1-2. Kansi Mkhristu angankhale tyani monga ni ng’anda itali ya nsanjika? (1 Akorinto 15:58)

 MU 1978, NG’ANDA ya nsanjika itali ngako yemangiwa ku Tokyo, Japan. Ŵanthu enze na nkhaŵa kuti ng’anda iyi ikakwanishe tyani kupitilizhya kunkhalapo cifukwa mumzinda uyu mwenzocitika ngako vivomezi. Kansi ŵanthu amene emanga ng’anda iyi ecita tyani kuti isapone? Eimanga m’njila yakuti inkhale yotang’a ngako. Tetyo Akhristu onse ali monga ni ng’anda iyi. Motyani?

² Mkhristu ofunika kunkhala na maganizo oyenelela pa nkhani yonkhala wotang’a koma soti kunkhala wokonzeka kucinja. Ofunika kunkhala wotang’a pa nkhani yomvwila malamulo a Yehova. (Ŵelengani 1 Akorinto 15:58.) Ndipo ofunika kunkhala “wokonzeka kumvwila” nthawi zonse. Olo n’tetyo, ofunika soti kunkhala “wololela” koma soti wokonzeka kucinja ngati ni pofunika kucita tetyo. (Yak. 3:17) Mkhristu wamene ali na maganizo oyenelela, opewa kukosesha vinthu olo kulolela cinthu ciliconse. Mu nkhani ino, tilaŵizhyane mwatingankhalile osanyezhyeka. Tilaŵizhyane soti njila 5 zakuseŵenzesha Satana pofuna kutikangisha kupitilizhya kunkhala otang’a na mwatingagonjesele zoyesayesa zake.

3. Kansi ni malamulo otyani yakupeleka Wotipasa Malamulo Mkulu yopezeka pa Machitidwe 15:28, 29?

³ Monga Wotipasa Malamulo Mkulu, nthawi zonse Yehova opeleka malamulo omvwika bwino. (Yes. 33:22) Mwacisanzo, bungwe yolamulila ya m’vyaka 100 voyambilila, yefotokoza zinthu zitatu pamene Akhristu enzofunika kunkhala otang’a: (1) mwa kupewa kulambila mafano, (2) kulemekeza milopa na (3) kupewa ciwelewele. (Ŵelengani Machitidwe 15:28, 29.) Kansi Akhristu masiku ŵano angankhale tyani otang’a pa mbali zitatu izi?

4. Kansi tulambila tyani Yehova yeka? (Chivumbulutso 4:11)

⁴ Tupewa kulambila mafano mwa kulambila Yehova tyala. Yehova elamula Aisiraeli kuti akolambila yove tyala. (Deut. 5:6-10) Peciyesewa na Maleŵania, Yesu elaŵila kuti tufunika tyala kulambila Yehova. (Mat. 4:8-10) Tetyo, tulambila lini mafano. Mwacisanzo, tulambila lini ŵanthu monga asogoleli acipembezo, azandale olo ŵanthu amene ni ochuka pa nkhani za maseŵela na zosangulusha. Tunkhala ku mbali ya Yehova nolambila wamene “elenga zinthu zonse.”​—Ŵelengani Chivumbulutso 4:11.

5. Ndaŵa yanji tumvwila lamulo ya Yehova yokhuza kulemekeza moyo na milopa?

⁵ Tumvwila lamulo ya Yehova yokhuza kulemekeza moyo na milopa. Ndaŵa yanji? N’cifukwa cakuti Yehova efotokoza kuti milopa yupanamila moyo ndipo ni mphaso yofumila kuli yove. (Lev. 17:14) Kwa nthawi yoyamba Yehova pecilola ŵanthu kulya nyama, eŵalamula soti kuti osati akokulya milopa. (Gen. 9:4) Yove ewelezhya lamulo iyi pecipasa Aisiraeli Cilamulo ca Mose. (Lev. 17:10) Ndipo esogolela bungwe yolamulila ya m’vyaka 100 voyambilila kuti ipeleke lamulo yakuti Akhristu onse ‘apitilizhye kupewa . . . milopa.’ (Mac. 15:28, 29) Tumvwila lamulo iyi motang’a mtima patupanga cosankha cokhuza cithandizo ca mankhwala catingalandile. b

