1. Fotokozani cisanzo coonesha cifukwa cake tufunika kukonkha cisogozo ca Yehova.

 GANIZILANI kuti mwasoŵa m’cipululu. M’cipululu ici muli vinyama, tudoyo toyambisha matenda, vomela va poizoni koma soti visengu vakuti mungaponelemo. Kulaŵila cendi, mungasangalale ngako kupeza munthu wamene oŵaziŵa bwino malo aŵa ndipo angakutetezeni kuti musakumane na mavuto. Calo catunkhalamo cili monga ni cipululu ndipo ni cozula na vinthu voyofya vamene vingaononge ushamwali wasu na Yehova. Koma cokondwelesha n’cakuti tili na wotisogolela wangwilo, Yehova. Yove otiyavya kuti tipewe vinthu voyofya notisogolela kuti tikapeze moyo wosasila m’calo calomba.

2. Kansi Yehova otisogolela tyani?

² Kansi Yehova otisogolela tyani? Coyamba, oseŵenzesha Mau ŵake Baibo. Ndipo caciŵili, oseŵenzesha ŵanthu. Mwacisanzo, oseŵenzesha “kapolo wokhulupilika na wanzelu” kuti atipase cakulya cauzimu notiyavya kupanga zosankha mwanzelu. (Mat. 24:45) Kuyangizhyila apo, Yehova oseŵenzesha analume oyenelela kuti atisogolele. Mwacisanzo, tili na oyanganila a madela na akulu mumpingo amene otipasa cilimbikiso na malangizo amene otiyavya kuti tikwanishe kupilila pa nthawi zovuta. Nise oyamikila ngako kuti Yehova otisogolela bwino ngako m’nthawi zino zovuta, masilizhyilo akaliyofwika. Izi zutiyavya kuti tipitilizhye kunkhala pa ushamwali na Yehova na kuti tikosangalala na moyo lomba koma soti mpaka kale-kale.

3. Kansi tiphunzilenji m’nkhani ino?

³ Olo n’tetyo, nthawi ziyakine tingavutike kukonkha malangizo a Yehova makamaka ngati yotwaliwa na ŵanthu amene aliye ungwilo. Ndaŵa yanji? N’cifukwa cakuti payakine malangizo yaangatipase yangasiyane na zinthu zatukonda. Olo payakine malangizo yaangatipase yangaoneke monga ni yosathandiza ndipo payakine  tingafwike na pokaikila ngati yofumila cendi kwa Yehova. Zinthu zikankhala teti, tufunika kunkhala na cidalilo cakuti Yehova osogolela gulu yake na kuti kukonkha malangizo ŵake kungacitishe kuti tipeze madaliso anyinji. Kuti titang’ishe cidalilo casu, nkhani ino ifotokoze (1) mwamene Yehova enzosogolelela atumiki ŵake m’nthawi zakuvuli, (2) mwamene Yehova osogolelela atumiki ŵake masiku ŵano na (3) mwatingapindulile ngati tukonkha malangizo ŵake.

MWAMENE YEHOVA ENZOSOGOLELELA MTUNDU WA AISIRAELI

4-5. Kansi Yehova eonesha tyani kuti enzoseŵenzesha Mose posogolela Aisiraeli? (Onani cithunzithunzi ca pacikuto.)

⁴ Yehova esankha Mose kuti asogolele Aisiraeli pofuma mu Iguputo. Yove epasa Aisiraeli umboni ooneka bwino wakuti enzoŵasogolela kupitila mwa Mose. Mwacisanzo, mzuŵa enzoŵasogolela kupitila mu mkumbi ndipo usiku na mulilo. (Eks. 13:21) Mose ekonkha mkumbi wamene uyu wamene wesogolela Aisiraeli ku Nyanja Isweta. Koma masoja aciiguputo enzokonkha Aisiraeli pavuli. Izi zeŵacitisha ngako wowa poganiza kuti mwina Aiguputo aŵapaye. Kuyangizhyila apo, ove eganiza kuti Mose ephonia poŵasogolela ku Nyanja Isweta. Koma uku kwenze lini kuphonia. Yehova eseŵenzesha Mose pofuna kusogolela ŵanthu ŵake ku malo aŵa. (Eks. 14:2) Pavuli pake, Yehova eŵapulumusa m’njila yodabwisa.—Eks. 14:​26-28.

