NKHANI YOPHUNZILA 4
Ndaŵa Yanji Tupezeka pa Cikumbuso Caka Ciliconse?
“Mukocita izi ponikumbukila.”—LUKA 22:19.
NYIMBO 20 Mwepeleka Mwana Wanu Wokondeka
ZATI TIPHUNZILE *
1-2. (a) Kansi ni pa nthawi yotyani makamaka patukumbukila okondeka ŵasu amene emwalila? (b) Kansi Yesu eyambisha mwambo wotyani pa usiku wakuti mailo apaiwe?
OLO kuti papita vyaka vinyinji tyani kufumila pamene okondeka ŵasu emwalila, tupitilizhya kuŵakumbukila. Ndipo tukonda kuŵaganizila ngako makamaka ikafwika siku yecimwalila.
2 Caka ciliconse, ŵanthu mamiliyoni anyinji osonkhana pamozi kuti akumbukile imfwa ya munthu wamene omukonda ngako. Munthu uyu ni Yesu Khristu. (1 Pet. 1:8) Tusonkhana pokumbukila zeciticitila. Yove epeleka moyo wake kuti atiwombole ku ucimo na imfwa. (Mat. 20:28) Yesu enzofuna kuti ophunzila ŵake akokumbukila imfwa yake. Tetyo, pa usiku wakuti mailo apaiwe, eyambisha mwambo wa Cikumbuso, ndipo elamula ophunzila ŵake kuti: “Mukocita izi ponikumbukila.”—Luka 22:19.
3. Kansi tilaŵizhyane cinji m’nkhani ino?
3 Ni Akhristu tyala atontho opezeka pa Cikumbuso, amene ali na ciyembekezo cakuyonkhala na moyo wosasila kululu. Koma ŵanthu mamiliyoni anyinji amene opezeka pa mwambo uyu, ali na ciyembekezo cakuyonkhala na moyo wosasila pacalo. M’nkhani ino, tilaŵizhyane vifukwa vucitisha kuti Akhristu ozozewa na a mbelele ziyakine, akopezeka pa Cikumbuso caka ciliconse. Tione soti mwatupindulila cifukwa copezeka pa mwambo uyu. Tiyeni tiyambe mwa kulaŵizhyana vifukwa vupangisha Akhristu ozozewa kupezeka pa Cikumbuso.
NDAŴA YANJI AKHRISTU OZOZEWA OPEZEKA PA CIKUMBUSO?
4. Ndaŵa yanji Akhristu ozozewa akulya mkate na kumwa vinyu pa Cikumbuso?
4 Caka ciliconse, Akhristu ozozewa amene opezeka pa Cikumbuso, onkhala na mwai wakulya mkate na kumwa vinyu. Ndaŵa yanji? Kuti tiyankhe konsho iyi, tiyeni tiganizile zecitika pa usiku wakuti Yesu wasala patontho kupaiwa. Pavuli pocita mwambo wa Pasika, Yesu eyambisha mwambo wamene weyamba kuziŵika kuti Cakulya ca Mcingulo ca Asikulu. Yove etola mkate na vinyu nopasa atumwi ŵake 11 okhulupilika. Ndipo eŵauzhya kuti alye na kumwa. Pa siku yamene iyi, Yesu epangana nao mapangano yaŵili, yamene ni pangano yalomba na pangano ya Ufumu. * (Luka 22:19, 20, 28-30) Mapangano aya yesegula mwai kuli atumwi na ciŵelengelo citontho ca Akhristu kuti akalamulile pamozi na Yesu monga mafumu na ansembe. (Chiv. 5:10; 14:1) Ni Akhristu tyala ozozewa amene akulya mkate na kumwa vinyu pa Cikumbuso, cifukwa ali mbali ya mapangano aŵa.
5. Kansi Akhristu ozozewa oziŵanji zokhuza ciyembekezo cao?
5 Kansi n’cifukwa ciyakine cotyani cupangisha Akhristu ozozewa kupezeka pa Cikumbuso? N’cifukwa cakuti mwambo uyu uŵapasa mwai woganizila za ciyembekezo cao. Yehova waŵapasa ciyembekezo cakuyonkhala na muŵili wauzimu koma soti wosafwa kululu. Ove akankhale soti na mwai wolamulila pamozi na Yesu Khristu koma soti a 144,000 ayao. Ndipo kupambana zonse, akankhale na mwai wonkhala pamenso pa Yehova Mulungu. (1 Akor. 15:51-53; 1 Yoh. 3:2) Akhristu ozozewa oziŵa kuti eitiwa kuti akasangalale na madaliso aŵa kululu. Koma kuti akayalandile, ofunika kupitilizhya kunkhala okhulupilika mpaka imfwa. (2 Tim. 4:7, 8) Akhristu aŵa osangalala ngako akaganizila za ciyembekezo cao cakuyonkhala na moyo wosasila kululu. (Tito 2:13) Nanga tyani za a “mbelele ziyakine”? (Yoh. 10:16) Ndaŵa yanji nao opezeka pa Cikumbuso?
