1-2. Ndaŵa yanji tupezeka pa Cikumbuso caka ciliconse?

 PAFUPIFUPI vyaka 2,000 vapita, Yesu epeleka moyo wake cifukwa ca seo. Izi zetisegulila mwai wakuti tikapeze moyo wosasila. Pa usiku wakuti mailo apaiwe, Yesu elamula ophunzila ŵake kuti akokumbukila imfwa yake mwa kucita mwambo wosavuta wamene uyangizhyilapo mkate na vinyu.​—1 Akor. 11:23-26.

² Tumvwila lamulo iyi ya Yesu cifukwa cakuti tumukonda ngako. (Yoh. 14:15) Caka ciliconse pa nyengo ya Cikumbuso, tuonesha kuti tuyamikila pa zeciticitila Yesu mwa kupatula nthawi yosinkhasinkha mwapemphelo tanthauzo ya imfwa yake. Tusangalala kuyangizhyila nthawi yatuseŵenzesha pa nchito yolalikila noitila ŵanthu anyinji kuti akapezekepo pa cocitika ici capadela. Ndipo tulola lini ciliconse kutikangisha kupezekapo pa mwambo wa Cikumbuso.

3. Kansi tilaŵizhyane cinji m’nkhani ino?

³ M’nkhani ino, tilaŵizhyane njila zitatu mwamene atumiki a Yehova opangila kuyesayesa kuti akumbukile imfwa ya Yesu: (1) mwa kucita Cikumbuso molingana na zeciŵaphunzisa Yesu, (2) mwa kuitila ŵanthu ayakine ku Cikumbuso na (3) mwa kucita Cikumbuso mosasamala kanthu za mavuto yakukumana nayo.

4. Ni mfundo zacendi zotyani zatuphunzila pa Cikumbuso caka ciliconse, ndipo ndaŵa yanji kuziŵa mfundo izi ni mwai ukulu? (Luka 22:19, 20)

⁴ Caka ciliconse pa Cikumbuso, tumvwishila ku nkhani ya m’Baibo yamene yuyankha makonsho osiyanasiyana. Tuphunzila cifukwa cake tufunikila dipo koma soti mwamene imfwa ya munthu umozi yecitishila kuti macimo ya ŵanthu anyinji akhululukiwe. Tukumbushiwa zaupanamila mkate na vinyu koma  soti ŵanthu amene ofunikila kulya viphiphiliso ivi. (Ŵelengani Luka 22:19, 20.) Kuyangizhyila apo, tuganizila za madaliso yati akapeze ŵala amene ali na ciyembekezo cakuyonkhala na moyo pacalo. (Yes. 35:5, 6; 65:17, 21-23) Tuona kuti ni mwai ukulu ngako kuziŵa mfundo izi cifukwa ŵanthu anyinji ku calo uku ozimvwisha lini ndipo oyamikila lini nsembe ya dipo ya Yesu. Kuyangizhyila apo, ocita lini mwambo wa Cikumbuso kulingana na mwecilamulila Yesu. Ndaŵa yanji?

5. Pavuli pakuti anyinji mwa atumwi a Yesu amwalila, kansi ŵanthu eyamba kukumbukila tyani imfwa ya Yesu?

⁵ Nthawi itontho pavuli pakuti anyinji mwa atumwi a Yesu amwalila, Akhristu awenye eloŵa mumpingo. (Mat. 13:24-27, 37-39) Ove eyamba kulaŵila ‘vinthu vawenye kuti apatushe ophunzila na colinga cakuti ayambe kukonkha ove.’ (Mac. 20:29, 30) Cimozi mwa viphunziso vawenye veenzophunzisa cenze cakuti Yesu aliyopeleke muŵila wake “kamozi kuti anyamule macimo ya ŵanthu anyinji,” monga ni mwayulaŵilila Baibo. M’malo mwake, enzophunzisa kuti nsembe ya Yesu yufunika kupelekewa mowelezhyawelezhya. (Aheb. 9:27, 28) Ŵanthu anyinji masiku ŵano okhulupilila ciphunziso ici cawenye. Osonkhana m’machechi ŵao wiki iliyonse olo payakine siku iliyonse kuti acite mwambo wokumbukila imfwa ya Yesu, wamene m’Cikatolika uitiwa kuti “Nsembe ya Misa.” b Ŵanthu a m’vipembezo viyakine okumbukila lini imfwa ya Yesu kaŵili-kaŵili. Ndipo anyinji mwa ŵanthu aŵa oziŵa lini tanthauzo ya nsembe ya Yesu. Ŵanthu ayakine ozikonsha kuti, ‘Kansi imfwa ya Yesu yucitisha cendi kuti macimo ŵangu akhululukiwe?’ Ndaŵa yanji ozikonsha konsho iyi? Nthawi ziyakine n’cifukwa cakuti osonkhezelewa na ŵanthu amene okaikila kuti nsembe ya Yesu yucitisha kuti macimo ŵasu akhululukiwe. Ophunzila a Yesu acendi oyavya ŵanthu kuziŵa tanthauzo ya nsembe ya Yesu na njila yoyenela yocitilamo Cikumbuso ca imfwa yake.

