “Yehova ali lini kutali na aliyense wa seo.” (Machitidwe 17:24-29) Mulungu ofuna kuti aliyense wa seo akolaŵila na yove monga ni mwakucitila mwana polaŵila na makolo ŵake acikondi.

5. Tingaphunzile cinji pa cisanzo ca kalongosi muyakine Wacikhristu?

⁵ Ayakine angacione kunkhala covuta kuona Yehova monga Ausuwao cifukwa cakuti ausuwao aumunthu enzoŵaonesha lini cikondi. Ganizilani zecifotokoza kalongosi muyakine Wacikhristu, elaŵila kuti, “Atata enzokonda kunyoza. Tetyo peneyamba kuphunzila Baibo, cenze covuta kuona kuti nili pafupi na Ausuwasu akululu. Koma penemuziŵa luweme Yehova, zinthu zecinja.” Kansi namwe mukumvwa cimozimozi? Ngati n’tetyo, musataye mtima, namwe mungamvwe kuti Yehova ni Ausuwanu muweme.

6. Molingana na Mateyu 11:27, ni njila imozi yotyani yamene Yehova otiyavyila kuti tikomuona monga Atata wacikondi?

⁶ Njila imozi yecitiyavyila Yehova kuti tikomuona monga Atata wacikondi, ni mwa kulemba mau a Yesu na zocita zake m’Baibo. (Ŵelengani Mateyu 11:27.) Yesu eonesha minkhalidwe ya Ausuwake, ndipo elaŵila kuti: “Aliyense waona neo waona Atata.” (Yohane 14:9) Nthawi zinyinji Yesu enzofotokoza udindo waali nao Yehova monga Atata. M’mabuku 4 a uthenga uweme, Yesu eseŵenzesha mau akuti “Atata” nthawi zokwanila 165 polaŵila za Yehova. Ndaŵa yanji Yesu elaŵila ngako za Yehova? Enzofuna kuti ŵanthu akhulupilile kuti Yehova ni Atata wacikondi.​—Yohane 17:25, 26.

7. Tuphuzilapo cinji tikaona mwecicitila vinthu Yehova na Mwana wake?

⁷ Ganizilani tyala zatuphunzilapo tikaona mwecicitila vinthu Yehova na Mwana wake Yesu. Nthawi zonse Yehova enzomvwishila mapemphelo a Yesu. Enzomvwishila lini tyala koma enzoyankha. (Yohane 11:41, 42) Mosasamala kanthu za mayeselo yecikumana nayo Yesu, eona cikondi na thandizo ya Ausuwake.​—Luka 22:42, 43.

8. Kansi Yehova eyavya Yesu m’njila zotyani?

⁸ Yesu enzozindikila kuti Ausuwake ni Nyamalenga koma soti womusamalila pecilaŵila kuti: “Nili na moyo cifukwa ca Atata.” (Yohane 6:57) Yesu enzodalila Ausuwake na mtima wonse, ndipo Yehova enzomusamalila pom’pasa vinthu vofunikila pa umoyo. Kupambana zonse, Yehova emuyavya Yesu kuti ankhale wokhulupilika.​—Mat. 4:4.

9. Kansi Yehova eonesha tyani kuti ni Atata wacikondi kwa Yesu?

⁹ Monga Atata wacikondi, Yehova eyavya Yesu kuzindikila kuti enzomucilikiza. (Mat. 26:53; Yohane 8:16) Nangu kuti Yehova  aliyomuteteze Yesu pa mayeselo alionse yecikumana nayo, emuyavya kuti apilile. Yesu enzoziŵa kuti zilizonse zaangakumane nazo zenze zosankhalisha. (Aheb. 12:2) Yehova eonesha kuti enzomukonda Yesu mwa kumumvwishila, kumusamalila, kumuphunzisa nomuyavya. (Yohane 5:20; 8:28) Lomba tiyeni tione mwamene Ausuwasu akululu otisamalilila monga ni mwecicitila kwa Yesu.

