1. Kansi ŵanthu anyinji masiku ŵano osamala za cinji?

 PAYAKINE mwaona kuti ŵanthu anyinji masiku ŵano, osamala ngako za ove ŵeka kupambana za ayakine. Mwacisanzo, oseŵenzesha malo otandalila a pa intaneti pofuna kuzioneshela na zinthu zaali nazo koma soti zaakwanisha kucita. Olo n’tetyo, pali ŵanthu ayakine amene opasa Yehova ulemelelo. M’nkhani ino, tilaŵizhyane tanthauzo ya kupeleka ulemelelo kwa Yehova na zingatisonkhezele kucita izi. Tiphunzile soti mwatingapasile Mulungu ulemelelo womuyenelela koma soti mwamene yove akalemekezele zina yake msogolo.

KANSI KUPELEKA ULEMELELO KWA YEHOVA KUTANTHAUZANJI?

 2. Kansi Yehova eonesha tyani ulemelelo wake pa lupili ya Sinai? (Onani soti cithunzithunzi pacikuto.)

² Baibo yuonesha kuti Yehova ni Mulungu Mkulu. Yove eonesha ulemelelo wake nthawi itontho pavuli pakuti mtundu wa Aisiraeli wafuma mu ukapolo ku Iguputo. Ganizilani cocitika ici: Yelekezelani kuti muona Aisiraeli mamiliyoni okumana pamozi pafupi na lupili ya Sinai kuti amvwe zakufuna kuŵauzhya Mulungu. Pavuli pake, mkumbi ufipa uphimba lupili yonse. Ndipo mosayembekezeleka, pocitika civomezi cikulu, pomvwika kulila kwa mabingu, tuleza koma soti kulila kwa mphamvu monga ni kulila kwa lipenga. (Eks. 19:​16-18; 24:17; Sal. 68:8) Yehova pecicita izi, Aisiraeli edabwa ngako poona mphamvu zaali nazo.

 3. Kansi tingapeleke tyani ulemelelo kwa Yehova?

³ Nanga tyani ponena za ŵanthu? Kansi nase tingapeleke ulemelelo kwa Yehova? Eee. Njila imozi yatucitilamo izi ni mwa kuuzhyako ayakine zokhuza mphamvu zake na minkhalidwe yake iweme. Tutamanda soti Mulungu mwa kumupasa  ulemelelo cifukwa ca zinthu zatingakwanishe kucita, moyavyiwa na yove. (Yes. 26:12) Mfumu Davide ni cisanzo cabwino ca ŵanthu amene etamanda Yehova. M’pemphelo yecipeleka pamenso pa Aisiraeli, Davide elaŵila kuti: “Mweo Yehova, ukulu, mphamvu, kukongola, ulemelelo na ulemu ni zanu, cifukwa zinthu zonse zakululu na za pa calo ni zanu.” Davide pecisilizhya kupemphela, “ŵanthu onse eyamba kutamanda Yehova.”—1 Mbi. 29:​11, 20.

 4. Kansi Yesu etamanda tyani Yehova?

⁴ Yesu peenze pa calo, etamanda Ausuwake mwa kuuzhya ŵanthu kuti ni Yehova emupasa mphamvu zocitila zozizwisa. (Mko. 5:​18-20) Yove eyavya soti ayakine kuona kuti Yehova ni wabwino kupitila mu zeenzolaŵila zokhuza Ausuwake koma soti mweenzocitila zinthu na ŵanthu. Siku iyakine, Yesu enzophunzisa m’sunagoge. Pa ŵanthu enzomumvwishila, penze munakazi muyakine wamene enze ekatiwa na mzimu uipa kwa vyaka 18. Mzimu uipa uyu wepangisha msana wake kunkhala wobenda cakuti enzoŵelamuka lini. Yesu emvwisha kuti munakazi uyu enze wovutika maganizo na kuti enzofuna kuti yove amuyavye. Tetyo mwacifundo emuuzhya kuti: “Mzimai, mwamasuka ku matenda ŵanu.” Pavuli pake, eika manja ŵake pa munakazi uyu ndipo nthawi yamene iyo, yove eŵelamuka “noyamba kutamanda Mulungu.” Munakazi uyu esangalala ngako kuti Yehova emupolesha. (Luka 13:​10-13) Kulaŵila cendi, mzimai uyu enze na cifukwa cabwino cotamandila Yehova.