6. Pofwika mu 1872, kansi gulu ya Ophunzila Baibo yemvwisha cinji?

⁶ Cakosilizhyila kwa vyaka va m’ma 1800, gulu ya Ophunzila Baibo amene enzosogolelewa na Charles Taze Russell yeyamba kuphunzila Malemba mwakhama. Enzofuna kuziŵa tanthauzo ya nsembe ya Yesu na mwamene imfwa yake yenzofunikila kukumbukiliwa. Pofwika mu 1872, emvwisha kuti n’cendi Yesu epelekela dipo ŵanthu onse. Ove aliyofise zinthu zecipeza. M’malo mwake, eyamba kuuzhyako ŵanthu ayakine kupitila m’mabuku, m’manyuzipepa na m’magazini. Ndipo nthawi itontho kufumila pa nthawi iyi, eyamba kukumana kamozi pa caka kuti acite mwambo wa Cikumbuso monga ni mweenzocitila Akhristu a m’vyaka 100 voyambilila.

7. Kansi tupindula tyani na zinthu zecifufuza Ophunzila Baibo?

⁷ Masiku ŵano tupindula na zecipeza Akhristu aŵa vyaka vinyinji kuvuli. Ndaŵa yanji talaŵila teti? N’cifukwa cakuti Yehova watiyavya kumvwisha tanthauzo ya nsembe ya Yesu na zinthu zukwanishika cifukwa ca nsembe iyi. (1 Yoh. 2:1, 2) Taphunzila soti kuti Baibo ili na viyembekezo viŵili vokhuza ŵanthu amene okondwelesha Mulungu. Coyamba n’cakuti ayakine akasangalale na moyo wauzimu koma soti wamene ungafwe lini kululu. Ndipo caciŵili n’cakuti ŵanthu mamiliyoni akasangalale na moyo wosasila pacalo. Ushamwali wasu na Yehova utang’ilako tikaganizila mwakutikondela na mwatupindulila cifukwa ca nsembe ya Yesu. (1 Pet. 3:18; 1 Yoh. 4:9) Tetyo, molingana na akwasu okhulupilika a m’nthawi zakuvuli, tuitilako ŵanthu anyinji kuti nao apezekepo pa  mwambo wa Cikumbuso, wamene ucitika monga ni mwecitiphunzisila Yesu.

8. Kansi atumiki a Yehova acita zinthu zotyani pofuna kuitila ŵanthu ayakine ku Cikumbuso? (Onani cithunzithunzi.)

⁸ Kwa vyaka vinyinji, atumiki a Yehova ankhala oitila ŵanthu ayakine ku Cikumbuso. Mu 1881, akwasu na azilongosi ku United States elandila ciitano cakuti akumane m’ng’anda ya mkwasu ku Allegheny, Pennsylvania kuti acite mwambo uyu wapadela. M’kuluta kwa nthawi, mpingo ulionse weyamba kucita mwambo uyu paweka. Mu March 1940, ofalisa euzhyiwa kuti angaitile ŵanthu acidwi a m’gao yao ku mwambo uyu. Mu 1960, kwa nthawi yoyamba, Beteli yepulinta tumapepa toitila ŵanthu ku Cikumbuso. Kuyambila nthawi yamene iyo, tumapepa toitila ŵanthu ku Cikumbuso mabiliyoni anyinji twankhala tupulintiwa. Ndaŵa yanji tucita khama kuitila ŵanthu ayakine ku Cikumbuso?