10. Molingana na Salimo 66:19, 20, kansi Yehova oonesha tyani kuti otikonda?

¹⁰ Yehova omvwishila mapemphelo ŵasu. (Ŵelengani Salimo 66:19, 20.) Yehova aliyotiikile malile mwatufunikila kupemphelela, koma otilimbikisha kuti tikopemphela nthawi zonse. (1 Ates. 5:17) Tingapemphele kwa Yehova mwaulemu nthawi iliyonse, mosasamala kanthu kwatingankhale. Otangwanika lini kuti angakangiwe kumvwishila mapemphelo ŵasu. Tikazindikila kuti Yehova omvwishila mapemphelo ŵasu, tuyamba kumukonda ngako. Wamasalimo elaŵila kuti, “Nukonda Yehova cifukwa omvwishila mau ŵangu.”​—Sal. 116:1.

11. Kansi Yehova oyankha tyani mapemphelo wasu?

¹¹ Ausuwasu Yehova omvwishila lini tyala mapemphelo ŵasu koma oyankha. Mtumwi Yohane etisimikizhyila kuti: “Ciliconse catingamusenge mokatizhyana na cifunilo cake, otimvwa.” (1 Yohane 5:14, 15) Koma nthawi ziyakine Yehova angayankhe lini mapemphelo ŵasu m’njila yatuyembekezela. Oziŵa zatufunikila, nthawi ziyakine angayankhe lini olo tingafunike kuyembekezela.​—2 Akor. 12:7-9.

12-13. Kansi Ausuwasu akululu otisamalila m’njila zotyani?

¹² Yehova otipasa zofunikila. Yove ocita vinthu vakufunikila kucita mitu ya mabanja. (1 Tim. 5:8) Opasa ŵana ŵake vinthu vofunikila pa umoyo. Ofuna lini kuti tikonkhala na nkhaŵa yokhuza vakulya, vovwala na ponkhala. (Mat. 6:32, 33; 7:11) Monga kolo yacikondi, Yehova watisimikizhyila kuti akatipase zinthu zonse zatufunikila msogolo.

¹³ Yehova otipasa soti zatufunikila kuti tinkhale pa ushamwali uweme na yove. Kupitila m’Mau ŵake, watiuzhya zacendi zokhuza yove, colinga cake, tanthauzo ya moyo koma soti zati zikacitike msogolo. Otiyavya poseŵenzesha makolo olo ŵanthu ayakine kuti atiphunzise zokhuza yove. Ndipo akalupitilizhya kutiyavya kuti tinkhale pa ushamwali na yove kupitila mwa akulu mumpingo, na akwasu na azilongosi okhwima mwauzimu. Kuyangizhyila apo, otiphunzisa kupitila m’misonkhano ya mpingo. Kupitila m’njila izi na ziyakine, Yehova otionesha cikondi monga ca kolo.​—Sal. 32:8.

14. Ndaŵa yanji Yehova otiphunzisa, ndipo ocita tyani zamene izi?

¹⁴ Yehova otiphunzisa. Mosiyana na Yesu, seo tiliye ungwilo. Nthawi ziyakine angatipase cilango ngati mpofunikila. Mau ŵake otikumbusha kuti: “Pakuti Yehova olanga aliyense wakukonda.” (Aheb. 12:6, 7) Yehova otilanga m’njila zinyinji. Mwacisanzo, zinthu zatuŵelenga m’Mau ŵake olo zatumvwishila pa misonkhano zingatiyavye kucinja. Olo payakine tingalondele thandizo kupitila mwa akulu. Mulimonse mwazingankhalile, Yehova otipasa cilango cifukwa cotikonda.​—Yer. 30:11.