NDAŴA YANJI A MBELELE ZIYAKINE OPEZEKA PA CIKUMBUSO?
6. Ndaŵa yanji a mbelele ziyakine osangalala kupezeka pa Cikumbuso caka ciliconse?
6 Olo kuti a mbelele ziyakine okumwa lini vinyu olo kulya mkate pa Cikumbuso, ove osangalala kupezekapo. Mu 1938, ŵala amene enze na ciyembekezo cakuyonkhala na moyo wosasila pacalo, eitiwa kwa nthawi yoyamba kuti apezekepo pa mwambo uyu. Nsanja ya Mulonda ya Cizungu ya March 1, 1938, yelaŵila kuti: “N’koyenelela kuti a mbelele ziyakine akopezeka pa msonkhano uyu noonelela zucitika. Nao ofunika kusangalala na cocitika ici.” Tetyo, monga ni mwamene ŵanthu ayakine osangalalila akapezeka pa phwando ya ukwati wa munthu muyakine, nao a mbelele ziyakine osangalala kupezeka pa Cikumbuso.
7. Ndaŵa yanji a mbelele ziyakine oyembekezela mwacidwi kumvwishila ku nkhani ya Cikumbuso?
7 Molingana na Akhristu ozozewa, nao a mbelele ziyakine akapezeka pa Cikumbuso, onkhala na mwai woganizila za ciyembekezo cao. Ove oyembekezela mwacidwi kumvwishila ku nkhani ya Cikumbuso yamene yugogomezela pa zati akacite Khristu na a 144,000, mu Ulamulilo wa Vyaka 1,000. Mosogolelewa na Mfumu yao Yesu Khristu, a 144,000 akayavye pa nchito yopanga calo kunkhala paladaiso nothandiza ŵanthu onse kunkhala angwilo. Zunkhala zosangalasa ngako kuli ŵanthu mamiliyoni amene opezeka pa Cikumbuso, kuganizila mwati yakakwanilishiwile maulosi ya m’Baibo, monga maulosi yopezekapa pa Yesaya 35:5, 6; 65:21-23; na Chivumbulutso 21:3, 4. Ŵanthu aŵa oziyelekezela kuti ali m’calo calomba pamozi na okondeka ŵao. Izi zucitisha kuti ciyembekezo cao citang’ileko ndipo zuŵayavya kuti apitilizhye kutumikila Yehova.—Mat. 24:13; Agal. 6:9.
8. Kansi n’cifukwa ciyakine cotyani cupangisha a mbelele ziyakine kupezeka pa Cikumbuso?
8 Kansi n’cifukwa ciyakine cotyani cupangisha a mbelele ziyakine kupezeka pa Cikumbuso? Ocita izi pofuna kuonesha kuti okonda, nocilikiza Akhristu ozozewa. Mau a Mulungu yeloselelatu kuti pakankhale mgwilizano wotang’a pakati pa Akhristu ozozewa na a mbelele ziyakine. Lomba, tiyeni tilaŵizhyane ayakine mwa maulosi amene aŵa.
9. Kansi ulosi upezeka pa Zekariya 8:23, uonesha tyani kuti a mbelele ziyakine okonda Akhristu ozozewa?
9 Ŵelengani Zekariya 8:23. Ulosi uyu uonesha mwamene a mbelele ziyakine okondela akwasu na azilongosi ozozewa. Mau akuti “Myuda” na akuti “namwe,” opanamila Akhristu ozozewa. (Aro. 2:28, 29) Ndipo “analume 10 ofumila m’vilaŵilo vonse,” opanamila a mbelele ziyakine. Ove ‘okata mwamphamvu’ Akhristu ozozewa mwa kukatizhyana nao pa kulambila kutuŵa. Tetyo, a mbelele ziyakine akapezeka pa Cikumbuso, oonesha mgwilizano ulipo pakati pa ove na Akhristu ozozewa.
