1. Kansi tufunika kucita cinji kuti tikapulumuke pa siku ya Yehova?

 BAIBO ikakamba za “siku ya Yehova,” yutanthauza nthawi pamene Yehova akaweluze adani ŵake nopulumusa ŵanthu ŵake. M’nthawi zakuvuli, Yehova epeleka cilango pa mitundu iyakine. (Yes. 13:1, 6; Ezek. 13:5; Zef. 1:8) M’nthawi zasu zino, “siku ya Yehova” ikayambe pamene magulu a zandale akaukile Babulo Mkulu ndipo ikasile pa Nkhondo ya Aramagedo. Kuti tikapulumuke pa “siku” iyi, tufunika kukonzekelelatu lomba teti. Yesu aliyokambe tyala kuti tufunika kuyembekezela “cisauso cikulu,” koma ekamba soti kuti tufunika ‘kunkhala okonzeka.’—Mat. 24:21; Luka 12:40.

2. Kansi lemba ya 1 Atesalonika ingatipindulishe tyani?

² M’kalata yake youzhyiliwa yoyamba yecilembela Atesalonika, mtumwi Paulo eseŵenzesha visanzo vosiyanasiyana pofuna kuyavya Akhristu kuti akonzekele siku ikulu ya Yehova ya ciweluzo. Paulo enzoziŵa kuti siku ya Yehova yenzokuza lini pa nthawi yamene iyo. (2 Ates. 2:1-3) Olo n’tetyo, yove elimbikisha akwake kuyembekezela monga kuti siku iyi yenzokuza mailo. Nase tingaseŵenzeshe malangizo aŵa. Lomba, tiyeni tilaŵizhyane zecikamba zokhuza: (1) mwati ikawelele siku ya Yehova, (2) ati akaleke kupulumuka pa siku iyi na (3) mwatingakonzekelele kuti tikapulumuke.

3. Kansi siku ya Yehova ikawele tyani monga ni kawalala usiku? (Onani soti cithunzithunzi.)

³ “Monga ni kawalala usiku.” (1 Ates. 5:2) Ici n’cisanzo coyamba pa visanzo vitatu vufotokoza kuwela kwa siku ya Yehova. Kanyinji-kanyinji, akawalala okonda kucita zinthu kamangu ndipo owela usiku ŵanthu pasayembekezela. Nayo siku ya Yehova ikawele mozizimusha, ndipo ŵanthu anyinji akadabwe. Olo Akhristu acendi payakine akadabwe na mwati zikacitikile kamangu  zinthu. Koma mosiyana na ŵanthu aipa, seo tikaonongewe lini.

4. Kansi siku ya Yehova ikankhale tyani monga ni voŵaŵa va povyala?

⁴ “Monga ni voŵaŵa va povyala va munakazi wa vumo.” (1 Ates. 5:3) Munakazi wa vumo, oziŵa lini siku yeneyene pati akavyale. Koma okaikila lini kuti siku iyi ikafwike. Nthawi iyi ikafwika, voŵaŵa vuyamba mwazizizi ndipo paliye angavipanamike. Molingana na izi, nase tuziŵa lini siku na nthawi pati ikayambe siku ya Yehova. Olo n’tetyo, tukaikila lini kuti siku iyi ikuza na kuti ciweluzo ca Mulungu pa ŵanthu aipa, cikacitike mwazizizi ndipo paliye wati akathaŵe.

5. Kansi cisauso cikulu cikankhale monga ni matandakuca m’njila yotyani?

⁵ Monga matandakuca. Cisanzo cacitatu ceciseŵenzesha Paulo cukamba soti za akawalala amene oiŵa usiku. Koma pa nthawi iyi, cuoneka kuti Paulo olinganizhya siku ya Yehova na matandakuca. (1 Ates. 5:4) Akawalala amene oiŵa usiku okonda kutangwanika cakuti payakine oona lini kuti nthawi yaluta. Tetyo, kuwala kwa m’mawa kungaŵafwikile mozizimusha ndipo angaonekele ku ŵanthu. Molingana na izi, cisauso cikulu cikaoneshe ŵanthu amene molingana na akawalala, opitilizhya kunkhala mu mfinzi mwa kupitilizhya kucita vinthu vosakondwelesha Mulungu. Mosiyana na ove, seo tingankhale okonzeka mwa kupewa kucita vinthu vosakondwelesha Yehova nopitilizhya kucita “ciliconse ciweme, colungama na cacendi.” (Aef. 5:8-12) Kuyangizhyila apo, Paulo oseŵenzesha visanzo viŵili pofotokoza za ŵanthu ati akaleke kupulumuka.