KANSI N’CINJI CUTISONKHEZELA KUPELEKA ULEMELELO KWA YEHOVA?

 5. Kansi tili na vifukwa votyani volemekezela Yehova?

⁵ Tupeleka ulemelelo kwa Yehova cifukwa tumulemekeza ngako. Tili na vifukwa vinyinji vomulemekezela. Mwacisanzo, yove ni wamphamvuzonse ndipo ali na mphamvu ziliye malile. (Sal. 96:​4-7) Nzelu zake zapalulu zuonekela bwino m’vinthu vecilenga. Yove etipasa moyo ndipo otipasa zonse zatufunikila kuti tinkhale na moyo. (Chiv. 4:11) Ni wokhulupilika. (Chiv. 15:4) M’zilizonse zakucita, opambana ndipo osunga malonjezo ŵake. (Yos. 23:14) Niye cifukwa cake ponena za Yehova, mneneli Yeremiya elaŵila kuti: “Pakati pa anzelu onse a m’mitundu ya ŵanthu koma soti pakati pa maufumu yao yonse, paliyeletu aliyense ali monga ni mweo.” (Yer. 10:​6, 7) Kulaŵila cendi, tili na vifukwa vinyinji volemekezela Ausuwasu akululu. Ndipo kuyangizhyila pa kulemekeza Yehova, tumukonda ngako.

 6. Kansi n’cinji cuticitisha kumukonda Yehova?

⁶ Tupeleka ulemelelo kwa Yehova cifukwa cakuti tumukonda ngako. Ganizilani minkhalidwe inyinji yaali nayo Yehova yamene yuticitisha kumukonda. Yove ni wacifundo ndipo ni muweme mtima. (Sal. 103:13; Yes. 49:15) Ngati takhumudwa, naye okhumudwa. (Zek. 2:8) Yove ocitisha kuti zinkhale zosavuta kwa seo kuvwendela naye pafupi monga ashamwali ŵake. (Sal. 25:14; Mac. 17:27) Ni wolicefya cakuti ‘oseluka m’nyansi kuti aone kululu na calo ndipo ousha munthu wonyozeka kumucosa m’lukungu.’ (Sal. 113:​6, 7) Cifukwa ca minkhalidwe iyi yaali nayo Mulungu wasu Mkulu, tumutamanda.—Sal. 86:12.

 7. Kansi tili na mwai wotyani?

⁷ Tupeleka ulemelelo kwa Yehova cifukwa tufuna kuti ayakine amuziŵe. Ŵanthu anyinji oziŵa lini zacendi zokhuza Yehova. Ndaŵa yanji? N’cifukwa cakuti Satana olaŵila zinthu zawenye zokhuza yove ndipo ŵanthu ozikhulupilila zinthu zamene izo. (2 Akor. 4:4) Satana wacitisha ŵanthu kukhulupilila kuti Yehova ni Mulungu wankhanza, osamala lini za ŵanthu na kuti niye ocitisha mavuto yatukumana nayo. Olo n’tetyo, seo tuziŵa zacendi  zokhuza Mulungu wasu. Tetyo, tili na mwai wouzhyako ayakine zacendi nopeleka ulemelelo kwa Mulungu. (Yes. 43:10) Lemba ya Salimo 96, yukamba za kupeleka ulemelelo kwa Yehova. Tetyo, patulaŵizhyana ayakine mwa mau ouzhyiliwa opezeka mu Salimo iyi, mukoganizila njila zamungapasilemo Yehova ulemelelo womuyenelela.

