1-2. (a) Kansi tukumvwa tyani tikaganizila umoyo na imfwa ya Yesu? (b) Kansi tilaŵizhyane cinji m’nkhani ino?

 NGATI munthu watukonda wamwalila tumuyewa ngako. Poyamba, tingankhale na cisoni ngako tikaganizila za nthawi pecisala patontho kufwa, makamaka ngati wokondeka wasu uyu elwala ngako akaliyokufwa. Olo n’tetyo, m’kuluta kwa nthawi tingayambe soti kusangalala makamaka tikaganizila pa zinthu zecitiphunzisa, zecicita olo zecilaŵila pofuna kutilimbikisha.

² Molingana na izi, tukumvwa ngako cisoni tikaganizila mwecivutikila Yesu pecisala patontho kufwa. Pa nyengo ya Cikumbuso tuganizila ngako pa mwamene nsembe ya dipo yutipindulishila. (1 Akor. 11:24, 25) Olo n’tetyo, tusangalala tikaganizila pa zinthu zecilaŵila Yesu nocita peenze pacalo. Tulimbikishiwa ngako tikaganizila zakucita pali lomba na zati akacite msogolo. Kusinkhasinkha zinthu izi koma soti cikondi cake pa seo, kutiyavya kuti tikoonesha kuti tuyamikila, monga ni mwati tionele m’nkhani ino.

3. Ndaŵa yanji tufunika kuyamikila nsembe ya dipo?

³ Tuyamikila ngako tikaganizila za umoyo na imfwa ya Yesu. Pa nthawi yonse ya utumiki wake wa pacalo, Yesu ephunzisa ŵanthu za madaliso yati ukalete Ufumu wa Mulungu. Tuyamikila ngako cifukwa ca zinthu zayuphunzisa Baibo koma soti zinthu zukwanishika cifukwa ca dipo. Tuyamikila ngako nsembe ya dipo cifukwa yutipasa mwai wonkhala pa ushamwali  wabwino na Yehova koma soti Yesu. Ŵala amene okhulupilila Yesu ali na ciyembekezo cakuyonkhala na moyo kosasila koma soti kuyoonana soti na okondeka ŵao amene ecifwa. (Yoh. 5:28, 29; Aro. 6:23) Tingakwanishe lini kulipila Mulungu na Khristu pa zinthu zaaticitila. (Aro. 5:8, 20, 21) Koma tingaoneshe kuti tuyamikila pa zonse zaakuticitila. Motyani?

4. Kansi Mariya Mmagadala eonesha tyani kuyamikila pa zecimucitila Yesu? (Onani cithunzithunzi.)

⁴ Ganizilani cisanzo ca munakazi muyakine waciyuda wa zina yakuti Mariya Mmagadala. Yove enzovutishiwa na viŵanda 7, ndipo payakine enzoona kuti paliye angamuyavye. Ganizilani tyala mwecisangalalila, Yesu pecimucosa viŵanda ivi. Ciyamikilo cake cemusonkhezela kunkhala wophunzila wa Yesu noseŵenzesha nthawi, mphamvu na cuma cake pocilikiza Yesu pa utumiki wake. (Luka 8:1-3) Mariya eyamikila Yesu pa zinthu zecimucitila olo kuti enzoziŵa lini cinthu cikulu camene enze kuzocita msogolo. Yesu enze kuzopeleka moyo wake monga dipo ya ŵanthu onse “kuti aliyense wokhulupilila yove” akasangalale na moyo wosasila. (Yoh. 3:16) Olo n’tetyo, Mariya eonesha kuti enzoyamikila Yesu mwa kunkhala wokhulupilika kwa yove. Yesu peenzonzunzika pa cimuti conzunzikilapo, Mariya epanama pafupi cifukwa enzosamala za yove ndipo enzofuna kutonthoza ayakine amene enze pafupi. (Yoh. 19:25) Pavuli pakuti Yesu wamwalila, Mariya na anakazi ayakine aŵili eleta zonunkhila kuti apake muŵili wa Yesu. (Mko. 16:1, 2) Yehova edalisa Mariya cifukwa cakuti enze wokhulupilika kwa Yesu. Mariya enkhala na mwai woonana nolaŵizhyana na Yesu pavuli pakuti waukishiwa. Uyu wenze mwai wapadela cifukwa ni ophunzila a Yesu atontho tyala amene enze na mwai uyu.​—Yoh. 20:11-18.

