NKHANI YOPHUNZILA 4
NYIMBO 18 Tukuyamikilani Cifukwa ca Dipo
Kansi Dipo Yutiphunzisanji?
“Zecicita Mulungu potionesha cikondi cake.”—1 YOH. 4:9.
ZATI TIPHUNZILE
M’nkhani ino, tione minkhalidwe yabwino yaali nayo Yehova koma soti yecionesha Yesu.
1. Kansi tupindula tyani cifukwa copezeka pa mwambo wokumbukila imfwa ya Yesu caka ciliconse?
YEHOVA etipasa mphaso yamtengo wapatali, pecituma Mwana wake kuti azetifwile. (2 Akor. 9:15) Cifukwa cakuti Yesu epeleka moyo wake, mungankhale pa ushamwali wotang’a na Mulungu. Kuyangizhyila apo, mungankhale na ciyembekezo cakuyonkhala na moyo kosasila. Tetyo, tili na vifukwa vinyinji voyamikilila Yehova wamene epeleka Mwana wake monga dipo, cifukwa cakuti otikonda ngako. (Aro. 5:8) Pofuna kutiyavya kuyamikila dipo, Yesu eyambisha mwambo wokumbukila imfwa yake wamene ucitika caka ciliconse.—Luka 22:19, 20.
2. Kansi tilaŵizhyane cinji m’nkhani ino?
2 Caka cino, mwambo wokumbukila imfwa ya Yesu ukacitike pa Ciwelu, April 12, 2025. Mosakaikila, tonse tufuna kuti tikapezekepo. Tikapindule ngako ngati pa nyengo ya Cikumbuso, tikapatule nthawi yosinkhasinkha a zawaticitila Yehova na Mwana wake. M’nkhani ino, tilaŵizhyane zayutiphunzisa dipo ponena za Yehova na Mwana wake. Nkhani yokonkhapo, ikatiyavye kuziŵa mwatupindulila na dipo na mwatingaoneshele kuyamikila.
KANSI DIPO YUTIPHUNZISANJI PONENA ZA YEHOVA?
3. Kansi zekwanishika tyani kuti imfwa ya munthu m’mozi iombole ŵanthu anyinji? (Onani soti cithunzithunzi.)
3 Dipo yutiphunzisa kuti Yehova ni Mulungu wokonda cilungamo. (Deut. 32:4) Adamu pecikangiwa kumvwila Mulungu, enkhala wocimwa ndipo m’kuluta kwa nthawi ecifwa. Cifukwa cakuti nise mbadwa za Adamu, nase nise ocimwa ndipo tikufwa. (Aro. 5:12) Kuti timasuliwe ku ucimo na imfwa, Yehova epeleka Mwana wake monga dipo. Koma kansi zecitika tyani kuti nsembe ya munthu m’mozi wolungama imasule ŵanthu mamiliyoni ku ucimo na imfwa? Mtumwi Paulo efotokoza kuti: “Pofwana kuti kusamvwila kwa munthu m’mozi [Adamu] kwecitisha kuti anyinji ankhale ocimwa, kumvwila kwa munthu m’mozi [Yesu] kukacitishe kuti anyinji ankhale olungama.” (Aro. 5:19; 1 Tim. 2:6) Apa, Paulo enzotanthauza kuti ŵanthu onse ni ocimwa ndipo ofunika kufwa cifukwa cakuti munthu m’mozi aliyomvwile Mulungu. Tetyo, kuti timasuliwe ku ucimo na imfwa, munthu m’mozi wolungama enzofunika kumvwila Mulungu.