10. Kansi Yehova wacita zotyani pokwanilisha ulosi upezeka pa Ezekieli 37:15-19, 24, 25?
10 Ŵelengani Ezekieli 37:15-19, 24, 25. Yehova ekwanilisha ulosi uyu mwa kucitisha a mbelele ziyakine na Akhristu ozozewa kuseŵenzela pamozi mokatizhyana. Ulosi uyu ufotokoza za ndodo ziŵili. Akhristu amene ali na ciyembekezo cakuyonkhala na moyo kululu ali monga ni ndodo “ya Yuda” (yamene ni fuko mwamene mafumu ya Aisiraeli yenzosankhiwa). Ndipo ŵala amene ali na ciyembekezo cakuyonkhala na moyo pacalo ali monga ni ndodo “ya Efuraimu.” * Yehova enze kuzogwilizanisa magulu yaŵili kuti yankhale “ndodo imozi.” Izi zuonesha kuti onse oseŵenzela pamozi mokatizhyana koma soti mosogolelewa na Mfumu yao, Khristu Yesu. Caka ciliconse, Akhristu ozozewa na a mbelele ziyakine, opezeka pa Cikumbuso, osati monga magulu aŵili koma monga “gulu imozi” yosogolelewa na “mciŵeta m’mozi.”—Yoh. 10:16.
11. Kansi “mbelele” zufotokozewa pa Mateyu 25:31-36, 40, zucilikiza tyani akwake a Khristu?
11 Ŵelengani Mateyu 25:31-36, 40. “Mbelele” zecifotokoza Yesu m’fanizo iyi, zupanamila a mbelele ziyakine amene ali na moyo m’nthawi ino yosilizhyila. Ove ocilikiza akwake a Khristu mwa kuŵayavya kukwanilisha udindo wao, wamene ni kulalikila uthenga wabwino pacalo conse nopanga ophunzila.—Mat. 24:14; 28:19, 20.
12-13. Kansi a mbelele ziyakine ocilikiza akwake a Yesu m’njila ziyakine zotyani?
12 Caka ciliconse ngati Cikumbuso casala patontho kucitika, a mbelele ziyakine oonesha kuti ocilikiza akwake a Khristu mwa kutolako mbali pa kampeni yoitila ŵanthu ku Cikumbuso. (Onani kabokosi kakuti “ Zamungacite pa Nyengo ya Cikumbuso.”) Kuyangizhyila apo, ooneshesha kuti zonse za pa Cikumbuso zakonzewa bwino olo kuti oziŵa kuti mumpingo mwao muliye Mkhristu wozozewa. A mbelele ziyakine osangalala ngako kucilikiza akwake a Khristu m’njila zoteti. Ove oziŵa kuti Yesu oona zakucitila Akhristu ozozewa monga kuti ocitila yove.—Mat. 25:37-40.
13 Kansi n’vifukwa viyakine votyani vupangisha kuti tonse tikopezeka pa Cikumbuso mosasamala kanthu za ciyembekezo casu?
NDAŴA YANJI TONSE TUPEZEKA PA CIKUMBUSO?
14. Kansi Yehova na Yesu eonesha tyani kuti otikonda?
14Tuonesha kuti tuyamikila cikondi cakutionesha Yehova na Yesu. Yehova otionesha cikondi m’njila zosiyanasiyana. Koma njila ikulu yecitioneshelamo cikondi ni mwa kutumizhya Mwana wake wokondeka kuti azetifwile. (Yoh. 3:16) Naye Yesu eonesha cikondi cake mwa kuvomelezhya kutwala moyo wake cifukwa ca seo. (Yoh. 15:13) Tingakwanishe lini kuwezhyela Yehova na Yesu pa cikondi cecitionesha. Koma tingaoneshe kuti tuŵayamikila kupitila m’zocita zasu siku iliyonse. (Akol. 3:15) Tetyo, tupezeka pa Cikumbuso poonesha kuti tuyamikila zeciticitila na kuti tuŵakonda.
15. Ndaŵa yanji Akhristu ozozewa na a mbelele ziyakine oyamikila ngako nsembe ya dipo?
15Tuonesha kuti tuyamikila nsembe ya dipo. (Mat. 20:28) Akhristu ozozewa oyamikila nsembe ya dipo cifukwa yucitisha kuti ciyembekezo cao cikakwanilishike. Cifukwa cokhulupilila nsembe ya Khristu, Yehova waŵaona kuti ni olungama ndipo waŵalola kunkhala ŵana ŵake. (Aro. 5:1; 8:15-17, 23) Nao a mbelele ziyakine oyamikila ngako nsembe ya dipo. Cifukwa cokhulupilila nsembe ya Khristu, okwanisha kunkhala pa ushamwali wotang’a na Yehova nomutumikila. Kuyangizhyila apo, ove ali na ciyembekezo cakuyopulumuka pa “cisauso cikulu.” (Chiv. 7:13-15) Njila imozi yamene Akhristu ozozewa na a mbelele ziyakine ooneshela kuti oyamikila nsembe ya dipo, ni mwa kupezeka pa Cikumbuso caka ciliconse.
