1. Kansi munthu ofunika kucita cinji akaliyoyamba kumanga ng’anda?

GANIZILANI za munthu wamene ofuna kumanga ng’anda. Oziŵa mtundu wa ng’anda yakufuna kumanga. Kansi angafunike kuluta nthawi yamene iyo kuyogula katundu noyamba kumanga? Yai. Akaliyoyamba kumanga, ofunika kucita cinthu ciyakine cofunika ngako camene ni kuŵelengela mtengo wake. Ndaŵa yanji? Cifukwa ofunika kuziŵa ngati ali na ndalama zokwanila kusilizhyila kuimanga. Ngati waŵelengela mosamala mtengo wake kukali nthawi, zingamuyavye kuziŵa kuti akwanishe kusilizhya kuimanga.

2. Molingana na Luka 14:27-30, n’cinji camufunikila kuganizila mosamala mukaliyobatizika?

² Kansi kukonda Yehova noyamikila vinthu vawakucitilani kukucitishani kuganizila zobatizika? Ngati n’tetyo, mufunika kupanga cosankha colingana na caangapange munthu wofuna kumanga ng’anda. Ndaŵa yanji talaŵila teti? Ganizilani mau a Yesu opezeka pa Luka 14:27-30. (Ŵelengani.) Yesu enzolaŵila tanthauzo yonkhala wophunzila wake. Kuti munkhale wophunzila wake, mufunika kunkhala wokonzeka kupilila zovuta koma soti kuleka vinthu viyakine. (Luka 9:23-26; 12:51-53) Mukaliyobatizika, mufunika kuganizila mosamala zamungakumane nazo cifukwa conkhala wophunzila wa Khristu. Pavuli pake munkhale okonzeka kupitilizhya kutumikila Mulungu mokhulupilika monga Mkhristu.

3. Tilaŵizhyane cinji m’nkhani ino?

³ Kansi munthu akabatizika opeza mapindu alionse kulinganizhya na vinthu vecisiya? Eee. Ngati munthu wabatizika opeza madaliso anyinji lomba, koma soti msogolo. Tiyeni tilaŵizhyane  makonsho ayakine ofunika ngako okhuza ubatizo. Kucita izi kukuyavyeni kuyankha konsho yakuti, “Kansi n’ne wokonzeka kubatizika?”

4. (a) Kansi kuzitwala kutanthauza cinji? (b) Ko “kuzikana” weka, kutanthauza cinji monga ni mwayafotokozela Mateyu 16:24?

⁴ Kansi kuzitwala kutanthauza cinji? Mukaliyobatizika, mufunika kuzitwala. Kuzitwala kutanthauza kumuuzhya Yehova m’pemphelo kuti museŵenzeshe moyo wanu wonse pomutumikila. Ngati mwezitwala kwa Mulungu niye kuti ‘mwezikana mweka.’ (Ŵelengani Mateyu 16:24.) Lomba muli kumbali ya Yehova, wamene ni mwai ukulu ngako. (Aro. 14:8) Mumuuzhya kuti kuyambila lomba, mukocita cifunilo cake osati canu. Kuzitwala ni lonjezo yamupanga kwa Mulungu, ndipo otikakamizhya lini kupanga lonjezo yamene iyi. Koma ngati tapanga lonjezo iyi tufunika kuikwanilisha.​—Sal. 116:12, 14.

5. Kansi kuzitwala kukatizhyana tyani na ubatizo?

⁵ Kansi kuzitwala kukatizhyana tyani na ubatizo? Ngati mwezitwala kwa Yehova, kuliye aliyense oziŵa. Koma ubatizo ni cocitika cuonekela ku ŵanthu, ndipo ucitika pa msonkhano wadela olo wacigawo. Ngati mwabatizika, muonesha kuli ayakine kuti mwezitwala kwa Yehova. * Tetyo ubatizo ucitisha ayakine kuziŵa kuti mukonda Yehova Mulungu wanu na mtima wanu wonse, moyo wanu wonse, maganizo ŵanu onse na mphamvu zanu zonse, ndipo uonesha kuti mwasimikizhya kuti mumutumikile kosasila.​—Mko. 12:30.

6-7. Molingana na 1 Petulo 3:18-22, ni vifukwa viŵili votyani vuonesha kuti ubatizo ni wofunika?