6. Kansi ŵanthu anyinji olala m’njila yotyani? (1 Atesalonika 5:6, 7)

⁶ “Ŵala amene olala.” (Ŵelengani 1 Atesalonika 5:6, 7.) Paulo elinganizhya ŵanthu ati  akaleke kupulumuka pa siku ya Yehova na ŵanthu amene ali m’tulo. Ove oziŵa lini vucitika pakati pao olo kuziŵa ngati nthawi yaluta. Tetyo, angaziŵe lini zinthu zofunika ngako zamene zucitika olo kucitapo kanthu. Ŵanthu anyinji masiku ŵano ali lele mwauzimu. (Aro. 11:8) Ove okhulupilila lini kuti tunkhala “m’masiku osilizhya” na kuti cisauso cikulu casala patontho kuti ciyambe. Zocitika za m’calo nthawi ziyakine zucitisha ŵanthu ayakine kuyamba kucita cidwi na uthenga wa Ufumu. Koma anyinji opitilizhya kulala m’malo monkhala tuni. Olo ŵala amene okhulupilila za siku ya ciweluzo, oganiza kuti siku iyi ikali kutali ngako. (2 Pet. 3:3, 4) Olo n’tetyo, seo tuziŵa kuti malangizo ouzhyiliwa akuti tinkhale menso ni ofunika ngako siku iliyonse.

7. Kansi ŵanthu ati akaonongewe na Mulungu olingana tyani na acakolwa?

⁷ “Acakolwa.” Mtumwi Paulo elinganizhya ŵanthu ati akaonongewe na Mulungu na acakolwa. Ŵanthu akakolwa, ocelwa kucitapo kanthu pa vinthu vucitika pakati pao, ndipo opanga lini zosankha zanzelu. Molingana na izi, ŵanthu amene ocita vinthu viipa ocitapo lini kanthu pa macenjezo a Mulungu. Ove osankha njila yamene yuŵapeleka kucionongeko. Koma Akhristu ouzhyiwa kunkhala menso nonkhala oganiza bwino. (1 Ates. 5:6) Kaswili muyakine wa Baibo efotokoza kuti munthu woganiza bwino, “onkhala wodekha, ocita lini zinthu mopupuluma ndipo okwanisha kupanga zosankha zanzelu.” Ndaŵa yanji tufunika kunkhala odekha koma soti otang’a? Kuti tisaloŵelele mu zandale na m’nkhani za m’calo. Siku ya Yehova payuvwendela pafupi, ŵanthu apitilizhye kutikakamizhya kuti tikotolako mbali mu nkhani izi. Olo n’tetyo, tufunika lini kucita nkhaŵa ponena zatingayankhe. Mzimu wa Mulungu ungatiyavye kunkhala odekha, otang’a nopanga zosankha zanzelu.—Luka 12:11, 12.

8. Kansi 1 Atesalonika 5:8 yufotokoza minkhalidwe yotyani yamene ingatiyavye kunkhala menso nopitilizhya kunkhala oganiza bwino? (Onani soti cithunzithunzi.)

⁸ “Tivwale cozitetezela pa cifuŵa . . . na . . . cisote.” Paulo otilinganizhya na masoja amene onkhala menso novwala vovwala vokonzekela kuchaya nkhondo. (Ŵelengani 1 Atesalonika 5:8.) Ŵanthu oyembekezela msoja kunkhala wokonzeka kuchaya nkhondo nthawi iliyonse. N’cimozimozi na seo. Tupitilizhya kunkhala okonzekela siku ya Yehova mwa kuvwala cozitetezela pa cifuŵa ca cikhulupililo, cikondi na cisote ca ciyembekezo. Minkhalidwe iyi ingatiyavye ngako.

9. Kansi cikhulupililo casu cutiteteza tyani?

⁹ Cozitetezela pa cifuŵa cenzoteteza mtima wa msoja. Cikhulupililo na cikondi zuteteza mtima wasu wophiphilisila. Minkhalidwe iyi yutiyavya kupitilizhya kutumikila Mulungu nokonkha Yesu. Cikhulupililo cutisimikizhyila kuti Yehova akatipase mphoto cifukwa tumusakilasakila na mtima wasu wonse. (Aheb. 11:6) Yutiyavya soti kupitilizhya kunkhala okhulupilika kuli Msogoleli wasu Yesu olo kuti tukumana na mavuto. Tingatang’ishe cikhulupililo casu mwa kuona visanzo va atumiki a Yehova a masiku ŵano amene opitilizhya kunkhala okhulupilika olo kuti onzunziwa nokumana na mavuto a zacuma. Ndipo tingapewe msampha wokondeshesha vinthu vamuŵili mwa kutolela cisanzo ca ŵanthu amene eyamba kunkhala na umoyo wosalila zinyinji na colinga cakuti aike Ufumu wa Mulungu pasogolo mu umoyo wao. b

