1-2. Kansi n’zinthu zotyani zucitika kanyinji-kanyinji ngati ŵanthu obatizika, ndipo tilaŵizhyane cinji?

 KANSI mweonako kale gulu ya ŵanthu amene ofuna kubatizika? Ganizilani kuti muona ŵanthu aŵa oyankha mosimikizhya makonsho yaŵili yakukonshewa akaliyobatizika. Muona abanja na ashamwali ŵao ooneka osangalala. Pakuvuuka m’manzi, mukumvwa ŵanthu oomba m’manja ndipo ove pakuona izi ooneka osangalala ngako. Pa avaleji, wiki iliyonse ŵanthu masauzande ozipeleka nobatizika kunkhala Mboni za Yehova.

² Nanga tyani ponena za mweo? Ngati muganiza zakuti mubatizike, niye kuti nimwe munthu wapadela m’calo cino ciipa cifukwa “musakilasakila Yehova.” (Sal. 14:1, 2) Nkhani ino yelembewela mweo mosasamala kanthu kuti nimwe wacilumbwana olo wacikulile. Koma nase amene tebatizika kale, tufunika kutang’isha cifuno casu cotumikila Yehova mpaka kale-kale. Tetyo, capamozi tiyeni tilaŵizhyane vifukwa vitatu vofunika ngako vamene vutipangisha kutumikila Yehova.

3. Ndaŵa yanji atumiki a Yehova okonda cendi na cilungamo? (Salimo 119:128, 163)

³ Yehova elamula ŵanthu ŵake kuti ‘akokonda cendi.’ (Zek. 8:19) Yesu elimbikisha ophunzila ŵake kuti akoyesayesa kucita cilungamo. (Mat. 5:6) Izi zutanthauza kuti munthu ofunika kunkhala na cifuno cocita zinthu zacilungamo, ziweme koma soti zituŵa m’menso mwa Mulungu. Kansi mukonda cendi na cilungamo? Nise osimikizhya kuti mukonda zinthu izi ndipo muzonda zinthu zonse ziipa. (Ŵelengani Salimo 119:128, 163.) Ngati munthu otala wenye niye kuti otolela Satana wamene niye olamulila calo cino. (Yoh. 8:44; 12:31) Cimozi mwa zolinga za Satana ni kuneneza zina ituŵa ya Yehova Mulungu.  Satana wankhala ofalisa nkhani zawenye zokhuza Mulungu kuyambila tyala pa kupanduka kwa m’munda wa Edeni. Eyesayesa kupangisha ŵanthu kuyamba kuganiza kuti Yehova ni wolamulila wozikonda koma soti wosaona mtima wamene otana ŵanthu vinthu viweme. (Gen. 3:1, 4, 5) Vinthu vawenye vakulaŵila Satana ponena za Yehova, vapitilizhya kupangisha ŵanthu kuganiza kuti Mulungu ni muipa. Ngati ŵanthu asankha ‘kusakonda cendi,’ Satana angaŵasonkhezele kucita vinthu vonse viliye cilungamo koma soti viipa.​—Aro. 1:25-31.

4. Kansi Yehova oonesha tyani kuti ni “Mulungu wacendi”? (Onani soti cithunzithunzi.)

⁴ Yehova ni “Mulungu wacendi” ndipo ophunzisa cendi ku ŵanthu amene omukonda. (Sal. 31:5) Mwa kucita izi, oŵayavya kuti osati akosoŵeshewa na wenye wa Satana. Yehova ophunzisa soti atumiki ŵake kunkhala oona mtima koma soti acilungamo. Izi zuŵayavya kumvwa kuti ni ofunika nonkhala na mtendele wa mu mtima. (Miy. 13:5, 6) Kansi muona kuti wakucitilani izi pamuphunzila Baibo? Mwaphunzila kuti njila za Yehova n’zopindulisha ku ŵanthu onse na kuli mweo pamweka. (Sal. 77:13) Tetyo, mufuna kucita zinthu zamene Mulungu oziona kuti n’zacilungamo. (Mat. 6:33) Mufuna kuteteza cendi noyavya ŵanthu ayakine kuziŵa kuti vinthu vakulaŵila Satana ponena za Yehova Mulungu n’vawenye. Kansi mungacite tyani izi?