⁶ Kansi kubatizika n’kofunika cendi? Ganizilani mau opezeka pa 1 Petulo 3:18-22. (Ŵelengani.) Monga mwamene cingalawa ceoneshela cikhulupililo ca Nowa, ubatizo wanu ni umboni woonesha kuti mwezitwala kwa Yehova. Koma, kansi ubatizo ni wofunika cendi? Eee. Petulo efotokoza cifukwa cake. Coyamba, ‘utipulumusa.’ Ubatizo ungatipulumuse ngati tatola sitepu yoyenelela yamene ni kuonesha cikhulupililo muli Yesu nokhulupilila kuti etifwila ndipo eukishiwa kuluta kululu. Lomba ali ku kwanja kwendi “kwa Mulungu.”

⁷ Caciŵili, ubatizo ucitisha kuti munkhale na “cikumbumtima ciweme.” Ngati tazitwala kwa Mulungu nobatizika, tunkhala pa ushamwali wapadela na yove. Tikalapa mofumila pansi pa mtima noonesha cikhulupililo mu dipo, Mulungu otikhululukila macimo yasu, ndipo tunkhala na cikumbumtima ciweme.

8. Kansi n’cinji cingakusonkhezeleni kuti mubatizike?

⁸ Kansi n’cinji cingakusonkhezeleni kuti mubatizike? Cifukwa cophunzila Baibo mosamala, mwaziŵa zinyinji zokhuza Yehova, umunthu wake, na njila zake. Zinthu zemwephunzila zokhuza yove zekusonkhezelani kuti mukomukonda ngako. Cikondi canu pa Yehova niye cekusonkhezelani kuti mupange cosankha cofuna kubatizika.

9. Molingana na Mateyu 28:19, 20, kansi kubatizika m’zina ya Atata na ya Mwana na ya mzimu utuŵa kutanthauzanji?

⁹ Cifukwa ciyakine cekusonkhezelani kuti mubatizike n’cakuti mwephunzila Baibo ndipo mwekhulupilila zayuphunzisa. Ganizilani zecilaŵila Yesu pecitwala lamulo yopanga ophunzila. (Ŵelengani Mateyu 28:19, 20.) Molingana na mwecilaŵilila Yesu, onse ofuna  kubatizika ofunika kubatizika “m’zina ya Atata na ya Mwana na ya mzimu utuŵa.” Kansi izi zutanthauzanji? Etanthauza kuti munthu ofuna kubatizika ofunika kukhulupilila na mtima wake wonse cendi ca m’Baibo cokhuza Yehova, Mwana wake Yesu na mzimu utuŵa. Cendi camene ici ni camphamvu ndipo cingakufwikeni pamtima. (Aheb. 4:12) Tiyeni tilaŵizhyane ziyakine.

10-11. Ni mfundo za cendi zotyani zemwephunzila zokhuza Atata?

¹⁰ Ganizilani pemweyamba kuphunzila cendi cokhuza Atata, mwephunzila kuti: “Zina yake ni Yehova,” ni “Wapalulu Ngako, wolamulila calo conse.” (Sal. 83:18; Yes. 37:16). Ni Nyamalenga ŵasu, ndipo “cipulumuso cufumila kwa Yove.” (Sal. 3:8; 36:9) Epanga makonzedwe akuti atipulumuse ku ucimo na imfwa, ndipo watipasa ciyembekezo ca moyo wosasila. (Yoh. 17:3) Kuzitwala na kubatizika kukuziŵikisheni kuti nimwe wa Mboni za Yehova. (Yes. 43:10-12) Munkhale m’banja ya pacalo conse ya ŵanthu amene omekela kuziŵika na zina ya Mulungu, koma soti oziŵisha ayakine zina yamene iyi.​—Sal. 86:12.

¹¹ Ni mwai wamtengo wapatali kumvwisha zayuphunzisa Baibo zokhuza Atata. Pemwephunzila cendi, mtima wanu wekusonkhezelani kuti muzitwale kwa Yehova nobatizika.

12-13. N’zinthu zacendi zotyani zemwephunzila zokhuza Mwana?

