NKHANI YOPHUNZILA 9
Tolelani Cisanzo ca Yesu pa Nkhani Yotumikila Ayakine
“Kupasa kuleta cimwemwe cikulu kupambana kulandila.”—MAC. 20:35.
NYIMBO 17 “Nufuna”
ZATI TIPHUNZILE *
1. Kansi atumiki a Yehova oonesha mzimu wotyani?
BAIBO yelosela kuti atumiki a Mulungu “akazipeleke mofunishisha” potumikila Yehova mosogolelewa na Mwana wake. (Sal. 110:3) Ulosi uyu ukwanilishiwa masiku ŵano. Caka ciliconse, atumiki a Yehova otaila maawazi mamiliyoni anyinji pa nchito yolalikila. Ove ocita nchito iyi mwa kufuna kwao ndipo opasiwa lini malipilo alionse. Atumiki a Yehova aŵa ocilikiza soti okhulupilila ayao mwamuŵili na mwauzimu. Kuyangizhyila apo, akulu na atumiki oyavya oseŵenzesha maawazi anyinji pokonzekela mbali zao pa misonkhano koma soti pocita maulwendo aubusa. Kansi n’cinji cusonkhezela atumiki a Mulungu kucita izi? N’cifukwa cakuti okonda Yehova na ŵanthu.—Mat. 22:37-39.
2. Molingana na Aroma 15:1-3, kansi Yesu etisiila cisanzo cotyani?
2 Yesu ni cisanzo cabwino ngako pa nkhani yoika zofuna za ayakine pa malo oyamba. Monga Akhristu, tufunika kucita zilizonse zatingakwanishe kuti titolele cisanzo cake. (Ŵelengani Aroma 15:1-3.) Ngati tucita izi, tipeze madaliso osaneneka. Yesu elaŵila kuti: “Kupasa kuleta cimwemwe cikulu kupambana kulandila.”—Mac. 20:35.
3. Kansi tilaŵizhyane cinji m’nkhani ino?
3 M’nkhani ino, tilaŵizhyane ziyakine mwa zinthu zecicita Yesu potumikila ayakine na mwatingatolele cisanzo cake. Tiphunzile soti zatingacite kuti tikulishe cifuno cotumikila ayakine.
TOLELANI CISANZO CA YESU
Kansi Yesu ecitanji gulu ya ŵanthu peyewela kuli yove olo kuti enze woŵeŵa? (Onani ndime 4)
4. Kansi Yesu eonesha tyani kuti enzoika zofuna za ayakine pa malo oyamba?
4 Yesu enzoyavya ayakine olo peenze woŵeŵa. Ganizilani zecicita pamene gulu ya ŵanthu yemukonkha peenze m’mbali mwa lupili, yamene payakine yenze pafupi na mzinda wa Kaperenao. Yesu enze eŵeŵa ngako cifukwa cakuti epemphela usiku wonse. Koma peciona gulu ya ŵanthu, ecitila cifundo osauka na olwala amene enze pakati pao. Yove epolesha olwala nocita ulaliki wochuka wamene uziŵika kuti Ulaliki wa Palupili.—Luka 6:12-20.
Kansi tingatolele tyani cisanzo ca Yesu pa nkhani yotumikila ayakine? (Onani ndime 5)
5. Kansi mitu ya mabanja ingatolele tyani cisanzo ca Yesu olo pa nthawi yakuti ni oŵeŵa?
5 Mwamene mitu ya mabanja ingatolele cisanzo ca Yesu. Ganizilani cocitika ici: Pavuli poseŵenza kwa siku yonse, mutu wabanja ofwika pa ng’anda apo n’kuti ni woŵeŵa ngako. Cifukwa ca izi, yove oona kuti angakwanishe lini kucitisha kulambila kwa pabanja pa siku iyi. Koma pavuli pake, osenga Yehova kuti amupase mphamvu kuti akwanishe kusogoza kulambila uku. Yehova oyankha pemphelo yake ndipo mkwasu uyu okwanisha kusogoza kulambila kwa pabanja monga ni mwakucitila wiki iliyonse. Ŵana otolapo phunzilo yofunika ngako yakuti makolo ŵao oona kuti kulambila Yehova niye cinthu cofunika ngako.
