1-2. Kansi munthu olandila madaliso otyani pavuli pobatizika?

 NI MWAI ukulu ngako kunkhala mbali ya banja ya Yehova. Ŵala amene ali na mwai uyu ovomelezhya mau a wamasalimo Davide wamene elaŵila kuti: “Wodala ni munthu wamene mwamusankha kuvwendela pafupi na mweo kuti ankhale mu luŵanza yanu.”—Sal. 65:4.

² Yehova olola lini tyala munthu aliyense kuti ankhale pa ushamwali na yove. Monga ni mwetephunzilila mu nkhani yapita, yove olola tyala ŵala amene aonesha kuti ofuna kunkhala pa ushamwali wotang’a na yove. (Yak. 4:8) Mukazipeleka kwa Yehova nobatizika, muvwendela pafupi na yove m’njila yapadela. Mungankhale osimikizhya kuti mukabatizika, Yehova ‘akukhutulileni madaliso ŵake ndipo musoŵe lini kalikonse.’—Mal. 3:10; Yer. 17:​7, 8.

3. Kansi ni udindo wofunika ngako wotyani waali nao Akhristu amene ezipeleka nobatizika? (Mlaliki 5:​4, 5)

³ Ubatizo ni ciyambi tyala ca utumiki wanu kwa Yehova. Pavuli pakuti mwabatizika, munkhale na cifuno cocita zonse zamungakwanishe kuti musunge lonjezo yanu ya kuzipeleka kwa Yehova olo kuti mwakumana na zinthu zoyesa cikhulupililo canu. (Ŵelengani Mlaliki 5:​4, 5.) Monga wophunzila wa Yesu, mukokonkha cisanzo cake na malamulo ŵake mosamala. (Mat. 28:​19, 20; 1 Pet. 2:21) Nkhani ino ikuyavyeni kucita izi.

PITILIZHYANI KUKONKHA YESU MOSASAMALA KANTHU KUTI MUKUMANA NA MAYESELO

4. Kansi ophunzila a Yesu onyamula tyani “cimuti conzunzikilapo”? (Luka 9:23)

⁴ Pavuli pakuti mwabatizika, mupitilizhye kukumana na mavuto. Yesu elaŵila momvwika bwino kuti ophunzila ŵake ofunika  kunyamula “cimuti conzunzikilapo.” Ndipo ofunika kucita izi “siku iliyonse.” (Ŵelengani Luka 9:23.) Kansi Yesu enzotanthauza kuti ophunzila ŵake akokumana na mavuto nthawi zonse? Yai. Koma enzogogomezela mfundo yakuti kuyangizhyila pa madaliso yakufunika kulandila, akokumana soti na mavuto. Ndipo ayakine mwa mavuto aŵa angankhale ovuta ngako.—2 Tim. 3:12.

5. Kansi ni madaliso otyani amene Yesu olonjeza ŵala amene ozitana vinthu viyakine?

⁵ Payakine abanja ŵanu okusushani olo payakine mwazitana zinthu ziyakine na colinga cakuti muike Ufumu wa Mulungu pasogolo mu umoyo wanu. (Mat. 6:33) Ngati n’tetyo, mungankhale osimikizhya kuti Yehova oona zonse zamumucitila. (Aheb. 6:10) Mosakaikila, payakine mwaona kukwanilishiwa kwa mau a Yesu akuti: “Paliye wamene wasiya ng’anda, akwake, azilongosi, atata, amama, ŵana olo minda cifukwa ca neo koma soti cifukwa ca uthenga wabwino, wamene lomba apeze lini zinyinji kuwilikiza maulwendo 100. Yove apeze ng’anda, akwake, azilongosi, amama, ŵana na minda koma soti manzunzo, ndipo m’nthawi ikuza akapeze moyo wosasila.” (Mko. 10:​29, 30) Madaliso yamwapeza pali lomba, ni yanyinji ngako kupambana kuzitana kulikonse kwamwapanga.—Sal. 37:4.