¹² Kansi mwecimvwa tyani pemwephunzila cendi cokhuza Mwana? Yesu ni munthu waciŵili wofunika ngako m’cilengedwe. Niye etiombola. Mofunishisha etwala moyo wake monga nsembe cifukwa ca seo. Ngati tuonesha m’zocita zasu kuti tukhulupilila dipo, macimo yasu yangakhululukiwe. Tingakulishe ushamwali wasu na Mulungu na kuyopeza moyo wosasila. (Yoh. 3:16) Yesu ni Mkulu wa Ansembe. Ofuna kutiyavya kuti tipindule na dipo nonkhala pa ushamwali na Mulungu. (Aheb. 4:15; 7:24, 25) Monga Mfumu ya Ufumu wa Mulungu, Yehova akaseŵenzeshe Yesu potuŵisha zina yake, kucosa viipa vonse, noleta madaliso osasila m’paladaiso. (Mat. 6:9, 10; Chiv. 11:15) Yesu ni cisanzo casu. (1 Pet. 2:21) Etipasa cisanzo pozitwala kucita cifunilo ca Mulungu.​—Yoh. 4:34.

¹³ Pemwephunzila zinthu zokhuza Yesu m’Baibo, mweyamba kum’konda Mwana wokondeka wa Mulungu wamene uyu. Cikondi ici cekusonkhezelani kuseŵenzesha umoyo wanu pocita cifunilo ca Mulungu monga ni mwecicitila Yesu. Cifukwa ca izi, mwelimbikishiwa kuti muzitwale kwa Yehova nobatizika.

14-15. Kansi mwephunzila cendi cotyani cokhuza mzimu utuŵa?

¹⁴ Kansi mweganiza cinji pemwephunzila cendi cokhuza mzimu utuŵa? Mzimu utuŵa ni munthu lini, koma ni mphamvu ya Mulungu yokata nchito. Yehova eseŵenzesha mzimu wake kuuzhyila ŵanthu elemba Baibo, ndipo nase mzimu wamene uyu utiyavya kumvwisha noseŵenzesha zataphunzila. (Yoh. 14:26; 2 Pet. 1:21) Kupitila mu mzimu wake utuŵa, Yehova otipasa “mphamvu yopambana yacibadwa.” (2 Akor. 4:7) Mzimu utuŵa utiyavya kulalikila uthenga uweme, kugonjesa mayeselo, utilimbikisha ngati tafooka, na kupilila mayeselo. Utiyavya kuonesha minkhalidwe iweme yamene ni “minkhalidwe ya mzimu utuŵa.” (Agal. 5:22) Mulungu otwala mzimu wake kuli ŵala omukhulupilila na ŵala omusenga.​—Luka 11:13.

¹⁵ N’zolimbikisha kuziŵa kuti atumiki a Yehova angadalile mzimu utuŵa kuti uŵayavye potumikila Mulungu. Pemwephunzila  cendi cokhuza mzimu utuŵa, mwelimbikishiwa kuti muzitwale kwa Yehova nobatizika.

16. Kansi taphunzila cinji mu nkhani ino?

¹⁶ Cosankha canu cakuti muzitwale kwa Mulungu nobatizika n’cofunika ngako. Monga ni mwetephunzilila, mufunika kunkhala okonzeka kukumana na mavuto. Koma madaliso yamungapeze ni yanyinji kupambana mavuto. Ubatizo ungakupulumuseni, nokucitishani kunkhala na cikumbumtima ciweme kwa Mulungu. Cifukwa cikulu cingakusonkhezeleni kuti mubatizike ni kukonda Yehova. Mufunika kukhulupilila na mtima wonse cendi cemwephunzila cokhuza Atata, Mwana, na mzimu utuŵa. Pavuli poganizila vatalaŵizhyana, kansi mungaiyankhe tyani konsho iyi? “Kansi n’ne wokonzeka kubatizika?”

