1-2. Kansi munthu ofunika kucita cinji akaliyobatizika?

 MU VYAKA 5 vapita, ŵanthu opitilila 1 miliyoni ebatizika nonkhala Mboni za Yehova. Molingana na wophunzila wa m’vyaka 100 voyambilila Timoteyo, anyinji mwa ŵanthu aŵa ephunzila cendi “kuyambila peenze lucece.” (2 Tim. 3:​14, 15) Ayakine ephunzila zokhuza Yehova apo n’kuti ni akulu ndipo ayakine peenze akulukazi. Munakazi muyakine ephunzila Baibo na Mboni za Yehova nobatizika peenze na vyaka 97.

² Ngati muphunzila Baibo olo ngati musungiwa na makolo amene ni Mboni, kansi muganizila zobatizika? Ici ni colinga cabwino ngako camungaziikile. Koma mukaliyobatizika, mufunika kuzitwala kwa Yehova. Nkhani ino ifotokoze tanthauzo ya kuzitwala kwa Yehova. Ikuyavyeni soti kuona cifukwa cake mufunika lini kuwayawaya kutola sitepu iyi nobatizika ngati nimwe okonzeka kucita tetyo.

KANSI KUZITWALA KWA YEHOVA KUTANTHAUZANJI?

3. Fotokozani visanzo va m’Baibo va ŵanthu amene enze ozipeleka kwa Yehova.

³ M’Baibo, kuzipeleka kutanthauza kusankhiwa na colinga capadela. Aisiraeli enze mtundu wozitwala kwa Yehova. Koma ŵanthu ayakine pakati pa Aisiraeli enze ozitwala kwa Yehova m’njila yapadela. Mwacisanzo, Aroni enzovwala duku yamene yenze na kansimbi koŵeka ka golide kamene kenzopanamila “cizindikilo copatulika ca kuzipeleka.” Kansimbi ka golide aka, kenzoonesha kuti yove esankhiwa kuti atumikile Yehova m’njila yapadela monga mkulu wa ansembe. (Lev. 8:9) Nao  Anazili enze ozipeleka kwa Yehova m’njila yapadela. Mau akuti “Mnazili” ofumila ku mau Aciheberi akuti nazirʹ amene otanthauza “Wosankhiwa” olo “Wozipeleka.” Anazili enzofunika kumvwila malamulo apadela amene elembewela ove m’Cilamulo ca Mose.—Num. 6:​2-8.

4. (a) Mukazipeleka kwa Yehova, n’cinji cunkhala cofunika ngako pa umoyo wanu? (b) Kansi ‘kuzikana’ kutanthauzanji? (Onani soti cithunzithunzi.)

⁴ Mukazipeleka kwa Yehova, musankha kunkhala wophunzila wa Yesu Khristu noika cifunilo ca Mulungu pasogolo mu umoyo wanu. Kansi kuzipeleka kuyangizhyilapo cinji? Yesu elaŵila kuti: “Ngati munthu ofuna kunikonkha, azikane yeka.” (Mat. 16:24) Mau Acigiliki amene emasuliliwa kuti “azikane yeka,” yangamasuliliwe soti kuti “akane kuzikondwelesha yeka.” Monga mtumiki wozitwala kwa Yehova, mukofunika kukana cinthu ciliconse camene cukatizhyana lini na cifunilo ca Mulungu. (2 Akor. 5:​14, 15) Izi zuyangizhyilapo kukana “nchito zamuŵili” monga ciwelewele. (Aga. 5:​19-21; 1 Akor. 6:18) Kansi kumvwila malamulo oteti kukupangisheni kuti munkhale na umoyo wovuta? Ngati mumukonda Yehova ndipo musimikizhyila kuti njila zake zukupindulishani, mungankhale na umoyo wabwino ngako. (Sal. 119:97; Yes. 48:​17, 18) Mkwasu muyakine wa zina yakuti Nicholas elaŵila kuti: “Mungasankhe kuona malamulo a Yehova monga ni vinsimbi va ku jele vamene vukulondani ufulu olo monga ni vinsimbi vamene vingakutetezeni kuti musalyewe na nkhalamu.”

5. (a) Kansi muzipeleka tyani kwa Yehova? (b) Kansi pali kusiyana kotyani pakati pa kuzipeleka na ubatizo? (Onani soti cithunzithunzi.)

