NKHANI YOPHUNZILA 5
NYIMBO 108 Cikondi ca Mulungu n’Cokhulupilika
Kansi Tupindula Tyani na Cikondi ca Yehova?
“Khristu Yesu ewela pa calo kuzopulumusa ocimwa.”—1 TIM. 1:15.
ZATI TIPHUNZILE
M’nkhani ino, tilaŵizhyane mwatupindulila cifukwa ca dipo na mwatingaoneshele kuti tuyamikila Yehova cifukwa ca mphaso iyi.
1. Kansi tingacitenji kuti tikondweleshe Yehova?
GANIZILANI kuti mwapasa munthu muyakine wamukonda mphaso yapadela koma soti yokongola. Mosakaikila, mungamvwe lini bwino ngati munthu uyu angoiseŵenzesha lini. Koma mungasangalale ngako ngati angoiseŵenzesha noonesha kuyamikila. Kansi izi zukatizhyana tyani na mphaso ya dipo yecitipasa Yehova? Yehova epeleka Mwana wake kuti atifwile. Tetyo, okondwela ngako ngati tuonesha kuti tuyamikila mphaso iyi yamtengo wapatali koma soti ngati tuyamikila cikondi cake camene cemusonkhezela kuti apeleke dipo.—Yoh. 3:16; Aro. 5:7, 8.
2. Kansi tilaŵizhyane cinji m’nkhani ino?
2 M’kuluta kwa nthawi, payakine tingaleke kuyamikila dipo. Kucita izi kungankhale monga kuti taika mphaso iyi yapadela pa malo pamene tingakwanishe lini kuiona. Kuti tipewe kucita izi, nthawi zonse tufunika kuganizila pa zeciticitila Mulungu na Yesu Khristu. Nkhani ino, itiyavye kuziŵa mwatingacitile izi. Tilaŵizhyane mwatingapindulile pali lomba na dipo na mwati tikapindulile msogolo. Tione soti mwatingaoneshele kuti tuyamikila cikondi ca Yehova, makamaka pa nyengo ya Cikumbuso.
MWATUPINDULILA PALI LOMBA
3. Kansi tupindula tyani cifukwa ca dipo pali lomba?
3 Olo pali lomba, tupindula na nsembe ya dipo ya Khristu. Mwacisanzo, cifukwa ca dipo, Yehova otikhululukila macimo ŵasu. Yove ofuna lini tyala kutikhululukila macimo ŵasu, koma ofunishisha kucita izi. Wamasalimo eonesha kuti oyamikila cikhululukilo ca Yehova. Elaŵila kuti: “Mweo Yehova, nimwe wabwino ndipo nimwe wokonzeka kukhululuka.”—Sal. 86:5; 103:3, 10-13.
4. Kansi Yehova epeleka dipo kuli ŵanthu otyani? (Luka 5:32; 1 Timoteyo 1:15)
4 Ayakine a seo tingayambe kuona kuti tufunikila lini cikhululukilo ca Yehova. Kulaŵila cendi, tonse nise osayenelela kukhululukiwa. Mtumwi Paulo emvwisha kuti enze “wosayenelela kuitiwa kuti mtumwi.” Ndipo epitilizhya kuti: “Cifukwa ca kuwama mtima kukulu kwa Mulungu, nili mwanilili.” (1 Akor. 15:9, 10) Ngati talapa macimo ŵasu, Yehova otikhululukila. Ndaŵa yanji? Yove ocita izi osati cifukwa cakuti nise oyenelela kukhululukiwa, koma cifukwa cakuti otikonda. Ngati muvutika cifukwa coona kuti muyenelela lini cikhululukilo ca Yehova, mukokumbukila kuti yove epeleka dipo osati kuli ŵanthu angwilo, koma kuli ŵanthu ocimwa amene alapa.—Ŵelengani Luka 5:32; 1 Timoteyo 1:15.
5. Ndaŵa yanji tufunika lini kuganiza kuti nise oyenelela kukhululukiwa na Yehova? Fotokozani.
5 Olo kuti tatumikila Yehova kwa vyaka vinyinji, tufunika lini kuganiza kuti nise oyenelela kukhululukiwa na yove. N’cendi kuti Yehova oyamikila zinthu zatumucitila pomutumikila. (Aheb. 6:10) Koma yove epeleka Mwana wake monga mphaso yaulele osati pofuna kutilipila pa zinthu zatumucitila. Tetyo, tufunika lini kuganiza kuti tufunika cikhululukilo cake cifukwa cakuti tamucitila zinthu zinyinji. Ngati tingaganize tetyo, zingankhale monga kuti tufunikila lini dipo ya Yesu.—Linganizhyani na Agalatiya 2:21.