6. Ndaŵa yanji mufunika kupitilizhya kulimbana na “vilakolako vamuŵili” pavuli pobatizika?

⁶ Mufunika mphela kulimbana na “vilakolako vamuŵili” pavuli pakuti mwabatizika. (1 Yoh. 2:16) Zili teti cifukwa muliye ungwilo. Payakine mungamvwe monga ni mwecimvwila mtumwi Paulo wamene elemba kuti: “Nusangalala ngako na cilamulo ca Mulungu, koma nuona cilamulo ciyakine m’viwalo vangu cuniatana na cilamulo ca m’maganizo mwangu nonipanga kunkhala kapolo wa cilamulo ca ucimo camene cili m’viwalo vangu.” (Aro. 7:​22, 23) Payakine mungafooke cifukwa colimbana na vilakolako viipa. Koma kuganizila pa lonjezo yozitwala yemwepanga kwa Yehova, kungakutang’isheni kuti mugonjese mayeselo. Zacendi n’zakuti mukakumana na mayeselo, lonjezo yanu ya kuzipeleka ikokuyavyani. Motyani?

7. Kansi kunkhala wozipeleka kwa Yehova kungakuyavyeni tyani kuti mupitilizhye kunkhala okhulupilika kwa yove?

⁷ Mukazipeleka kwa Yehova, muzikana mweka. Izi zutanthauza kuti mwasankha kukana vilakolako olo zolinga zilizonse zamene zingakhumudwishe Yehova. (Mat. 16:24) Tetyo, mukakumana na mayeselo, mukovutika lini kuziŵa zamufunika kucita. Zili teti cifukwa cakuti munkhala kuti mwepanga kale cosankha cokhuza zamufunika kucita camene ni kupitilizhya kunkhala wokhulupilika kwa Yehova. Mukacita izi, munkhale monga ni Yobu wamene ekumana na mayeselo akulu ngako koma elaŵila mwacidalilo kuti: “Nileke lini kunkhala na mtima wosayaŵanika.”—Yobu 27:5.

8. Kansi kusinkhasinkha pa pemphelo yozipeleka kungakuyavyeni tyani kugonjesa mayeselo?

⁸ Kuganizila pemphelo yozitwala kwa Yehova kukupaseni mphamvu zakuti mukwanishe kugonjesa mayeselo alionse. Mwacisanzo, kansi mungayambe kukopana na munthu wamene ni mkazi olo mulume wanamwine? Yai. Cifukwa mwelonjeza kale Yehova kuti mungacite lini cinthu coteti. Tetyo, ngati mulola lini vilakolako viipa kukula, zikuyavyeni kuti osati mukovutika na vilakolako ivi. Ndipo mupatuke pa njila ya ŵanthu aipa.—Miy. 4:​14, 15.

9. Kansi kusinkhasinkha pa pemphelo ya kuzipeleka kwanu kungakuyavyeni tyani kuika zinthu zauzimu pasogolo mu umoyo wanu?

⁹ Nanga tyani ngati mwapeza nchito yamene ingocitisha kuti mukophonya misonkhano? Mosakaikila, muziŵa zamufunika kucita. Mukaliyopeza nchito iyi, mwepanga kale cosankha ndipo mungavomele lini nchito iliyonse  yamene ingocitisha kuti mukophonya misonkhano. Tetyo mungavomele lini nchito yoteti poganiza kuti mupeze njila yakuti muikilemo Yehova pasogolo mu umoyo wanu. Kusinkhasinkha pa cisanzo ca Yesu kungakuyavyeni. Yove enze wofunishisha kukondwelesha Ausuwake. Molingana na Yesu, mukonkhala ofunishisha kukana kamangu koma soti motang’a mtima cinthu ciliconse camuziŵa kuti cingacitishe kuti Mulungu akhumudwe.—Mat. 4:10; Yoh. 8:29.

10. Kansi Yehova akuyavyeni tyani kuti mupitilizhye kukonkha Yesu pavuli pakuti mwabatizika?

¹⁰ Zacendi n’zakuti mayeselo yamungakumane nayo, yokupasani mwai woonesha kuti nimwe osimikizhya ‘kupitilizhya kukonkha Yesu.’ Ngati mucita izi, mungankhale osimikizhya kuti Yehova akuyavyeni. Baibo yulaŵila kuti: “Mulungu ni wokhulupilika ndipo alole lini kuti muyesewe kufwika pa mlingo wakuti mungapilile lini. Koma pamukumana na mayeselo amene ao, yove apeleke njila yopulumukila kuti mukwanishe kuyapilila.”—1 Akor. 10:13.