⁵ Vyaka 40 pavuli pake, Mose epitilizhya kudalila mkumbi posogolela ŵanthu a Mulungu m’cipululu. a Kwa kanthawi, Yehova eika mkumbi palulu pa hema wa Mose ndipo Aisiraeli onse enzokwanisha kuuona. (Eks. 33:​7, 9-10) Kupitila mu mkumbi wamene uyu, Yehova elaŵila na Mose ndipo pavuli pake, yove euzhya ŵanthu zecimuuzhya Yehova. (Sal. 99:7) Aisiraeli eona umboni wooneka bwino wakuti Yehova enzoseŵenzesha Mose kuti aŵasogolele.

6. Kansi Aisiraeli eyalandila tyani malangizo a Yehova? (Numeri 14:​2, 10, 11)

⁶ Comvwisha cisoni n’cakuti Aisiraeli ayakine ekana umboni wooneka bwino wakuti Yehova enzoseŵenzesha Mose polaŵila nao. (Ŵelengani Numeri 14:​2, 10, 11.) Mowelezhyawelezhya, ove ekana kuvomelezhya kuti Yehova enzoseŵenzesha Mose kuti aŵasogolele. Cifukwa ca izi, Yehova aliyoŵalole kuti aloŵe m’Calo Colonjezewa.—Num. 14:30.

7. Fotokozani visanzo va ŵanthu amene ekonkha malangizo a Yehova. (Numeri 14:24) (Onani soti cithunzithunzi.)

⁷ Olo n’tetyo, penze soti Aisiraeli ayakine amene ekonkha mosamala malangizo ofumila kwa Yehova. Mwacisanzo, Yehova elaŵila kuti: “Kalebe . . . epitilizhya kumukonkha na mtima wonse.” (Ŵelengani Numeri 14:24.) Cifukwa ca izi, Yehova edalisa Kalebe ndipo efwika mpaka pomulola kuti asankhe malo kweenzofuna kunkhala m’Calo Colonjezewa. (Yos. 14:​12-14) Aisiraeli amene elolewa kuloŵa m’Calo Colonjezewa, eonesha cisanzo cabwino pokonkha malangizo a Yehova. Mwacisanzo, Yoswa peciloŵa m’malo mwa Mose monga msogoleli wosankhiwa wa Aisiraeli, ove “enzomulemekeza ngako masiku onse a moyo wake.” (Yos. 4:14) Cifukwa ca izi, Yehova eŵadalisa ndipo eŵapasa Calo Colonjezewa.—Yos. 21:​43, 44.

8. Fotokozani mwamene Yehova esogolelela ŵanthu ŵake m’nthawi ya mafumu. (Onani soti cithunzithunzi.)

⁸ Vyaka vinyinji pavuli pake, Yehova esankha oweluza kuti akosogolela ŵanthu ŵake. Koma pavuli pake, m’nthawi ya mafumu, Yehova esankha aneneli kuti akosogolela ŵanthu ŵake. Mafumu okhulupilika ekonkha malangizo yeciŵapasa aneneli. Mwacisanzo, Mfumu Davide,  evomelezhya uphungu wecipasiwa na mneneli Natani. (2 Sam. 12:​7, 13; 1 Mbi. 17:​3, 4) Mfumu Yehosafati ekonkha malangizo yecipasiwa na mneneli Yahazieli ndipo elimbikisha ŵanthu a mu Yuda kuti ‘akodalila aneneli a Mulungu.’ (2 Mbi. 20:​14, 15, 20) Mfumu Hezekiya peenzokumana na mavuto, esenga mneneli Yesaya kuti amuyavye. (Yes. 37:​1-6) Nthawi zonse ngati mafumu akonkha malangizo a Yehova, enzodalisiwa ndipo mtundu wa Aisiraeli wenzotetezewa. (2 Mbi. 20:​29, 30; 32:22) Tetyo, izi zecitisha aliyense kuona umboni wakuti Yehova enzoseŵenzesha aneneli posogolela ŵanthu ŵake. Olo n’tetyo, penze soti mafumu na Aisiraeli ayakine amene ekana kumvwila aneneli a Yehova.—Yer. 35:​12-15.

