Yehova ofuna kuti ŵanthu olungulana akonkhala osangalala na kuti akokondana kwa moyo wao wonse. (Mat. 19:4-6) Ngati mufuna kulungula olo kulunguliwa, kansi n’cinji cingakuyavyeni kuti mupeze munthu woyenelela? Pofwana kuti Yehova niye etilenga, oziŵa bwino zinthu zingatiyavye kuti tinkhale na banja yacimwemwe. Tetyo, kuseŵenzesha mfundo za m’Baibo kungatiyavye kupanga zosankha moyenelela. Lomba, tiyeni tilaŵizhyane ziyakine mwa mfundo zamene izi.

Coyamba, tufunika kumvwisha mfundo yakuti: “Mtima ni wonyenga kupambana cinthu ciyakine ciliconse, ndipo ungakwanishe kucita ciliconse ciipa.” (Yer. 17:9) Ngati ŵanthu amene ali lini pa cisumbali okonda kutandala pa intaneti, angayambe kukopana ndipo izi zingacitishe kuti asapange cosankha mwanzelu. Kuyangizhyila apo, ngati munthu ofuna kulungula olo kulunguliwa, tyala cifukwa cofuna kukhutilisha cilakolako cake, zingamucitishe kuti asapange cosankha mwanzelu. Ndipo izi zingamuletele mavuto. (Miy. 28:26) Niye cifukwa cake tufunika kupewa kupanga malonjezo olo kuoneshana cikondi na munthu wamene tikaliyomuziŵa bwino.

Lemba ya Miyambo 22:3 yulaŵila kuti: “Wocenjela ni ula wakuti akaona soka ofisama, koma ŵanthu osaziŵa zinthu ongopitilila ndipo olangiwa.” Kansi kuseŵenzesha mawebusaiti oyavya ŵanthu kupeza visumbali kungankhale na vuto yanji? N’zomvwisha cisoni kuti ŵanthu ayakine eyamba cisumbali na ŵanthu amene enzoŵaziŵa lini bwino pa intaneti. Pavuli pake ezindikila kuti eŵapusisha ndipo zinthu zonse zeenzoŵauzhya ni zawenye. Kuyangizhyila apo, pa intaneti popezeka ŵanthu acinyengo amene ofisa umunthu wao kuti aiŵile ŵanthu ndalama. Nthawi ziyakine ŵanthu amene ocita zinthu izi, olaŵila kuti ni Mboni za Yehova koma m’cenecene ni Mboni lini.

Ndipo mawebusaiti ayakine oseŵenzesha mapulogilamu ya pa kompyuta yamene okamba kuti yoyavya ŵanthu kupeza munthu wolungulana naye. Koma paliye umboni woonesha kuti mapulogilamu aŵa oyavya ŵanthu kupeza munthu woyenelela. Kansi muona kuti cingankhale cinthu canzelu kudalila mapulogilamu a pa kompyuta popanga cosankha cofunika ngako monga kupeza munthu wolungulana naye? Yai. Cingankhale lini canzelu kudalila mapulogilamu aya, m’malo modalila mfundo za m’Baibo.​—Miy. 1:7; 3:5-7.

Miyambo 14:15 yulaŵila kuti: “Munthu wosaziŵa  zinthu okhulupilila mau alionse, koma wocenjela oganizila mwakuyendela.” Tetyo, mukaliyoganiza kuti mumange banja na munthu muyakine, mufunika kumuziŵa bwino. Koma mungakwanishe lini kumuziŵa bwino ngati muonana tyala pa intaneti. Tyani ngati mutumilana mapikica olo kulembelana mameseji? Kansi izi zingakuyavyeni kuti muziŵane luweme? Yai. Ayakine amene enzoona kuti apeza cikondi cenecene pa intaneti, edabwa ngako pecikumana na munthu weenzotandala naye.

Wamasalimo elaŵila kuti: “Nunkhala lini pansi na ŵanthu acinyengo, ndipo nukatizhyana lini na ŵanthu ofisa umunthu wao.” (Sal. 26:4) Ŵanthu anyinji otala wenye pa intaneti pofuna kuoneka monga ni ŵanthu abwino. Ndipo ayakine ali na minkhalidwe iipa. Koma mungakwanishe lini kuiziŵa ngati mutumilana tyala mameseji. Tetyo, mukaliyoyamba kutandala na munthu wamene okamba kuti ni Mboni ya Yehova pa intaneti, mungacite bwino kuzikonsha kuti: Kansi munthu uyu ni wobatizika? Kansi okonda zinthu zauzimu? Kansi ŵanthu a mumpingo mwao omuona kuti ni cisanzo ciweme olo ali na minkhalidwe iipa cakuti ayakine omupewa? (1 Akor. 15:33; 2 Tim. 2:20, 21) Kansi ni womasuka mwa Malemba kuti angalungule olo kulunguliwa? Mufunika kuziŵa mayankho a makonsho aŵa. Koma kuti mukwanishe, mufunika kukonshako ŵanthu a mumpingo mwao amene omuziŵa bwino. (Miy. 15:22) Kucita izi kungakuyavyeni kuti mupewe “kumangiwa m’joko” na munthu wosakhulupilila.​—2 Akor. 6:14; 1 Akor. 7:39.

Kulingana na mfundo zatalaŵizhyana, n’zoonekelatu kuti n’cinthu lini canzelu kuseŵenzesha mawebusaiti posakila munthu wolungulana naye. Lomba kansi ni kuni kwamungapeze munthu woyenelela kuti mumange naye banja? Pa nthawi yakuti kusonkhana pamozi ni kololeka, mungankhale na mwai woziŵana na akwasu na azilongosi a cisanzo cabwino amene ni mbeta pa misonkhano ya mpingo, ya dela, ya cigao na misonkhano iyakine.

Pa nthawi yakuti tukwanisha lini kusonkhana pamozi cifukwa ca mavuto ayakine monga mlili wa COVID-19, tuseŵenzesha vipangizo valomba pocita misonkhano ya mpingo. Tetyo, mungaseŵenzeshe mipata yamene iyi kuti muziŵane bwino na mkwasu olo kalongosi wamufuna kumanga naye banja. Mungankhale na mwai woona mwakulaŵilila nkhani nomvwishila ku ndemanga zakupeleka pa misonkhano. (1 Tim. 6:11, 12) Ndipo misonkhano ikasila, mungankhale soti na mwai wolaŵizhyana na munthu wamene uyo poseŵenzesha mbali yoitiwa kuti Breakout Room. Kuyangizhyila apo, mungapange makonzedwe yakuti munkhale na mayanjano na akwasu na azilongosi kupitila pa vipangizo valomba. Pa mayanjano aŵa mungaiteko soti munthu wamufuna kuziŵa bwino. Izi zingakuyavyeni kuti muziŵe mwakucitila zinthu na ŵanthu ayakine. (1 Pet. 3:4) Ndipo kucita izi kungakuyavyeni kuti muziŵe ngati muli na zolinga zolingana noona ngati ni woyenelela kumanga naye banja.

Ngati Akhristu amene ni mbeta oseŵenzesha mfundo za m’Baibo pofuna kupeza munthu wolungulana naye, angapeze munthu woyenelela ndipo angankhale na banja yacimwemwe. Kuyangizhyila apo, angaone kukwanilishiwa kwa mau opezeka m’buku ya Miyambo akuti: “Munthu wamene wapeza mkazi [olo mulume] wabwino, niye kuti wapeza cinthu cabwino ndipo Yehova okondwela naye.”​—Miy. 18:22.