NKHANI YOPHUNZILA 10
Kukonda Yehova na Kumuyamikila Kungakusonkhezeleni Kuti Mubatizike
“N’cinji cunilesha kuti nibatizike?”—MACHITIDWE 8:36.
NYIMBO 37 Kutumikila Yehova na Moyo Wasu Wonse
ZATI TIPHUNZILE *
1-2. Molingana na Machitidwe 8:27-31, 35-38, n’cinji cesonkhezela nduna ya ku Itiyopiya kuti ibatizike?
KANSI mufuna kubatizika nonkhala wophunzila wa Khristu? Kukonda Yehova na kumuyamikila kwasonkhezela ŵanthu anyinji kuti apange cosankha camene ici. Ganizilani cisanzo ca nduna yamene yenzotumikila mfumukazi ya ku Itiyopiya.
2 Nduna ya ku Itiyopiya yecitapo kanthu nthawi yamene iyo pa zinthu zeyephunzila m’Malemba. (Ŵelengani Machitidwe 8:27-31, 35-38.) Kansi n’cinji cecitisha kuti ibatizike? Yeyamikila zinthu zeyenzoŵelenga kufumila m’buku ya Yesaya peyenze m’galeta. Nduna iyi peyecimvwa zecifotokoza Filipo, yeyamikila ngako zinthu zeciicitila Yesu. Ndaŵa yanji nduna iyi yenze yeluta ku Yerusalemu? Cifukwa cakuti yenzokonda Yehova. Tuziŵa tyani? Cifukwa yenzofumila ku Yerusalemu kuyolambila Yehova. Nduna iyi yeleka cipembezo cake, ndipo yeyamba kukatizhyana na mtundu wamene wenze wozitwala kwa Mulungu wacendi. Cikondi cimozimozi ceisonkhezela kuti ibatizike nonkhala wophunzila wa Khristu.—Mat. 28:19.
3. N’cinji cingakangishe munthu kubatizika? (Onani bokosi yakuti “ Kansi Mtima Wanu Uli Tyani?”)
3 Kukonda Yehova kungakusonkhezeleni kuti mubatizike. Koma payakine kukonda ngako abanja olo vinthu viyakine kungatikangishe kucita zamene izi. Motyani? Ganizilani visanzo ivi: Payakine mukonda ngako abanja ŵanu osakhulupilila na ayanu, ndipo mungankhale na nkhaŵa yakuti ngati mungabatizike, angakuzondeni. (Mat. 10:37) Olo payakine mukonda kucita vinthu vakuzonda Mulungu, ndipo muona kuti n’covuta kuleka. (Sal. 97:10) Kapena kwa nthawi itali mwankhala mucita vikondwelelo vokatizhyana na cipembezo cawenye. Payakine mukumvwa luweme mukakumbukila nthawi pemwenzokondwelela vinthu vamene ivi. Cifukwa ca izi, mungaone kuti n’covuta kuleka kucita vikondwelelo vakuzonda Yehova. (1 Akor. 10:20, 21) Tetyo mungazikonshe kuti, “Kansi n’cinji canukonda ngako olo ni ŵani wanukonda ngako?”
MUNTHU WATUFUNIKILA KUKONDA NGAKO
4. N’cinji cingakusonkhezeleni kuti mubatizike?
4 Pali vinthu vinyinji viweme vatingakonde noyamikila. Mwacisanzo, payakine mukaliyoyamba kuphunzila na Mboni za Yehova, mwenzoyamikila kale mfundo za m’Baibo. Panthawi iyi payakine mwenze mwekulisha kale cikondi canu pa Yesu. Pofwana kuti lomba mwaŵaziŵa luweme a Mboni za Yehova, musangalala kusonkhana nao. Kukonda tyala vinthu viweme ivi, kungakucitisheni lini kuti muzitwale kwa Yehova nobatizika. Koma cinthu cofunika ngako cingakusonkhezeleni kuti mubatizike, ni kukonda Yehova. Ngati mukonda Yehova kupambana vinthu viyakine vonse, mungalole lini ciliconse olo aliyense kuti akukangisheni kumutumikila. Kukonda Yehova kungakusonkhezeleni kubatizika koma soti kungakuyavyeni kunkhala okhulupilika kuli yove pavuli pobatizika.