ZAMUNGACITE KUTI MUPITILIZHYE KUKONKHA YESU

11. Kansi ni njila imozi yotyani yamene ingatiyavye kuti tipitilizhye kukonkha Yesu? (Onani soti cithunzithunzi.)

¹¹ Yesu enzotumikila Yehova na mtima wonse ndipo epitilizhya kunkhala pafupi na Yehova mwa kupemphela. (Luka 6:12) Njila imozi yabwino ngako yamene ingakuyavyeni kuti mupitilizhye kukonkha Yesu pavuli pakuti mwabatizika, ni kupitilizhya kucita zinthu zamene zingakuyavyeni kuti muvwendele pafupi na Yehova. Baibo yulaŵila kuti: “Mulimonse mwatapitila pasogolo, tiyeni tipitilizhye kupita pasogolo pocita zatucita.” (Afil. 3:16) Nthawi na nthawi, mukokumvwa za akwasu na azilongosi amene epanga cosankha cakuti  acite zinyinji potumikila Yehova. Payakine eloŵako Sukulu ya Alengezi a Ufumu olo eluta kuyotumikila ku malo kwamene kufunika ofalisa anyinji. Ngati mungaziikile zolinga zoteti, mukoyesayesa kuzikwanilisha. Atumiki a Yehova ni ofunishisha kuyangizhyila utumiki wao. (Mac. 16:9) Nanga tyani ngati pali lomba ni zosakwanishika kucita izi? Osaganiza kuti nimwe atyalatyala. Cofunika ngako ni kupitilizhya kupilila. (Mat. 10:22) Osaluŵa kuti mukondwelesha ngako Yehova ngati mucita zonse zamungakwanishe pomutumikila, kulingana na mwazilili zinthu pa umoyo wanu. Ici niye cinthu cofunika ngako camufunika kucita kuti mupitilizhye kukonkha Yesu pavuli pakuti mwabatizika.—Sal. 26:1

12-13. Kansi mungacitenji ngati muona kuti musangalala lini potumikila Yehova monga ni mwemwenzocitila kale? (1 Akorinto 9:​16, 17) (Onani soti kabokosi kakuti “ Pitilizhyani Kunkhala pa Mpikishano.”)

¹² Nanga tyani ngati mukumvwa kuti mapemphelo ŵanu ofumila lini pansi pa mtima olo musangalala lini na utumiki monga ni mwemwenzocitila kale? Nanga tyani ngati musangalala lini kuŵelenga Baibo monga ni mwemwenzocitila kale? Ngati mukumvwa teti pavuli pobatizika, osati mukoganiza kuti muliye mzimu wa Yehova. Cifukwa cakuti tiliye ungwilo, tucinjacinja mwatumvwila. Ngati mwayamba kuwelela kuvuli, mukoganizila cisanzo ca mtumwi Paulo. Olo kuti enzoyesayesa kutolela cisanzo ca Yesu, yove enzoziŵa kuti nthawi ziyakine akonkhala aliye cifuno cocita zoyenela. (Ŵelengani 1 Akorinto 9:​16, 17.) Yove elaŵila kuti: “Olo kuti nucita mokakamizhyika, n’ne mphela woyanganila mokatizhyana na udindo wenepasiwa.” M’mau ayakine, tinganene kuti Paulo enze wosimikizhya kukwanilisha utumiki wake mosasamala kanthu mweenzomvwila pa nthawi yamene iyo.

 ¹³ Molingana na Paulo, osati mukopanga cosankha kulingana na mwamumvwila. Mukonkhala okonzeka kucita zoyenela olo kuti mufuna lini kucita izi. Mukapitilizhya kucita zoyenela, m’kuluta kwa nthawi mucinje mwamumvwila. Kunkhala na ndandanda iweme yocitilamo phunzilo ya pamweka, kupemphela, kupezeka pa misonkhano nolalikila, kungakuyavyeni kukonkha Yesu pavuli pakuti mwabatizika. Akwasu na azilongosi akaona kupilila kwanu potumikila Yehova alimbikishiwe ngako.—1 Ates. 5:11.

PITILIZHYANI KUZIFUFUZA

14. Kansi tufunika kuzifufuza nthawi zonse kuti tiziŵe cinji, ndipo ndaŵa yanji? (2 Akorinto 13:5)

¹⁴ Nthawi na nthawi ni cinthu cabwino kuzifufuza pavuli pakuti tabatizika. (Ŵelengani 2 Akorinto 13:5.) Nthawi zonse mungacite bwino kuzifufuza kuti muone ngati mupemphela siku iliyonse, kuŵelenga nophunzila Baibo, kupezeka pa misonkhano notolamo mbali mu utumiki. Mukoyesayesa kupeza njila zamene zingakuyavyeni kuti mukosangalala ngako nopindula pocita zinthu izi. Mwacisanzo, mungazikonshe kuti: ‘Kansi ningakwanishe kufotokozela ayakine viphunziso voyambilila va m’Baibo? Kansi paliko njila ziyakine zamene zinganiyavye kuti nikosangalala ngako na utumiki wangu? Kansi mapemphelo ŵangu ni acindunji ndipo oonesha kuti nudalila Yehova na mtima wonse? Kansi nupezeka pa misonkhano nthawi zonse? Kansi ningacite tyani kuti nikomvwishila mosamala ngako olo kuongolela ndemanga zangu pa misonkhano?’

