1. Kansi nkhani yelaŵiliwa pa msonkhano wacigao mu 1935 yekhuza tyani mlumbwana muyakine?

PENZE banja iyakine ya Ophunzila Baibo yamene ni zina yeenzoziŵika nayo a Mboni za Yehova. Banja iyi yenze na ŵana analume atatu na anakazi aŵili, ndipo eŵaphunzisa kutumikila Yehova Mulungu notolela cisanzo ca Yesu Khristu. M’mozi mwa ŵana ŵao ebatizika ali na vyaka 18 mu 1926. Monga ni mweenzocitila Ophunzila Baibo onse, naye enzokulya mkate na kumwa vinyu pa Cikumbuso caka ciliconse. Koma ciyembekezo cake cecinja pecimvwa nkhani ya mutu wakuti “Gulu Ikulu.” Nkhani iyi yelaŵiliwa na mkwasu J. F. Rutherford pa msonkhano wacigao wamene wecitikila ku Washington, D.C., U.S.A mu 1935. Kansi Ophunzila Baibo ephunzila cinji pa msonkhano uyu?

2. Kansi mkwasu Rutherford efotokoza cendi cotyani m’nkhani yake?

² M’nkhani iyi, mkwasu Rutherford efotokoza za ŵanthu ati akapange “gulu ikulu” yufotokozewa pa Chivumbulutso 7:9. Kufumila kuvuli mpaka nthawi yamene iyo, Ophunzila Baibo enzokhulupilila kuti a gulu ikulu akalute kululu koma enzoonewa kuti ali na cikhulupililo citontho mosiyana na ozozewa. Mkwasu Rutherford eseŵenzesha Malemba pofotokoza kuti a gulu ikulu aliyosankhiwe kuti alute kululu, koma ni a mbelele * ziyakine za  Khristu amene ati akapulumuke “cisauso cikulu” nonkhala na moyo pacalo kosasila. (Chiv. 7:14) Yesu elonjeza kuti, “Nili na mbelele ziyakine, zamene ni za m’ciŵaya lini ici; nazo nufunika kuzileta. Zikokumvwa mau ŵangu, ndipo zikankhale gulu imozi, m’ciŵeta m’mozi.” (Yoh. 10:16) A mbelele ziyakine ni a Mboni za Yehova okhulupilika amene ali na ciyembekezo cakuyonkhala m’Paladaiso pacalo. (Mat. 25:31-33, 46) Tiyeni tilaŵizhyane mwamene kamvwedwe kalomba aka kecinjila umoyo wa atumiki anyinji a Yehova, kuyangizhyilapo mlumbwana wala wa vyaka 18.​—Sal. 97:11; Miy. 4:18.

3-4. Pa msonkhano wacigao wa mu 1935, kansi ŵanthu anyinji ezindikila cinji, ndipo ndaŵa yanji?

³ Pa msonkhano uyu ŵanthu esangalala ngako mkwasu Rutherford pecilaŵila kuti: “Onse ali na ciyembekezo cakuyonkhala na moyo wosasila pacalo apaname.” Mkwasu wamene epezeka pa msonkhano uyu, elaŵila kuti ŵanthu opitilila pa hafu ya ŵanthu epezeka pa msonkhano uyu, epanama. Pavuli pake mkwasu Rutherford elaŵila kuti: “Onani! Gulu ikulu!” Tetyo ŵanthu onse esangalala ngako. Ŵala epanama ezindikila kuti Yehova aliyoŵasankhe kuti akalute kululu. Ezindikila soti kuti enze aliyozozewe na mzimu utuŵa. Pa siku yokonkhapo, ŵanthu 840 ebatizika nonkhala a Mboni za Yehova ndipo anyinji mwa ŵanthu aŵa enze a mbelele ziyakine.

⁴ Pavuli pa nkhani iyi, mlumbwana watatomola poyamba na ŵanthu ayakine anyinji, eleka kulya mkate na kumwa vinyu pa Cikumbuso. Anyinji ecimvwa monga ni mwecimvwila mkwasu muyakine wamene elaŵila kuti: “Nthawi yosilizhyila penecilya mkate na kumwa vinyu yenze pa Cikumbuso ca mu 1935, cifukwa nezindikila kuti Yehova aliyonizoze na mzimu utuŵa kuti ninkhale na ciyembekezo cakuya kululu. M’malomwake, nenze na ciyembekezo cakuyonkhala na moyo wosasila pacalo noyavya kupanga calo kunkhala paladaiso.” (Aro. 8:16, 17; 2 Akor. 1:21, 22) Kuyambila nthawi yamene iyo, gulu ikulu yayangizhyilika ndipo oseŵenzela pamozi na ozozewa atontho amene ali pacalo.