5. Tilaŵizhyane konsho yotyani lomba?
5 Yesu elaŵila kuti tufunika kukonda Yehova na mtima wasu wonse, moyo wasu wonse, maganizo ŵasu onse na mphamvu zasu zonse. (Maliko 12:30) Kansi mungacite cinji kuti mukokonda Yehova nomulemekeza ngako? Kuganizila mwakutioneshela cikondi Yehova kungatisonkhezele kuti tikomukonda. (1 Yohane 4:19) Kansi pangankhale zofumapo zotyani ngati mwakulisha cikondi camene ici? *
6. Molingana na Aroma 1:20, kansi ni njila imozi yotyani yatingaphunzilile za Yehova?
6 Phunzilani za Yehova kupitila m’cilengedwe. (Ŵelengani Aroma 1:20; Chiv. 4:11) Kuganizila za vomela na vinyama vecilenga Yehova, kungatiyavye kuona nzelu zake. Ganizilani tyala mwecilengela miŵili yasu. (Sal. 139:14) Ganizilani soti za mphamvu zeciika mzuŵa yamene ni imozi mwa nyenyezi mabiliyoni. * (Yes. 40:26) Mukaganizila za cilengedwe ca Yehova, mufwika pomulemekeza ngako. Tetyo, kuziŵa kuti Yehova ni wanzelu koma soti wamphamvu ni mbali imozi tyala yonkhalila pa ushamwali na yove. Kuti tikulishe ushamwali wasu na Yehova, tufunika kuziŵa zinyinji zokhuza yove.
7. Kuti timukonde ngako Yehova, kansi tufunika kusimikizhyila za cinji?
7 Mufunika kusimikizhyila kuti Yehova okukondani. Kansi muvutika kukhulupilila kuti Nyamalenga, wamene elenga kululu na calo okuziŵani ndipo okusamalilani? Ngati n’tetyo, mufunika kukumbukila kuti Yehova “ali lini kutali na aliyense wa seo.” (Mac. 17:26-28) Yove “ofufuza mitima yonse,” ndipo olonjeza kuti, “ukamusakilasakila, alole kuti um’peze.” (1 Mbi. 28:9) Cifukwa camuphunzilila Baibo n’cakuti Yehova ‘ekuletani pafupi.’ (Yer. 31:3) Mukapitilizhya kuyamikila zinthu zawakucitilani Yehova, cikondi canu pa yove cipitilizhye kukula.
8. Kansi mungaoneshe tyani kuti muyamikila cikondi ca Yehova?
8 Njila imozi yatingaoneshele kuyamikila cikondi ca Yehova ni mwa kupemphela. Cikondi canu pa Mulungu cingapitilizhye kukula ngati mumuuzhya mavuto ŵanu nomuyamikila pa vinthu vawakucitilani. Ushamwali wanu na Yehova ungankhale wotang’a mukaona mwakuyankhila mapemphelo ŵanu. (Sal. 116:1) Mungankhale osimikizhya kuti okumvwishishani. Kuti munkhale pafupi na Yehova, mufunika kumvwisha mwakuonela koma soti mwakucitila vinthu. Mufunika soti kuziŵa zakufuna kuli mweo. Njila imozi yamungaziŵile zamene izi ni mwa kuphunzila Baibo.
Njila iweme yatingankhalile pafupi na Mulungu, noziŵa zakufuna kuli seo ni mwa kuphunzila Baibo (Onani ndime 9) *
9. Mungaoneshe tyani kuti muyamikila Baibo?
9 Mukoyamikila Mau a Mulungu Baibo. M’Baibo niye muli cendi cokhuza Yehova na colinga cake kuli mweo. Mungaoneshe kuti muyamikila Baibo mwa kuiŵelenga siku iliyonse, kucita phunzilo ya pamweka koma soti kuseŵenzesha zamuphunzila. (Sal. 119:97, 99; Yoh. 17:17) Kansi muli na ndandanda yoŵelenga Baibo? Kansi muikonkha ndandanda yamene iyo siku iliyonse?
