NKHANI YOPHUNZILA 23
Muli Lini Mweka, Yehova Ali Namwe
“Yehova ali pafupi na onse oita pa yove.”—SAL. 145:18.
NYIMBO 28 Tinkhale pa Ushamwali na Yehova
ZATI TIPHUNZILE *
1. N’cinji cucitisha Akhristu ayakine kuzimvwa kuti ali ŵeka?
ANYINJI a seo tukonda kumvwa kuti tili seka nthawi ziyakine. Kuli ayakine, maganizo oteti otola lini nthawi itali. Pamene ayakine zingatole nthawi itali. Nthawi ziyakine tingazimvwe kuti tili seka olo kuti tili pakati pa ŵanthu anyinji. Mwacisanzo, Akhristu ayakine ovutika kuti apeze ashamwali ngati akukila mumpingo walomba. Ayakine ekulila m’mabanja okatizhyana koma okumvwa kuti ali ŵeka ngati aluta kutali na banja yao. Ayakine oyewa wokondeka wao wamene emwalila. Akhristu ayakine makamaka ŵala amene ephunzila cendi calombapano, okumvwa kuti ali ŵeka ngati osushiwa olo kunzunziwa na ayao olo abanja ŵao amene ni osakhulupilila.
2. Kansi tilaŵizhyane makonsho otyani m’nkhani ino?
2 Yehova oziŵa mwatumvwila ndipo otimvwishisha. Tetyo, yove oziŵa ngati tukumvwa kuti tili seka, ndipo ni wofunishisha kutiyavya. Kansi Yehova otiyavya tyani? Kansi tingacitenji kuti tigonjese maganizo oteti? Ndipo tingayavye tyani akwasu na azilongosi amene ozimvwa kuti ali ŵeka? M’nkhani ino, tilaŵizhyane mayankho a makonsho aŵa.
YEHOVA OZIŴA MWATUMVWILA
Yehova etuma mngelo kuti akalimbikishe Eliya nomusimikizhyila kuti enze lini yeka (Onani ndime 3)
3. Kansi Yehova eonesha tyani kuti enzoziŵa mweenzomvwila Eliya?
3 Yehova ofuna kuti atumiki ŵake akonkhala osangalala. Yove ali pafupi na aliyense wa seo ndipo oziŵa ngati tuvutika maganizo. (Sal. 145: 18, 19) Ganizilani mwamene Yehova eyavyila mneneli Eliya. Mneneli uyu enkhalako pa nthawi yovuta m’mbili ya Aisiraeli. Asogoleli enzonzunza atumiki a Mulungu ndipo enzofunishisha kupaya Eliya. (1 Maf. 19:1, 2) Kuyangizhyila apo, mneneli Eliya enzoona kuti enze tyala yeka wamene enzotumikila Yehova pa nthawi yamene iyo. Ndipo cuoneka kuti maganizo aŵa emufookesha. (1 Maf. 19:10) Mulungu ecitapo kanthu kamangu kuti amuyavye ndipo etuma mngelo kuti akamusimikizhyile kuti enze lini yeka. Mngelo euzhya Eliya kuti penze soti Aisiraeli anyinji amene enzotumikila Yehova mokhulupilika.—1 Maf. 19:5, 18.
4. Molingana na Maliko 10:29, 30, kansi Yehova oŵayavya tyani Akhristu amene okaniwa na ayao na abanja ŵao?
4 Yehova oziŵa kuti tezitana zinthu ziyakine kuti tiyambe kum’tumikila. Mwacisanzo, payakine ayasu olo abanja ŵasu eleka kutiyavya cifukwa conkhala Mboni. Nthawi zinyinji, izi zuticitisha nkhaŵa. Ndipo payakine niye zecitisha mtumwi Petulo kukonsha Yesu kuti: “Tasiya zinthu zonse nokukonkhani, kansi tikapeze cinji?” (Mat. 19:27) Yesu esimikizhyila ophunzila ŵake kuti Akhristu ayao akankhale monga ni banja yao. (Ŵelengani Maliko 10:29, 30.) Ndipo Yehova olonjeza kuti acilikize ŵala onse amene osankha kumutumikila. (Sal. 9:10) Kansi mungacitenji kuti Yehova akuyavyeni kulimbana na maganizo oziona kuti muli mweka?
ZAMUNGACITE NGATI MUZIMVWA KUTI MULI MWEKA
5. Ndaŵa yanji tufunika kuganizila mwamene Yehova otiyavyila?
5 Mukoganizila mwamene Yehova okuyavyilani. (Sal. 55:22) Izi zikuyavyeni kuona kuti muli lini mweka. Ganizilani zecilaŵila kalongosi Carol * wamene ni mbeta ndipo abanja ŵake ni Mboni lini. Yove elaŵila kuti: “Kuganizila mwamene Yehova oniyavyila nikakumana na mavuto, kuniyavya kuona kuti nili lini neka. Ndipo kuniyavya kunkhala na cidalilo cakuti Yehova akaniyavye soti msogolo.”