9-10. Ni ŵani opindula cifukwa ca khama yatucita poitila ŵanthu ku Cikumbuso? (Yohane 3:16)

⁹ Cifukwa cimozi catuitila ŵanthu ayakine ku Cikumbuso n’cakuti tufuna kuti ŵala ati apezekepo kwa nthawi yoyamba, aphunzile zawaticitila Yehova na Yesu. (Ŵelengani Yohane 3:16.) Tukhulupilila kuti zaangamvwe noona pa Cikumbuso, zingaŵacitishe kunkhala na cifuno cophunzila zinyinji noyamba kutumikila Yehova. Koma pali soti ŵanthu ayakine amene opindula.

¹⁰ Tuitila soti ŵanthu amene eleka kutumikila Yehova. Tucita izi pofuna kuŵakumbusha kuti Mulungu akaluŵakonda. Anyinji olandila ciitano casu, ndipo tusangalala tikaona kuti apezekapo pa mwambo uyu. Kupezeka pa Cikumbuso kuŵakumbusha za cimwemwe ceenze naco peenzotumikila Yehova m’nthawi zakuvuli.  Ganizilani cisanzo ca kalongosi Monica. c Yove eyamba soti kulalikila pa nthawi ya mlili wa COVID-19. Pavuli popezeka pa Cikumbuso mu 2021, elaŵila kuti: “Cikumbuso ca caka cino cenze capadela ngako kuli neo. Kwa nthawi yoyamba pavuli pa vyaka 20, nakwanisha kulalikila ŵanthu noŵaitila ku Cikumbuso. Necita khama kuitila ŵanthu ku Cikumbuso cifukwa nuyamikila ngako zinthu zaanicitila Yehova na Yesu.” (Sal. 103:1-4) Mosasamala kanthu kuti ŵanthu olandila ciitano casu olo yai, tucita khama poitila ŵanthu ayakine ku Cikumbuso cifukwa tuziŵa kuti Yehova osangalala na khama yatucita.

11. Kansi Yehova wadalisa tyani khama yasu poitila ŵanthu ku Cikumbuso? (Hagai 2:7)

¹¹ Yehova wadalisa ngako khama yasu patuitila ŵanthu ayakine ku Cikumbuso. Mosasamala kanthu za vileso venzepo cifukwa ca mlili wa COVID-19, mu 2021 ŵanthu okwanila 21,367,603 epezekapo pa Cikumbuso. Izi zutanthauza kuti ciŵelengelo ca Mboni za Yehova pacalo conse culoŵamo kaŵili na hafu m’ciŵelengelo ici. Olo n’tetyo, Yehova oika lini ngako maganizo ŵake pa kupaka kwa ŵanthu opezeka pa mwambo uyu. Koma ocita cidwi na munthu aliyense payeka wamene wapezekapo. (Luka 15:7; 1 Tim. 2:3, 4) Nise osimikizhya kuti Yehova oseŵenzesha nchito yoitila ŵanthu ku Cikumbuso pofuna kutiyavya kupeza ŵanthu a mtima woyenelela.​—Ŵelengani Hagai 2:7.

12. Ni zinthu zotyani zamene zingacitishe kuti cinkhale covuta kucita mwambo wa Cikumbuso? (Onani cithunzithunzi.)

¹² Yesu elosela kuti m’masiku osilizhya tikokumana na mavuto osiyanasiyana monga kusushiwa na abanja ŵasu, kunzunziwa, nkhondo, milili na mavuto ayakine. (Mat. 10:36; Mko. 13:9; Luka 21:10, 11) Nthawi ziyakine, mavuto aya yocitisha kuti cinkhale covuta kuti tikumbukile imfwa ya Yesu. Kansi akwasu na azilongosi ocita zotyani pofuna kugonjesa mavuto aŵa, ndipo Yehova oŵayavya tyani?