10. N’cinthu cimozi cotyani camene cucitisha Baibo kunkhala buku yapadela?
10 Cinthu cocitisha cidwi cokhuza Baibo n’cakuti ili na maumboni ya ŵanthu amene eona na menso zecitika pa umoyo wa Yesu. Niye tyala buku muli nkhani yolondola yamene yufotokoza zecicita Yesu kuli mweo. Mukaphunzila zecilaŵila Yesu nocita, zikusonkhezeleni kunkhala pa ushamwali na yove.
11. Kansi n’cinji cingakuyavyeni kuti mukokonda Yehova?
11 Ngati mukonda Yesu, cikondi canu pa Yehova cikule. Ndaŵa yanji? Cifukwa Yesu eonesha minkhalidwe iweme ya Ausuwake. (Yoh. 14:9) Tetyo, mukapitilizhya kuziŵa zinyinji zokhuza Yesu, mufwike pomuziŵa luweme Yehova nomuyamikila. Ganizilani mwecioneshela cifundo Yesu ku ŵanthu amene enzooneka atyalatyala, osauka, olwala koma soti ofooka. Ganizilani soti malangizo yake mwayotiyavyila pa umoyo wasu ngati tuyakonkha.—Mat. 5:1-11; 7:24-27.
12. Kansi kuziŵa zokhuza Yesu kungakulimbikisheni kucita cinji?
12 Cikondi casu pa Yesu cingakule ngati tuganizila ngako za nsembe yecitwala kuti macimo yasu yakokhululukiwa. (Mat. 20:28) Mukazindikila kuti Yesu enze wofunishisha kukufwilani, zingakusonkhezeleni kuti mulape nosenga cikhululukilo kwa Yehova. (Mac. 3:19, 20; 1 Yohane 1:9) Mukapitilizhya kukonda Yesu na Yehova, munkhale m’gulu ya ŵanthu amene okonda Yesu na Yehova.
13. Kansi Yehova watipasa cinji kuti tipeze thandizo?
13 Kondani ŵanthu amene okonda Yehova. Abanja ŵanu osakhulupilila na ayakine enze ayanu kale angamvwishe lini cifukwa cake mufuna kuzitwala kwa Yehova. Nthawi ziyakine angafwike pokusushani. Koma Yehova angakuyavyeni kupitila m’banja yake yauzimu. Ngati munkhala pafupi na banja yauzimu yamene iyi, muone cikondi na thandizo yamufunikila. (Maliko 10:29, 30; Aheb. 10:24, 25) M’kuluta kwa nthawi, ayakine mwa abanja ŵanu angayambe kutumikila Yehova nokonkha mfundo zake.—1 Pet. 2:12.
14. Molingana na 1 Yohane 5:3, kansi n’cinji camwaziŵa pankhani yokhuza malangizo a Yehova?
14 Mukolemekeza noseŵenzesha malangizo a Yehova. Mukaliyophunzila za Yehova, mwenzoyendela maganizo ŵanu, koma lomba mwaziŵa kuti malangizo a Yehova ni aweme ngako. (Sal. 1:1-3; ŵelengani 1 Yohane 5:3.) Ganizilani malangizo ali m’Baibo oluta kwa analume olungula, anakazi olunguliwa, makolo na ŵana. (Aef. 5:22–6:4) Kansi banja yanu ni yacimwemwe cifukwa coseŵenzesha malangizo amene aŵa? Kansi mwecinja minkhalidwe yemwenze nayo kale cifukwa cokonkha malangizo a Yehova? Kansi lomba nimwe okondwela? (Miy. 13:20; 1 Akor. 15:33) N’zoonekelatu kuti yankho yanu pa makonsho aya ni yakuti eee.
15. Mungacite cinji ngati mufuna kuziŵa mwamungaseŵenzeshele mfundo za m’Baibo?
15 Nthawi ziyakine zingakuvuteni kuziŵa mwamungaseŵenzeshele mfundo za m’Baibo zamuphunzila. Niye cifukwa cake Yehova oseŵenzesha gulu yake kutipasa zofalisa zozikiwa pa Baibo, zamene zingatiyavye kuzindikila ciweme na ciipa. (Aheb. 5:13, 14) Ngati muŵelenga nophunzila zofalisa zamene izi, muone phindu yake, ndipo munkhale pafupi na gulu ya Yehova.