KANSI TINGAPASE TYANI YEHOVA ULEMELELO WOMUYENELELA?

 8. Kansi ni m’njila zotyani zatingapasilemo Yehova ulemelelo? (Salimo 96:​1-3)

⁸ Ŵelengani Salimo 96:​1-3. Tingapase Yehova ulemelelo kupitila m’zinthu zatulaŵila zokhuza yove. Mavesi aya yotiuzhya kuti “imbilani Yehova,” “tamandani zina yake,” “mukolengeza uthenga wabwino wa cipulumuso cake,” ndipo “lengezani ulemelelo wake pakati pa ŵanthu a mitundu iyakine.” Tingapase Ausuwasu akululu ulemelelo kupitila m’njila zonse izi. Ayuda okhulupilika koma soti Akhristu a m’nthawi ya atumwi, aliyowayewaye kuuzhyako ayakine zinthu zabwino zeciŵacitila Yehova. (Dan. 3:​16-18; Mac. 4:29) Kansi nase tingacite tyani izi?

9-10. Kansi muphunzilapo cinji pa cokumana naco ca kalongosi Angelena? (Onani soti cithunzithunzi.)

⁹ Ganizilani cokumana naco ca kalongosi muyakine wa zina yakuti Angelena, a wamene onkhala ku United States. Motang’a mtima, yove elaŵila zokhuza Yehova ku nchito kwao. Monga munthu wamene enze eyamba calombapano kuseŵenza pa kampani iyakine, Angelena esengewa kuti akapezekepo pa miting’i ya ŵanthu amene enze eyamba calombapano kuseŵenza pa kampani iyi. Yove epasiwa mwai wakuti akauzhyeko ayakine cinthu ciyakine cokhuza umoyo wake. Tetyo, yove eganiza zakuti akaŵaoneshe ayakine mwa mafoto ŵake amene enzoonesha cimwemwe ceenze naco cifukwa conkhala m’mozi wa Mboni za Yehova. Olo n’tetyo, nthawi yakuti alaŵilepo ikaliyokwana, muyake muyakine wa ku nchito eziziŵikisha kuti ekulila m’banja ya Mboni za Yehova. Munthu uyu eyamba kulaŵila ziipa zokhuza Mboni za Yehova na zeenzokhulupilila. Angelena elaŵila kuti: “Necita nkhaŵa ngako. Koma nenzoziŵa kuti zeenzolaŵila munthu uyu zokhuza Yehova, zenze zawenye. Tetyo neziuzhya kuti ‘nufunika lini kunkhala celele, koma nufunika kuŵauzhya zacendi zokhuza Yehova.’”

¹⁰ Muyake wa ku nchito ula pecisilizhya kulaŵila, Angelena epeleka pemphelo ifupi ya mu mtima. Pavuli pake, elaŵila naye mwaulemu.  Emuuzhya kuti: “Nane nekulila m’banja ya Mboni. Ndipo mpaka pano, nikalupitilizhya kunkhala m’mozi wa Mboni za Yehova.” Pa nthawi iyi, makambisilano yao yenzoyenda lini bwino. Olo n’tetyo, Angelena epitilizhya kunkhala wodekha. Eonesha ayake a ku nchito mafoto yeenze nayo yamene yenzoonesha kuti yove na ayake osangalala kutumikila Yehova. Pavuli pake, eŵaonesha zinthu zakukhulupilila. (1 Pet. 3:15) Kansi penkhala zofumapo zotyani? Angelena pecisilizhya kulaŵila, munthu ula wamene enzolaŵila ziipa zokhuza Mboni, eleka kulaŵila zinthu ziipa. Efwika mpaka pokumbukila zabwino zenzocitika peenze mwana koma soti peenzokatizhyana na Mboni za Yehova. Angelena elaŵila soti kuti: “Zina ya Yehova yufunika kutetezewa. Ndipo ni mwai ukulu kucita izi.” Nase tingatamande Yehova mwa kuteteza zina yake ngati ayakine olaŵila ziipa zokhuza yove. Ndipo kucita izi ni mwai ukulu.