5. Kansi Yehova oŵaona tyani ŵanthu amene eleka kulya ziphiphiliso?

⁵ Kansi Yehova oŵaona tyani ŵanthu eleka kulya ziphiphiliso pa Cikumbuso pavuli pa caka ca 1935? Nanga tyani za Mkhristu wa m’masiku ŵano wamene enzokulya ziphiphiliso pa Cikumbuso koma pavuli pake ezindikila kuti aliyozozewe? (1 Akor. 11:28) Ayakine okulya ziphiphiliso cifukwa cosamvwishisha za ciyembekezo cao. Koma akazindikila kuti elakwisa noleka kulya ziphiphiliso koma soti akapitilizhya kutumikila Yehova mokhulupilika, yove oŵalola kunkhala mbali ya a mbelele ziyakine. Nangu kuti okulya lini ziphiphiliso, opitilizhya kupezeka pa Cikumbuso cifukwa oyamikila zeciŵacitila Yehova na Yesu.

6. Kansi Yesu elamula angelo kucita cinji?

⁶ Pofwana kuti cisauso cikulu casala patontho kuti ciyambe, zingankhale zolimbikisha kulaŵizhyana zayufotokoza Chivumbulutso capita 7 zokhuza Akhristu ozozewa na gulu ikulu ya mbelele ziyakine. Yesu elamula angelo kupitilizhya  kukata mphepo 4 zacionongeko. Ofunika lini kuzitailila mpaka Akhristu ozozewa onse akadindiwe cidindo cosilizhyila camene cati cikaoneshe kuti Yehova waŵavomelezhya. (Chiv. 7:1-4) Akhristu ozozewa amene aŵa akalandile mphoto yao yolamulila monga mafumu na ansembe kululu. (Chiv. 20:6) Yehova, Yesu na angelo akasangalale kuona a 144,000 olandila mphoto yao kululu.

7. Molingana na Chivumbulutso 7:9, 10, kansi Yohane eona cinji, ndipo enzocita cinji? (Onani cithunzithunzi pa cikuto.)

⁷ Pavuli pakuti Yohane waona a 144,000 monga mafumu na ansembe, eona soti “gulu ikulu” ya ŵanthu amene epulumuka pa Aramagedo. Mosiyana na gulu yoyamba, gulu yaciŵili ni ikulu ndipo paliye angakwanishe kuiŵelenga. (Ŵelengani Chivumbulutso 7:9, 10.) “Evwala mikhanjo ituŵa,” kuonesha kuti “aliye ciŵanga” mu calo ca Satana ndipo ni okhulupilika kwa Mulungu na Khristu. (Yak. 1:27) Ove okuwa kuti cipulumuso cao cakwanishika cifukwa ca zecicita Yehova na Yesu. Akata soti misambo ya kanjeza m’manja mwao, kuonesha kuti ovomelezhya kuti Yesu ni Mfumu yosankhiwa na Yehova.​—Linganizhyani na Yohane 12:12, 13.

8. Kansi Chivumbulutso 7:11, 12 yutiuzhyanji zokhuza banja yakululu ya Yehova?

⁸ Ŵelengani Chivumbulutso 7:11, 12. Kansi Yehova, Yesu na angelo ecimvwa tyani peciona a gulu ikulu? Yohane eona banja yonse yakululu ya Yehova yusangalala notamanda Mulungu pavuli poona a gulu ikulu. Banja iyi ikasangalale ngako ikayoona mensomphenya aŵa okwanilishika pamene a gulu ikulu akapulumuke pa cisauso cikulu.

9. Molingana na Chivumbulutso 7:13-15, kansi a gulu ikulu ocita nchito yanji pali lomba?

⁹ Ŵelengani Chivumbulutso 7:13-15. Yohane elemba kuti a gulu ikulu “awasha mikhanjo yao na kuituŵisha m’milopa ya Mwanawambelele.” Izi zuonesha kuti ali na cikumbumtima cituŵa ndipo Yehova oŵaona kuti ni olungama. (Yes. 1:18) Ove ni Akhristu obatizika, amene ali na cikhulupililo cotang’a mu nsembe ya dipo ya Yesu ndipo ali pa ushamwali wotang’a na Yehova. (Yoh. 3:36; 1 Pet. 3:21) Tetyo ni oyenelela kupanama pamenso pa mpando wacifumu wa Yehova ndipo omucitila “utumiki wopatulika mzuŵa na usiku” pano pacalo. Ndipo olo lomba, ocita mwakhama mbali ikulu pa nchito yolalikila nopanga ophunzila. Tetyo, oika Ufumu wa Mulungu pamalo oyamba pa umoyo wao.​—Mat. 6:33; 24:14; 28:19, 20.

