1. Kansi ayakine mwa atumiki a Yehova okhulupilika okaikila cinji?

 NI CINTHU cokondwelesha kuziŵa kuti Yehova okondwela na atumiki ŵake monga gulu. Baibo yulaŵila kuti: “Yehova okondwela nao ŵanthu ŵake.” (Sal. 149:4) Nthawi ziyakine, ŵanthu ayakine angayambe kukaikila ngati Yehova okondwela nao. Ŵanthu anyinji otomolewa m’Baibo amene etumikila Yehova mokhulupilika, pa nthawi iyakine enkhalako na maganizo oteti.—1 Sam. 1:​6-10; Yobu 29:​2, 4; Sal. 51:11.

2. Kansi Yehova okondwela na ŵanthu otyani?

² Baibo yufotokoza momvwika bwino kuti olo kuti ŵanthu aliye ungwilo, angankhale ovomelezhyeka kwa Yehova. Motyani? Mwa kukhulupilila Yesu nobatizika. (Yoh. 3:16) Mwa njila iyi, tuonesha kuli ayakine kuti telapa macimo ŵasu na kuti tepanga lonjezo yakuti tikocita cifunilo ca Mulungu. (Mac. 2:38; 3:19) Yehova okondwela ngako ngati tacita zinthu izi na colinga cakuti tinkhale pa ushamwali na yove. Tetyo, ngati tuyesayesa kukwanilisha lonjezo yasu yakuti timutumikile, Yehova okondwela ngako ndipo otiona kuti nise ashamwali ŵake a pa mtima.—Sal. 25:14.

3. Kansi tilaŵizhyane makonsho atatu otyani?

³ Ndaŵa yanji nthawi ziyakine ŵanthu ayakine angazimvwe kuti Yehova okondwela lini nao? Kansi Yehova oonesha tyani kuti okondwela nase? Kansi Mkhristu angasimikizhye tyani kuti Yehova okondwela naye?

CIFUKWA CAKE ŴANTHU AYAKINE OONA KUTI YEHOVA OKONDWELA LINI NAO

4-5. Olo kuti nthawi ziyakine tingazimvwe kunkhala atyalatyala, kansi tingankhale osimikizhya za cinji?

⁴ Kuyambila petenze ŵana, anyinji a seo pa nthawi iyakine temvwapo kuti nise atyalatyala. (Sal. 88:15) Mkwasu wa zina yakuti  Adrián elaŵila kuti: “Nenzozimvwa kuti n’ne watyalatyala. Penenze mlumbwana, nukumbukila kuti nenzopemphela kuti banja yasu ikankhale m’Paladaiso olo kuti nenze lini wosimikizhya kuti n’ne woyenelela kuyopezekamo.” Tony wamene aliyokulile m’banja ya Mboni, elaŵila kuti: “Makolo ŵangu aliyoniuzhyepo kuti onikonda olo kukondwela nane. Izi zenzonipangisha kuona kuti paliye ciliconse caningacite kuti niŵakondweleshe.”

⁵ Ngati nthawi ziyakine tuziona kuti nise atyalatyala, tufunika kukumbukila kuti Yehova niye etileta pafupi na yove. (Yoh. 6:44) Yove oona zabwino muli seo zamene seo tingazione lini ndipo oziŵa mtima wasu. (1 Sam. 16:7; 2 Mbi. 6:30) Tetyo, tingakhulupilile ngati watiuzhya kuti nise ofunika ngako kuli yove.—1 Yoh. 3:​19, 20.

6. Kansi mtumwi Paulo ecimvwa tyani peciganizila vinthu vecilakwisa kuvuli?

⁶ Tikaliyophunzila cendi, ayakine a seo telakwisapo zinthu zamene olo pali lomba tikaluziimba mlandu. (1 Pet. 4:3) Ayakine amene ankhala otumikila Yehova mokhulupilika, nthawi ziyakine angovutika maganizo cifukwa ca vinthu vecilakwisa kuvuli. Tyani ponena za mweo? Kansi nthawi ziyakine mukumvwa kuti Yehova angakukhululukileni lini? Ngati n’tetyo, mungatonthozewe poziŵa kuti ayakine mwa atumiki a Yehova okhulupilika emvwako cimozimozi. Mwacisanzo, mtumwi Paulo evutikapo maganizo peciganizila zinthu zecilakwisa kuvuli. (Aro. 7:24) Izi zenzocitika, apo n’kuti walapa macimo ŵake nobatizika. Olo n’tetyo, yove elaŵila kuti ‘niye enze mtontho pa atumwi onse’ na kuti niye enze wocimwa “ngako.”—1 Akor. 15:9; 1 Tim. 1:15.

