1. Kansi Yehova elosela kuti n’cinji cati cikacitike m’nthawi yasu ino?

YEHOVA elosela za m’nthawi yasu ino kuti: “Analume 10 ofumila m’vilaŵilo vonse akakate mwamphamvu covwala ca m’Yuda nolaŵila kuti: “Tilute namwe cifukwa tamvwa kuti Mulungu ali namwe.” (Zek. 8:23) Mu “Yuda” opanamila ozozewa na mzimu utuŵa. Oitiwa soti kuti “Isiraeli wa Mulungu.” (Agal. 6: 16) “Analume 10” opanamila ŵala ali na ciyembekezo conkhala pacalo mpaka kale-kale. Oziŵa kuti Yehova wasankha gulu ya ozozewa ndipo oona kuti ni mwai kulambila nao pamozi.

2. Kansi “analume 10” oluta tyani pamozi na ozozewa?

² Nangu kuti ni covuta kuziŵa zina ya wozozewa aliyense ali pacalo, * ŵala ali na ciyembekezo conkhala na moyo wosasila pacalo, ‘oluta’ na ozozewa. Motyani? Baibo yulaŵila kuti, “analume 10” “akakate mwamphamvu covwala ca m’Yuda nolaŵila kuti: ‘Tilute namwe cifukwa tamvwa kuti Mulungu ali namwe.’” Baibo yulaŵila za m’Yuda m’mozi. Koma mau akuti “namwe” na mau akuti “ali namwe” oonesha kuti ni ŵanthu anyinji. Izi zutanthauza kuti m’Yuda ni munthu lini m’mozi, koma ni gulu yonse ya Akhristu ozozewa. A gulu ikulu otumikila Yehova pamozi na ozozewa. Olo n’tetyo, oona lini  ozozewa kunkhala asogoleli ŵao, cifukwa oziŵa kuti Yesu niye msogoleli wao.​—Mat. 23:10.

3. Ni makonsho otyani yati tilaŵizhyane mu nkhani ino?

³ Pofwana kuti Akhristu ozozewa ali pakati pa ŵanthu a Mulungu masiku ŵano, ayakine angazikonshe kuti: (1) Kansi Akhristu ozozewa oziona tyani? (2) Kansi ŵanthu akulya viphiphiliso pa Cikumbuso tufunika kuŵaona tyani? (3) Kansi tufunika Kucita nkhaŵa ngati ciŵelengelo ca ŵanthu akulya viphiphiliso cuyangizhyilika? Nkhani ino iyankhe makonsho amene aŵa.

4. Kansi ni cenjezo yotyani yopezeka pa 1 Akorinto 11:27-29 yamene Akhristu ozozewa ofunika kuganizila, ndipo ndaŵa yanji?

⁴ Akhristu ozozewa ofunika kuganizila mwamphamvu cenjezo yupezeka pa 1 Akorinto 11:27-29. (Ŵelengani.) Kansi ozozewa angalye tyani viphiphiliso mosayenelela? Angacite zamene izi ngati akulya na kumwa viphiphiliso koma okonkha lini mfundo zolungama za Yehova. (Aheb. 6:4-6; 10:26-29) Ozozewa ozindikila kuti ofunika kunkhala okhulupilika kuti akalondele “mphoto yao kululu yeciŵaitila Mulungu kupitila mwa Yesu.”​—Afil. 3:13-16.

5. Kansi Akhristu ozozewa ofunika kuziona tyani?

 ⁵ Mzimu utuŵa wa Yehova uyavya atumiki ŵake kunkhala olicefya. (Aef. 4:1-3; Akol. 3:10, 12) Tetyo, Akhristu ozozewa oziona lini kuti ni amtengo wapatali ngako kupambana ayakine. Oziŵa kuti Yehova oŵapasa lini mzimu utuŵa wopambana Akhristu ayakine. Oona lini kuti ove ŵeka niye omvwisha ngako Baibo kupambana Akhristu ayakine. Ndipo ofunika lini kuuzhya ayakine kuti nao azozewa, ndipo angayambe kulya viphiphiliso pa Cikumbuso. Molicefya ozindikila kuti Yehova niye osankha munthu kuti alute kululu.

6. Molingana na 1 Akorinto 4:7, 8, kansi Akhristu ozozewa ofunika kuziona tyani?

⁶ Nangu kuti Akhristu ozozewa oona kuti ni mwai kuti esankhiwa kuluta kululu, oyembekezela lini ayakine kuti akoŵapasa ulemu m’njila yapadela. (Afil. 2:2, 3) Oziŵa soti kuti Yehova peciŵasankha, aliyouzhyeko ayakine za kusankhiwa kwao. Tetyo, Mkhristu wozozewa odabwa lini ngati ayakine okhulupilila lini kuti yove esankhiwa. Ozindikila kuti Baibo yulaŵila kuti tufunika lini kufulumila kukhulupilila munthu ngati olaŵila kuti Mulungu wamupasa udindo wapadela. (Chiv. 2:2) Mkhristu wozozewa ofuna lini kulondela ulemu wapadela, olo kuuzhya ayakine kuti ezozewa. Ofunika lini kuzikuzhya cifukwa cakuti ni wozozewa.​—Ŵelengani 1 Akorinto 4:7, 8.