6. Kansi tucitanji kuti tikwanishe kumvwila lamulo ya Yehova yokhuza kupewa ciwelewele?

⁶ Tumvwila lamulo ya Yehova yakuti tikopewa ciwelewele. (Aheb. 13:4) Mtumwi Paulo otilangiza kuti ‘tipaye’ viwalo va miŵili yasu. Izi zutanthauza kuti tufunika kucita zonse zatingakwanishe kuti tipewe vinthu vamene vingacitishe kuti tinkhale na vilakolako viipa. Kuti ticite izi, tupewa kulolesha olo kucita cinthu ciliconse camene cingacitishe kuti tinkhale na cilakolako cakuti ticite ciwelewele. (Akol. 3:5; Yobu 31:1) Tikayesewa, nthawi yamene iyo tupewa maganizo olo kucita vinthu vamene vingaononge ushamwali wasu na Mulungu.

7. Kansi tufunika kusimikizhya mtima kucita cinji, ndipo ndaŵa yanji?

⁷ Yehova oyembekezela kuti “tikomumvwila mofumila pansi pa mtima.” (Aro. 6:17) Malangizo yakutipasa yotipindulisha nthawi zonse ndipo tingacinje lini malamulo ŵake. (Yes. 48:17, 18; 1 Akor. 6:9, 10) Tucita zonse zatingakwanishe kuti timukondweleshe Yehova ndipo tuonesha mzimu wecionesha wamasalimo wamene elaŵila kuti: “Nasimikizhya mtima kukonkha malamulo ŵanu mpaka kale-kale kwa moyo wangu wonse.” (Sal. 119:112) Olo n’tetyo, Satana oyesayesa kutifookesha. Kansi ocita tyani izi?

8. Kansi Satana oseŵenzesha tyani cinzunzo pofuna kutifookesha?

⁸ Cinzunzo. Pofuna kutifookesha, Satana oseŵenzesha cinzunzo. Colinga cake ni  kufuna kuononga ushamwali wasu na Yehova. (1 Pet. 5:8) Akhristu a m’vyaka 100 voyambilila eyofyewa, kuniatiwa koma soti kupaiwa cifukwa conkhala osimikizhya mtima kunkhala otang’a. (Mac. 5:27, 28, 40; 7:54-60) Olo masiku ŵano, Satana opitilizhya kuseŵenzesha cinzunzo. Umboni wa izi uonekela bwino tikaona mwakunzunzikila akwasu na azilongosi ku Russia koma soti m’vyalo viyakine. Ndipo ŵanthu ayakine onzunza akwasu na azilongosi m’njila zosiyanasiyana.

9. Fotokozani cisanzo coonesha kufunika konkhala menso na mayeselo ovuta kuzindikila.

⁹ Mayeselo ovuta kuzindikila. Kuyangizhyila pa cinzunzo, Satana oseŵenzesha “zocita zacinyengo.” (Aef. 6:11) Mwacisanzo, ganizilani za mkwasu Bob wamene eikiwa m’cipatala na colinga cakuti acitiwe opaleshoni ikulu. Yove euzhya madokota kuti avomele lini kuikiwa milopa mosasamala kanthu mwazingankhalile zinthu. Madokota evomela kuti alemekeze cosankha cake. Koma pa usiku wakuti mailo acitiwe opaleshoni, dokota muyakine eluta kuyoona mkwasu Bob pavuli pakuti abanja ŵake aluta ku ng’anda. Yove euzhya mkwasu Bob kuti akamuike lini milopa koma akaike milopa pafupi kucitila ngati yangafunikile. Payakine dokota uyu eganiza kuti mkwasu Bob acinje maganizo cifukwa cakuti abanja ŵake enzepo lini. Koma mkwasu uyu epitilizhya kunkhala wotang’a nomuuzhya kuti angalandile lini milopa mulimonse mwazingankhalile zinthu.