7. Kansi tingankhale na cidalilo cotyani ngati telapa macimo ŵasu mofumila pansi pa mtima?

⁷ Ausuwasu akululu olonjeza kuti akotikhululukila ngati talapa. (Sal. 86:5) Tetyo, ngati talapa mofumila pansi pa mtima, tingankhale na cidalilo cakuti zakulaŵila Yehova n’zacendi ndipo watikhululukila.—Akol. 2:13.

8-9. Kansi tingagonjese tyani maganizo oziona kuti tingakwanishe lini kucita zinyinji kuti tikondweleshe Yehova?

⁸ Tonse tufuna kucita zilizonse zatingakwanishe kuti titumikile Yehova. Koma ayakine angaone kuti ocita lini zinyinji kuti akondweleshe Yehova. Kalongosi wa zina yakuti Amanda elaŵila kuti: “Kanyinji-kanyinji, nukonda kuganiza kuti kucita zilizonse zaningakwanishe, kutanthauza kucita zinyinji. Tetyo, nukonda kufuna kucita zinyinji kupambana zaningakwanishe. Koma ngati nakangiwa, nukonda kuganiza kuti Yehova aliyokondwele monga ni mwanamvwila neo.”

⁹ Kansi tingagonjese tyani maganizo oziona kuti tingakwanishe lini kucita zinyinji kuti tikondweleshe Yehova? Kumbukilani kuti Yehova oziŵa zatingakwanishe ndipo angatiuzhye lini kucita zinthu zakuti tingakwanishe lini. Yove oyamikila zilizonse zatingakwanishe malinga ngati tuzicita na mtima wonse. Mukoganizila soti za ŵanthu amene etumikila Yehova na mtima wonse. Mwacisanzo, ganizilani za Paulo. Yove eseŵenza mwamphamvu kwa vyaka vinyinji, kuyenda misenga itali-itali nonkhazikisha mipingo. Olo n’tetyo, zinthu zecinja pa umoyo wake cakuti enzokwanisha lini kucita zinyinji polalikila monga ni mweenzocitila kale. Kansi izi zetanthauza kuti Yehova enzosangalala lini naye? Yai. Yove epitilizhya kucita zeenzokwanisha ndipo Yehova emudalisa. (Mac. 28:​30, 31) Molingana na izi, nase zinthu zingacinje pa umoyo cakuti tingakwanishe lini kucita zinyinji monga ni mwetenzocitila kale. Koma cofunika ngako kwa Yehova, ni colinga catucitila zamene izo. Lomba, tiyeni tilaŵizhyane njila ziyakine zakuoneshelamo Yehova kuti okondwela nase.

 KANSI YEHOVA OONESHA TYANI KUTI OKONDWELA NASE?

10. Kansi ni m’njila yotyani mwamene Yehova otiuzhyila kuti okondwela nase? (Yohane 16:27)

¹⁰ Kupitila m’Baibo. Yehova osakila njila zooneshela atumiki ŵake kuti oŵakonda na kuti okondwela nao. Baibo yufotokoza zocitika ziŵili pamene Yehova euzhya Yesu kuti ni wokondeka na kuti okondwela naye. (Mat. 3:17; 17:5) Kansi mungasangalale kumvwa kuti Yehova okondwela namwe? Yehova olaŵila lini nase mwacindunji. Koma olaŵila nase kupitila m’Mau ŵake Baibo. Tikaŵelenga mau acikondi amene Yesu enzouzhya ophunzila ŵake, zunkhala monga kuti tukumvwa Yehova ouzhya seo mau amene ao. (Ŵelengani Yohane 16:27.) Yesu eonesha ndendende minkhalidwe ya Ausuwake. Tetyo, tikaŵelenga mau a Yesu amene oonesha kuti enzokondwela na okonkha ŵake amene enzeve ungwilo, tikoganizila kuti Yehova ouzhya seo mau amene ao.—Yoh. 15:​9, 15.

11. Ndaŵa yanji tingalaŵile kuti kukumana na mayeselo kutanthauza lini kuti Yehova okondwela lini nase? (Yakobo 1:12)

¹¹ Kupitila mu zinthu zakuticitila. Mwa kutipasa zinthu zamuŵili, Yehova oonesha kuti ni wofunishisha kutiyavya. Koma nthawi ziyakine Yehova angalole zinthu ziipa kuticitikila monga ni mwezecitikila kwa Yobu. (Yobu 1:​8-11) Koma zacendi n’zakuti mayeselo otanthauza lini kuti Yehova okondwela lini nase. M’malo mwake, yotipasa mwai woonesha mwatumukondela Mulungu nomudalila. (Ŵelengani Yakobo 1:12.) Patukumana na mayeselo, tione mwakutikondela na mwakutiyavyila kuti tipilile.