6. Ndaŵa yanji Paulo enzoseŵenza mwakhama potumikila Yehova?
6 Mtumwi Paulo enzoziŵa kuti angakhululukiwe lini na Yehova, tyala cifukwa cakuti enzocita zinyinji pomutumikila. Lomba kansi n’cinji cemupangisha kuti apitilizhye kuseŵenza mwakhama potumikila Yehova? Ecita izi pofuna kuyamikila Yehova cifukwa ca cifundo cake cikulu. (Aef. 3:7) Molingana na Paulo, nase tupitilizhya kutumikila Yehova mwakhama osati cifukwa cakuti tufuna kuti ationeshe cifundo, koma pofuna kumuyamikila cifukwa cotionesha cifundo.
7. Kansi ni njila iyakine yotyani yatupindulila na dipo pali lomba? (Aroma 5:1; Yakobo 2:23)
7 Njila iyakine yatupindulila cifukwa ca dipo pali lomba ni yakuti tingankhale pa ushamwali na Yehova. a Monga ni mwetephunzilila m’nkhani yapita, petevyalika tenze lini pa ushamwali na Mulungu. Koma cifukwa ca dipo, tingasangalale “kunkhala pa mtendele na Mulungu” novwendela naye pafupi.—Ŵelengani Aroma 5:1; Yakobo 2:23.
8. Ndaŵa yanji tufunika kuyamikila Yehova cifukwa ca mwai wa pemphelo?
8 Tukwanisha kupemphela kwa Yehova cifukwa cakuti tili pa ushamwali na yove. Yehova akumvwa lini tyala mapemphelo opelekewa pa gulu ngati tasonkhana pamozi. Koma akumvwa soti mapemphelo yakupeleka aliyense payeka. Pemphelo yutiyavya kucepeshako nkhaŵa nonkhala na mtendele wa mu mtima. Yutiyavya soti kutang’isha ushamwali wasu na Mulungu. (Sal. 65:2; Yak. 4:8; 1 Yoh. 5:14) Peenze pa calo, Yesu enzopemphela mowelezhyawelezhya kuli Ausuwake cifukwa enzoziŵa kuti enzokumvwa, na kuti pemphelo ingamuyavye kupitilizhya kunkhala pa ushamwali wotang’a na Ausuwake. (Luka 5:16) Nise oyamikila ngako kuti cifukwa ca nsembe ya Yesu, tunkhala pa ushamwali na Yehova nolaŵila naye m’pemphelo.
MWATINGAYOPINDULILA MSOGOLO
9. Kansi atumiki a Yehova okhulupilika akapindule tyani na dipo msogolo?
9 Kansi atumiki a Yehova okhulupilika akapindule tyani na dipo msogolo? Yehova akaŵapase moyo wosasila. Ŵanthu anyinji oganiza kuti izi n’zosakwanishika, tyala cifukwa cakuti ŵanthu ankhala akufwa kwa vyaka vinyinji. Koma colinga ca Yehova coyambilila cenze cakuti ŵanthu ankhale na moyo kosasila. Kuti Adamu aliyocimwe, sembe paliye aliyense wamene oganiza kuti n’zosakwanishika ŵanthu kunkhala na moyo kosasila. Olo kuti n’zovuta kuganizila kunkhala na moyo kosasila pali lomba, tingakhulupilile kuti izi zikacitike cifukwa Yehova epeleka mtengo ukulu wamene ni moyo wa Mwana wake kuti izi zinkhale zokwanishika.—Aro. 8:32.