10. Ndaŵa yanji kaganizidwe ka ŵanthu amene okonkha lini malamulo a Yehova ni msampha? (1 Akorinto 3:19, 20)

¹⁰ Kaganizidwe ka ŵanthu amene okonkha lini malamulo a Yehova. Ngati tingaone zinthu monga ni mwakuzionela ŵanthu amene okonkha lini malamulo a Yehova, tingayambe kunyalanyaza Yehova na malamulo ŵake. (Ŵelengani 1 Akorinto 3:19, 20.) “Nzelu za cino calo” zulimbikisha ŵanthu kusamvwila Mulungu. Akhristu atontho a mumpingo wa Pegamo na Tiyatira etolela minkhalidwe iipa ya ŵanthu a m’mizinda yamene iyi amene enzocita ciwelewele nolambila mafano. Yesu eŵapasa uphungu wamphamvu cifukwa colekelela nkhalidwe ya ciwelewele. (Chiv. 2:14, 20) Masiku ŵano, ŵanthu angatisonkhezele kuti tinkhale na kaonedwe kolakwika. Abanja na ayasu angatisonkhezele kuti tiphwanye malamulo a Yehova. Mwacisanzo, angalaŵile kuti kuphwanya malamulo a Yehova okhuza ciwelewele kuliye vuto na kuti malamulo a m’Baibo pa nkhani iyi ni yakale ngako.

11. Patunkhala otang’a, tufunika kupewa cinji?

¹¹ Nthawi ziyakine tingaganize kuti malangizo yakutipasa Yehova ni yosamvwika bwino. Tingayesewe kuti ticite zinthu ‘zopitilila pa zolembewa.’ (1 Akor. 4:6) Asogoleli acipembezo a m’nthawi ya Yesu enze na mlandu wocita cimo iyi. Ove eyangizhyila malamulo ŵao pa Cilamulo, zamene zecitisha kuti cinkhale covuta kwa ŵanthu kukonkha malamulo aŵa. (Mat. 23:4) Yehova otipasa malangizo omvwika bwino kupitila m’Mau ŵake na gulu yake. Tiliye cifukwa ciliconse coyangizhyilapo malamulo ŵasu. (Miy. 3:5-7) Tetyo, tufunika lini kupitilila zinthu zolembewa m’Baibo olo kupangila olambila ayasu malamulo pa zinthu zaumwini.

12. Kansi Satana oseŵenzesha tyani “wenye”?

¹² Wenye. Satana oseŵenzesha “wenye” na “mfundo zamene niye maziko a moyo m’calo ici” pofuna kusoŵesha ŵanthu noŵacitisha kuti ankhale ogaŵikana. (Akol. 2:8) M’vyaka 100 voyambilila, izi zenzoyangizhyilapo viphunziso va ŵanthu, viphunziso va Ayuda vamene venze vosazikiwa pa Malemba na ciphunziso cakuti Akhristu ofunika kukonkha  Cilamulo ca Mose. Vinthu ivi vesoŵesha ŵanthu cifukwa cakuti vecitisha ŵanthu kusaika maganizo ŵao pa Mwineco wa nzelu, wamene ni Yehova. Masiku ŵano, Satana oseŵenzesha intaneti pofuna kufalisa nkhani na malipoti awenye mosogolelewa na asogoleli azandale. Teona umboni wa izi pa nthawi ya mlili wa COVID-19. c Mboni za Yehova zamene zemvwila malangizo ofumila ku gulu yasu, ziliyonkhale na nkhaŵa zopitilila malile monga ni zeenze nazo ŵala amene emvwila nkhani zawenye.​—Mat. 24:45.