7. Kansi Akhristu ozozewa ofunika kupewa cinji, ndipo ndaŵa yanji?

⁷ Akhristu ozozewa oona lini kuti ofunika kutandala tyala na Akhristu ozozewa ayao, cifukwa cakuti ali m’gulu imozi. Osakilasakila lini Akhristu ozozewa ayao, pofuna kuti akolaŵizhyana za kuzozewa kwao, olo kupanga kagulu kuti akophunzila Baibo pamozi. (Agal. 1:15-17) Mumpingo mungankhale lini mgwilizano ngati kuti Akhristu ozozewa angocita zamene izi. Ngati angacite izi, angocita zinthu mosiyana na mzimu utuŵa wamene uyavya atumiki a Mululngu kuti akonkhala mwamtendele na mokatizhyana.​—Aro. 16:17, 18.

8. Ndaŵa yanji tufunika kunkhala osamala na mwatucitila vinthu na ŵanthu akulya viphiphiliso? (Onani mau a m’nyansi)

⁸ Kansi akwasu na azilongosi ozozewa tufunika kuŵaona tyani? Kungankhale kulakwa kukumbwila ngako munthu cifukwa  cakuti ni wozozewa. (Mat. 23:8-12) Polaŵila za akulu, Baibo yulaŵila kuti, ‘tolelani cikhulupililo cao.’ Izi zutanthauza lini kuti tufunika kuŵaona kunkhala asogoleli ŵasu. (Aheb. 13:7) N’cendi kuti Baibo yulaŵila kuti akulu osogolela bwino “akopasiwa ulemu ukulu.” Ofunika kupasiwa ulemu ukulu cifukwa ca ‘nchito zao ziweme na kuphunzisa,’ osati cifukwa cakuti ni ozozewa. (1 Tim. 5:17) Ngati ozozewa tuŵatamanda noŵapasa ulemu wopitilila malile, angazimvwe lini kunkhala omasuka *, ndipo kuyangizhyila apo, angayambe kuzikuzhya. (Aro. 12:3) Paliye aliyense wa seo amene angakonde kuti vinthu voteti viŵacitikile Akhristu ozozewa!​—Luka 17:2.

9. Tingaoneshe tyani kuti tulemekeza Akhristu ozozewa?

⁹ Kansi tingaoneshe tyani kuti tulemekeza Akhristu amene azozewa na Yehova? Tufunika lini kuŵakonsha mwecizozewela. Iyi ni nkhani yaumwini, tetyo tufunika lini kuziŵa mwecizozewela. (1 Ates. 4:11; 2 Ates. 3:11) Tufunika lini kuganiza kuti mulume, mkazi, makolo olo a banja ŵake ayakine ni ozozewa. Munthu onkhala lini ozozewa cifukwa cakuti a m’banja mwake ni ozozewa yai, koma ocitosankhiwa na Yehova. (1 Ates. 2:12) Tufunika lini kukonsha makonsho angakhumudwishe ayakine. Mwacisanzo, tufunika lini kukonsha mkazi wa wozozewa mwaakumvwila za ciyembekezo conkhala na moyo pacalo mpaka kale-kale kuliye mulume wake. Cifukwa tukhulupilila kuti m’calo calomba, Yehova “akakhutilishe vofuna va camoyo ciliconse.”​—Sal. 145:16.

10. Tingankhale tyani otetezeka ngati tupewa kukumbwila kacitidwe ka vinthu ka Akhristu ayakine?

¹⁰ Kupasa Akhristu ozozewa ulemu woyenelela kungatiteteze. Motyani? Baibo yulaŵila kuti, Akhristu ayakine ozozewa angapitilizhye lini kunkhala okhulupilika. (Mat. 25:10-12; 2 Pet. 2:20, 21) Tetyo, tufunika lini kukumbwila mopitilila malile, kacitidwe ka vinthu ka Akhristu ozozewa olo Akhristu ayakine amene atumikila Yehova kwa nthawi itali. (Yuda 16) Cifukwa ngati ŵanthu amene aŵa asiya kunkhala okhulupilika olo asiya mpingo, tingasiye lini kunkhala okhulupilika kwa Yehova olo kuleka kumtumikila.

11. N’cinji cankhala cucitika na ciŵelengelo ca akulya viphiphiliso pa Cikumbuso?

¹¹ Kwa vyaka vinyinji ciŵelengelo ca akulya viphiphiliso pa Cikumbuso cenzokuya cucepelacepela. Koma vyaka vapavuli apa cankhala cuyangizhyilika caka ciliconse. Kansi izi zufunika kuticitisha nkhaŵa? Yai. Tiyeni tilaŵizhyane cifukwa cake.