12. Kansi tingaphunzilepo cinji pa cokumana naco ca mkwasu Dmitrii?

¹² Ganizilani zecitikila mkwasu muyakine wa ku Asia wa zina yakuti Dmitrii. Yove ecosewa nchito ndipo pepita miyezi inyinji kuti apeze iyakine. Tetyo, eganiza zoyangizhyila utumiki wake, zamene zeonesha kuti enzodalila Yehova. Miyezi yenze kungokuya koma enzopeza lini nchito. Pavuli pake, elwala ngako cakuti enzonkhala yone. Izi zepangisha kuti ayambe kuganiza kuti enze lini mulume koma soti atata abwino. Kuyangizhyila apo, eyamba kukaikila ngati Yehova enzokondwela naye. Usiku uyakine, mwana wake munakazi elemba pa pepa mau opezeka pa Yesaya 30:15 amene akuti: “Munkhale amphamvu mukankhala odekha koma soti acikhulupililo.” Pavuli pake, etwala kuli ausuwake amene enze lele pa bedi nolaŵila  kuti, “Atata, mukankhala na maganizo ofookesha mukokumbukila lemba iyi.” Pa nthawi iyi, mkwasu Dmitrii enze na vakulya, vovwala na ng’anda. Yove elaŵila kuti, “Cenenzofunikila kucita ni kunkhala odekha nopitilizhya kudalila Mulungu.” Ngati mukumana na mayeselo olingana na aŵa, mungankhale na cidalilo cakuti Yehova osamala za mweo ndipo akuyavyeni kuti mupilile.

13. Kansi Yehova angaseŵenzeshe ŵani pofuna kutionesha kuti okondwela nase, ndipo motyani?

¹³ Kupitila muli olambila ayasu. Yehova oseŵenzesha akwasu na azilongosi pofuna kutionesha kuti okondwela nase. Mwacisanzo, angasonkhezele ayakine kulaŵila mau olimbikisha pa nthawi yoyenela. Izi niye zecitikila kalongosi muyakine wa ku Asia pa nthawi yeenzovutika maganizo. Yove ecosewa nchito ndipo elwala ngako. Pavuli pake, mulume wake ecita cimo ikulu ndipo ecosewa pa udindo monga mkulu. Elaŵila kuti: “Nenzomvwisha lini cifukwa cake zinthu izi zenzonicitikila. Neganiza kuti payakine necita cinthu ciyakine ciipa cakuti Yehova enzokondwela lini nane.” Yove esenga Yehova kuti amuyavye kusimikizhyila kuti enzomukonda. Kansi Yehova eyankha tyani pemphelo yake? Kalongosi uyu elaŵila kuti: “Akulu a mumpingo mwasu eniyavya kuona kuti Yehova enzonikonda.” Pavuli pake, esenga soti Yehova kuti amuyavye. Elaŵila soti kuti: “Pa siku yamene iyo, nelandila kalata kufumila ku gulu ya akwasu na azilongosi a mumpingo mwasu ndipo peneŵelenga mau ŵao otonthoza, nezindikila kuti Yehova wanimvwa.” Kulaŵila cendi, Yehova oonesha kuti otikonda kupitila m’mau olimbikisha ofumila kuli ayakine.—Sal. 10:17.

14. Ni njila iyakine yotyani yakuoneshelamo Yehova kuti okondwela nase?

¹⁴ Yehova oonesha soti kuti okondwela nase mwa kuseŵenzesha olambila ayasu kuti atipase uphungu ngati ni pofunikila. Mwacisanzo, mu  vyaka 100 voyambilila, Yehova eseŵenzesha mtumwi Paulo kulemba makalata ouzhyiliwa 14 kuli okhulupilila ayake. M’makalata aya, Paulo epasa akwake uphungu wosapita m’mbali koma mwacikondi. Ndaŵa yanji Yehova euzhyila Paulo kulemba uphungu woteti? N’cifukwa cakuti Yehova ni Atata wabwino amene olanga ŵana ŵake “ŵakukonda.” (Miy. 3:​11, 12) Tetyo, ngati munthu muyakine watipasa uphungu, zutanthauza lini kuti Yehova ekhumudwa nase. M’malo mwake, zuonesha kuti Yehova akalutikonda. (Aheb. 12:6) Kansi ni zinthu ziyakine zotyani zuonesha kuti Yehova otikonda?