10. Kansi ŵanthu ati akapulumuke cisauso cikulu ni osimikizhya za cinji, ndipo ni lonjezo yanji yati akaone yukwanilishiwa?

¹⁰ Ŵanthu ati akapulumuke cisauso cikulu ni osimikizhya kuti Mulungu akapitilizhye kuŵasamalila cifukwa “Wonkhala pa mpando wacifumu akatambulule hema wake palulu pao.” Lonjezo yamene a gulu ikulu ankhala oyembekeza kwa vyaka vinyinji ikakwanilishiwe yakuti: “[Mulungu] akapukute misozi yonse m’menso mwao, ndipo imfwa ikankhaleko lini soti. Kukaŵeve kulila, kapena kumimila, olo voŵaŵa.”​—Chiv. 21:3, 4.

11-12. (a) Molingana na Chivumbulutso 7:16, 17, kansi a gulu ikulu oyembekeza madaliso otyani? (b) Kansi a mbelele ziyakine ocita cinji pa Cikumbuso, ndipo ndaŵa yanji?

¹¹ Ŵelengani Chivumbulutso 7:16, 17. Pali lomba, ayakine mwa atumiki a Yehova  ovutika na njala cifukwa cakuti aliye ndalama zokwanila zogulila vakulya koma soti cifukwa ca mavuto owela cifukwa ca nkhondo. Ndipo ayakine oikiwa m’jele cifukwa ca cikhulupililo cao. Olo n’tetyo, a gulu ikulu osangalala kuziŵa kuti akayopulumuka cionongeko ca calo cino, akankhale na vakulya vinyinji vamuŵili na vauzimu. Calo ca Satana pati cikaonongewe Yehova akaonesheshe kuti wateteza ŵanthu ŵake. Pavuli pakuti cisauso cikulu casila, Yesu akasogolele ŵanthu ati akapulumuke ku “manzi amoyo [wosasila].” Ganizilani tyala ciyembekezo capadela caali naco a gulu ikulu. Ŵanthu mabiliyoni akankhale na moyo mpaka kalekale ndipo akafwe lini.​—Yoh. 11:26.

¹² A mbelele ziyakine ali na ciyembekezo capadela camene cuŵapangisha kuyamikila Yehova na Yesu. Ove aliyosankhiwe kuti akalute kululu, koma izi zuonesha lini kuti ni osafunika kwa Yehova. Akhristu ozozewa na a mbelele ziyakine otamanda Mulungu na Khristu. Njila imozi yakucitila izi ni mwa kupezeka pa Cakulya ca M’cingulo ca Asikulu.

13-14. Ndaŵa yanji Akhristu ozozewa na a mbelele ziyakine opezeka pa Cikumbuso?

¹³ M’vyaka valombapano, cuoneka ni munthu m’mozi pa ŵanthu 1,000 amene akulya ziphiphiliso pa Cikumbuso. Izi zuonesha kuti m’mipingo inyinji pacalo muliye ŵanthu amene akulya ziphiphiliso. Ndipo izi zuonesha soti kuti anyinji mwa ŵanthu opezeka pa Cikumbuso ali na ciyembekezo ca kuzonkhala pacalo. Ndaŵa yanji opezeka pa Cikumbuso? Opezeka pa cifukwa colingana na cucitisha ŵanthu kupezeka pa phwando ya ukwati wa shamwali wao. Ŵanthu opezeka pa phwando ya ukwati cifukwa cakuti ofuna kuonesha kuti okonda nocilikiza ŵanthu aŵili amene okwatilana. Tetyo a mbelele ziyakine opezeka pa Cikumbuso cifukwa cofuna kuonesha kuti okonda nocilikiza Khristu na ozozewa. Ndipo a mbelele ziyakine opezeka soti pa Cikumbuso cifukwa cofuna kuyamikila nsembe ya dipo ya Yesu yamene yucitisha kuti zinkhale zokwanishika kuyonkhala na moyo wosasila pacalo.

 ¹⁴ Cifukwa ciyakine cucitisha a mbelele ziyakine kupezeka pa Cikumbuso, ni kufuna kumvwila lamulo ya Yesu. Yove peciyambisha mwambo uyu na atumwi ŵake okhulupilika, eŵauzhya kuti: “Mukocita izi ponikumbukila.” (1 Akor. 11:23-26) Tetyo a mbelele ziyakine apitilizhye kucita mwambo wamene uyu malinga ngati ozozewa akali pacalo. A mbelele ziyakine oitilako ŵanthu ayakine ku mwambo wamene uyu wa Cikumbuso.