10. Kansi kukonda Mulungu na ŵanthu kutiyavya tyani kupilila?

¹⁰ Naco cikondi ni cofunika ngako kuti tipitilizhye kunkhala menso koma soti oganiza bwino. (Mat. 22:37-39) Kukonda Mulungu kutiyavya  kupilila patulalikila mosasamala kanthu za mavuto yatingakumane nayo. (2 Tim. 1:7, 8) Cifukwa cakuti tukonda soti ŵanthu amene otumikila lini Yehova, tupitilizhya kulalikila m’magao ŵasu, kucita ulaliki wa pafoni na wa makalata. Tutaya lini ciyembekezo poziŵa kuti siku iyakine akacinje noyamba kucita vinthu voyenela.—Ezek. 18:27, 28.

11. Kansi kukonda okhulupilila ayasu kutiyavya tyani? (1 Atesalonika 5:11)

¹¹ Tukonda soti akwasu na azilongosi. Tuonesha cikondi ici mwa “kulimbikishana notonthozana.” (Ŵelengani 1 Atesalonika 5:11.) Molingana na masoja amene oseŵenzela pamozi pochaya nkhondo, nase tulimbikishana. N’cendi kuti nthawi ziyakine msoja angacite msoja muyake mwangozi paali pa nkhondo, koma angacitile lini lona. Molingana na izi, nase tingacitile lini lona kukhumudwisha Mkhristu muyasu olo kuwezhyela ciipa pa ciipa. (1 Ates. 5:13, 15) Tuonesha soti cikondi mwa kulemekeza akwasu amene osogolela mumpingo. (1 Ates. 5:12) Paulo peenzolemba kalata iyi, mpingo wa Atesalonika wenze ukaliyokwanisha caka kufumila pewenkhazikishiwa. Akwasu amene enzosogolela enzeve ciziŵiso ngako ndipo payakine enzolakwisa zinthu. Olo n’tetyo, enzofunika kuŵalemekeza. Cisauso cikulu pacuvwendela pafupi, tikafunike kudalila ngako akulu kuti atipase malangizo kupambana mwatucitila pali lomba. Payakine pa nthawi iyakine zingayokwanishika lini kulandila malangizo kufumila ku likulu yasu na ku ofesi ya msambo. Tetyo, n’cofunika ngako kukonda akulu noŵalemekeza pali lomba. Mulimonse mwazingankhalile zinthu, tiyeni tipitilizhye kunkhala oganiza bwino nopewa kuika maganizo pa vinthu vakulakwisa. M’malo mwake, tiyeni tikoika maganizo pa mfundo yakuti Yehova osogolela analume aŵa okhulupilika kupitila mwa Khristu.

12. Kansi ciyembekezo casu cuteteza tyani maganizo ŵasu?

¹² Monga ni mwamene cisote cenzotetezela mutu wa msoja, ciyembekezo ca cipulumuso cutiyavya kuteteza maganizo ŵasu. Ngati tili na ciyembekezo cotang’a tuzindikila kuti zilizonse zacingatipase calo ni zatyalatyala. (Afil.  3:8) Ciyembekezo casu cutiyavya kupitilizhya kunkhala odekha koma soti otang’a. Izi niye zecitikila mkwasu Wallace na kalongosi Laurinda amene otumikila ku Africa. M’mawiki atatu, aliyense etaikiliwa kolo mu imfwa. Cifukwa ca mlili wa COVID-19, ove aliyokwanishe kuwelela kwao kuti akankhale na mabanja ŵao. Mkwasu Wallace elemba kuti: “Ciyembekezo ca ciukililo cuniyavya kuti nikoŵaganizila, osati monga ni mweenzoonekela m’masiku akuti asala patontho kufwa m’calo cino, koma mwati akoonekela m’masiku oyambilila pavuli pakuti aukishiwa m’calo calomba. Ciyembekezo ici cunitonthoza nikayamba kuvutika na cisoni cifukwa ca imfwa yao.”