Cifukwa ca munthu m’mozi Adamu, tonse tecimwa ndipo tikufwa. Ndipo cifukwa ca munthu m’mozi Yesu, tingamasuliwe ku ucimo na imfwa (Onani ndime 3)
4. Ndaŵa yanji Yehova aliyolole ŵana ŵa Adamu amene emumvwila kunkhala na moyo kosasila?
4 Kansi Yesu enzofunika cendi kufwa kuti atipulumuse? Ndaŵa yanji Yehova aliyoganize tyala zolola mbadwa za Adamu kupitilizhya kunkhala na moyo? M’kaonedwe kaumunthu, njila iyi ingaoneke monga kuti niye ya cifundo koma soti yoyenela kucita. Koma kwa Yehova, izi zenze lini zoyenela kucita. Zili teti cifukwa sembe zeoneka monga kuti Adamu aliyocite cimo ikulu na kuti ŵana ŵake enze lini ocimwa, pamene niye lini mwezenzele.
5. Ndaŵa yanji tingankhale osimikizhya kuti nthawi zonse Yehova ocita zoyenela?
5 Nanga tyani kuti Yehova aliyopeleke dipo koma elola mbadwa za Adamu kunkhala na moyo kosasila olo kuti zenze zocimwa? Izi sembe zeonesha monga kuti enyalanyaza mfundo zake zokhuza coyenela na cosayenela. Ndipo cifukwa ca izi, payakine ŵanthu sembe oganiza kuti Yehova angayoluŵa soti mfundo zake zolungama nokangiwa kucita zecilaŵila kuti akacite msogolo. Mwacisanzo, payakine ŵanthu sembe okaikila kuti Yehova akakwanilishe malonjezo yake ya msogolo. Koma tufunika lini kucita nkhaŵa. Ndaŵa yanji? N’cifukwa cakuti Yehova ecita cilungamo olo kuti kucita izi kwenzotanthauza kuti apeleke Mwana wake. Tetyo, tingankhale osimikizhya kuti yove nthawi zonse ocita zoyenela.
6. Kansi ni m’njila iyakine yotyani mwamene dipo yuoneshela cikondi ca Yehova? (1 Yohane 4:9, 10)
6 Dipo yutiyavya lini tyala kumvwisha kuti Yehova ni wacilungamo, koma yutiyavya soti kumvwisha kukula kwa cikondi cake. (Yoh. 3:16; ŵelengani 1 Yohane 4:9, 10.) Dipo yutionesha kuti Yehova ofuna lini tyala kuti tinkhale na moyo wosasila, koma ofuna soti kuti tinkhale mbali ya banja yake. Ganizilani izi: Adamu pecicimwa, Yehova aliyomulole kunkhala mbali ya banja yake. Cifukwa ca izi, tonse patuvyalika tunkhala lini mbali ya banja ya Mulungu. Koma cifukwa ca dipo, Yehova otikhululukila macimo yasu ndipo ŵala onse amene oonesha cikhulupililo nomumvwila, akankhale soti mbali ya banja yake. Olo pali lomba, Yehova otikhululukila macimo yasu, tunkhala naye pa ushamwali wotang’a nonkhala pa ushamwali na akwasu na azilongosi. Kulaŵila cendi, Yehova otikonda.—Aro. 5:10, 11.
7. Kansi kuvutika kwa Yesu kutiyavya tyani kuziŵa mwakutikondela Yehova?
7 Tingamvwishe bwino mwakutikondela Yehova, tikaganizila zecicita kuti apeleke dipo. Satana olaŵila kuti paliye mtumiki wa Yehova wamene angapitilizhye kunkhala wokhulupilika kuli yove ngati wakumana na mavuto. Kuti aoneshe kuti Satana ni wawenye, Yehova elola Mwana wake kuvutika akaliyokufwa. (Yobu 2:1-5; 1 Pet. 2:21) Yehova enzoona Yesu peenzonyozewa na asogoleli acipembezo, kukwapuliwa na masoja nokhomelelewa pa cimuti conzunzikilapo. Pavuli pake, Yehova eona Mwana wake wokondeka akufwa imfwa yoŵaŵa. (Mat. 27:28-31, 39) Kuti Yehova enze efuna, sembe aliyolole kuti Mwana wake avutike mwa njila iyi. Mwacisanzo, ŵanthu osusha peenzolaŵila kuti “Mulungu amupulumuse ngati omufuna cendi,” Yehova sembe ekwanisha kucita zamene izo cifukwa ali na mphamvu. (Mat. 27:42, 43) Koma kuti enze ecita izi, sembe paliye dipo iliyonse yepelekewa ndipo sembe tiliye ciyembekezo ciliconse. Tetyo, Yehova elola Mwana wake kuvutika mpaka peecifwa.