15. Kansi tutamanda tyani Mulungu na Khristu pa Cikumbuso?

¹⁵ Pa Cikumbuso, tunkhala na mwai wotamanda Yehova na Khristu mwa kuimba nyimbo nopemphela. Nkhani ya caka cino ya Cikumbuso ni ya mutu wakuti “Muziyamikila Zimene Mulungu na Khristu Akucitilani!” Nkhani iyi ikakulishe ciyamikilo casu pa Yehova na Khristu. Tetyo mkate na vinyu pati ukoyendeshewa, ukatiyavye kuganizila zaupanamila zamene ni muŵili na milopa ya Yesu. Ndipo tikokumbukila kuti Yehova elola mwana wake kutifwila kuti zinkhale zokwanishika kuyopeza moyo wosasila. (Mat. 20:28) Tetyo aliyense wamene okonda Ausuwasu akululu na mwana wake akapezeke pa Cikumbuso.

16. Kansi ozozewa na a mbelele ziyakine olingana tyani?

¹⁶ Akhristu ozozewa na a mbelele ziyakine onse ni ofunika kwa Yehova. Yove oona lini kuti gulu imozi yupambana iyake. Tuziŵa izi cifukwa cakuti onse eguliwa pa mtengo umozi wamene ni moyo wa Mwana wake wokondeka. Koma kusiyana tyala kulipo ni kwakuti magulu aŵili aŵa ali na ciyembekezo cosiyana. Magulu onse ofunika kupitilizhya kunkhala okhulupilika kwa Mulungu na kwa Khristu. (Sal. 31:23) Ndipo kumbukilani kuti Yehova otwala mzimu wake utuŵa ku munthu aliyense, kaya ni wozozewa olo wa mbelele ziyakine.

17. Kansi Akhristu ozozewa oyembekezela cinji msogolo?

¹⁷ Akhristu ozozewa ovyalika lini ali na ciyembekezo coluta kululu. Mulungu niye oŵapasa ciyembekezo camene ici. Ove oganizila za ciyembekezo cao, kucipemphelela koma soti ni ofunishisha kuyolandila mphoto yao kululu. Oziŵa lini kuti miŵili yao ikankhale tyani kululu. (Afil. 3:20, 21; 1 Yoh. 3:2) Olo n’tetyo, oyembekezela mwacidwi kuyoonana na Yehova, Yesu, angelo na Akhristu ozozewa ayakine. Ndipo ni ofunishisha kuyolandila mphoto yao kululu.

18. Kansi a mbelele ziyakine oyembekezela cinji?

 ¹⁸ A mbelele ziyakine oyembekezela mwacidwi kuyonkhala na moyo wosasila pacalo monga ni mwakufunila munthu aliyense. (Mla. 3:11) Ove oyembekezela mwacidwi nthawi pati akayavye kupanga calo conse kunkhala paladaiso. Ndipo oyembekezela kuyomanga mang’anda, kuyolima minda nonkhala na ŵana ali na thanzi yangwilo. (Yes. 65:21-23) Oyembekezela soti mwacidwi kuyoziŵa malo osiyanasiyana na kuyoona malupili, nkhalango, nyanja nophunzila zinyinji pa vinthu vecilenga Yehova. Kupambana vonse, osangalala kuziŵa kuti ushamwali wao na Yehova ukapitilizhye kutang’ilako.

19. Kansi mwambo wa Cikumbuso utipasa mwai wotyani, ndipo mwambo uyu ukacitike lini?

¹⁹ Yehova wapasa mtumiki wake aliyense ciyembekezo ciweme ca msogolo. (Yer. 29:11) Cikumbuso ca imfwa ya Khristu cupasa aliyense wa seo mwai wotamanda Mulungu na Khristu pa vinthu veciticitila kuti tikasangalale na moyo wosasila. Cikumbuso ni msonkhano wofunika ngako wakucita Akhristu acendi caka ciliconse. Caka cino mwambo uyu ukacitike pa Ciŵelu, m’cingulo pa March 27, 2021. M’vyalo vinyinji mwamene muli ufulu wolambila, ŵanthu anyinji akapezeke pa mwambo uyu. Ndipo olo kuti ayakine onkhala m’vyalo mwamene nchito yasu ni yoleshewa akapezeke mphela. Ayakine akacitile m’jele. Yehova, Yesu, angelo na ozozewa amene eukishiwa, akoonelela mwambo uyu pati ukocitika. Lekani kuti mpingo uliwonse, kagulu na munthu aliyense payeka akacite luweme mwambo uyu wa Cikumbuso!