13. Ndaŵa yanji tufunika kunkhala osamala na zinthu zosokoneza?

¹³ Zinthu zosokoneza. Tufunika kuika maganizo ŵasu pa “zinthu zofunika ngako.” (Afil. 1:9, 10) Zinthu zosokoneza zingationongele mphamvu zasu na nthawi yasu ikulu. Zinthu zatukonda kucita monga kulya, kumwa, zinthu zosangulusha na nchito zingatisokoneze ngati tingayambe kuziona kuti niye zofunika ngako pa umoyo wasu. (Luka 21:34, 35) Kuyangizhyila apo, siku iliyonse tukumvwa noŵelenga nkhani zokhuza vioneselo na kusushana kwa azandale. Tufunika lini kulola zinthu izi kutisokoneza. Ngati tingaleke kusamala, tingayambe kucilikiza gulu iyakine m’maganizo na mumtima. Satana oseŵenzesha zinthu zonse izi zatakambilana pofuna kutifookesha notikangisha kucita zinthu zoyenela. Lomba, tiyeni tilaŵizhyane zatingacite kuti tipewe nogonjesa zoyesayesa zake.

14. Kansi n’cinthu cimozi cotyani cingatiyavye kupitilizhya kunkhala otang’a ku mbali ya Yehova?

¹⁴ Mukoganizila cifukwa cake mwezipeleka nobatizika. Mwetola masitepu aya cifukwa mwenzofuna kunkhala ku mbali ya Yehova. Mukoganizila zinthu zekusimikizhyilani kuti mwepeza cendi. Mwephunzila zokhuza Yehova ndipo mumulemekeza monga Ausuwanu akululu. Mwenkhala na cikhulupililo ndipo izi zekusonkhezelani kuti mulape. Mweleka kucita zinthu zakuzonda Yehova ndipo mweyamba kucita vinthu vomukond welesha.  Mwesangalala pemweziŵa kuti Yehova ekukhululukilani. (Sal. 32:1, 2) Mweyamba kupezeka pa misonkhano ndipo mweyamba kuuzhyako ayakine zemwephunzila. Monga Mkhristu wobatizika, lomba muyenda pa njila ya ku moyo ndipo nimwe osimikizhya kupitilizhya kuyenda pa njila iyi.​—Mat. 7:13, 14.

15. Ndaŵa yanji kuphunzila nosinkhasinkha n’kopindulisha?

¹⁵ Mukophunzila Mau a Mulungu nosinkhasinkha. Cimuti cunkhala cotang’a ngati mizhyu yake yukuya patali. Nase tingankhale otang’a ngati cikhulupililo casu ni cozikiwa pa Mau a Mulungu. Cimuti pacukula, mizhyu yake yulutilatu patali. Nase ngati tuphunzila nosinkhasinkha pa Mau a Mulungu, tutang’isha cikhulupililo casu nonkhala osimikizhya kuti malamulo a Mulungu ni abwino ngako. (Akol. 2:6, 7) Tufunika kuganizila mwamene malangizo, cisogozo na citetezo ca Yehova ceyavyila atumiki ŵake a m’nthawi zakuvuli. Mwacisanzo, Ezekieli emvwishila mosamala pamene mngelo enzopima kacisi m’mensomphenya. Mensomphenya aŵa etang’isha Ezekieli ndipo yotiphunzisa zatingacite kuti ticilikize malamulo a Yehova pa nkhani ya kulambila kutuŵa. d (Ezek. 40:1-4; 43:10-12) Nase tupindula ngati tupatula nthawi yophunzila nosinkhasinkha pa zinthu zozama zupezeka m’Mau a Mulungu.