MWAMENE YEHOVA ENZOSOGOLELELA AKHRISTU OYAMBILILA

9. Kansi Yehova enzoseŵenzesha ŵani posogolela Akhristu a m’vyaka 100 voyambilila? (Onani soti cithunzithunzi.)

⁹ Pa Pentekosite wa mu 33 C.E., Yehova enkhazikisha mpingo wacikhristu. Kansi enzoŵasogolela tyani Akhristu oyambilila? Yove esankha Yesu kunkhala mutu wa mpingo. (Aef. 5:23) Olo n’tetyo, Yesu enzolaŵila lini mwacindunji na wophunzila aliyense poŵauzhya zocita. M’malo mwake, enzoseŵenzesha atumwi na akulu ku Yerusalemu kuti aŵasogolele. (Mac. 15:​1, 2) Tetyo, akulu enzosankhiwa kuti asogolele mipingo.—1 Ates. 5:12; Tito 1:5.

10. (a) Kansi anyinji mwa Akhristu oyambilila eyalandila tyani malangizo yecipasiwa? (Machitidwe 15:​30, 31) (b) Ndaŵa yanji Akhristu ayakine a m’nthawi zakuvuli ekangiwa kuzindikila cisogozo ca Yehova? (Onani kabokosi kakuti “ Cifukwa Cake Ayakine Ekana Umboni Wooneka Bwino.”)

¹⁰ Kansi Akhristu a m’vyaka 100 voyambilila eyalandila tyani malangizo? Anyinji mwa Akhristu aŵa esangalala ngako na malangizo yecilandila ndipo enze okonzeka kuyaseŵenzesha. Ove “ekondwela ngako cifukwa ca mau olimbikisha” yecilandila. (Ŵelengani Machitidwe 15:​30, 31.) Kansi Yehova wankhala osogolela tyani atumiki ŵake masiku ŵano?

MWAMENE YEHOVA OSOGOLELELA ATUMIKI ŴAKE MASIKU ŴANO

11. Fotokozani cisanzo coonesha mwamene Yehova wankhala osogolelela ŵanthu amene osogolela masiku ŵano.

¹¹ Olo masiku ŵano, Yehova wapitilizhya kusogolela atumiki ŵake. Yove wankhala ocita izi kupitila m’Mau ŵake Baibo koma soti kupitila mwa  Mwana wake wamene ni mutu wa mpingo. Kansi pali umboni ulionse wamene uonesha kuti Yehova wapitilizhya kusogolela ŵanthu poseŵenzesha omupanamila? Eee. Mwacisanzo, ganizilani zecitika pavuli pa caka ca 1870. Mkwasu Charles Taze Russell na ayake ezindikila kuti caka ca 1914 cenze kuzonkhala caka cofunika ngako ca Ufumu wa Mulungu. (Dan. 4:​25, 26) Ove epeza umboni uyu cifukwa cakuti efufuza m’Baibo ndipo enze na cikhulupililo cakuti maulosi aŵa akakwanilishiwe. Kansi Yehova enzoŵasogolela peenzofufuza m’Baibo? Eee. Talaŵila teti cifukwa mu 1914, zocitika pacalo zeonesha kuti Ufumu wa Mulungu weyamba kulamulila. Nkhondo Yoyamba ya Pacalo Conse peyeyamba, pacalo peyamba kucitika vivomezi, milili na njala. (Luka 21:​10, 11) Kulaŵila cendi, Yehova enzoseŵenzesha analume aŵa oona mtima kuti ayavye atumiki ŵake.

12-13. Kansi ni makonzedwe yotyani yepangiwa pa nthawi ya Nkhondo Yaciŵili ya Pacalo Conse pofuna kuyangizhyila nchito yolalikila nophunzisa?