5. Kansi tingaoneshe tyani kuti tuyamikila pa zonse zaaticitila Yehova na Yesu?

⁵ Nase tingaoneshe kuti tuyamikila pa zonse  zaaticitila Yehova na Yesu mwa kuseŵenzesha nthawi, mphamvu na cuma casu potumikila Yehova. Mwacisanzo, tingazipeleke kuti tiyavyeko pa nchito yomanga nokonza malo ŵasu olambililamo.

6. Ndaŵa yanji tingalaŵile kuti dipo ni mphaso yepelekewa ku munthu aliyense payeka?

⁶ Tikaganizila mwamene Yehova na Yesu otikondela, tusonkhezelewa kuti tikoŵakonda. (1 Yoh. 4:10, 19) Cikondi casu cukulilako tikazindikila kuti Yesu efwila aliyense wa seo payeka. Mtumwi Paulo enzoiziŵa mfundo iyi ndipo eonesha kuyamikila pecilembela Akhristu a ku Galatiya kuti: “Mwana wa Mulungu . . . enikonda nozipeleka yeka cifukwa ca neo.” (Aga. 2:20) Cifukwa ca nsembe ya dipo, Yehova ecitisha kuti zinkhale zokwanishika kuti munkhale naye pa ushamwali. (Yoh. 6:44) Kansi mulimbikishiwa lini kuziŵa kuti Yehova eona zabwino muli mweo ndipo elipila mtengo wodula ngako kuti munkhale shamwali wake? Kansi izi zutang’isha lini cikondi canu pa Yehova na Yesu? Tingacite bwino kuzikonsha kuti: ‘Kansi cikondi ici cunikakamizhya kucita cinji?’

7. Molingana na cithunzithunzi, kansi tonse tingaoneshe tyani kuti tukonda Yehova na Yesu? (2 Akorinto 5:14, 15; 6:1, 2)

⁷ Cikondi casu pa Mulungu na Khristu cutisonkhezela kuonesha cikondi ku ŵanthu ayakine. (Ŵelengani 2 Akorinto 5:14, 15; 6:1, 2.) Njila imozi yatuoneshelamo cikondi ici ni mwa kucita khama pa nchito yolalikila. Tulalikila munthu aliyense watingakumane naye mosasamala kanthu kuti tusiyana mtundu na cinkhalidwe. Ndipo tulalikila munthu aliyense mosasamala kanthu kuti ni wolemela, wophunzila ngako, wosauka olo wosaphunzila. Ngati tucita izi, niye kuti tucita zinthu mokatizhyana na colinga ca Yehova “wamene cifunilo  cake n’cakuti ŵanthu a mtundu ulionse apulumuke noziŵa cendi molondola.”​—1 Tim. 2:4.

8. Kansi tingaoneshe tyani kuti tukonda akwasu na azilongosi?

⁸ Tuonesha soti kuti tukonda Mulungu na Khristu mwa kuonesha cikondi kwa akwasu na azilongosi. (1 Yoh. 4:21) Tusamala za ove ndipo tuŵayavya akakumana na mavuto. Tuŵatonthoza ngati wokondeka wao wamwalila noluta kuyoŵaona ngati olwala. Ndipo tucita zonse zatingakwanishe kuti tiŵalimbikishe ngati afooka. (2 Akor. 1:3-7; 1 Ates. 5:11, 14) Tupitilizhya kuŵapemphelela cifukwa tuziŵa kuti “pembezelo ya munthu wolungama yukata nchito mwamphamvu ngako.”​—Yak. 5:16.

9. Ni njila iyakine yotyani yatingaoneshelemo kuti tukonda akwasu na azilongosi?

⁹ Tuonesha soti kuti tukonda akwasu na azilongosi mwa kucita khama kuti tipitilizhye kunkhala nao mwamtendele. Tuyesayesa kutolela cisanzo ca Yehova pa nkhani yokhululukila. Yehova enze wofunishisha kulola kuti Mwana wake afwe cifukwa ca macimo ŵasu. Tetyo, nase tufunika kunkhala ofunishisha kukhululukila akwasu na azilongosi ngati atilakwila. Tufunika lini kutolela cisanzo ca kapolo muipa wecifotokoza Yesu m’fanizo iyakine. Kapolo uyu ekangiwa kukhululukila kapolo muyake wamene enze emukongolela ndalama itontho olo pavuli pakuti abosi ŵake amukhululukila nkhongole ikulu. (Mat. 18:23-35) Ngati mwekhumudwishana na Mkhristu muyakine mumpingo, mungacite bwino kucitapo kanthu kamangu kuti munkhazikishe mtendele ikaliyofwika siku ya Cikumbuso. (Mat. 5:23, 24) Mukacita izi muoneshe kukula kwa cikondi canu pa Yehova na Yesu.