12. Ndaŵa yanji tufunika lini kucita nkhaŵa na kuyangizhyilika kwa ciŵelengelo ca akulya viphiphiliso pa Cikumbuso?

¹² “Yehova oziŵa ŵanthu ŵake.” (2 Tim. 2:19) Mosiyana na Yehova wamene oziŵa ozozewa ŵeneŵene, akwasu amene oŵelenga ŵanthu akulya viphiphiliso oziŵa lini zacendi. Tetyo, namba ya akulya yuyangizhyilapo na ŵala amene oganizila tyala kuti ni ozozewa koma ni ozozewa lini. Mwacisanzo, ayakine amene enzokulya kale pavuli pake eleka. Ayakine oyamba kulya cifukwa ca matenda ya maganizo yamene yoŵapangisha kuti akoziona monga kuti ezozewa, ndipo akalamulile na Yesu kululu. Kulaŵila  cendi, tuziŵa lini namba yeneyene ya Akhristu ozozewa amene ali pacalo masiku ŵano.

13. Kansi Baibo yulaŵila kuti pakankhale ozozewa anyinji tyani cisauso cikulu cikayoyamba?

¹³ Pakankhale ozozewa mbali zosiyanasiyana pacalo Yesu akayowela kuzoŵatola kuya nao kululu. (Mat. 24:31) Baibo yulaŵila kuti m’masiku osilizhya pakankhale ciŵelengelo citontho ca Akhristu ozozewa pacalo. (Chiv. 12:17) Koma yulaŵila lini kuti pakankhale ciŵelengelo cotyani cisauso cikulu cikayoyamba.

14. Molingana na Aroma 9:11, 16, tufunika kumvwisha mfundo yotyani pa nkhani yosankha ozozewa?

¹⁴ Yehova niye oziŵa nthawi yaangazoze munthu. (Aro. 8:28-30) Yehova eyamba kusankha Akhristu ozozewa pavuli pakuti Yesu waukishiwa. Zuoneka kuti Akhristu onse acendi a m’vyaka 100 voyambilila enze ozozewa. Vyaka mahandiledi pavuli pake, anyinji amene enzolaŵila kuti enze Akhristu enzokonkha lini Khristu. Olo n’tetyo, panthawi yamene iyo Yehova ezoza Akhristu atontho amene enze Akhristu acendi. Akhristu amene aŵa enze monga ni tiligu wecilaŵila Yesu kuti ukakulile pamozi na uzu. (Mat. 13:24-30) M’masiku ŵano osilizhya, Yehova akalupitilizhya kusankha ŵanthu kuti ankhale a m’gulu ya 144,000. * Tetyo, ngati Mulungu wasankha ayakine m’masiku ŵano osilizhya tingakaikile lini nzelu zake. (Ŵelengani Aroma 9:11, 16.) *  Tufunika kunkhala osamala kuti tipewe kaganizidwe ka ŵanthu a m’fanizo ya Yesu. Edandaula na mwamene woŵalemba nchito ecitila vinthu na anchito ayakine amene eseŵenza nchito nthawi itontho.​—Mat. 20:8-15.

15. Kansi Akhristu ozozewa onse ali “mbali ya kapolo wokhulupilika na wanzelu” wotomolewa pa Mateyu 24:45-47? Fotokozani.

¹⁵ Ni onse lini amene ali na ciyembekezo cakuyonkhala kululu amene ali m’gulu ya “kapolo wokhulupilika na wanzelu.” (Ŵelengani Mateyu 24:45-47.) Monga ni mwezenzele m’vyaka 100 voyambilila, Yehova na Yesu oseŵenzesha akwasu atontho kuphunzisa ŵanthu anyinji. Ni Akhristu atontho tyala m’vyaka 100 voyambilila amene eseŵenzeshewa kulemba malemba Yacigiliki Yacikhristu. Cimozimozi na masiku ŵano, ni Akhristu ozozewa atontho tyala ali na udindo wopasa atumiki a Mulungu “cakulya pa nthawi yoyenela.”

16. Kansi taphunzila cinji m’nkhani ino?

¹⁶ Kansi nkhani ino yatiphunzisa cinji? Yehova esankha kupasa gulu ikulu moyo wosasila pacalo, na Akhristu atontho kuyolamulila na Yesu kululu. Odalisa atumiki ŵake, “m’Yuda” na “analume 10” ndipo ofuna kuti onse akomvwila malamulo amozi, na kuti apitilizhye kunkhala okhulupilika. Onse ofunika kunkhala olicefya notumikila pamozi mokatizhyana. Ofunika kusunga mtendele mumpingo. Patufwika kosilizhyila kwa cino calo, tiyeni tipitilizhye kutumikila Yehova nokonkha Khristu monga ‘gulu imozi.’​—Yohane 10:16.