6. Kansi 1 Petulo 5:9, 10 ingalimbikishe tyani ŵala amene ozimvwa kuti ali ŵeka?
6 Mukoganizila mwamene Yehova oyavyila Akhristu ayakine amene ozimvwa kuti ali ŵeka. (Ŵelengani 1 Petulo 5:9, 10.) Mkwasu Hiroshi wamene watumikila Yehova kwa vyaka vinyinji, koma abanja ŵake ni Mboni lini elaŵila kuti: “Mumpingo, Mkhristu aliyense okumana na mavuto. Kuziŵa kuti aliyense ocita zaangakwanishe potumikila Yehova kungalimbikishe ŵala amene abanja ŵao ni Mboni lini.”
7. Kansi pemphelo yukuyavyani tyani?
7 Mukopemphela, kuŵelenga Baibo nopezeka pa misonkhano nthawi zonse. Mukomuuzhya Yehova mwamumvwila. (1 Pet. 5:7) Kalongosi Massiel peciyamba kutumikila Yehova, enzozimvwa kuti ali yeka cifukwa abanja ŵake enze lini Mboni. Yove elaŵila kuti: “Cimozi mwa zinthu zeniyavya ni kupemphela kwa Yehova nthawi zonse. Nenzomuona monga ni atata. Tetyo, nenzopemphela kwa yove kanyinji pa siku nomuuzhya mwenenzomvwila.”
Kumvwishila ku Baibo na zofalisa zolekodewa, kungayavye ŵala amene ozimvwa kuti ali ŵeka kuzimvwa kuti Yehova ali nao pafupi (Onani ndime 8) *
8. Kansi kuŵelenga Baibo nosinkhasinkha kukuyavyani tyani?
8 Mukoŵelenga Baibo nthawi zonse nosinkhasinkha pa nkhani zuonesha kuti Yehova okukondani. Kalongosi Bianca wamene epilila pamene abanja ŵake enzomuuzhya mau ofookesha, elaŵila kuti: “Kuŵelenga Baibo nosinkhasinkha pa nkhani za atumiki a Yehova amene ekumana na mavuto monga ni yanukumana nayo, kuniyavya kuti nipilile.” Akhristu ayakine eloŵeza pa mtima Malemba yamene yoŵalimbikisha monga Salimo 27:10 na Yesaya 41:10. Ayakine omvwishila ku zofalisa zolekodewa pokonzekela misonkhano olo poŵelenga Baibo. Ndipo okamba kuti kucita izi kuŵayavya kuzimvwa kuti ali lini ŵeka.
9. Kansi kupezeka pa misonkhano kungakuyavyeni tyani?
9 Mukoyesayesa kupezeka pa misonkhano nthawi zonse. Kucita izi kungakulimbikisheni ngako ndipo kungakuyavyeni kuziŵana na akwasu na azilongosi. (Aheb. 10:24, 25) Kalongosi Massiel watatomola lombapano, elaŵila kuti: “Olo kuti nenze wansoni, nezipangila colinga cakuti nikopezeka pa misonkhano nthawi zonse noyankhapo. Izi zeniyavya kuzimvwa kuti nili mbali ya mpingo.”
10. Ndaŵa yanji tufunika kunkhala pa ushamwali na akwasu na azilongosi mumpingo?
10 Nkhalani pa ushamwali na Akhristu okhulupilika. Mukopeza ashamwali mumpingo amene angakuphunzisenkoni zinthu ziyakine olo kuti mungasiyane vyaka na cinkhalidwe. Baibo yukamba kuti ‘ŵanthu okalamba onkhala na nzelu.’ (Yobu 12:12) Koma nao acikulile angaphunzile soti zinyinji kuli acilumbwana. Davide enze mtontho pali Yonatani. Koma izi ziliyoŵakangishe kunkhala pa ushamwali wotang’a. (1 Sam. 18:1) Davide na Yonatani enzoyavyana kutumikila Yehova olo kuti enzokumana na mavuto osiyanasiyana. (1 Sam. 23:16-18) Kalongosi Irina wamene abanja ŵake ni Mboni lini, elaŵila kuti: “Akwasu na azilongosi ni banja yasu yauzimu ndipo Yehova angaŵaseŵenzeshe potipasa zatufunikila.”