¹² Ganizilani soti zecitika peyeyamba Nkhondo Yaciŵili ya Pacalo Conse. Akwasu amene enzosogolela ku likulu ya Mboni za Yehova ya pacalo conse, ephunzila lemba ya Chivumbulutso 17:8. Pa kuphunzila uku, emvwisha kuti Nkhondo Yaciŵili ya Pacalo Conse yenze lini kuzosogolela ku nkhondo ya Aramagedo. Tetyo, emvwisha kuti penze kuzonkhala nthawi ya mtendele pavuli pa nkhondo, pamene Mboni za Yehova zenze kuzolalikila ŵanthu anyinji. Pa nthawi iyo, izi zenzooneka monga kuti zenze zovuta kumvwisha. Gulu ya Mulungu yenkhazikisha sukulu ya Giliyadi na colinga cakuti aphunzise amishonale kuti akolalikila nophunzisa pacalo conse. Amishonale enzotumizhyiwa olo pa nthawi ya nkhondo. Kuyangizhyila apo, kapolo wokhulupilika na wanzelu enkhazikisha Kosi ya Utumiki wa Mulungu b na colinga cakuti ayavye ofalisa onse kuti akolalikila nophunzisa mwaluso. Izi zeyavya atumiki a Mulungu kukonzekela kukata nchito yolalikila yamene yenze kuzocitika msogolo.

¹³ Masiku ŵano, tuona umboni wakuti Yehova enzosogolela atumiki ŵake pa nthawi yovuta. Kufumila pa nthawi ya Nkhondo Yaciŵili ya Pacalo Conse, atumiki a Yehova m’vyalo vinyinji ankhala olalikila mwaufulu. Izi zacitisha kuti ŵanthu anyinji amuziŵe Yehova na kuti atumiki ŵake akwanishe kulalikila pacalo conse.

14. Ndaŵa yanji tufunika kudalila malangizo yofumila ku gulu ya Yehova koma soti kwa akulu? (Chivumbulutso 2:1) (Onani soti cithunzithunzi.)

 ¹⁴ Masiku ŵano, akwasu a m’Bungwe Yolamulila opitilizhya kukonkha malangizo a Khristu. Ove ofuna kuti malangizo yakupeleka kuli akwasu na azilongosi, yakooneka kuti yofumila kwa Mulungu. Kuyangizhyila apo, ove oseŵenzesha oyanganila a madela na akulu popeleka malangizo ku mipingo. c Akulu ozozewa ali pa “kwanja yamalendi” ya Khristu. (Ŵelengani Chivumbulutso 2:1.) Akulu aŵa aliye ungwilo ndipo nthawi ziyakine olakwisa zinthu. Nthawi ziyakine Mose na Yoswa enzolakwisa zinthu monga ni mweenzocitila atumwi. (Num. 20:12; Yos. 9:​14, 15; Aro. 3:23) Olo n’tetyo, Khristu osogolela kapolo wokhulupilika na wanzelu koma soti akulu ndipo apitilizhye kucita teti “masiku onse mpaka masilizhyilo a nthawi ino.” (Mat. 28:20) Tetyo, tili na vifukwa vomvwika vokhulupilila malangizo yaakutipasa kupitila muli analume aŵa amene otisogolela.

TUPINDULA NGATI TUPITILIZHYA KUKONKHA CISOGOZO CA YEHOVA

15-16. Kansi mwaphunzilapo cinji pa zokumana nazo za ŵanthu amene ekonkha malangizo a Yehova?