6. Fotokozani cisanzo cuonesha mwamene Yesu eseŵenzeshela nthawi yake poyavya ŵanthu ayakine.
6 Yesu enzoyavya ayakine olo pa nthawi yakuti enzofuna kucita zinthu zaumwini. Kansi muganiza kuti Yesu ecimvwa tyani peciziŵa kuti Yohane Mbatizi wamene enze shamwali wake, epaiwa? Cuoneka kuti ecimvwa cisoni ngako. Baibo yulaŵila kuti: “Peecimvwa [za imfwa ya Yohane] Yesu ekwela boti noluta ku malo kuliye ŵanthu kuti ankhale kwayeka.” (Mat. 14:10-13) Tingamvwishe cifukwa cake Yesu enzofuna kunkhala kwayeka cifukwa olo masiku ŵano, ŵanthu anyinji osankha kunkhala kwaŵeka ngati ali na cisoni. Koma colinga cake ciliyokwanilishike cifukwa ŵanthu anyinji efwika ku malo aŵa yove akaliyofwika. Kansi Yesu ecitanji? Eganizila zosoŵa za ŵanthu ndipo “eŵacitila cifundo.” Yesu ezindikila kuti ŵanthu aŵa enzofunikila kusisimuliwa mwauzimu. Tetyo, “eyamba kuŵaphunzisa zinthu zinyinji.”—Mko. 6:31-34; Luka 9:10, 11.
7-8. Fotokozani visanzo vuonesha mwamene akulu acikondi otolela cisanzo ca Yesu ngati Akhristu ayao ofunikila thandizo.
7 Mwamene akulu acikondi otolela cisanzo ca Yesu. Tuyamikila ngako nchito zakucita akulu potiyavya. Akwasu na azilongosi anyinji mumpingo, oziŵa lini nchito zonse zakucita akulu. Mwacisanzo, ngati Mkhristu walwala matenda yokhuzana na zamilopa, akwasu amene otumikila m’Komiti Yolaŵizhyana na Azacipatala, ocitapo kanthu kamangu kuti aŵapanamileko polaŵizhyana na madokota. Kanyinji-kanyinji, izi zukonda kucitika pa nthawi ya usiku. Koma akaganizila zawakumana nazo mkwasu olo kalongosi, mosonkhezelewa na cifundo, akwasu aŵa pamozi na mabanja ŵao, oika zofuna za okhulupilila ayao pa malo oyamba.
8 Akulu oyavya soti pa nchito yomanga Mang’anda ya Ufumu, malo ocitilapo misonkhano ikulu-ikulu na pa nchito yopeleka thandizo pakacitika masoka acilengedwe. Kuyangizhyila apo, oseŵenzesha nthawi yao ikulu potiphunzisa notilimbikisha. Tuŵayamikila ngako akwasu aŵa pamozi na mabanja ŵao. Ndipo pemphelo yasu ni yakuti Yehova apitilizhye kuŵadalisa cifukwa ca mzimu wakuonesha. Koma molingana na Akhristu onse, akulu ofunika kuseŵenzesha nthawi yao mwanzelu. N’cendi kuti ofunika kucita khama posamalila maudindo ŵao mumpingo. Koma izi, zufunika lini kuŵakangisha kusamalila mabanja ŵao.
ZAMUNGACITE KUTI MUKULISHE MZIMU WOTUMIKILA AYAKINE
9. Molingana na Afilipi 2:4, 5, kansi Akhristu onse ofunika kunkhala na maganizo otyani?
9 Ŵelengani Afilipi 2:4, 5. N’cendi kuti ni tonse lini amene nise akulu mumpingo. Koma tonse tufunika kutolela cisanzo ca Yesu pa nkhani yotumikila ayakine. Baibo yulaŵila kuti Yesu “enkhala monga kapolo.” (Afil. 2:7) Ganizilani zatingaphunzilepo pa mau aŵa. Kapolo olo mtumiki wabwino, oyesayesa kucita zilizonse zaangakwanishe kuti akondweleshe abosi ŵake. Cifukwa cakuti nimwe akapolo a Yehova ndipo mutumikila akwasu, mufunika kucita zilizonse zamungakwanishe kuti muŵakondweleshe. Onani ziyakine mwa zinthu zingakuyavyeni kucita izi.
10. Kansi tingazikonshe makonsho otyani?
10 Ganizilani mwamucitila zinthu. Mungacite bwino kuzikonsha kuti: ‘Kansi nunkhala wokonzeka kuseŵenzesha nthawi na mphamvu zangu poyavya ayakine? Mwacisanzo, kansi ningacitenji ngati anisenga kuti nikaone mkwasu wacikulile wamene onkhala ku ng’anda yosungilako akulukazi, olo ngati anganisenge kuti ninyamuleko kalongosi wacikulile pakuya ku misonkhano? Kansi nuzipeleka kuti niyavyeko pa nchito yoyelesa pa malo yocitilapo misonkhano olo pa Ng’anda ya Ufumu?’ Petezipeleka kwa Yehova, temulonjeza kuti tikoseŵenzesha zonse zatili nazo pomutumikila. Yove ofuna kuti tikoseŵenzesha nthawi yasu, mphamvu zasu na cuma casu poyavya ayakine. Ngati tucita izi, yove osangalala ngako. Nanga tufunika kucitanji ngati taona kuti pali mbali yatufunika kuongolela?