15-16. Kansi mwaphunzilapo cinji pa zecitikila mkwasu muyakine pa nkhani yogonjesa ciyeso?

¹⁵ Mungacite soti bwino kuzifufuza moona mtima kuti muziŵe vifooko vanu. Mkwasu muyakine wa zina yakuti Robert efotokoza zemucitikila zamene zuonesha umboni wa mfundo iyi. Elaŵila kuti: “Penenze na vyaka pafupifupi 20, nenzoseŵenza nchito iyakine. Siku iyakine pavuli pakuti takomboka, munakazi muyakine wamene tenzoseŵenza naye eniitila ku ng’anda kwake. Yove eniuzhya kuti tikankhaleko seka ndipo enze wokonzeka kuti tikalalane. Poyamba, niliyokane motang’a mtima koma posilizhyila pake, nekana ndipo nemufotokozela cifukwa cake.” Mkwasu Robert ekwanisha kugonjesa ciyeso ici ndipo tumuyamikila cifukwa cocita izi. Pavuli pake, eganizila zecitika ndipo ezindikila kuti sembe ecita zinthu m’njila yosiyanako. Elaŵila kuti: “Niliyokane ciyeso ici motang’a mtima koma soti kamangu monga ni mwecicitila Yosefe kuli mkazi wa Potifara. (Gen. 39:​7-9) Kulaŵila cendi, nedabwa kuti cenze covuta kukana. Cocitika  ici ceniyavya kuona kuti nenzofunika kutang’isha ushamwali wangu na Yehova.”

¹⁶ Mungapindule ngati muzifufuza monga ni mwecicitila mkwasu Robert. Olo pavuli pakuti mwakwanisha kugonjesa ciyeso, mukozikonsha kuti: ‘Kansi zenitolela utali wotyani kuti nikwanishe kugonjesa ciyeso ici?’ Ngati muona kuti pali mbali zamufunika kuongolela, musafooke. Mukosangalala kuti lomba muziŵa cifooko camuli naco. Mukopemphela kwa Yehova nocita zinthu zingakuyavyeni kuti munkhale na cifuno comumvwila.—Sal. 139:​23, 24.

17. Kansi zecikumana nazo mkwasu Robert zekhuza tyani zina ya Yehova?

¹⁷ Pali soti cinthu ciyakine catingaphunzile pa cisanzo ca mkwasu Robert. Yove epitilizhya kuti: “Pavuli pakuti nakana kuluta ku ng’anda kwa munakazi wenenzoseŵenza naye, yove elaŵila kuti, ‘Wapambana ciyeso.’ Nemukonsha zeenzotanthauza. Yove elaŵila kuti muyake wamene kale enze Mboni emuuzhya kuti acilumbwana onse a Mboni ocita vinthu volakwika mofisa ngati apeza mpata. Tetyo, yove euzhya muyake kuti ayese neo. Nesangalala ngako penezindikila kuti necitisha kuti zina ya Yehova ilemekezewe.”

18. Kansi nimwe osimikizhya kucita cinji pavuli pobatizika? (Onani soti kabokosi kakuti “ Nkhani Ziŵili Zamungasangalale Nazo.”)

¹⁸ Ngati mwazipeleka kwa Yehova nobatizika, muonesha kuti mufunishisha kutuŵisha zina yake mosasamala kanthu za zinthu zamungakumane nazo. Ndipo mungankhale na cidalilo cakuti Yehova oziŵa mayeselo yamukumana nayo koma soti yamugonjesa. Yove adalise khama yamucita kuti mupitilizhye kunkhala okhulupilika. Nkhalani osimikizhya kuti akupaseni mphamvu zamufunikila poseŵenzesha mzimu wake utuŵa. (Luka 11:​11-13) Moyavyiwa na Yehova, mukwanishe kupitilizhya kukonkha Yesu pavuli pakuti mwabatizika.