8. Kansi Yehova enzokumvwa tyani peenzoona Mwana wake ovutika? Fotokozani. (Onani soti cithunzithunzi.)
8 Tufunika lini kuganiza kuti cifukwa cakuti Mulungu ni wamphamvuzonse, niye kuti okhumudwa lini olo kumvwa cisoni. Baibo yufotokoza kuti yove ‘okhumudwa’ na ‘kumvwa cisoni.’ (Sal. 78:40, 41) Ganizilani cokumana naco ca Abulahamu na Isaki. Payakine mukumbukila kuti Abulahamu enze elamuliwa kuti apeleke mwana wake monga nsembe. (Gen. 22:9-12; Aheb. 11:17-19) Lomba ganizilani tyala mwecimvwila Abulahamu peenzokonzeka kuti apaye mwana wake. Ganizilani soti mwecimvwila Yehova peciona ŵanthu okwapula Mwana wake nomupaya.—Onani vidyo yakuti Tolelani Cikhulupililo Cao—Abulahamu, Mbali 2 pa jw.org
Cemuŵaŵa ngako Yehova kuona Mwana wake ovutika (Onani ndime 8)
9. Kansi Aroma 8:32, 38, 39 yutiyavya tyani kumvwisha kukula kwa cikondi caali naco Yehova pali seo na olambila ayasu?
9 Dipo yutionesha kuti paliye munthu otikonda ngako monga ni mwakutikondela Yehova. Ndipo olo ayasu na abanja ŵasu angatikonde lini monga ni mwakutikondela Yehova. (Ŵelengani Aroma 8:32, 38, 39.) Mosakaikila, Yehova otikonda kupambana mwatuzikondela seka. Kansi mufuna kunkhala na moyo kosasila? Yehova ofuna kuti munkhale na moyo kosasila kupambana mwamufunila mweo. Kansi mufuna kuti macimo yanu yakhululukiwe? Yehova ni wofunishisha kukukhululukilani. Yove ofuna tyala kuti tivomelezhye mphaso yake mwa kumukhulupilila nomumvwila. Dipo ni mphaso yamtengo wapatali yamene yuonesha cikondi cikulu caali naco Yehova pali seo. M’calo calomba, tikaphunzile zinyinji zokhuza cikondi ca Yehova.—Mla. 3:11.
ZAYUTIPHUNZISA DIPO PONENA ZA YESU
10. (a) Ndaŵa yanji Yesu evutika maganizo cifukwa ca imfwa yake? (b) Kansi Yesu elemekeza zina ya Yehova m’njila yotyani? (Onani soti kabokosi kakuti “ Yesu Elemekeza Zina ya Yehova Mokhulupilika.”)
10 Yesu osamala ngako za zina ya Ausuwake. (Yoh. 14:31) Yove evutika ngako maganizo poganiza kuti aimbiwe mlandu wonyoza Mulungu na kuti izi ziipishe zina ya Mulungu. Niye cifukwa cake yove epemphela kuti: “Atata, ngati n’zokwanishika lolani kuti kapu iyi inipitilile.” (Mat. 26:39) Mwa kupitilizhya kunkhala wokhulupilika kwa Yehova mpaka imfwa, Yesu elemekeza zina ya Ausuwake.
