M’CILAMULO ca Mose, Aisiraeli enzololewa kupeleka nkhunda olo njiŵa monga nsembe kwa Yehova. Kanyinji-kanyinji, tunyoni utu twenzotomolewa pamozi m’malamulo okhuza kupeleka nsembe. Ngati munthu aliye nkhunda enzopeleka njiŵa, ndipo ngati aliye njiŵa enzopeleka nkhunda. (Lev. 1:14; 12:8; 14:30) Ndaŵa yanji izi zenze zopindulisha? Cifukwa cimozi n’cakuti ni nthawi lini zonse pamene njiŵa zenzopezeka pafupi. Ndaŵa yanji?

Njiŵa zupezeka paliponse ku Isiraeli m’nyengo yakupya. Koma caka ciliconse mu October, zundalalila ku vyalo va kum’mwela kwamene ni kwakupya ndipo zuwelela ku Isiraeli m’nyengo yakupya. (Nyi. 2:11, 12; Yer. 8:7) M’nthawi za m’Baibo, izi zenzocitisha kuti cinkhale covuta kwa Aisiraeli kupeleka njiŵa monga nsembe m’nyengo yozizila.

Mosiyana na izi, nkhunda zucinjacinja lini malo. Tetyo, zenzopezeka pafupi m’nyengo iliyonse. Kuyangizhyila apo, nkhunda zenzotekewa. (Linganizhyani na Yohane 2:14, 16.) Buku yakuti Bible Plants and Animals yelaŵila kuti “ku Palestine, ŵanthu onse a ku minzi na a m’tauni enzoteka nkhunda. Pa ng’anda paliponse penzopezeka kakhola olo cim’boo ku cipupa ca ng’anda mwamene mwenzonkhala nkhunda.”—Linganizhyani na Yesaya 60:8.

Tetyo, Yehova eonesha kuti ni wacikondi koma soti wololela mwa kulola kuti Aisiraeli akopeleka nsembe tunyoni twamene twenze tosavuta kupeza m’nyengo iliyonse ya caka.