5. Kansi mungaoneshe tyani kuti mucilikiza cendi na cilungamo?

⁵ Mungasankhe kunkhala na umoyo wamene ungoonesha ku ŵanthu onse kuti mukana wenye wa Satana ndipo mucilikiza cendi. Mungaoneshe kuti mwasankha Yehova kunkhala Wolamulila wanu na kuti mufuna kucita zinthu zakuona yove kuti ni ziweme. Kansi mungacite tyani izi? Mwa kuzipeleka kwa Yehova m’pemphelo na kuonesha patuŵa kuzipeleka kwanu mwa kubatizika. Kukonda cendi na cilungamo ni vinthu vofunika ngako vamene vutipangisha kupanga cosankha cakuti tibatizike.

6. Kansi pa Salimo 45:4 pali vifukwa votyani vamene vukupangishani kukonda Yesu Khristu?

⁶ Ndaŵa yanji mumukonda Yesu Khristu? Onani vifukwa viweme vupezeka pa Salimo 45:4. (Ŵelengani.) Yesu okonda cendi, kulicefya na cilungamo. Ngati mukonda cendi na cilungamo, n’zoonekelatu kuti mumukonda  Yesu Khristu. Ganizilani mwamene Yesu etetezela cendi na cilungamo motang’a mtima. (Yoh. 18:37) Ni motyani mwamene Yesu ooneshela kulicefya?

7. N’cinji cukucitishani cidwi na kulicefya kwa Yesu?

⁷ Yesu oonesha nkhalidwe yolicefya kupitila m’zocita zake. Mwacisanzo, yove otwala ulemelelo wonse kuli Ausuwake osati kwa yove. (Mko. 10:17, 18; Yoh. 5:19) Kansi kulicefya kwa Yesu kutipangisha kumvwa tyani? Kulaŵila cendi, kutipangisha kukonda Mwana wa Mulungu nofunishisha kutolela cisanzo cake. Ndaŵa yanji Yesu ni wolicefya? N’cifukwa cakuti okonda notolela minkhalidwe ya Ausuwake amene ni wolicefya. (Sal. 18:35; Aheb. 1:3) Kansi izi zukupangishani lini kuvwendela pafupi na Yesu wamene oonesha ndendende minkhalidwe ya Yehova?

8. Ndaŵa yanji tumukonda ngako Yesu monga Mfumu yasu?

⁸ Tumukonda ngako Yesu monga Mfumu yasu cifukwa ni wolamulila muweme. Yehova emuphunzisa nomusankha kuti alamulile. (Yes. 50:4, 5) Ganizilani soti cikondi cozitana cecionesha. (Yoh. 13:1) Monga Mfumu yanu, mufunika kumukonda. Yove efotokoza kuti ŵala amene omukonda cendi koma soti ŵala amene yove oŵaita kuti ashamwali, oonesha cikondi mwa kumvwila malamulo ŵake. (Yoh. 14:15; 15:14, 15) Kulaŵila cendi, ni mwai ukulu ngako kunkhala shamwali wa Mwana wa Yehova.

9. Kansi ubatizo wa Akhristu ulingana tyani na wa Khristu?

⁹ Imozi mwa malamulo a Yesu ni yakuti ophunzila ŵake ofunika kubatizika. (Mat. 28:19, 20) Yove epeleka cisanzo pa nkhani iyi. M’njila ziyakine, ubatizo wake ni wosiyana na wa ophunzila ŵake. (Onani bokosi yakuti “ Ubatizo wa Yesu na wa Ophunzila Ŵake​—Kansi Usiyana Tyani?”) Koma m’njila ziyakine ni wolingana. Mwa kubatizika, Yesu eonesha kuti enze wokonzeka kucita cifunilo ca Ausuwake. (Aheb. 10:7) Molingana na izi, okonkha a Yesu obatizika monga cizindikilo cakuti ezitwala kwa Yehova Mulungu. Cinthu cofunika ngako pa umoyo wao ni kucita cifunilo ca Mulungu osati cao. Tetyo, otolela cisanzo ca Asikulu ŵao.

10. Ndaŵa yanji tulaŵila kuti kukonda Yesu kungakusonkhezeleni kuti mubatizike?

¹⁰ Mukhulupilila kuti Yesu ni Mwana wovyalika yeka wa Yehova ndipo musangalala kuti ni Mfumu yamene Mulungu eisankha kuti itilamulile. Muziŵa kuti Yesu ni wolicefya ndipo otolela minkhalidwe ya Yehova ndendende. Mwephunzila kuti elyesha a njala, etonthoza ofooka ndipo epolesha olwala. (Mat. 14:14-21) Mwaona mwakusogolelela mpingo wake masiku ŵano. (Mat. 23:10) Ndipo muziŵa kuti msogolo akacite zinyinji monga Mfumu ya Ufumu wa Mulungu. Lomba kansi mungaoneshe tyani kuti mumukonda? Mungacite izi mwa kutolela cisanzo cake. (Yoh. 14:21) Cimozi mwa zinthu zamungacite kuti mutolele cisanzo cake ni kupeleka moyo wanu kwa Yehova nobatizika.