¹⁵ Ngati tupitilizhya kukonkha malangizo a Yehova, tusangalala na madaliso olo pali lomba. Mwacisanzo, mkwasu Andy na kalongosi Robyn eseŵenzesha malangizo ofumila kwa kapolo wokhulupilika na wanzelu okhuza kunkhala na umoyo wosalila zinyinji. (Onani manosi ophunzilila m’Baibo ya Cizungu pa Mateyu 6:22.) Cifukwa ca izi, ove ezipeleka kuti akayavye kumanga Mang’anda a Ufumu na vimango viyakine va m’gulu yasu. Kalongosi Robyn elaŵila kuti: “Nthawi ziyakine tenzonkhala m’vipinda vitontho ngako cakuti tenzonkhala tiliye malo opikila. Cifukwa ca izi, negulisa zinthu zinyinji zenenzoseŵenzesha pokopa mafoto olo kuti nenzosangalala kukopa mafoto. Penegulisa zinthu izi, necimvwa cisoni ndipo nelila. Koma molingana na mkazi wa Abulahamu, Sara, nenze wofunishisha osati kunkhala na cisoni cifukwa ca zinthu zenegulisa, koma kunkhala osangalala cifukwa ca zinthu zenenzokwanisha kucita potumikila Yehova.” (Aheb. 11:15) Kansi mkwasu Andy na kalongosi Robyn epindula tyani? Kalongosi Robyn elaŵila kuti: “Nise osangalala ngako cifukwa coziŵa kuti tupasa Yehova zilizonse zatili nazo. Ngati neo na alume ŵangu tuseŵenza nchito yawatipasa Yehova, tunkhala na cithunzi cokhuza mwati ukankhalile umoyo m’paladaiso.” Naye mkwasu Andy elaŵila kuti:  “Nise osangalala cifukwa tuseŵenzesha nthawi na mphamvu zasu zonse pa nchito ya Yehova.”

¹⁶ Kansi tupindula soti motyani ngati tupitilizhya kukonkha malangizo a Yehova? Pavuli posilizhya maphunzilo a ku sekondale, kalongosi Marcia enzofunishisha kukonkha malangizo yecilandila yakuti ayambe upainiya. (Mat. 6:33; Aro. 12:11) Yove elaŵila kuti: “Nenze nepasiwa mwai wonilipilila ku yuniveziti kwa vyaka 4. Koma nenzofunishisha kukwanilisha zolinga zangu zauzimu. Tetyo, m’malo moluta ku yuniveziti, nesankha kuluta ku sukulu yophunzisa za maluso na colinga cakuti nikokwanisha kupeza ndalama zakuti zikoniyavya pocita upainiya. Ici cenze cosankha cabwino ngako cenepanga. Lomba, nusangalala kucita upainiya wanthawi zonse ndipo pofwana kuti nchito yangu yunipasa mpata, nukwanisha kuyavyako nchito pa Beteli nosangalala na mbali ziyakine potumikila Yehova.”

17. Kansi ni mapindu ayakine otyani yatingapeze ngati tupitilizhya kukonkha cisogozo ca Yehova? (Yesaya 48:​17, 18)

¹⁷ Nthawi ziyakine, tulandila malangizo ofumila ku gulu ya Yehova amene otiteteza. Mwacisanzo, tucenjezewa za kukondeshesha ndalama na zinthu zamene zingatipangishe kunyalanyaza malamulo a Mulungu. Kulaŵila cendi, ni cabwino ngako kukonkha malangizo a Mulungu. Zili teti cifukwa tupewa mavuto ndipo tupitilizhya kunkhala na cikumbumtima cituŵa. (1 Tim. 6:​9, 10) Cifukwa ca izi, tukwanisha kutumikila Yehova na mtima wonse ndipo paliye ciliconse cutipasa cimwemwe na mtendele kupambana kutumikila Yehova.—Ŵelengani Yesaya 48:​17, 18.

18. Ndaŵa yanji nimwe ofunishisha kupitilizhya kukonkha cisogozo ca Yehova?

¹⁸ Mosakaikila, Yehova apitilizhye kuseŵenzesha ŵanthu potipasa malangizo pali lomba, pa cisauso cikulu koma soti mpaka mu Ulamulilo wa Vyaka 1,000. (Sal. 45:16) Kansi tipitilizhye kukonkha malangizo olo kuti kucita izi kungatanthauze kupewa kuyendela maganizo ŵasu? Izi zingadalile pa mwatucitila zinthu pali lomba tikapasiwa malangizo ofumila kwa Yehova. Tetyo, tiyeni tipitilizhye kukonkha malangizo a Yehova kuyangizhyilapo na yala yofumila kuli analume amene esankhiwa kuti akotiyanganila. (Yes. 32:​1, 2; Aheb. 13:17) Tikacita izi, tinkhale na cifukwa comvwika cokhulupilila msogoleli wasu Yehova, wamene otipewesha ku ngozi yauzimu notisogolela ku moyo wosasila m’calo calomba.