Tingakhululukiwe macimo ŵasu, tyala kupitila mu nsembe ya dipo yamene Yesu elipila na milopa yake. (Aef. 1:7) Olo n’tetyo, Baibo yulaŵila kuti: “Mulungu ecita izi pofuna kuonesha kuti okalipa lini kamangu mwa kukhululukila macimo a m’nthawi zakuli,” kutanthauza Yesu akaliyopeleka dipo. (Aro. 3:25) Kansi zenzokwanishika tyani kuti Yehova akhululukile macimo, dipo ikaliyopelekewa koma nopitilizhya kunkhala Mulungu wacilungamo?

Yehova elonjeza kuti akapeleke Mwana wake wamene enze kuzopulumusa ŵanthu amene omukhulupilila nokhulupilila malonjezo ŵake. Tetyo, zenze monga kuti dipo yapelekewa kale. (Gen. 3:15; 22:18) Mulungu enze wosimikizhya kuti Mwana wake enze kuzopeleka dipo pa nthawi yoyenelela. (Aga. 4:4; Aheb. 10:​7-10) Yesu peenze pacalo, Yehova emupasa ulamulilo wokhululukila macimo, dipo ikaliyopelekewa. Yesu enzokhululukila macimo ya ŵala amene enze na cikhulupililo cifukwa enzoziŵa kuti nsembe yati akapeleke, yenze kuzoziŵilizhya macimo yao.—Mat. 9:​2-6.