10. Kansi ozozewa na a mbelele ziyakine oyembekezela cinji msogolo?
10 Olo kuti tikasangalale na moyo kosasila msogolo, Yehova ofuna kuti tikoganizila izi pali lomba. Ozozewa oyembekezela mwacidwi kuyosangalala na moyo kululu pati akolamulila pamozi na Khristu. (Chiv. 20:6) A mbelele ziyakine nao oyembekezela mwacidwi kuyosangalala na moyo m’paladaiso pa calo, mwamene mukankhale muliye voŵaŵa vilivonse na cisoni. (Chiv. 21:3, 4) Kansi nimwe m’mozi wa a mbelele ziyakine amene muli na ciyembekezo cakuyonkhala na moyo pano pa calo? Kulaŵila cendi, mphaso iyi ni yapadela ngako. Talaŵila teti cifukwa Yehova elenga ŵanthu kuti ankhale pa calo. Tetyo, tikasangalale ngako kunkhala na moyo pano pa calo.
11-12. Kansi ni madaliso ayakine otyani yatuyembekezela mwacidwi msogolo? (Onani soti vithunzithunzi.)
11 Ganizilani mwati ukankhalile umoyo m’Paladaiso pa calo. Mukocita lini nkhaŵa cifukwa ca matenda olo imfwa. (Yes. 25:8; 33:24) Yehova akakhutilishe zolakalaka za munthu aliyense. Kansi mufunishisha kuyophunzila zinthu zotyani? Kansi mungakonde kuyophunzila zinyinji zokhuza vinyama? Kansi mungakonde kuyophunzila molizhyila zida zoimbila? Olo kansi mungakonde kuyophunzila modulowing’ila vithunzithunzi? M’paladaiso, mukafunike ŵanthu oziŵa kulemba mapulani ya mang’anda koma soti oziŵa kumanga. Ndipo ŵanthu akafunike kulima minda, kupanga zida zoseŵenzesha, kukomola mbeu nozisamalila. (Yes. 35:1; 65:21) Cifukwa cakuti tikankhale na moyo kosasila, tikankhale na nthawi ikulu yophunzila luso iliyonse yatingafune.
12 Zikankhale zosangalasa ngako kulandila ŵanthu ati akoukishiwa. (Mac. 24:15) Ganizilani soti mwati mukamvwile kuphunzila zinyinji zokhuza zinthu zecilenga Yehova. (Sal. 104:24; Yes. 11:9) Kupambana zonse, tikasangalale ngako kulambila Yehova apo n’kuti nise angwilo. Kansi mungalole kuti ‘kucita macimo nosangalala kwa kanthawi katontho’ pali lomba kukakukangisheni kulandila madaliso aŵa? (Aheb. 11:25) Mosakaikila, mungafune lini izi. Moyo wosangalasa wati tikankhale nao, ukankhale wabwino ngako kupambana cinthu ciliconse catingapeze m’calo cino pali lomba. Mukokumbukila kuti tikoyembekezela lini Paladaiso pa nthawi yamene iyo cifukwa niye mwati tikonkhala. Zonse izi n’zokwanishika cifukwa cakuti Yehova etikonda ngako nopeleka Mwana wake monga dipo.
Kansi ni madaliso yotyani yamuyembekezela mwacidwi kuyoona m’Paladaiso? (Onani ndime 11-12)
MUKOONESHA KUTI MUYAMIKILA CIKONDI CA YEHOVA
13. Kansi tingaoneshe tyani kuti tuyamikila cikondi ca Yehova? (2 Akorinto 6:1)
13 Kansi tingaoneshe tyani kuti tuyamikila Yehova cifukwa cotipasa dipo? Tingacite izi mwa kuika Ufumu wa Mulungu pasogolo mu umoyo wasu. (Mat. 6:33) Yesu ecifwa “kuti amene ali na moyo asankhale umoyo wozisangalasha ŵeka, koma ankhale na moyo wosangalasha eŵafwila noukishiwa.” (2 Akor. 5:15) Yehova wankhala otionesha cifundo cikulu notikhululukila. Tetyo, ngati tucita zilizonse zatingakwanishe kuti timutumikile, tuonesha kuti tumvwisha noyamikila zinthu zonse zakuticitila.—Ŵelengani 2 Akorinto 6:1.
14. Kansi tingaoneshe tyani kuti tukhulupilila cisogozo ca Yehova?
14 Tingaoneshe soti kuti tuyamikila cikondi ca Yehova mwa kumukhulupilila nokonkha cisogozo cake. Kansi tingacite tyani izi? Ngati tufuna kupanga zosankha monga zokhuza maphunzilo yatufuna kucita koma soti nchito yatingaloŵe, tufunika kuganizila zaangafune Yehova kuti ticite. (1 Akor. 10:31; 2 Akor. 5:7) Ngati tudalila Yehova popanga zosankha, cikhulupililo casu muli yove koma soti ushamwali wasu na yove utang’ilako. Ndipo ciyembekezo casu cinkhale cosimikizhyilika.—Aro. 5:3-5; Yak. 2:21, 22.