11. Kansi cifukwa cikulu cupangisha munthu kubatizika n’cinji, ndipo ndaŵa yanji zili teti?

¹¹ Kansi cifukwa cikulu cupangisha munthu kubatizika n’cinji? Yesu efotokoza lamulo ikulu ya Mulungu pecilaŵila kuti: “Ukokonda Yehova Mulungu wako na mtima wako wonse, moyo wako wonse, maganizo ŵako onse na mphamvu zako zonse.” (Mko. 12:30) Kansi umu niye mwamumukondela Mulungu?

12. Ndaŵa yanji mukonda Yehova? (Onani soti cithunzithunzi.)

¹² Pali vifukwa vinyinji vamene vutipangisha kukonda Yehova. Mwacisanzo, muziŵa  kuti yove niye “Mwineco wa moyo” na kuti niye otipasa “mphaso iliyonse iweme koma soti yangwilo.” (Sal. 36:9; Yak. 1:17) Vinthu vonse vabwino vamusangalala navo vufumila kuli Mulungu wasu wacikondi.

13. Ndaŵa yanji dipo ni mphaso yamtengo wapatali?

¹³ Dipo ni mphaso yamtengo wapatali yecitipasa Yehova. Ndaŵa yanji talaŵila teti? Ganizilani ushamwali wotang’a wamene uli pakati pa Yehova na Mwana wake. Yesu elaŵila kuti: “Atata onikonda” na kuti “nukonda Atata.” (Yoh. 10:17; 14:31) Ushamwali wao wetang’a ngako peenzoseŵenzela pamozi kwa vyaka masauzande anyinji. (Miy. 8:22, 23, 30) Lomba ganizilani tyala mwecemuŵaŵila Yehova pecilola Mwana wake kuvutika na kufwa. Yehova okonda ngako ŵanthu kuyangizhyilapo mweo, cakuti epeleka Mwana wake wokondeka monga nsembe kuti mweo na ŵanthu ayakine mukapeze moyo wosasila. (Yoh. 3:16; Aga. 2:20) Ici niye cifukwa cikulu ngako cutipangisha kukonda Mulungu.

14. Kansi ni colinga cabwino cotyani camungaziikile mu umoyo wanu?

¹⁴ Cikondi canu pa Yehova cakulilako cifukwa cophunzila zinyinji zokhuza yove. Kulaŵila cendi, mufuna kunkhala naye pafupi lomba koma soti mpaka kale-kale. Ndipo mungakwanishe kucita izi. Mwacikondi, yove okulimbikishani kuti mukocita zinthu zokondwelesha mtima wake. (Miy. 23:15, 16)  Mungacite izi osati tyala na mau, koma na zocita zanu. Zamucita mu umoyo wanu niye zingaoneshe ngati mumukonda cendi Yehova. (1 Yoh. 5:3) Ici niye colinga cabwino camungaziikile mu umoyo wanu.

15. Kansi mungaoneshe tyani kuti mumukonda Yehova?

¹⁵ Kansi mungaoneshe tyani kuti mumukonda Yehova? Coyamba, mupeleka pemphelo yozipeleka kwa Mulungu wacendi. (Sal. 40:8) Caciŵili, mulengeza patuŵa kuzipeleka kwanu mwa kubatizika. Monga ni mwatalaŵilila koyambilila kwa nkhani ino, kubatizika niye cinthu capadela mu umoyo wanu. Talaŵila teti cifukwa pa nthawi iyi muyamba umoyo walomba, osati wofuna kuzikondwelesha mweka koma kukondwelesha Yehova. (Aro. 14:8; 1 Pet. 4:1, 2) Ici ni cosankha cikulu ngako camufunika kupanga. Ndipo cukusegulilani mwai wonkhala na umoyo wabwino ngako. Ndaŵa yanji talaŵila teti?