10-11. Kansi akulu angaoneshe tyani kuti okonda Yehova na Yesu? (1 Petulo 5:1, 2)

¹⁰ Kansi akulu angaoneshe tyani kuti okonda Yehova na Yesu? Njila imozi yaangaoneshelemo izi ni mwa kusamalila mbelele za Yesu. (Ŵelengani 1 Petulo 5:1, 2.) Yesu emvwikisha bwino mfundo iyi kwa mtumwi Petulo. Pavuli pokana Yesu katatu, mosakaikila Petulo enzofunishisha kuonesha kuti enzokonda Yesu. Pavuli pakuti Yesu waukishiwa, ekonsha Petulo kuti: “Simoni mwana wa Yohane, kansi unikonda?” Tingankhale osimikizhya kuti Petulo enze wokonzeka kucita zilizonse zaangakwanishe kuti aoneshe kuti enzokonda Asikulu ŵake. Yesu euzhya Petulo kuti: “Ŵetela ŵana a mbelele zangu.” (Yoh. 21:15-17) Kwa umoyo wake wonse, Petulo esamalila mbelele za Asikulu mwa cikondi. Izi zeonesha kuti enzokonda Yesu.

¹¹ Akulu, kansi mungaoneshe tyani kuti muona mau yamene Yesu euzhya Petulo kuti ni yofunika kuli mweo pa nyengo ya Cikumbuso? Mungaoneshe cikondi canu pa Yehova na Yesu mwa kucita maulwendo aubusa mowelezhyawelezhya koma soti kuyangizhyila nthawi yanu polimbikisha Akhristu amene efooka kuti awelele kwa Yehova. (Ezek. 34:11, 12) Kuyangizhyila apo, mukolimbikisha ophunzila Baibo na ŵanthu acidwi amene opezeka pa Cikumbuso. Kucita izi n’kofunika cifukwa tili na ciyembekezo cakuti siku iyakine nao akankhale ophunzila a Yesu.

12. Ndaŵa yanji kuganizila pa mau yecilaŵila Yesu pa usiku wakuti mailo apaiwe kutiyavya kunkhala otang’a mtima? (Yohane 16:32, 33)

¹² Pa usiku wakuti mailo apaiwe, Yesu euzhya ophunzila ŵake kuti: “M’calo umu mukumane na masauso, koma tang’ani mtima. Nacigonjesa calo.” (Ŵelengani Yohane 16:32, 33.) Kansi n’cinji ceyavya Yesu kunkhala wotang’a mtima peenzoyofyewa na adani  ŵake koma soti kupitilizhya kunkhala wokhulupilika mpaka imfwa yake? Enzodalila Yehova. Pofwana kuti enzoziŵa kuti ophunzila ŵake enze kuzokumana na mavuto olingana na yecikumana nayo yove, Yesu esenga Yehova kuti akoŵayanganila. (Yoh. 17:11) Ndaŵa yanji kuziŵa izi kutiyavya kunkhala otang’a mtima? N’cifukwa cakuti Yehova ni wamphamvu ngako kupambana adani ŵasu. (1 Yoh. 4:4) Yove oona zonse zuticitikila. Tetyo, nise osimikizhya kuti ngati tudalila Yehova atiyavye kugonjesa wowa ulionse noonesha kutang’a mtima.

13. Kansi Yosefe wa ku Arimateya eonesha tyani kutang’a mtima?

¹³ Ganizilani cisanzo ca Yosefe wa ku Arimateya. Yove enze munthu wolemekezeka ngako pakati pa Ayuda ndipo enze membala wa Khoti Ikulu ya Ayuda. Olo n’tetyo, Yesu peenzocita utumiki wake wa pacalo, Yosefe enze lini wotang’a mtima. Yohane elaŵila kuti “enze wophunzila wa Yesu koma wa mseli cifukwa enzoyopa Ayuda.” (Yoh. 19:38) Olo kuti Yosefe enze ecita cidwi na uthenga wa Ufumu, enzofisa kuti enzokhulupilila Yesu. Mosakaikila, enzoyopa kuti payakine ŵanthu angaleke kumulemekeza ngati aziŵa kuti enze wophunzila wa Yesu. Koma Baibo yulaŵila kuti pavuli pakuti Yesu wamwalila, Yosefe “eluta kwa Pilato motang’a mtima kuyom’senga mtembo wa Yesu.” (Mko. 15:42, 43) Kuyambila pa nthawi iyi, Yosefe eleka kufisa kuti enze wophunzila wa Yesu.