⁵ Kansi muzipeleka tyani kwa Yehova? Mumulonjeza kupitila m’pemphelo kuti mukolambila yove yeka ndipo mukoika cifunilo cake pasogolo mu umoyo wanu. Mulonjeza Yehova  kuti mupitilizhye kumukonda na “mtima wanu wonse, moyo wanu wonse, maganizo ŵanu onse na mphamvu zanu zonse.” (Mko. 12:30) Muzipeleka apo n’kuti muli mwaŵili, mweo na Yehova. Mosiyana na izi, ubatizo ucitika pamenso pa ŵanthu. Tetyo mwakubatizika, muonesha ku ŵanthu kuti mwezipeleka. Kuzipeleka ni lumbilo yopatulika ndipo Yehova oyembekezela kuti mukocita zinthu mokatizhyana na lumbilo iyi. Colinga canu ni kukwanilisha lumbilo iyi.—Mla. 5:​4, 5.

NDAŴA YANJI MUFUNIKA KUZIPELEKA KWA YEHOVA?

6. N’cinji cusonkhezela munthu kuti azipeleke kwa Yehova?

⁶ Cifukwa cikulu camene cufunika kukusonkhezelani kuti muzipeleke kwa Yehova n’cakuti mumukonda. Cikondi ici ciliyoyambe ceka. M’malo mwake, mweyamba kukonda Yehova cifukwa ‘coziŵa molondola’ koma soti ‘kumvwisha zinthu zauzimu’ zemwephunzila ponena za Yehova. (Akol. 1:9) Kuphunzila Malemba kwakusimikizhyilani kuti (1) Yehova ni wenewene, (2) Baibo ni Mau ŵake ouzhyiliwa na (3) kuti oseŵenzesha gulu yake kuti akwanilishe cifunilo cake.

7. Kansi tufunika kucita cinji tikaliyozipeleka kwa Mulungu?

⁷ Ŵala amene ozipeleka kwa Yehova ofunika kuziŵa ziphunziso zoyambilila za m’Mau a Mulungu nocita zinthu mokatizhyana na malamulo ŵake. Kuyangizhyila apo, ocita zilizonse zaangakwanishe kuti auzhyeko ŵanthu ayakine zinthu zeciphunzila. (Mat. 28:​19, 20) Cikondi cao pa Yehova cakula ndipo ofunishisha kulambila yove yeka. Kansi umu niye mwamumvwila? Ngati mukonda Yehova  na mtima wanu wonse, muzitwale lini kwa Yehova nobatizika, tyala cifukwa cakuti mufuna kukondwelesha okuphunzisani Baibo na makolo ŵanu olo cifukwa cakuti niye zakucita ayanu onse.

8. Kansi kuyamikila kungakuyavyeni tyani kupanga cosankha cakuti muzipeleke kwa Yehova? (Salimo 116:​12-14)

⁸ Mukaganizila zinthu zonse ziweme zawakucitilani Yehova, munkhale oyamikila ndipo munkhale na cifuno cakuti muzipeleke. (Ŵelengani Salimo 116:​12-14.) Baibo yulaŵila kuti “mphaso iliyonse yabwino koma soti yangwilo” yufumila kululu. (Yak. 1:17) Mphaso ikulu ngako yecitipasa Yehova ni nsembe ya Mwana wake Yesu. Ganizilani tyala. Dipo yecitisha kuti zinkhale zokwanishika kuti munkhale pa ushamwali na Yehova. Ndipo wakupasani ciyembekezo cakuyonkhala na moyo wosasila msogolo. (1 Yoh. 4:​9, 10, 19) Kuzitwala kwa Yehova ni imozi mwa njila zabwino ngako zamungaoneshelemo kuti muyamikila dipo koma soti vinthu viyakine viweme vawakupasani Yehova. (Deut. 16:17; 2 Akor. 5:15) Ciyamikilo coteti cufotokozewa bwino m’buku ya Sangalalani na Moyo Kosasila! mutu 46, mfundo 4 yamene yuyangizhyilapo na vidyo ya maminesi atatu yakuti Pelekani Mphaso Zanu Kwa Mulungu.

KANSI MWAKONZEKA KUTI MUZIPELEKE NOBATIZIKA?