13. Kansi Yehova edalisa tyani kutang’a mtima kwecionesha mkwasu Artem pofuna kuti acite Cikumbuso peenze m’jele?

¹³ Kuikiwa m’jele. Akwasu amene ali m’jele cifukwa ca cikhulupililo cao, ocita zonse zaangakwanishe kuti acite mwambo wokumbukila imfwa ya Yesu. Ganizilani cisanzo ca mkwasu Artem. Pa nyengo ya Cikumbuso ca mu 2020, eikiwa m’cipinda ca masikweyamita 17. M’cipinda umu mwenzonkhala akaidi 5. Mosasamala kanthu kuti mkwasu uyu enze m’jele, ekwanisha kupeza zinthu zoseŵenzesha monga viphiphiliso pa Cikumbuso. Kuyangizhyila apo, ekonzekela kuti akambe nkhani ya Cikumbuso. Koma akaidi ayake enzokonda kupepa fwaka noseŵenzesha mau onyoza. Kansi yove ecitanji? Eŵasenga kuti aleke kupepa fwaka noseŵenzesha mau onyoza kwa awa imozi tyala. Mkwasu Artem edabwa ngako kuti akaidi aŵa evomela kuti apepe lini fwaka olo kuseŵenzesha mau onyoza pa nthawi yonse ya Cikumbuso. Mkwasu Artem elaŵila kuti: “Neŵasenga kuti niŵafotokozele zokhuza Cikumbuso na kuti apezekepo.” Olo kuti ekana kumvwishila, pavuli poona koma soti kumvwa mkwasu Artem peenzocita Cikumbuso, emukonsha makonsho okhuza mwambo uyu.

14. Kansi atumiki a Yehova ecita tyani Cikumbuso mosasamala kanthu za mlili wa COVID-19?

¹⁴ Mlili wa COVID-19. Mlili uyu peweyamba, zenze zosakwanishika kwa atumiki a Yehova kuti acitile Cikumbuso m’Ng’anda ya Ufumu. Koma izi ziliyoŵakangishe kucita mwambo wa Cikumbuso. d Mipingo yamene ili ku  malo kwamene kuli intaneti, yecita Cikumbuso kupitila pa vidyokonfalensi. Nanga tyani za ŵanthu mamiliyoni amene onkhala ku malo kwamene kuliye intaneti? M’vyalo viyakine, ofesi ya msambo yepanga makonzedwe akuti nkhani ya Cikumbuso ikambiwe pa TV na pa wailesi. Kuyangizhyila apo, maofesi ya msambo yelekoda nkhani ya Cikumbuso m’vilaŵilo vopitilila 500 na colinga cakuti ŵala amene onkhala ku malo akutali akwanishe kucita Cikumbuso. Akwasu okhulupilika etwala nkhani iyi yolekodewa kuli akwasu na azilongosi a ku malo aŵa.

15. Kansi mwaphunzilapo cinji pa cisanzo ca wophunzila Baibo wa zina yakuti Sue?

¹⁵ Kusushiwa na abanja. Vuto ikulu yakukumana nayo ayakine pofuna kuti apezeke pa Cikumbuso, ni kusushiwa na abanja ŵao. Ganizilani cisanzo ca wophunzila Baibo muyakine wa zina yakuti Sue. Mu 2021 pa siku yakuti mailo ni Cikumbuso, euzhya kalongosi wamene enzomuphunzisa Baibo kuti akapezekepo lini pa Cikumbuso cifukwa cakuti enzosushiwa na abanja ŵake. Kalongosi emuŵelengela Luka 22:44 nomufotokozela kuti ngati tukumana na mavuto tufunika kutolela cisanzo ca Yesu mwa kupemphela  kwa Yehova nomudalila na mtima wonse. Siku yokonkhapo, Sue ekonza viphiphiliso va pa Cikumbuso notamba pulogilamu ya Kulambila Kwa m’Mawa yapadela pa jw.org. Mcingulo peenze yeka m’cipinda mwake, elumikizhya ku Cikumbuso kupitila pa foni. Pavuli pake, Sue elembela kalongosi enzomuphunzisa Baibo kuti: “Mwenilimbikisha ngako mailo. Nacita zonse zaningakwanishe kuti nipezekepo pa Cikumbuso, ndipo Yehova waniyavya. N’ne wosangalala ngako ndipo n’ne woyamikila cakuti ningakwanishe lini kufotokoza mwanumvwila.” Kansi muganiza kuti Yehova angakuyavyeni ngati mwakumana na mavuto olingana na aŵa?

16. Ndaŵa yanji nise osimikizhya kuti Yehova adalise khama yasu pofuna kuti tipezeke pa Cikumbuso? (Aroma 8:31, 32)

¹⁶ Yehova oyamikila ngako khama yatucita kuti ticite Cikumbuso ca imfwa ya Yesu. Ndipo tingankhale osimikizhya kuti atidalise ngati tuonesha kuti tuyamikila zawaticitila. (Ŵelengani Aroma 8:31, 32.) Tetyo, tisalole ciliconse kutikangisha kupezeka pa mwambo wa Cikumbuso wa caka cino. Ndipo tiyeni tiyeseyese kuyangizhyila utumiki wasu pa nyengo ya Cikumbuso.