11. Kansi tufunika kucita cinji kuti tinkhale pa ushamwali na ŵanthu ayakine?
11 Cingankhale covuta kupanga ashamwali ngati tili na nsoni. Ganizilani za Ratna wamene ni wansoni ndipo ephunzila cendi olo kuti enzosushiwa na abanja ŵake. Yove elaŵila kuti: “Nenzofunika kuyavyiwa na akwasu na azilongosi mumpingo.” Nthawi ziyakine, cingankhale covuta kuuzhyako ayakine mwatumvwila. Koma kucita izi kungatiyavye kuti tinkhale nao pa ushamwali. Ashamwali ŵanu angakulimbikisheni nokuyavyani ngati mwaŵafotokozela vuto yanu.
12. Kansi ulaliki ungatiyavye tyani kupanga ashamwali?
12 Njila imozi yamungapangilemo ashamwali ni mwa kuluta nao mu utumiki. Kalongosi Carol ŵatatomola lombapano, elaŵila kuti: “Kuluta na azilongosi ayakine mu utumiki noseŵenzela nao pamozi nchito ziyakine za mpingo kwaniyavya ngako. Kwaniyavya kupanga ashamwali aweme. Yehova waniyavya kupitila mwa ashamwali aŵa.” Kunkhala pa ushamwali na Akhristu okhulupilika kuli na zofumapo zabwino. Yehova angaseŵenzeshe ashamwali aŵa potiyavya kugonjesa maganizo oziona kuti tili seka.—Miy. 17:17.
YAVYANI AYAKINE KUTI AKOKUMVWA KUTI ALI MBALI YA MPINGO
13. Kansi tonse tili na udindo wanji mumpingo?
13 Tonse tili na udindo wocitisha kuti mumpingo munkhale mtendele. Tufunika soti kuonesha cikondi kuli ayakine kuti osati akolimvwa kuti ali ŵeka. (Yoh. 13:35) Ndipo tingalimbikishe ayakine mwa mau na zocita zasu. Kalongosi muyakine elaŵila kuti: “Penephunzila cendi, mpingo wenkhala monga ni banja yangu. Sembe niliyonkhale Mboni ya Yehova kuti aliyoniyavye.” Kansi mungacitenji kuti muyavye ŵala amene abanja ŵao ni Mboni lini, kuzimvwa kuti ali mbali ya mpingo?
14. Kansi tingacitenji kuti tinkhale pa ushamwali na ŵala amene abanja ŵao ni Mboni lini?
14 Apangeni kunkhala ashamwali ŵanu. Mungacite izi mwa kuŵalandila mwaubwenzi akawela pa misonkhano. (Aro. 15:7) Koma tufunika kucita zinyinji kuyangizhyila pa kuŵalandila mwaubwenzi. Tufunika kuyesayesa kunkhala pa ushamwali wotang’a na ŵanthu amene abanja ŵao ni Mboni lini. Tingacite izi ngati tuŵaonesha cikondi na cifundo. Tufunika kupewa kuŵakonsha makonsho ocitisha nsoni. M’malomwake, tufunika kumvwishisha mavuto yakupitamo. Ayakine angacite nsoni kutiuzhya mavuto yakupitamo. Tetyo, tufunika lini kuŵakakamizhya kuti atiuzhye mavuto ŵao. M’malomwake, tufunika kuŵakonsha makonsho yangacitishe kuti amasuke. Tufunika soti kumvwishila mosamala pakufotokoza. Mwacisanzo, mungaŵakonshe mweciphunzilila cendi.
15. Kansi Akhristu ofwikapo mwauzimu na akulu angayavye tyani ayakine mumpingo?
15 Tonse mumpingo tutang’ishiwa ngati Akhristu ofwikapo mwauzimu koma soti akulu oonesha kuti otikonda. Kalongosi Melissa wamene ephunzisiwa cendi na amai ŵake, elaŵila kuti: “Nuyamikila ngako thandizo yecinipasa akwasu mumpingo. Akwasu aŵa enze monga ni atata ndipo enzopeza nthawi yotandala nane nonionesha cidwi. Enzomvwishila nthawi zonse nikankhala na vuto.” Mkwasu Mauricio ecimvwa kuti ali yeka pamene mkwasu enzomuphunzisa Baibo esiya cendi. Yove elaŵila kuti: “Cikondi na cisamalilo cecinionesha akulu zenilimbikisha ngako. Enzopeza nthawi yolaŵila nane, kunitola pakuya mu utumiki noniuzhyako mfundo zolimbikisha za m’Baibo. Ndipo nthawi ziyakine enzonitola pakuyochaya bola.” Lomba, kalongosi Melissa na mkwasu Mauricio ocita utumiki wanthawi zonse.
Kansi muziŵako aliyense mumpingo mwanu wamene ozimvwa kuti ali yeka ndipo mungamuitile ku maceza? (Onani ndime 16-19) *
16-17. Kansi ni m’njila ziyakine zotyani zatingayavyilemo ayakine amene ozimvwa kuti ali ŵeka?