16. Kansi kunkhala na mtima wotang’a kwemuteteza tyani mkwasu Bob? (Salimo 112:7)

¹⁶ Tang’ishani mtima wanu. Mfumu Davide elaŵila kuti akaleke lini kukonda Yehova peciimba kuti: “Mtima wangu wankhazikika, mweo Mulungu.” (Sal. 57:7) Nase tingatang’ishe mtima wasu mwa kukhulupilila Yehova na mtima wonse. (Ŵelengani Salimo 112:7.) Ganizilani mwamene izi zeyavyila mkwasu Bob watatomola koyambilila. Peciuzhyiwa kuti milopa inkhale pafupi kucitila ngati yangafunikile, nthawi yamene iyo elaŵila kuti ngati madokota angafune kuti amuike milopa, afumemo m’cipatala nthawi yamene iyo. Pavuli pake, mkwasu Bob elaŵila kuti,  “Nenzokaikila lini kuti ningafumemo m’cipatala ndipo nenzocita lini nkhaŵa na zinthu zinganicitikile.”

17. Kansi tingaphunzilepo cinji pa cokumana naco ca mkwasu Bob? (Onani soti cithunzithunzi.)

¹⁷ Mkwasu Bob enze wotang’a mtima cifukwa enze epanga cosankha ici nthawi itali kuvuli akaliyoluta ku cipatala. Coyamba, enzofunishisha kukondwelesha Yehova. Caciŵili, enzophunzila mosamala zayukamba Baibo koma soti zofalisa zasu pa nkhani ya kupatulika kwa moyo na milopa. Cacitatu, enze wosimikizhya kuti Yehova akamupase mphoto cifukwa comvwila malamulo ŵake. Nase tingankhale otang’a mosasamala kanthu za mavuto yatingakumane nayo.

18. Kansi cisanzo ca Baraki cutiphunzisanji pa nkhani yodalila Yehova? (Onani cithunzithunzi ca pacikuto.)

¹⁸ Kudalila Yehova. Ganizilani mwamene kudalila malangizo a Yehova kweyavyila Baraki. Pa nthawi iyi, Aisiraeli enze osakonzeka kuchaya nkhondo ndipo enzeve zida. Koma Yehova euzhya Baraki kuti akaniatane na Sisera na gulu yake ya nkhondo. (Ower. 5:8) Mneneli munakazi Debora euzhya Baraki kuti aseluke mu lupili noluta ku malo afulati kuti akaniatane na Sisera na magaleta yake ya nkhondo yokwanila 900. Olo kuti Baraki enzoziŵa kuti cingankhale covuta kwa Aisiraeli kuniatana na magaleta ya nkhondo pa malo afulati, ekonkha malangizo yecipasiwa. Masoja peenzoseluka mu lupili ya Tabori, Yehova ecitisha cimvula cikulu kulokwa. Izi zecitisha kuti magaleta ya nkhondo yajombe m’matika ndipo Yehova ecitisha Baraki kupambana pa nkhondo iyi. (Ower. 4:1-7, 10, 13-16) Molingana na izi, Yehova angacitishe kuti tipambane ngati tingamudalile nodalila malangizo yakupeleka kupitila m’gulu yake.​—Deut. 31:6.

19. Ndaŵa yanji tufunika kupitilizhya kunkhala ololela?

¹⁹ Tufunika kupitilizhya kucita khama kuti tipitilizhye kunkhala otang’a patili m’calo cino ciipa. (1 Tim. 6:11, 12; 2 Pet. 3:17) Tetyo, tisalole cinzunzo, mayeselo ovuta kuzindikila, kaganizidwe ka ŵanthu amene omvwila lini Yehova, wenye na vinthu vosokoneza kuti vitifookeshe. (Aef. 4:14) M’malo mwake, tiyeni tipitilizhye kunkhala otang’a, okonda Yehova nomvwila malamulo ŵake. Pa nthawi imozimozi tufunika soti kunkhala ololela. Mu nkhani yokonkhapo, tikaphunzile mwamene Yehova na Yesu ooneshela cisanzo cabwino pa nkhani yololela.