9. Ndaŵa yanji munthu ofunika lini kukakamizhyika kuti azipeleke kwa Yehova?

⁹ Payakine mungamvwe kuti mukaliyokonzeka kuti muzipeleke nobatizika. Payakine mufunika kupanga masinthidwe ayakine pa umoyo wanu kuti mukokonkha malamulo a Mulungu. Olo payakine mukalufunika nthawi kuti mutang’ishe cikhulupililo canu. (Akol. 2:​6, 7) Ophunzila Baibo onse okulila lini pamozi mwauzimu ndipo acilumbwana onse obatizikila lini pamozi. Tetyo, mukoyesa kuona zinthu zamufunika kucinja pa umoyo wanu nocita zonse zamungakwanishe osati mozilinganizhya na ŵanthu ayakine.—Aga. 6:​4, 5.

10. Kansi mungacitenji ngati muona kuti mukaliyokonzeka kuti muzipeleke nobatizika? (Onani soti kabokosi kakuti “ Kwa Ŵala Amene Olelewa na Makolo Amene ni Mboni.”)

¹⁰ Olo kuti muona kuti mukaliyokonzeka kuti muzitwale kwa Yehova, pitilizhyani kuziikila colinga ici. Mukosenga Yehova kuti akuyavyeni kupanga masinthidwe yaliyonse yangafunikile. (Afil. 2:13; 3:16) Mungankhale osimikizhya kuti aamvwe pemphelo yanu ndipo akuyavyeni.—1 Yoh. 5:14.

CIFUKWA CAKE AYAKINE OWAYAWAYA KUTI AZIPELEKE NOBATIZIKA

11. Kansi Yehova angatiyavye tyani kuti tipitilizhye kunkhala okhulupilika kwa yove?

¹¹ Ayakine ni okonzeka kuti azipeleke nobatizika koma akaluwayawaya. Ove ali na nkhaŵa poganiza kuti pavuli pakuti abatizika, angacite cimo ikulu ndipo angacosewe mumpingo. Ngati namwe mukumvwa teti, nkhalani osimikizhya kuti Yehova akupaseni zilizonse zamufunikila kuti mupitilizhye ‘kuyenda mokatizhyana na zakufuna yove kuti mumukondweleshe pa ciliconse.’ (Akol. 1:10) Akupaseni soti mphamvu yocita zoyenela. Yove waonesha kale kuti angakwanishe kucita izi mwa kuyavya ŵanthu anyinji kucita zinthu zoyenela. (1 Akor. 10:13) Niye cifukwa cake pali tyala ŵanthu atontho amene ecosewa mumpingo wacikhristu. Yehova oyavya ŵanthu ŵake kupitilizhya kunkhala okhulupilika.

12. Kansi tingapewe tyani kucita cimo ikulu?

¹² Cifukwa cakuti munthu aliyense aliye ungwilo, oyesewa kuti acite vinthu viipa. (Yak. 1:14) Koma mufunika kusankha  zamungacite ngati mwayesewa. Zacendi n’zakuti mweo niye muli na mphamvu zoyendeshela umoyo wanu. Ayakine olaŵila kuti tingakwanishe lini kuongolela mwatumvwila na zatingacite. Koma uyu ni wenye. Mungaphunzile kuongolela vilakolako vanu viipa. Tetyo, olo kuti mwayesewa mungasankhe kupewa kucita cinthu ciipa. Pali vinthu vamene vingakuyavyeni kupewa kucita cimo. Mwacisanzo, mukopemphela siku iliyonse, mukonkhala na ndandanda iweme yophunzilila Mau a Mulungu pamweka, ndipo mukopezeka pa misonkhano yacikhristu. Kuyangizhyila apo, mukouzhyako ayakine za cikhulupililo canu. Kucita izi nthawi zonse kukuyavyeni kuti munkhale otang’a na kuti mupitilizhye kunkhala okhulupilika kwa Yehova. Nthawi zonse mukokumbukila kuti Yehova akuyavyeni.—Aga. 5:16.

13. Ni cisanzo cabwino cotyani cecitisiila Yosefe?

¹³ Cikonkhala cosavuta kupitilizhya kunkhala okhulupilika kwa Yehova ngati muziŵilatu zamungacite ngati mwayesewa. M’Baibo muli visanzo va ŵanthu amene ecita izi olo kuti nao enzeve ungwilo. Mwacisanzo, mowelezhyawelezhya, mkazi wa Potifara enzonyengelela Yosefe kuti alale naye. Koma Yosefe enzoziŵilatu zeenzofunika kucita. Baibo yulaŵila kuti “ekana” ndipo elaŵila kuti: “Ningacitilenji ciipa cikulu teti nocimwila Mulungu?” (Gen. 39:​8-10) N’zoonekelatu kuti Yosefe enze eziŵilatu zaangacite ngati wayesewa. Izi zecitisha kuti cinkhale cosavuta kwa yove kucita cinthu coyenela pavuli pakuti wayesewa.