11. Kansi Yesu eonesha tyani cikondi cake cikulu pa ŵanthu? (Yohane 13:1)
11 Dipo yutiphunzisa soti kuti Yesu osamala ngako za ŵanthu, makamaka okonkha ŵake. (Miy. 8:31; ŵelengani Yohane 13:1.) Mwacisanzo, Yesu enzoziŵa kuti utumiki wake wa pa calo ukankhale wovuta ngako na kuti akafwe imfwa yoŵaŵa. Olo n’tetyo, yove ecita zinthu izi osati tyala cifukwa cakuti niye zecimutuma Yehova, koma na cifukwa cakuti enzokonda ŵanthu. Yove eonesha cikondi cikulu pa ŵanthu mwa kuŵalalikila, kuŵaphunzisa na kuŵayavya. Olo pa siku yeenzopaiwa, Yesu esambika mendo ya ophunzila ŵake, kuŵatonthoza noŵapasa malangizo. (Yoh. 13:12-15) Peenze pa cimuti conzunzikilapo, Yesu epasa ciyembekezo nyankapondo enze pafupi na yove mwa kumuuzhya kuti akankhale naye m’paladaiso. Ndipo euzhya soti Yohane kuti akosamalila amai ŵake. (Luka 23:42, 43; Yoh. 19:26, 27) Yesu eonesha cikondi cikulu pa ŵanthu osati tyala mwa kuŵafwila, koma na kuŵaonesha cifundo.
12. Kansi Yesu oticitila cinji pali lomba?
12 Olo kuti Khristu etifwila, yove akaluticitila zinthu zinyinji. (Aro. 6:10) Kansi ocita cinji? Opitilizhya kutipasa zinthu zabwino zamene n’zokwanishika cifukwa ca dipo. Mwacisanzo, ganizilani zakucita pali lomba. Yove otumikila monga Mfumu yasu, Mkulu wa Ansembe koma soti monga mutu wa mpingo. (1 Akor. 15:25; Aef. 5:23; Aheb. 2:17) Oyanganila soti nchito yosonkhanisha ozozewa na a mbelele ziyakine, yamene ni nchito yati ikasile cisauso cikulu cikaliyosila. b (Mat. 25:32; Mko. 13:27) Ooneshesha soti kuti atumiki ŵake okhulupilika ali na zonse zakufunikila kuti apitilizhye kutumikila Yehova mokhulupilika m’masiku yano yosilizhya. (Mat. 24:45) Ndipo mu Ulamulilo wake wa Vyaka 1,000, akatipase zinthu zinyinji zabwino. Kulaŵila cendi, Yehova epeleka Mwana wake osati tyala kuti atifwile, koma na kuti aticitile zinyinji.
PITILIZHYANI KUPHUNZILA ZINTHU ZALOMBA
13. Kansi mungapitilizhye tyani kuphunzila za cikondi caali naco Yehova na Khristu pali seo?
13 Mungapitilizhye kuphunzila za cikondi ca Yehova na Yesu, mwa kusinkhasinkha pa zinthu zakuticitila. Pa nyengo ya Cikumbuso ca caka cino, mukayese kuŵelenga mosamala buku imozi ya Uthenga wabwino olo kupitililapo. Osati mukoŵelenga macaputa anyinji pa nthawi imozi. M’malo mwake, mukoŵelenga patontho-patontho nopeza vifukwa voyangizhyilika voonesha cifukwa cake tufunika kukonda Yehova na Yesu. Ndipo mukouzhyako ayakine zamwapeza pa kuŵelenga kwanu Baibo.
14. Molingana na Salimo 119:97 na mau a m’nyansi, kansi kufufuza kungatiyavye tyani kuphunzila zokhuza dipo na nkhani ziyakine? (Onani soti cithunzithunzi.)
14 Ngati mwankhala mutumikila Yehova kwa vyaka vinyinji, payakine mungadabwe kuti pali zinthu zinyinji zalomba zamufunika kuphunzila zokhuza cilungamo ca Mulungu, cikondi cake koma soti dipo. Mfundo yacendi ni yakuti nthawi zonse, pakonkhala zinthu zinyinji zamungaphunzile zokhuza zinthu izi na ziyakine. Lomba kansi mufunika kucita cinji? Mufunika kuŵelenga nophunzila mfundo zosangalasa zamene zupezeka m’zofalisa zasu. Ngati mwaŵelenga mfundo iyakine ya m’Baibo ndipo muimvwisha lini, mufunika kufufuza. Ndipo kwa siku yonse, mungasinkhesinkhe pa mfundo zamwapeza noona zamuphunzilapo ponena za Yehova, Mwana wake na mwakutikondela.—Ŵelengani Salimo 119:97 na mau a m’nyansi.
