Akhristu ayakine masiku ŵano oseŵenzesha vipangizo valomba polaŵizhyana na abanja ŵao koma soti okhulupilila ayao. Koma Mkhristu wofwikapo mwauzimu, okumbukila malangizo akuti: “Wocenjela akaona soka ofisama koma osaziŵa zinthu amene opitilizhya kuyenda olangiwa.”​—Miy. 27:12.

Tuyamikila kuti Yehova ofuna kutiteteza. Tetyo, tupewa kukatizhyana na ŵanthu amene oleta magaŵano, ocosewa koma soti ampatuko. (Aro. 16:17; 1 Akor. 5:11; 2 Yoh.  10, 11) Ayakine amene okatizhyana na mpingo, okonkha lini malamulo a Mulungu. (2 Tim. 2:20, 21) Posankha ayasu tufunika kukumbukila zamene izi. Koma cingankhale cinthu covuta kusankha ayasu mwanzelu ngati tulaŵizhyana nao kupitila pa mapulogilamu otumizhyila mameseji.

Ngati tepanga gulu ikulu yotumizhyilana mameseji, tufunika kusamala ngako posankha ayasu. Akhristu ayakine akumana na mavuto cifukwa cokatizhyana na magulu akulu otumizhyilana mameseji. Ndaŵa yanji mkwasu olo kalongosi ofunika kusamala ngati ali pa gulu ikulu ya ŵanthu amene otumizhyilana mameseji? N’cifukwa cakuti cingankhale covuta kuŵaziŵa luweme koma soti kuziŵa umoyo wao wauzimu. Lemba ya Salimo 26:4 yulaŵila kuti: “Nukatizhyana lini na ŵanthu acinyengo koma soti nupewa kukatizhyana na ŵanthu amene ofisa umunthu wao.” Izi zuonesha kuti n’cinthu canzelu kulembela tyala mameseji ŵanthu ŵatuziŵa.

Olo m’magulu atontho-atontho, Mkhristu ofunika kusamala mphela nthawi yakutaila polemba mameseji koma soti na zinthu zakulaŵila ŵanthu a m’gulu yamene iyo. Ni posafunika kwenekwene kuyankha meseji iliyonse, tyala cifukwa cakuti ni yocitisha cidwi. Kucita izi kungationongele tyala nthawi. Paulo ecenjeza Timoteyo kuti ofunika kupewa ŵanthu “atonzhyo koma soti oloŵelela m’nkhani za ayakine.” (1 Tim. 5:13) Olo masiku ŵano cingankhale cosavuta kuyamba kutonzhya kupitila pa zipangizo zalomba.

Mkhristu wofwikapo mwauzimu opewa kumvwishila olo kuulula nkhani zacisinsi zokhuza ŵanthu ayakine. (Sal. 15:3; Miy.  20:19) Ofunika soti kupewa nkhani ziliye umboni. (Aef. 4:25) Tili na nkhani zinyinji ziweme zozikiwa pa Baibo, malipoti odalilika a pa webusaiti yasu ya jw.org koma soti mapulogilamu a pa mwezi a JW Broadcasting^®.

Mboni ziyakine zuseŵenzesha mapulogilamu yotumizhyilapo mameseji pogulisa, kugula, kuchacha malonda koma soti kupasa ŵanthu ayakine mwai wa nchito. Izi ni nkhani zamalonda zamene zukatizhyana lini na kulambila Yehova. Akhristu amene opewa mzimu “wokondeshesha ndalama,” angakonde lini kupezelapo mwai wopeza ndalama pa akwasu ŵakutandala nao.​—Aheb. 13:5.

Kansi tufunika kuseŵenzesha mapulogilamu otumizhyila mameseji posenga ndalama kuli akwasu na colinga cakuti tiyavyile ayakine amene ofunikila thandizo? Cifukwa cakuti tukonda akwasu na azilongosi, tuŵayavya noŵalimbikisha. (Yak. 2:15, 16) Ngati tucita izi poseŵenzesha mapulogilamu otumizhyila mameseji, tingasokoneze dongosolo yamene ofesi ya msambo koma soti mpingo, useŵenzesha potwala thandizo kuli akwasu na azilongosi ofunikila thandizo. (1 Tim. 5:3, 4, 9, 10, 16) Paliye aliyense wa seo wamene angakonde kuti ŵanthu akomuona kuti esankhiwa mwapadela kuti akosamalila akwasu na azilongosi.

Tufunika kucita zinthu zamene zingalete ulemelelo kwa Mulungu. (1 Akor. 10:31) Tetyo tufunika kusamala poseŵenzesha mapulogilamu otumizhyila mameseji kuti tipewe mavuto.