11. Kansi atumiki okhulupilika a Yehova ankhala okonkha tyani mfundo yupezeka pa Salimo 96:8?

¹¹ Ŵelengani Salimo 96:8. Tingatamande Yehova na vinthu vasu. Atumiki acendi a Yehova ankhala omutamanda mwa njila iyi. (Miy. 3:9) Mwacisanzo, Aisiraeli epeleka zopeleka zocilikizila kumanga nokonza soti kacisi. (2 Maf. 12:​4, 5; 1 Mbi. 29:​3-9) Ophunzila a Yesu nao ecilikiza Yesu koma soti atumwi “poseŵenzesha cuma cao.” (Luka 8:​1-3) Akhristu a m’nthawi ya atumwi epeleka zopeleka kuti ayavye olambila ayao. (Mac. 11:​27-29) Nase masiku ŵano, tingatamande Yehova mwa kupanga zopeleka.

12. Kansi zopeleka zasu zingapeleke tyani ulemelelo kwa Yehova? (Onani soti cithunzithunzi.)

¹² Ganizilani tyala cisanzo cimozi cuonesha mwamene zopeleka zasu zutwalila ulemelelo kwa Yehova. Mu 2020, ku Zimbabwe kwecitika cilala camene cetola nthawi itali. Ŵanthu mamiliyoni anyinji enzeve vakulya, kuyangizhyilapo kalongosi muyakine wa zina yakuti Prisca. Olo kuti kwenze cilala, kalongosi uyu epitilizhya kukonkha ndandanda yake yolalikila pa Citatu na pa Cisanu ciliconse. Yove enzocita izi olo pa nthawi yolima. Tetyo maneba ŵake peciona izi, eyamba kumunyoza mwa kulaŵila kuti, “Mumufwe na njala.” Koma mwacidalilo Prisca enzoyankha kuti, “Yehova akaliyokangiwapo kusamalila atumiki ŵake.” Pakaliyopita nthawi itali, yove elandila thandizo ya vakulya kufumila ku gulu yasu. Kalongosi Prisca epeza mwai wa vakulya koma soti vinthu viyakine veenzofunikila cifukwa ca zopeleka zatupanga. Maneba a Prisca peciona  izi, ecita cidwi ndipo emuuzhya kuti, “Mwelaŵila cendi, taona kuti nthawi zonse Mulungu okuyavyani. Tetyo, tufuna kuphunzila zinyinji zokhuza yove.” Zocitisha cidwi n’zakuti maneba ŵake okwanila 7, eyamba kupezeka pa misonkhano.

13. Kansi tingapeleke tyani ulemelelo kwa Yehova kupitila m’zocita zasu? (Salimo 96:9)

¹³ Ŵelengani Salimo 96:9. Tupeleka ulemelelo kwa Yehova kupitila m’zocita zasu. Ansembe amene enzotumikila pa kacisi wa Yehova, enzofunika kunkhala atuŵa mwamuŵili. (Eks. 40:​30-32) Nase tufunika kunkhala atuŵa, osati tyala mwamuŵili koma na mwa kupewa kucita cinthu ciliconse cakuzonda Yehova. (Sal. 24:​3, 4; 1 Pet. 1:​15, 16) Baibo yulaŵila kuti tufunika kuvula “umunthu wakale” novwala “umunthu walomba.” Izi zutanthauza kuti tufunika kucita zilizonse zatingakwanishe kuti tipewe kaganizidwe kolakwika nopewa zinthu zakuzonda Yehova. Tetyo, tuphunzila kuganiza nocita zinthu m’njila yamene yuonesha kuti tutolela Mulungu na minkhalidwe yake iweme. (Akol. 3:​9, 10) Na thandizo ya Yehova, olo ŵanthu amene ocita minkhalidwe iipa angacinje novwala umunthu walomba.