16. Kansi Yehova otisamalila tyani kupitila m’gulu yake?
16 Mukokonda nocilikiza gulu ya Yehova. Yehova wasonkhanisha ŵanthu ŵake mumpingo, ndipo Mwana wake Yesu niye mutu wa mpingo. (Aef. 1:22; 5:23) Yehova wasankha gulu ya Akhristu ozozewa kuti asogolele pa nchito yofunika ngako masiku ŵano. Gulu yamene iyi yuitiwa kuti “kapolo wokhulupilika na wanzelu,” ndipo ili na udindo wotiyavya kuti tinkhale pafupi na Mulungu noteteza ushamwali wasu na Yehova. (Mat. 24:45-47) Njila imozi yamene kapolo wokhulupilika otisamalilila ni mwa kuika akulu oyenelela kuti akotisogolela notiteteza. (Yes. 32:1, 2; Aheb. 13:17; 1 Pet. 5:2, 3) Akulu amene aŵa ni okonzeka kucita zilizonse zaangakwanishe kuti atitonthoze notiyavya kuti tivwendele pafupi na Yehova. Koma cinthu cimozi cofunika cakuticitila ni kutiyavya nophunzisa ayakine zokhuza Yehova.—Aef. 4:11-13.
17. Molingana na Aroma 10:10, 13, 14, ndaŵa yanji tuuzhya ayakine za Yehova?
17 Yavyani ayakine kuti akokonda Yehova. Yesu euzhya okonkha ŵake kuti akophunzisa ayakine za Yehova. (Mat. 28:19, 20) Nase tumvwila lamulo iyi cifukwa cokonda Yehova, osati cifukwa cakuti ni udindo wasu. Ngati cikondi canu pa Yehova cakula, mumvwe monga ni mwecimvwila mtumwi Petulo na Yohane, pecilaŵila kuti: “Tingaleke lini kulaŵila za vinthu veteona na kumvwa.” (Mac. 4:20) Tingankhale okondwa ngako ngati tingayavye munthu kuziŵa Yehova. Ganizilani cimwemwe ceenze naco Filipo peciyavya nduna ya ku Itiyopiya kuziŵa cendi copezeka m’Malemba nobatizika! Ngati mutolela cisanzo ca Filipo nomvwila lamulo ya Yesu yakuti tikolalikila, muoneshe kuti mufuna kunkhala wa Mboni za Yehova. (Ŵelengani Aroma 10:10, 13, 14.) Ngati zinthu zankhala teti, mungazikonshe konsho yecikonsha nduna ya ku Itiyopiya kuti: “N’cinji cunilesha kuti nibatizike?”—Mac. 8:36.
18. Tikalaŵizhyane cinji m’nkhani yokonkhapo?
18 Kubatizika ni cosankha cofunika ngako catingapange pa umoyo. Ponkhala kuti ni cosankha cofunika ngako, tufunika kuiganizila mosamala nkhani iyi. Kansi tufunika kuziŵa cinji pankhani ya ubatizo? Ko mufunika kucita cinji mukaliyobatizika, koma soti pavuli pobatizika? Makonsho aya akayankhiwe m’nkhani yokonkhapo.
NYIMBO 2 Zina Yanu Nimwe Yehova
^ par. 5 Ŵanthu ayakine akangoyamba kukonda Yehova, ocita wowa kuti abatizike nonkhala a Mboni za Yehova. Ngati mukumvwa teti, nkhani ino ikuyavyeni kuganizila vinthu vamungacite kuti mubatizike.
^ par. 5 Ŵanthu osiyanasiyana. Tetyo ayakine angaseŵenzeshe malangizo ali m’nkhani ino mosiyana na mwayafotokozewela.
^ par. 6 Kuti muziŵe zinyinji, onani tumabuku twa m’Chichewa twakuti: Kodi Zamoyo Zinachita Kulengedwa? na Mmene Moyo Unayambira—Mafunso 5 Ofunika Kwambiri.
^ par. 61 MAU OFOTOKOZA CITHUNZITHUNZI: Kalongosi oyaŵila ka thilakiti ku msimbi peenzogula vinthu.