11. Kansi pemphelo ingatiyavye tyani kuti tikulishe mzimu wotumikila ayakine?
11 Mukopemphela kwa Yehova mofumila pansi pa mtima. Kansi mungacitenji ngati muona kuti pali mbali yamufunika kuongolela pa nkhani yotumikila ayakine, koma muona kuti mungakwanishe lini? Mufunika kupemphela kwa Yehova mofumila pansi pa mtima. Mukomuuzhya mwamumvwila nomusenga kuti ‘atang’ishe zolakalaka zanu kuti mucite zinthu zonse zakukonda.’—Afil. 2:13.
12. Kansi akwasu acilumbwana amene ni obatizika, angayavye tyani mumpingo?
12 Ngati nimwe mkwasu wacilumbwana wobatizika, mukosenga Yehova kuti akuyavyeni kunkhala na cifuno cocita zinyinji poyavya akwasu na azilongosi mumpingo. M’vyalo viyakine, akulu ni anyinji kupambana atumiki oyavya. Ndipo anyinji mwa atumiki oyavya ni acikulile. Gulu ya Mulungu payukuya yukulilakulila, pofunikila akwasu acilumbwana anyinji amene angayavye posamalila akwasu na azilongosi mumpingo. Ngati munkhala okonzeka kucita utumiki ulionse wamungapasiwe, munkhale osangalala. Ndaŵa yanji? Cifukwa mukokondwelesha Yehova, munkhale na mbili yabwino ndipo mukonkhala na cimwemwe camene cuwela cifukwa coyavya ayakine.
Akhristu a ku Yudeya peciutuka, etauka m’mana wa Yorodano noluta mumzinda wa Pela. Ŵala amene eyambilila kufwika oyaŵila vakulya ayao amene ecelwa kufwika (Onani ndime 13)
13-14. Kansi tufunika kucitanji kuti tiyavye akwasu na azilongosi? (Onani cithunzithunzi ca pacikuto.)
13 Mukonkhala chelu kuti mukokwanisha kuzindikila Akhristu amene ofunikila thandizo. Mtumwi Paulo euzhya Akhristu a ku Yudeya kuti: “Musaluŵe kucita zabwino noyaŵana zinthu na ayakine, pakuti Mulungu okondwela na nsembe zoteti.” (Aheb. 13:16) Aya yenze malangizo yaweme ngako. Pakaliyopita nthawi itali kufumila pecilandila kalata iyi, Akhristu a ku Yudeya enzofunika kusiya mang’anda ŵao, malonda yao na abanja ŵao osakhulupilila ‘noutukila ku malupili.’ (Mat. 24:16) Pa nthawi iyi, ove enzofunika kuyavyana. Ngati Akhristu aŵa enzoyaŵana vinthu veenze navo na Akhristu ayao olo peenze akaliyoutukila ku malupili, monga ni mweciŵalangizila mtumwi Paulo, niye kuti aliyovutike kujaila umoyo walomba.
14 Ni nthawi lini zonse pamene akwasu na azilongosi angacitotiuzhya kuti ofunikila thandizo. Mwacisanzo, mkwasu wamene mkazi wake emwalila, angafunikile thandizo pa mbali yomugulilako vakulya, mayendedwe olo kumuseŵenzelako nchito za pa ng’anda. Payakine angatiuzhye lini kuti ofunikila thandizo pa mbali izi poyopa kuti tingaganize kuti otivuta. Koma angayamikile ngako ngati tingamuyavye olo kuti aliyotisenge. Tufunika kupewa kunkhala na maganizo akuti ŵanthu ayakine amuyavye olo kuganiza kuti ngati ofuna thandizo atiuzhye. Zikonsheni kuti: ‘Ngati n’neo nakumana na vuto yoteti, kansi ningakonde kuti ŵanthu ayakine anicitile zotyani?’
