YOMARA na azilongosi ŵake—Marcelo na Hiver—onkhala m’munzi utontho ku Guatemala. Yomara eyamba kuphunzila Baibo na Mboni za Yehova. Pavuli pake, nao azilongosi ŵake eyamba kuphunzila Baibo. Koma penzeko vuto iyakine. Onse atatu ololesha lini, ndipo enzokwanisha lini kuŵelenga mabuku ya ŵanthu osalolesha. Tetyo, mkwasu wamene enzoŵaphunzisa Baibo enzocitoŵaŵelengela ndime na Malemba pa phunzilo.

Cenzonkhala soti covuta kuti apezeke pa misonkhano ya mpingo cifukwa enzokwanisha lini kuyenda ŵeka msenga wa maminesi 40. Tetyo, mpingo wepanga makonzedwe akuti ukoŵayavya kupezeka pa misonkhano yonse. Ndipo peciyamba kulaŵila nkhani m’sukulu, akwasu na azilongosi enzoŵayavya kukonzekela nosunga pa mtima mbali zao.

Mu May 2019, misonkhano ya mpingo yeyamba kucitikila m’munzi mwao. Pa nthawi iyi, banja iyakine ya apainiya yenze yekukila m’munzi mwao. Olo kuti apainiya aŵa enzoziŵa lini kuŵelenga olo kulemba mabuku ya ŵanthu osalolesha, enzofunishisha kuŵaphunzisa mocitila izi. Tetyo, eluta ku laibulale notola mabuku ya ŵanthu osalolesha na colinga cakuti aphunzile mophunzisila ayakine moyaseŵenzeshela.

M’miyezi itontho, Yomara na azilongosi ŵake, eyamba kukwanisha kuŵelenga mabuku ya ŵanthu osalolesha mosavuta. Izi zeŵayavya kuti apite pasogolo mwauzimu. a Pali lomba, onse atatu otumikila monga apainiya anthawi zonse. Ndipo Marcelo ni mtumiki woyavya. Ove onkhala otangwanika wiki yonse pocita zinthu zauzimu. Ndipo ŵanthu ayakine otolela cisanzo cao cabwino ca kuzipeleka.

Yomara na azilongosi ŵake, oyamikila ngako cikondi na thandizo yakulandila kufumila ku mpingo. Yomara elaŵila kuti: “Kufumila tyala pa nthawi yoyamba, Mboni za Yehova zationesha cikondi cenecene cacikhristu.” Naye Marcelo elaŵila kuti: “Tili na ayasu abwino mumpingo wa kwasu, ndipo nise mbali ya banja ya pacalo conse yamene ni yokatizhyana koma soti yukondana.” Yomara na azilongosi ŵake oyembekezela mwacidwi kuyoona nthawi pamene Yehova akacinje calo kunkhala paladaiso.​—Sal. 37:10, 11; Yes. 35:5.