16. Kansi ni cifukwa ciyakine cotyani catupezekela pa Cikumbuso?
16 Cifukwa ciyakine catupezekela pa Cikumbuso ni cakuti tufuna kuonesha kuti tumvwila Yesu. Mosasamala kanthu za ciyembekezo casu, tonse tufuna kumvwila lamulo yecipeleka pa usiku weciyambisha mwambo wa Cikumbuso. Elaŵila kuti: “Mukocita izi ponikumbukila.”—1 Akor. 11:23, 24.
MAPINDU YATUPEZA CIFUKWA COPEZEKA PA CIKUMBUSO
17. Kansi Cikumbuso cutiyavya tyani kuvwendela pafupi na Yehova?
17Tuvwendela pafupi na Yehova. (Yak. 4:8) Monga ni mwataphunzilila, Cikumbuso cutipasa mwai woganizila za ciyembekezo casu nosinkhasinkha pa cikondi cawationesha Yehova. (Yer. 29:11; 1 Yoh. 4:8-10) Ngati tuganizila za madaliso yati tikapeze msogolo na cikondi cosasila cawationesha Mulungu, cikondi casu pa yove cukulilako ndipo ushamwali wasu utang’ilako.—Aro. 8:38, 39.
18. Kansi kusinkhasinkha pa cisanzo ca Yesu kungatiyavye tyani?
18Tulimbikishiwa kutolela cisanzo ca Yesu. (1 Pet. 2:21) Cikumbuso cikasala patontho kucitika, tunkhala na pulogilamu yoŵelenga mavesi yofotokoza zecitika mu wiki yosilizhyila ya utumiki wa Yesu wa pacalo, imfwa yake, na kuukishiwa kwake. Kuyangizhyila apo, nkhani yamene yulaŵiliwa pa siku ya Cikumbuso yutiyavya kukumbukila za cikondi cecitionesha Yesu potwala moyo wake. (Aef. 5:2; 1 Yoh. 3:16) Ngati tuŵelenga nosinkhasinkha pa cisanzo ca Yesu, tulimbikishiwa kupitilizhya “kuyenda monga ni mweciyendela yove.”—1 Yoh. 2:6.
19. Kansi n’cinji cingatiyavye kuti tipitilizhye kunkhala pa ushamwali na Yehova?
19Tulimbikishiwa kuti tipitilizhye kunkhala pa ushamwali na Yehova. (Yuda 20, 21) Kuti tipitilizhye kunkhala pa ushamwali wotang’a na Yehova, tufunika kumumvwila, kutuŵisha zina yake nokondwelesha mtima wake. (Miy. 27:11; Mat. 6:9; 1 Yoh. 5:3) Kupezeka pa Cikumbuso kuticitisha kunkhala osimikizhya kuti siku iliyonse tikocita zinthu zoonesha kuti tufuna kunkhala ashamwali a Yehova mpaka kale-kale.
20. Kansi tili na vifukwa viweme votyani vutipangisha kupezeka pa Cikumbuso?
20 Mosasamala kanthu kuti tili na ciyembekezo cakuyonkhala na moyo wosasila kululu olo pacalo, tili na vifukwa vomvwika vopezekela pa Cikumbuso. Caka ciliconse, tusonkhana pamozi kuti tikumbukile imfwa ya munthu watukonda ngako, Yesu Khristu. Ndipo kupambana zonse, kupezeka pa Cikumbuso kutipasa mwai wokumbukila cikondi cecitionesha Yehova mwa kupeleka Mwana wake wokondeka monga dipo. Caka cino, Cikumbuso cikacitike mcingulo pa Cisanu, pa April 15, 2022. Tumukonda ngako Yehova pamozi na Mwana wake. Tetyo, paliye ciliconse cingatikangishe kupezeka pa Cikumbuso ca imfwa ya Yesu, caka ciliconse.
NYIMBO 16 Tamandani Yehova Cifukwa ca Mwana Wake Wozozewa
^ par. 5 Mosasamala kanthu kuti tili na ciyembekezo cakuyonkhala na moyo wosasila kululu olo pacalo, caka ciliconse tuyembekezela mwacidwi kucita Cikumbuso ca imfwa ya Yesu. Nkhani ino ifotokoze vifukwa va m’Malemba vuonesha cifukwa cake tupezeka pa Cikumbuso na mwatupindulila cifukwa cocita izi.
^ par. 4 Kuti muziŵe zinyinji pa nkhani ya pangano yalomba na pangano ya Ufumu, onani nkhani yakuti, ‘Muzakhala Ufumu wa Ansembe’ mu Nsanja ya Mlonda ya m’Cinyanja, ya October 15, 2014 mapeji 15-17.
^ par. 10 Kuti muziŵe zinyinji zokhuza ulosi wonena za ndodo ziŵili upezeka mu Ezekieli caputa 37, onani nkhani yakuti “Mafunso Ocokela kwa Aŵelengi” mu Nsanja ya Mlonda ya Cinyanja ya July, 2016.