15. Kansi tufunika kucitanji kuti tikoyavya ayakine?
15 Nkhalani ofwikilika. Mosakaikila, muziŵako akwasu na azilongosi mumpingo mwanu amene onkhala okonzeka kuyavya ayakine nthawi zonse. Akhristu aŵa, oticitisha lini kunkhala na maganizo akuti tuŵavutisha. Tuziŵa kuti onkhala okonzeka kutiyavya tikakumana na mavuto, ndipo nase tufuna kutolela cisanzo cao. Mkwasu Alan wamene ni mkulu ndipo ali na vyaka va m’ma 40, oyesayesa kunkhala wofwikilika. Pofotokoza zeciphunzila pa cisanzo ca Yesu, yove elaŵila kuti: “Yesu enzonkhala wotangwanika, koma enze wofwikilika ndipo ŵanthu amisinkhu yosiyanasiyana enzonkhala omasuka kumusenga thandizo. Ŵanthu aŵa enzocita izi cifukwa enzoziŵa kuti yove enzoŵakonda ndipo enzosamala za ove. Nane nucita zilizonse zaningakwanishe kuti nitolele cisanzo ca Yesu pa nkhani yonkhala wofwikilika, waubwenzi koma soti wosamala za ayakine.”
16. Kansi kuseŵenzesha malangizo opezeka pa Salimo 119:59, 60 kungatiyavye tyani kutolela cisanzo ca Yesu mosamala?
16 Tufunika lini kutaya mtima tikaona kuti tutolela lini cisanzo ca Yesu ndendende monga ni mwatufunila. (Yak. 3:2) Munthu wamene ophunzila kudulowing’a angapambane lini womuphunzisa. Koma ngati ophunzilapo kanthu pa zakulakwisa noyesayesa kutolela cisanzo ca mphunzisi ŵake mosamala, naye angayambe kudulowing’a vithunzithunzi vooneka bwino. Molingana na izi, ngati tuyesayesa kuseŵenzesha zatuphunzila pocita phunzilo ya paseka nocita khama kuongolela zolakwa zasu, tingakwanishe kutolela cisanzo ca Yesu mosamala.—Ŵelengani Salimo 119:59, 60.
MADALISO YATINGAPEZE NGATI TUTUMIKILA AYAKINE
Ngati akulu otolela cisanzo ca Yesu pa nkhani yotumikila ayakine, nao acilumbwana oyesayesa kutolela cisanzo cao (Onani ndime 17) *
17-18. Kansi tingapeze madaliso otyani ngati tutolela cisanzo ca Yesu pa nkhani yotumikila ayakine?
17 Ngati tunkhala okonzeka kuyavya ayakine mumpingo, Akhristu ayakine angalimbikishiwe kucita cimozimozi. Mkwasu Tim wamene ni mkulu elaŵila kuti: “Mumpingo mwasu tili na akwasu acilumbwana amene eyamikiliwa kunkhala atumiki oyavya. Cimozi mwa vinthu veŵayavya kuti ayenelele kutumikila pa udindo uyu, ni kutolela cisanzo ca Akhristu ayakine amene enze ofunishisha kuyavya ayao. Akwasu acilumbwana aŵa oyavya mpingo nocilikiza ngako akulu.”
18 Ŵanthu anyinji m’calo cino ni ozikonda. Koma atumiki a Yehova ali lini teti. M’nkhani ino, taona zecicita Yesu potumikila ŵanthu ayakine, ndipo tufunishisha kutolela cisanzo cake. N’cendi kuti tingatolele lini cisanzo cake ndendende. Koma tingakwanishe kukonkha “maluwayo ŵake mosamala.” (1 Pet. 2:21) Ngati tucita zonse zatingakwanishe potolela cisanzo ca Yesu, tinkhale acimwemwe poziŵa kuti tukondwelesha Yehova.
NYIMBO 13 Khristu ni Cisanzo Casu
^ par. 5 Yesu enzoika zofuna za ayakine pa malo oyamba nthawi zonse. M’nkhani ino, tiphunzile mwatingatolele cisanzo cake. Tione soti madaliso yatingapeze ngati tutolela cisanzo ca Yesu pa nkhani yotumikila ayakine.
^ par. 57 MAU OFOTOKOZA VITHUNZITHUNZI: Mkwasu wacilumbwana wa zina yakuti Dan, wacita cidwi na akulu aŵili amene aluta kuyoona ausuwake m’cipatala. Cisanzo cao camulimbikisha kuti naye akoonesha cikondi ku ŵanthu ayakine mumpingo. Mkwasu wacilumbwana muyakine wa zina yakuti Ben, wacita cidwi na cikondi cawaonesha Dan kuli kalongosi wacikulile. Cisanzo ca Dan calimbikisha Ben kuti ayavyeko pa nchito yoyelesa m’Ng’anda ya Ufumu.