14. Kansi muphunzilapo cinji pa cokumana naco ca Jack? (Onani soti cithunzithunzi.)

¹⁴ Ganizilani cokumana naco ca Jack, munalume wamene enze wa ndeo koma soti woyofya ndipo ŵanthu enzomuita kuti ciŵanda. Cifukwa ca zocita zake ziipa, yove emangiwa noweluziwa kuti apaiwe. Olo n’tetyo, peenzoyembekezela kuti apaiwe, yove evomela kuyamba kuphunzila Baibo na mkwasu muyakine wamene enzolalikila ku jele. Olo kuti yove enzocita vinthu viipa kuvuli, evula umunthu wake wakale ndipo eyenelela kubatizika. Jack ecinja ngako cakuti siku yakuti apaiwe peyefwika, olonda jele ayakine eponesha misozi penzolailana naye. Wolonda jele muyakine elaŵila kuti: “Jack niye enze munthu muipa ngako mu jele iyi. Koma lomba wankhala munthu wabwino ngako.” Wiki yokonkhapo pavuli pakuti Jack wapaiwa, akwasu eluta soti ku jele kuti akacitishe msonkhano wa mkati mwa wiki. Tetyo, ekumana na munthu muyakine enze m’jele iyi wamene epezekapo pa msonkhano kwa nthawi yoyamba. Kansi n’cinji cemusonkhezela kuti apezekepo? Yove ecita cidwi na kucinja kwa Jack ndipo enzofuna kuziŵa zeenzofunika kucita kuti akolambila Yehova. N’zoonekelatu kuti zocita zasu  zingapeleke ulemelelo kuli Ausuwasu akululu.—1 Pet. 2:12.

KANSI YEHOVA AKALEMEKEZE TYANI ZINA YAKE MSOGOLO?

15. Kansi Yehova akatuŵishiletu tyani zina yake msogolo? (Salimo 96:​10-13)

¹⁵ Ŵelengani Salimo 96:​10-13. Mavesi osilizhyila a Salimo 96, ofotokoza Yehova monga Woweluza wacilungamo koma soti Mfumu. Lomba kansi yove akalemekeze tyani zina yake msogolo? Akacite izi kupitila mu viweluzo vake. Lombapano, yove akaononge Babulo Mkulu cifukwa conyoza zina yake ituŵa. (Chiv. 17:​5, 16; 19:​1, 2) Payakine ayakine mwa ŵanthu ati akaone kuonongewa kwa Babulo Mkulu, akakatizhyane nase pa kulambila kwacendi. Posilizhyila pake, Yehova akaononge dongosolo ya zinthu ya Satana pa Aramagedo ndipo akaononge onse omususha nonyoza boma yake. Koma akapulumuse onse amene omukonda, omumvwila nopeleka ulemelelo kuli yove. (Mko. 8:38; 2 Ates. 1:​6-10) Yehova akatuŵishiletu zina yake pa ciyeso cosilizhyila cati cikacitike pavuli pa Vyaka 1,000 va Ulamulilo wa Yesu. (Chiv. 20:​7-10) Pa nthawi iyi, “calo cikazule na ŵanthu oziŵa ulemelelo wa Yehova monga ni mwamene manzi yozuzhyila nyanja.”—Hab. 2:14.

16. Kansi mwasimikizhya mtima kucita cinji? (Onani soti cithunzithunzi.)

¹⁶ Zikankhale zosangalasa ngako kuona ŵanthu onse opasa Yehova ulemelelo woyenela zina yake. Koma patuyembekezela nthawi iyi, tingaciteko mbali yasu mwa kuseŵenzesha mpata ulionse watingankhale nao kuti tilemekeze Mulungu wasu. Pofuna kutiyavya kuika maganizo yasu pa udindo uyu wofunika ngako, Bungwe Yolamulila yasankha Salimo 96:8 kunkhala lemba ya caka ca 2025. Lemba iyi yukamba kuti: “M’paseni Yehova ulemelelo woyenela zina yake.”