15. Kansi tingaoneshe tyani ciyamikilo casu kwa Yehova pa nyengo ya Cikumbuso?
15 Pali soti njila iyakine yatingaoneshelemo kuti tuyamikila cikondi ca Yehova. Njila iyi ni kuseŵenzesha nyengo ya Cikumbuso kuti tioneshe Yehova kuti tumuyamikila cifukwa ca dipo. Kuyangizhyila pa kupezekapo pa Cikumbuso, tingaitileko soti ayakine kuti nao akapezekepo. (1 Tim. 2:4) Mukofotokozela ŵala ŵamwaitila, zati zikacitike ku Cikumbuso. Mungaŵaoneshe soti mavidyo ya pa jw.org ya mutu wakuti Ndaŵa Yanji Yesu Ecifwa? na yakuti Kumbukilani Imfwa ya Yesu. Akulu, mungaitile soti ŵala amene efoka. Ganizilani tyala cisangalalo cunkhala kululu na pa calo ngati ziyakine mwa mbelele za Yehova zamene zenze zesoŵa, zawelela soti pa gulu ya ziyake. (Luka 15:4-7) Pa Cikumbuso, tiyeni tikaziikile colinga copasa moni ŵanthu ayakine, makamaka ŵala amene ni kuyamba kupezekapo na ŵala amene enze efoka. Tikayocita izi, tikaŵayavye kuyozimvwa kuti ni olandiliwa.—Aro. 12:13.
16. Ndaŵa yanji tufunika kuyangizhyila utumiki wasu pa nyengo ya Cikumbuso?
16 Kansi mungaciteko zinyinji potumikila Yehova pa nyengo ya Cikumbuso? Kucita izi ni njila yabwino yatingaoneshelemo kuti tuyamikila zeciticitila Mulungu na Khristu. Ngati tucita zinyinji potumikila Yehova, niye patuona ngako mwakutiyavyila. Ndipo cifukwa ca izi, cidalilo casu pali yove cutang’ilako. (1 Akor. 3:9) Kuyangizhyila apo, pa nyengo ya Cikumbuso mukoŵelenga Baibo pokonkha ndandanda yoŵelengela Baibo pa nyengo ya Cikumbuso, yamene yupezeka mu kabuku ka Kuphunzila Malemba Siku Iliyonse olo mu chati yupezeka mu kabuku ka msonkhano wa mkati mwa wiki. Ngati mufuna, mungaseŵenzeshe Malemba aŵa pa kuphunzila kwanu Baibo.
17. Kansi Yehova osangalala na cinji? (Onani soti kabokosi kakuti “ Mwatingaoneshele Kuti Tuyamikila Cikondi ca Yehova.”)
17 Payakine cifukwa ca mwazilili zinthu mu umoyo wanu, mungakwanishe lini kucita zinthu zonse zatalaŵizhyana m’nkhani ino. Olo n’tetyo, mukokumbukila kuti Yehova olinganizhya lini zamukwanisha kucita na zakukwanisha kucita ayakine. Yove oona zili mu mtima mwanu. Ndipo osangalala ngako akaona kuti muyamikila mphaso yamtengo wapatali yamene ni dipo.—1 Sam. 16:7; Mko. 12:41-44.
18. Ndaŵa yanji tuyamikila Yehova Mulungu na Yesu Khristu?
18 Cifukwa ca dipo, tingakhululukiwe macimo ŵasu, tunkhala pa ushamwali na Yehova koma soti tili na mwai wakuyonkhala na moyo wosasila. Tiyeni tipitilizhye kuyamikila cikondi ca Yehova, camene cemusonkhezela kuti acitishe kuti zinkhale zokwanishika kwa seo kulandila madaliso aya. (1 Yoh. 4:19) Tiyeni tipitilizhye soti kuyamikila Yesu wamene etikonda nopeleka moyo wake cifukwa ca seo.—Yoh. 15:13.
NYIMBO 154 Cikondi Cosasila