15. Kansi Yehova otiteteza m’njila zotyani?

¹⁵ Yehova otiyavya tikakumana na mayeselo. Monga ni mwakucitila atata aumunthu kuyavya ŵana ŵao akakumana na mavuto, nao Ausuwasu akululu otiyavya tikakumana na mayeselo. Oseŵenzesha mzimu wake  utuŵa kuti atiteteze ku vinthu vingaononge ushamwali wasu na yove. (Luka 11:13) Yehova otiyavya ngati tili na nkhaŵa. Mwacisanzo, otipasa ciyembekezo ciweme. Ciyembekezo camene ici cutiyavya kupilila mavuto. Ganizilani mfundo iyi: Olo kuti vinthu viipa viticitikile, Ausuwasu acikondi akacosepo mavuto. Mavuto yatingakumane nayo ni yosankhalisha, koma madaliso yakutipasa Yehova ni yosasila.​—2 Akor. 4:16-18.

16. N’cinji cecitika pavuli pakuti Adamu wapondokela Ausuwake akululu?

¹⁶ Tuona umboni wa cikondi ca Yehova tikaona mwecicitila zinthu na makolo ŵasu oyambilila. Adamu pecipondokela Ausuwake akululu, etaya mwai wake, koma soti wa mbadwa zake wonkhala m’banja yacimwemwe ya Yehova. (Aro. 5:12; 7:14) Koma Yehova ecitapo kanthu kuti ayavye mbadwa za Adamu.

17. Pavuli pakuti Adamu wapondoka, ko Yehova ecita cinji nthawi yamene iyo?

¹⁷ Yehova emulanga Adamu, koma epasa mbadwa zake ciyembekezo. Nthawi yamene iyo elonjeza kuti ŵanthu omvwila akankhale soti m’banja ya Yehova. (Gen. 3:15; Aro. 8:20, 21) Epanga makonzedwe aya kupitila mu nsembe ya Mwana wake wokondeka Yesu. Mwa kupeleka Mwana wake kuti atiombole, Yehova eonesha kuti otikonda ngako.​—Yohane 3:16.

18. Ndaŵa yanji tingankhale osimikizhya kuti Yehova otikonda monga ŵana ŵake olo kuti temusiya?

¹⁸ Nangu kuti tiliye ungwilo, Yehova ofuna kuti tinkhale m’banja yake, ndipo otiona lini kunkhala cinthu coŵeŵesha. Tingamulakwile olo kumusiya kwa kanthawi, koma Yehova onkhala na cikhulupililo cakuti tiwelele kwa yove. Yesu eonesha kukula kwa cikondi caali naco Yehova pecifotokoza fanizo ya mwana woloŵelela. (Luka 15:11-32) Ausuwake a  mwana m’fanizo iyi aliyoleke kukhulupilila kuti mwana wao akawelele. Mwana peciwelela, ausuwake emulondela mwacimwemwe. Ngati temusiya Yehova koma talapa, tingankhale na cidalilo cakuti atilondele mwacimwemwe.

19. Kansi Yehova akakonze tyani vinthu veciononga Adamu?

¹⁹ Ausuwasu akakonze vonse veciononga Adamu. Pavuli pakuti Adamu wacimwa, Yehova esankha a 144,000 kuti akalamulile monga mafumu koma soti ansembe kululu pamozi na Mwana wake. Yesu pamozi na olamulila ayake akayavye ŵanthu omvwila kuti akankhale angwilo m’calo calomba. Ati akapulumuke pa ciyeso cosilizhyila, Mulungu akaŵapase moyo wosasila. Pavuli pake Ausuwasu akakondwele ngako kuona calo cazula na ŵanthu angwilo, anakazi na analume. Kulaŵila cendi, ikankhale nthawi yokondwelesha ngako!

20. Kansi Yehova waonesha kuti otikonda m’njila zotyani, ndipo m’nkhani yokonkhapo tikaphunzile cinji?

²⁰ Yehova waonesha kuti otikonda ngako. Yove ni Atata muweme ngako. Omvwishila mapemphelo ŵasu ndipo otipasa zinthu zatufunikila, zamuŵili na zauzimu. Otiphunzisa notiyavya ndipo watisungila madaliso anyinji msogolo. Nise osangalala ngako kuziŵa kuti Ausuwasu otikonda notisamalila. M’nkhani yokonkhapo tikaphunzile njila zatingaoneshele kuti tuyamikila cikondi cake.