13. Kansi tingacitenji kuti tilandile mzimu utuŵa?

¹³ “Musazimye mulilo wa mzimu.” (1 Ates. 5:19) Paulo elinganizhya mzimu utuŵa na mulilo wamene ungankhale mkati mwasu. Ngati tili na mzimu wa Mulungu, tuyaka mwa kunkhala acangu koma soti ozipeleka pa kucita zabwino. Ndipo tunkhala ofunishisha kutumikila Yehova. (Aro. 12:11) Kansi tingacitenji kuti tilandile mzimu utuŵa? Tingacite izi mwa kusenga Yehova kupitila m’pemphelo, kuphunzila Mau ŵake ouzhyiliwa nokatizhyana na gulu yamene yusogolelewa na mzimu wake. Kucita izi kutiyavya kukulisha “minkhalidwe ya mzimu utuŵa.”—Aga. 5:22, 23.

14. Kansi tufunika kupewa cinji kuti tipitilizhye kulandila mzimu wa Mulungu? (Onani soti cithunzithunzi.)

¹⁴ Pavuli pakuti Mulungu watipasa mzimu wake utuŵa, tufunika kunkhala osamala kuti ‘tisazimye mulilo wa mzimu.’ Mulungu opeleka tyala mzimu wake kuli ŵala amene opitilizhya kunkhala na maganizo atuŵa nocita vinthu vabwino. Angapitilizhye lini kutipasa mzimu wake ngati tusunga maganizo olakwika nocita zinthu mokatizhyana na maganizo amene ao. (1 Ates. 4:7, 8) Kuti tipitilizhye kulandila mzimu utuŵa, tufunika soti kupewa ‘kunyoza mau aulosi.’ (1 Ates. 5:20) Pa vesi iyi “mau a ulosi” otanthauza mauthenga yakutipasa Yehova poseŵenzesha mzimu wake. Mauthenga aya yoyangizhyilapo yokhuza siku ya Yehova na kuzindikila nthawi yatilimo. Tufunika kupewa maganizo akuti siku ya Yehova olo Aramagedo ikawele lini m’nthawi zasu zino. M’malo mwake,  tufunika kuonesha kuti tuyembekezela kuti siku iyi iwele lombapano mwa kupitilizhya kunkhala na nkhalidwe ituŵa, nonkhala otangwanika pocita ‘nchito zoonesha kuti nise ozipeleka kwa Mulungu’ siku iliyonse.—2 Pet. 3:11, 12.

15. Kansi tingapewe tyani kupusishiwa na mauthenga awenye koma soti ofumila ku viŵanda? (1 Atesalonika 5:21)

¹⁵ Lombapano, adani a Mulungu akalengeze kuti: “Bata na mtendele!” (1 Ates. 5:3) Mauthenga awenye ouzhyiliwa na viŵanda akawande pacalo conse ndipo akasoŵeshe ŵanthu anyinji. (Chiv. 16:13, 14) Nanga tyani ponena za seo? Tikapusishiwe lini ngati ‘tusimikizhyila vinthu vonse.’ (Ŵelengani 1 Atesalonika 5:21; onani manosi ophunzilila m’Baibo ya Cizungu.) Mau Acigiliki yecimasulila kuti “simikizhyilani,” yenzoseŵenzeshewa pofotokoza njila zeenzoseŵenzesha ŵanthu poyesa nsimbi monga golide olo siliva kuti asimikizhyile ngati ni gong’a lini. Nase tufunika kuyesa zatukumvwa na zatuŵelenga kuti tiziŵe ngati n’zacendi. Izi zenze zofunika ngako kuli Atesalonika ndipo zikankhale zofunika ngako kuli seo makamaka cisauso cikulu pacuvwendela pafupi. M’malo mokhulupilila vinthu vilivonse vakukamba ŵanthu ayakine, tufunika kuseŵenzesha luso yasu yoganiza polinganizhya zatuŵelenga na zatukumvwa ku ŵanthu ayakine na zayukamba Baibo na gulu ya Yehova. Tikacita izi, tikapusishiwe lini na mauthenga awenye ofumila ku viŵanda.—Miy. 14:15; 1 Tim. 4:1.

16. Kansi tili na ciyembekezo cosimikizhyilika cotyani, ndipo talimbikishiwa kucita cinji?

¹⁶ Monga gulu, atumiki a Mulungu akapulumuke pa cisauso cikulu. Koma aliyense wa seo payeka, tuziŵa lini zati zikaticitikile mailo. (Yak. 4:14) Olo n’tetyo, mosasamala kanthu kuti tikapite a moyo pa cisauso cikulu olo tikafwe cisauso cikulu cikaliyoyamba, tikapasiwe mphoto ya moyo wosasila ngati tipitilizhye kunkhala okhulupilika. Akhristu ozozewa akankhale pamozi na Khristu kululu. A mbelele ziyakine akankhale m’paladaiso pacalo. Tiyeni tonse tikoika maganizo ŵasu pa ciyembekezo casu cabwino nokonzekela siku ya Yehova.