Olo kuti tatumikila Yehova kwa nthawi itali, tingapitilizhye kuphunzila zinthu zalomba zokhuza dipo zamene zingakulishe ciyamikilo casu pa zinthu zeciticitila Yehova na Yesu (Onani ndime 14)
15. Ndaŵa yanji tufunika kupitilizhya kuphunzila mfundo zalomba kufumila m’Baibo?
15 Mufunika lini kukhumudwa ngati mupeza lini nkhani zalomba olo zocitisha cidwi nthawi iliyonse pamuphunzila Baibo. Mukoziona monga munthu wamene osakila golide. Kanyinji-kanyinji munthu wamene osakila golide, oseŵenza maawazi yanyinji olo masiku yanyinji kuti aipeze. Olo n’tetyo, opitilizhya kuisakila cifukwa ni yamtengo wapatali. Namwe, mufunika lini kuleka kuphunzila mfundo za m’Baibo cifukwa ni zamtengo wapatali kupambana golide. (Sal. 119:127; Miy. 8:10) Tetyo, pitilizhyani kuphunzila Baibo nosakila mfundo zalomba kuti muphunzilepo kanthu.—Sal. 1:2.
16. Kansi tingatolele tyani cisanzo ca Yehova na Yesu?
16 Pamuphunzila Baibo, mukosakila njila zamungaseŵenzeshelemo zamuphunzila. Mwacisanzo, mungatolele cisanzo ca Yehova coonesha cilungamo mwa kupewa sankho. Mungatolele soti cisanzo ca Yesu cokonda Ausuwake koma soti ŵanthu ayakine mwa kulola kuvutika cifukwa ca zina ya Yehova koma soti kuyavya Akhristu ayanu pa nthawi zovuta. Kuyangizhyila apo, tolelani cisanzo ca Yesu mwa kulalikila ŵanthu ayakine kuti nao aziŵe zinthu zocitisha cidwi, zamene Yehova wankhala oticitila noonesha kuti mukhulupilila dipo.
17. Kansi tikalaŵizhyane cinji m’nkhani yokonkhapo?
17 Ngati tupitilizhya kuphunzila zokhuza dipo, timukonde ngako Yehova na Mwana wake. Ndipo ngati onse tuŵakonda, nao akotikonda ngako. (Yoh. 14:21; Yak. 4:8) Lomba, tiyeni tipitilizhye kuseŵenzesha zinthu zonse zawatipasa Yehova kuti tipitilizhye kuphunzila zokhuza dipo. M’nkhani yokonkhapo, tikalaŵizhyane za madaliso yatupeza pali lomba cifukwa ca dipo na mwatingaoneshele kuti tuyamikila cikondi ca Yehova.
NYIMBO 107 Tolelani Cikondi ca Mulungu
a TANTHAUZO YA MAU AYAKINE: “Kusinkhasinkha,” kutanthauza kuganizilapo mosamala pa nkhani yamuŵelenga nophunzila zinyinji kuti muimvwishe bwino.
b “Kusonkhanisha zinthu kululu” kwecifotokoza Paulo pa Aefeso 1:10, n’kosiyana ngako na kusonkhanisha “ocita kusankhiwa” kwecifotokoza Yesu pa Mateyu 24:31 na Maliko 13:27. Paulo enzofotokoza za nthawi pamene Yehova osankha ŵana ŵake auzimu mwa kuŵazoza na mzimu utuŵa. Koma Yesu enzolaŵila za nthawi pamene osalila ozozewa onse pa calo akasokhanishiwe kululu pa nthawi ya cisauso cikulu.