16 Mukoŵayavya ngati ofunikila thandizo. (Agal. 6:10) Mkwasu Leo wamene otumikila monga m’mishonale ku calo ciyakine, elaŵila kuti: “Nthawi ziyakine tingafunike kucitila akwasu na azilongosi zinthu zitontho zoonesha kuwama mtima. Nukumbuka nthawi iyakine penepezeka mu ngozi ya motoka. Penefwika pa ng’anda, nevutika ngako maganizo. Koma banja iyakine yeniitila ku cakulya. Nukumbukila lini cakulya cetecilya koma canukumbuka n’cakuti enimvwishila mosamala. Izi zenilimbikisha ngako.”
17 Tonse tusangalala na misonkhano ikulu-ikulu monga msonkhano wa dela na msonkhano wa cigao. Pa misonkhano iyi tunkhala na nthawi yotandala na akwasu na azilongosi koma soti kulaŵizhyana mfundo zataphunzila. Koma kalongosi Carol watatomola koyambilila elaŵila kuti: “Pa misonkhano ya dela na ya cigao nukumvwa kuti nili neka-neka.” Ndaŵa yanji elaŵila teti? Yove epitilizhya kuti: “Olo kuti pa misonkhano iyi ponkhala ŵanthu anyinji, onse onkhala pamozi na mabanja ŵao. Koma neo nunkhala neka cifukwa abanja ŵangu ni Mboni lini. Izi zunicitisha kumvwa kuti nili neka.” Ayakine ovutika kupezeka pa misonkhano ikulu-ikulu pavuli pa imfwa ya muyao wa m’cikwati. Kansi muziŵako Mkhristu aliyense wamene okumana na mavuto oteti? Mungacite bwino kumusenga kuti mukankhale naye pamozi na banja yanu pa msonkhano.
18. Kansi 2 Akorinto 6:11-13 yutilimbikisha tyani kuonesha wanzi?
18 Mukotandala nao. Mukoonesha wanzi mwa kuitilako akwasu na azilongosi ku maceza, makamaka ŵala amene ozimvwa kuti ali ŵeka. (Ŵelengani 2 Akorinto 6:11-13.) Kalongosi Melissa watatomola lombapano, elaŵila kuti: “Tenzosangalala ngako ngati mabanja ayakine atiitila kuyotandala ku mang’anda ŵao. Ndipo nthawi ziyakine enzotitola kuyoona malo ayakine.” Kansi muziŵako aliyense mumpingo mwanu wamungaitile ku maceza?
19. Ni pa nthawi yotyani pamene akwasu na azilongosi angayamikile ngati tingapeze nthawi yotandala nao?
19 Pali nthawi ziyakine pamene Akhristu ayasu angayamikile ngako ngati tingapeze nthawi yotandala nao. Mwacisanzo, ayakine angazimvwe kuti ali ŵeka pa nthawi yamene abanja ŵao ocita vikondwelelo vosakatizhyana na Malemba. Ndipo ayakine angankhale na cisoni pa siku yecimwalila muyao wa mu ukwati. Ngati tupatula nthawi yotandala na akwasu na azilongosi amene okumana na mavuto oteti, tuonesha kuti “tuŵakonda.”—Afil. 2:20.
20. Kansi mau a Yesu opezeka pa Mateyu 12:48-50 angatiyavye tyani ngati tuzimvwa kuti tili seka?
20 Ni vinthu vinyinji vamene vingapangishe Akhristu kuzimvwa kuti ali ŵeka. Olo n’tetyo, tikokumbukila kuti Yehova oziŵa mwatumvwila. Ndipo oseŵenzesha akwasu na azilongosi potipasa zatufunikila. (Ŵelengani Mateyu 12:48-50.) Ndipo nase tuonesha kuti tuyamikila pa zakuticitila ngati tuyavya akwasu na azilongosi amene ozimvwa kuti ali ŵeka. Olo kuti nthawi ziyakine tingazimvwe kuti tili seka, tikokumbukila kuti Yehova ali nase nthawi zonse.
NYIMBO 46 Tukuyamikilani Yehova
^ par. 5 Kansi nthawi ziyakine mukumvwa kuti muli mweka-mweka? Ngati n’tetyo, ziŵani kuti Yehova oziŵa mwamumvwila ndipo ni wokonzeka kukuyavyani. M’nkhani ino, tikambilane zatingacite kuti tigonjese maganizo oziona kuti tili seka. Tiphunzile soti mwatingayavyile akwasu na azilongosi amene ozimvwa kuti ali ŵeka.
^ par. 5 Mazina ayakine acinjiwa.