14. Ni cinji cingatiyavye kugonjesa mayeselo?

¹⁴ Kansi mungatolele tyani cisanzo ca Yosefe nogonjesa mayeselo? Mungacite izi mwa kuziŵilatu pali lomba zati mukacite mukayoyesewa. Phunzilani kukana nthawi yamene iyo zinthu zakuzonda Yehova ndipo mukopewa olo kuziganizila. (Sal. 97:10; 119:165) Ngati mucita izi, mungacimwe lini pavuli pakuti mwayesewa cifukwa muziŵa kale zamufunika kucita.

15. Kansi munthu angaoneshe tyani kuti ‘osakilasakila Yehova na mtima wonse’? (Aheberi 11:6)

¹⁵ Payakine nimwe osimikizhya kuti mwepeza cendi, ndipo mufunishisha kutumikila Yehova na mtima wanu wonse, koma mukaluona kuti nimwe osakonzeka kuzipeleka nobatizika. Ngati n’tetyo, mungacite monga ni zecicita Mfumu Davide. Mungasenge Yehova  kuti: “Nifufuzeni mweo Mulungu, ndipo muziŵe mtima wangu. Nifufuzeni noziŵa maganizo ŵangu amene onicitisha nkhaŵa. Ndipo muone muli neo ngati muli ciliconse camene cunicitisha kuyenda pa njila iipa ndipo munisogolele pa njila yamuyaya.” (Sal. 139:​23, 24) Yehova odalisa ŵala amene “omusakilasakila na mtima wonse.” Kuyesayesa kwamucita kuti mukwanilishe colinga cozipeleka nobatizika, kuonesha kuti mumusakilasakila na mtima wonse.—Ŵelengani Aheberi 11:6.

PITILIZHYANI KUVWENDELA PAFUPI NA YEHOVA

16-17. Kansi Yehova odonsa tyani ŵala amene makolo ŵao ni Mboni? (Yohane 6:44)

¹⁶ Yesu elaŵila kuti ophunzila ŵake odonsewa na Yehova. (Ŵelengani Yohane 6:44.) Ganizilani tyala tanthauzo ya izi kuli mweo. Yehova oona zinthu zabwino muli aliyense ndipo omudonsela kuli yove. Oona munthu aliyense monga “cuma cake capadela.” (Deut. 7:6) Umu niye mwakukuonelani mweo.

¹⁷ Payakine zingankhale kuti nimwe mwana wamene makolo ŵanu ni Mboni. Payakine mungamvwe kuti mutumikila Yehova, tyala cifukwa cakuti makolo ŵanu niye zakucita, osati cifukwa cakuti Yehova ekudonsani. Olo n’tetyo, Baibo yulaŵila kuti: “Vwendelani pafupi na Mulungu ndipo naye avwendele pafupi na mweo.” (Yak. 4:8; 1 Mbi. 28:9) Mukankhala woyamba kuvwendela pafupi na Yehova, naye avwendele pafupi na mweo. Yehova okuonani lini tyala monga mbali ya gulu. Yove odonsa munthu aliyense payeka kuyangizhyilapo na ŵala amene olelewa na makolo amene ni Mboni. Munthu woteti akavwendela pafupi na Yehova, naye ovwendela pafupi monga ni mwayulaŵilila lemba ya Yakobo 4:8.—Linganizhyani na 2 Atesalonika 2:13.

18. Kansi tikalaŵizhyane cinji m’nkhani yokonkhapo? (Salimo 40:8)

¹⁸ Mukazipeleka kwa Yehova nobatizika, mutolela cisanzo ca Yesu. Yove enze wofunishisha kucita ciliconse cecimutuma Ausuwake. (Ŵelengani Salimo 40:8; Aheb. 10:7) Mu nkhani yokonkhapo, tikaphunzile zinthu zingakuyavyeni kuti mupitilizhye kutumikila Yehova mokhulupilika pavuli pakuti mwabatizika.