MAUMBONI AYAKINE OONESHA KUTI YEHOVA OKONDWELA NASE

15. Kansi Yehova opeleka mzimu wake utuŵa kuli ŵani, ndipo ndaŵa yanji izi zingatipase cidalilo?

¹⁵ Yehova opeleka mzimu utuŵa kuli ŵanthu ŵakukondwela nao. (Mat. 12:18) Tetyo tingazikonshe kuti, ‘Kansi nuonesha iyakine mwa minkhalidwe ya mzimu utuŵa pa umoyo wangu?’ Kansi lomba muonesha ngako kuti nimwe oleza mtima kupambana pemwenze mukaliyophunzila cendi? Ngati mupitilizhya kuonesha minkhalidwe ya mzimu wa Mulungu, zingakuyavyeni kunkhala na cidalilo cakuti Yehova okondwela namwe.—Onani kabokosi kakuti “ Minkhalidwe ya Mzimu Ni . . . ”

16. Kansi Yehova oseŵenzesha ŵani kulalikila uthenga uweme, ndipo izi zukupangishani kumvwa tyani? (1 Atesalonika 2:4)

¹⁶ Yehova wapeleka mwai wolalikila uthenga uweme kuli ŵanthu ŵakukondwela nao. (Ŵelengani 1 Atesalonika 2:4.) Onani mwecipindulila kalongosi Jocelyn cifukwa couzhyako ayakine uthenga uweme. Siku iyakine peciuka m’mawa, kalongosi uyu evutika ngako maganizo. Elaŵila kuti: “Nenzeve mphamvu ndipo nezimvwa kuti n’ne watyalatyala. Pa nthawi iyi, nenzocita upainiya ndipo yenze siku yakuti nilute mu utumiki. Tetyo, nepemphela, pavuli pake neluta mu utumiki.” Pa siku yamene iyi m’mawa peciluta mu utumiki, kalongosi Jocelyn ekumana na Mary wamene evomela kuphunzila Baibo. Pavuli pa miyezi, Mary efotokoza kuti siku yoyamba pamene kalongosi Jocelyn enzogogoda paciseko ca ng’anda yake, yove enzopemphela kwa Mulungu kuti amuyavye. Poganizila cocitika ici, kalongosi Jocelyn elaŵila kuti, “Necimvwa monga kuti Yehova oniuzhya kuti, ‘Nukondwela nawe.’” N’cendi kuti ni ŵanthu lini onse angamvwishile  uthenga wasu. Koma tingankhale osimikizhya kuti Yehova osangalala ngako ngati tucita zilizonse zatingakwanishe kuti tiuzhyeko ayakine uthenga uweme.

17. Kansi mwaphunzilanji pa zecilaŵila kalongosi Vicky pa nkhani ya dipo? (Salimo 5:12)

¹⁷ Yehova oseŵenzesha mtengo wa dipo kuli ŵanthu ŵakukondwela nao. (1 Tim. 2:​5, 6) Nanga tyani ngati tikalukaikila kuti Yehova okondwela nase olo kuti tukhulupilila nsembe ya dipo koma soti tebatizika? Kumbukilani kuti ni nthawi lini zonse patufunika kukhulupilila mwatumvwila. M’malo mwake, tufunika kudalila Yehova. Yove oona ŵala amene okhulupilila dipo kuti ni olungama m’menso mwake ndipo olonjeza kuti akoŵadalisa. (Ŵelengani Salimo 5:12; Aro. 3:26) Kusinkhasinkha pa dipo kweyavya kalongosi Vicky. Siku iyakine peenzoganizila pa dipo, elaŵila kuti: “Yehova wankhala onilezela mtima kwa nthawi itali. . . . Koma zenze monga kuti nenzomuuzhya kuti: ‘Mungakonde lini munthu monga ni neo ndipo nsembe ya Mwana wanu ingaziŵilizhye lini macimo ŵangu.’” Mwa kusinkhasinkha pa dipo, eyamba kumvwa kuti okondewa na Yehova. Nase tingamvwe kuti tukondewa na Yehova nozindikila kuti nise ovomelezhyeka kwa yove ngati tusinkhasinkha pa dipo.

18. Kansi tingankhale na cidalilo cotyani ngati tupitilizhya kukonda Ausuwasu akululu?

¹⁸ Olo kuti tingayeseyese kuseŵenzesha mfundo zatalaŵizhyana, nthawi ziyakine tingakhumudwe nokaikila ngati Yehova okondwela nase. Ngati zoteti zaticitikila, tufunika kukumbukila kuti Yehova okondwela na “ŵala amene opitilizhya kumukonda.” (Yak. 1:12) Tetyo, tiyeni tipitilizhye kuvwendela pafupi na Yehova nozindikila njila zonse zamene zuonesha kuti okondwela nase. Ciyakine, osaluŵa kuti Yehova “ali lini kutali na aliyense wa seo.”—Mac. 17:27.