14. Kansi mufunika kucita cinji ngati muyopa ŵanthu?

¹⁴ Kansi namwe muyopa ŵanthu monga ni mweenzocitila Yosefe? Kansi mucita nsoni kuziziŵikisha kuti nimwe Mboni ya Yehova ngati muli ku sukulu olo ku nchito? Kansi muwayawaya kunkhala wofalisa wosabatizika olo kubatizika poganizila mwaangakuoneleni ŵanthu? Musalole kuti zoteti zikukangisheni kucita zinthu zoyenela. Mukopemphela kwa Yehova mofumila pansi pa mtima. Mukomusenga kuti akuyavyeni kunkhala otang’a mtima kuti mukwanishe kucita cifunilo cake. Mukaona mwamene Yehova oyankhila mapemphelo ŵanu, munkhale otang’a mtima.​—Yes. 41:10, 13.

15. Pavuli pakuti Yesu waonekela kuli ophunzila ŵake, kansi cimwemwe cao ceŵasonkhezela kucita cinji? (Luka 24:52, 53)

¹⁵ Yesu pecimwalila, atumwi enze na cisoni cikulu. Ganizilani tyala mwecimvwila. Ove aliyoumvwe tyala monga ataikiliwa shamwali wao, koma ezimvwa soti kuti enzeve ciyembekezo.  (Luka 24:17-21) Olo n’tetyo, Yesu pecionekela kuli ove eŵayavya kumvwisha udindo wake pokwanilisha ulosi wa m’Baibo. Eŵapasa soti nchito yofunika ngako. (Luka 24:26, 27, 45-48) Pofwika pa nthawi pamene Yesu ewelela kululu apo n’kuti papita masiku 40 kufumila peciukishiwa, atumwi enkhala soti na cimwemwe. Ndaŵa yanji? Ove eziŵa kuti Asikulu ŵao enze moyo ndipo enze wokonzeka kuŵayavya kukwanilisha nchito yeciŵapasa. Cimwemwe ceenze naco ceŵasonkhezela kuti atamande Yehova mosalekezhya.​—Ŵelengani Luka 24:52, 53; Mac. 5:42.

16. Kansi tingatolele tyani cisanzo ca ophunzila a Yesu?

¹⁶ Kansi tingatolele tyani cisanzo ca ophunzila a Yesu? Tingapeze cimwemwe patutumikila Yehova osati tyala pa nyengo ya Cikumbuso, koma kwa caka conse. Izi zufuna kuti tikoika Ufumu wa Mulungu pasogolo mu umoyo wasu. Mwacisanzo, Akhristu anyinji acepeshako nthawi yocita nchito yamuŵili na colinga cakuti akotolamo mbali mu utumiki, kupezeka pa misonkhano koma soti kucita kulambila kwa pa banja nthawi zonse. Ayakine asankha kusankhala na zinthu zinyinji zamuŵili zamene ŵanthu ayakine oona kuti n’zofunika ngako. Acita izi na colinga cakuti akocita zinyinji mumpingo olo kuyotumikila ku malo kwamene kufunikila ofalisa anyinji. Olo kuti tufunika kupilila kuti tipitilizhye kutumikila Yehova, yove otilonjeza kuti atidalise ngati tuika Ufumu wake pasogolo mu umoyo wasu.​—Miy. 10:22; Mat. 6:32, 33.

17. Kansi nimwe osimikizhya kucita cinji pa nyengo ino ya Cikumbuso? (Onani cithunzithunzi.)

¹⁷ Tuyembekezela mwacidwi kuyopezeka pa Cikumbuso pa Ciŵili, April 4. Olo n’tetyo, mufunika lini kuyembekezela kuti siku iyi ifwike kuti muganizile umoyo na imfwa ya Yesu koma soti cikondi cecitionesha yove na Yehova. Mufunika kuganizila zinthu izi pa nyengo yonse ya Cikumbuso. Mwacisanzo, mufunika kupatula nthawi yoŵelenga nosinkhasinkha pa zocitika zili pa chati yakuti “Wiki Yosilizhyila ya Umoyo wa Yesu Pacalo” yamene yupezeka mu Kabuku ka Msonkhano ka April 2019, peji 4. Pamucita izi mukoyesayesa kuona mbali zamene zutang’isha ciyamikilo, cikondi, kutang’a mtima koma soti cimwemwe canu. Mukoyesa soti kuona njila yamungaoneshelemo kuti muyamikila zecikucitilani Yehova na Yesu. Mungankhale osimikizhya kuti Yesu asangalale na zonse zati mucite pofuna kumukumbukila pa nyengo ino ya Cikumbuso.​—Chiv. 2:19.