16. Molingana na Salimo 41:12, kansi Yehova akaŵapase mphoto yotyani ŵanthu amene asankha kumutumikila?

¹⁶ Yehova ni wawanzi ngako kupambana munthu aliyense. Mosasamala kanthu za zinthu zamungamupase, yove akuwezhyeleni zinyinji. (Mko. 10:29, 30) Akupaseni moyo wabwino olo m’calo cino ciipa. Ndipo ici ni ciyambi tyala. Umoyo wamuyamba pa ubatizo wanu usile lini. Mupitilizhye kutumikila Ausuwanu acikondi mpaka kale-kale. Cikondi camene cili pakati pa mweo na Ausuwanu cipitilizhye kukula ndipo mukankhale na moyo mpaka kale-kale monga ni yove.​—Ŵelengani Salimo 41:12.

17. N’cinji camungapase Yehova camene yove aliye?

¹⁷ Mukazipeleka nobatizika, munkhala na mwai wopasa Ausuwanu cinthu camtengo wapatali ngako. Yove ekupasani zinthu zonse ziweme zamusangalala nazo. Tetyo, mungapase Mwineco wa kululu na calo cinthu camene yove aliye. Cinthu ici ni kufunishisha kwanu koma soti kukhulupilika kwanu pomutumikila. (Yobu 1:8; 41:11; Miy. 27:11) Iyi niye njila yabwino ngako yamungaseŵenzeshelemo moyo wanu. Mosakaikila, cikondi canu pa Yehova niye cifukwa cikulu cufunika kukupangishani kubatizika.

18. Kansi ni makonsho yotyani yamungazikonshe?

¹⁸ Kansi mungayankhe tyani konsho yakuti, Kansi mubatizike? Mweo niye muziŵa. Koma zingakuyavyeni ngati mungazikonshe kuti, ‘Kansi n’cinji cunikangisha kubatizika?’ olo, ‘Kansi nuyembekezela cinji kuti nibatizike?’ (Mac. 8:36) Kumbukilani vifukwa vitatu vatalaŵizhyana m’nkhani ino. Coyamba, mukonda cendi na cilungamo. Zikonsheni kuti, ‘Kansi n’ne wofunishisha kuyoona ŵanthu onse olaŵila cendi nocita zinthu m’njila yacilungamo?’ Caciŵili, mukonda Yesu Khristu. Zikonsheni kuti, ‘Kansi nufunishisha kuti Mwana wa Mulungu ankhale Mfumu yangu na kuti nikotolela cisanzo cake?’ Ndipo cacitatu koma soti cofunika ngako, mukonda Yehova. Zikonsheni kuti, ‘Kansi nufunishisha kukondwelesha mtima wa Yehova mwa kumutumikila monga Mulungu wangu?’ Ngati mwayankha kuti eee pa makonsho yonse aya, kansi n’cinji cukuleshani kubatizika? Kansi muyembekezela cinji?​—Mac. 16:33.

19. Ndaŵa yanji mufunika lini kuwayawaya kuti mubatizike? Fotokozani fanizo. (Yohane 4:34)

¹⁹ Ngati muwayawaya kuti mubatizike, ganizilani fanizo yeciseŵenzesha Yesu. (Ŵelengani Yohane 4:34.) Yesu elinganizhya kucita cifunilo ca Mulungu na cakulya. Ndaŵa yanji? Cakulya n’cofunika ngako kuli seo tonse. Yesu enzoziŵa kuti zinthu zili zonse zakutisenga Yehova kuti ticite, n’zopindulisha kuli seo. Yehova ofuna lini kuti tikocita zinthu zamene posilizhyila pake zingatiletele mavuto. Kansi Yehova ofuna kuti mubatizike? Eee. (Mac. 2:38) Tetyo, mungankhale osimikizhya kuti kumvwila lamulo yakuti mubatizike kukupindulisheni. Ngati muwayawaya lini kulya cakulya ciweme, ndaŵa yanji muwayawaya kuti mubatizike?

20. Kansi tikalaŵizhyane cinji m’nkhani yokonkhapo?

²⁰ Kansi muyembekezela cinji kuti mubatizike? Anyinji angayankhe kuti: ‘N’ne wosakonzeka.’ Koma mfundo yacendi ni yakuti , kuzipeleka kwa Yehova nobatizika n’cosankha cofunika ngako camufunika kupanga. Tetyo, mufunika kuganizilapo mosamala pa cosankha ici ndipo zingatole nthawi koma soti khama kuti mukwanilishe ziyeneleso. Koma ngati mufunishisha kubatizika, kansi n’cinji cingakuyavyeni kukonzekela? Nkhani yokonkhapo ikayankhe konsho iyi.