17. Kansi munthu ofunika kutola masitepu otyani kuti abatizike?

¹⁷ Ngati muona kuti nimwe wokonzeka kubatizika, n’zosakaikisha kuti mweyamba kale kutola masitepu okuyavyani kunkhala pa ushamwali na Yehova. * Cifukwa cakuti muphunzila Baibo nthawi zonse, mwaziŵa zinyinji zokhuza Yehova na Yesu. Ndipo mwenkhala na cikhulupililo. (Aheb. 11:6) Lomba mukhulupilila malonjezo a Yehova opezeka m’Baibo, ndipo nimwe osimikizhya kuti cikhulupililo canu mu nsembe ya Yesu cingakupulumuseni ku ucimo na imfwa. Mwelapa macimo ŵanu nokumvwa cisoni pa vinthu viipa vemwecita kale, ndipo mwesenga Yehova kuti akukhululukileni. Mwecinja umoyo wanu ndipo mwesiya umoyo wamwenze nao kale wocita viipa, ndipo lomba munkhala na umoyo wokondwelesha Mulungu. (Mac. 3:19) Nimwe wofunishisha kuuzhyako ayakine za cikhulupililo canu. Mweyenelela kunkhala wofalisa wosabatizika noyamba kulalikila pamozi na mpingo. (Mat. 24:14) Yehova ni wokondwela cifukwa ca masitepu ofunika ngako yemwetola. Mwem’kondwelesha ngako.​—Miy. 27:11

18. Kansi n’cinji ciyakine camufunika kucita mukaliyobatizika?

¹⁸ M’kaliyobatizika, pali vinthu viyakine vamufunika kucita. Molingana na mwataphunzilila, mufunika kuzitwala kwa Mulungu. Kuzitwala kutanthauza kumuuzhya Yehova m’pemphelo kuti museŵenzeshe moyo wanu wonse pomutumikila. (1 Pet. 4:2) Pavuli pake mufunika kuuzhya mgwilizanisi wa bungwe ya akulu kuti mufuna kubatizika. Apange makonzedwe akuti akulu aonane namwe. Mufunika lini kucita wowa pakuyoonana na akulu. Mukokumbukila kuti akwasu aŵa okuziŵani ndipo okukondani. Akalaŵizhyane namwe mfundo zoyambilila za m’Baibo zemwephunzila. Ofuna kusimikizhyila  ngati mwemvwisha ziphunziso ndipo muziŵa tanthauzo ya kuzitwala na ubatizo. Ngati avomelezhya kuti nimwe wokonzeka, angakuuzhyeni kuti mukabatizike pa msonkhano ukuza.

19-20. Kansi mufunika kucita cinji pavuli pobatizika, ndipo mungacite tyani zamene izi?

¹⁹ Pavuli pobatizika, kansi n’cinji camufunika kucita? * Kumbukilani kuti kuzitwala ni lonjezo, ndipo Yehova oyembekezela kuti mukoikwanilisha. Pavuli pobatizika, mufunika kukwanilisha lonjezo yemwepanga. Kansi mungacite tyani zamene izi?

²⁰ Mufunika kukatizhyana na mpingo. Pemwebatizika, mwenkhala mbali ya gulu yonse ya akwasu. (1 Pet. 2:17) Akwasu na azilongosi mumpingo ni banja yauzimu. Ngati musonkhana nao nthawi zonse, munkhale pa ushamwali wotang’a. Mukoŵelenga Mau a Mulungu nthawi zonse noŵasinkhasinkha. (Sal. 1:1, 2) Mukaŵelenga mbali iyakine m’Baibo, mukopatula nthawi yosinkhasinkha zamwaŵelenga. Mukacita teti, niye kuti mau a Mulungu akufwikeni pamtima. ‘Mukopemphela mosalekezhya.’ (Mat. 26:41) Mapemphelo ŵanu ofumila pansi pamtima akuyavyeni kuvwendela pafupi na Yehova. Pitilizhyani kusakilasakila Ufumu coyamba. (Mat. 6:33) Mungacite zamene izi mwa kuika pasogolo nchito yolalikila. Ngati mulalikila nthawi zonse, cikhulupililo canu cinkhale cotang’a, ndipo muyavye ayakine kuti akapeze moyo wosasila.​—1 Tim. 4:16.

21. Kansi ubatizo ungasegule mwai wotyani?

²¹ Kuzitwala kwa Yehova nobatizika ni cosankha cikulu ngako camungapange pa umoyo. N’cendi kuti mungakumane na mavuto. Koma madaliso yamungapeze ni yanyinji kupambana mavuto. Mavuto yamungakumane nayo m’calo cino ni “akanthawi ndipo ni opepuka.” (2 Akor. 4:17) Koma ubatizo usegula njila yakuti munkhale na umoyo wokhutilisha lomba, koma soti “moyo wenewene” msogolo. (1 Tim. 6:19) Yesayesani kuganizila mosamala ndipo mukopemphela kuti mupeze yankho ya konsho yakuti “Kansi n’ne wokonzeka kubatizika?”