1-2. Kansi wolemba muyakine elaŵila cinji, ndipo tilaŵizhyane cinji m’nkhani ino?

ŴANTHU mamiliyoni anyinji masiku ŵano olaŵila kuti okhulupilila Yesu, koma ovomelezhya lini vinthu veciphunzisa. (2 Tim. 4:3, 4) Wolemba muyakine elaŵila kuti: “Tiyelekezele kuti masiku ŵano kuli munthu wamene olaŵila olo kucita zinthu monga ni zeenzocita Yesu . . . , kansi tingamukane monga ni mwecicitila ŵanthu amene emukana vyaka 2,000 vapita? . . . Yankho ni yakuti eee, tingamukane.”

² Ŵanthu anyinji m’nthawi zakuvuli emuona Yesu ophunzisa nocita zozizwisa, koma ekana kumukhulupilila. Ndaŵa yanji? M’nkhani yapita telaŵizhyana vinthu 4 vecitisha ŵanthu anyinji kumukana Yesu. Lomba, tiyeni tilaŵizhyane vinthu viyakine 4. Tione soti cucitisha ŵanthu anyinji kukana Mboni za Yehova masiku ŵano, na zatingacite kuti tisalole ciliconse kutikangisha kutumikila Yehova.

3. Kansi Yesu enzocita cinji camene cecitisha ŵanthu anyinji kumukana?

³ Yesu peenze pacalo, enzotandala na ŵanthu osiyanasiyana. Enzokulya na ŵanthu olemela, koma enzoseŵenzesha nthawi yake ikulu potandala na ŵanthu osauka koma soti ovutika maganizo. Kuyangizhyila apo, enzocitila cifundo ŵanthu amene ayakine enzoŵaona kuti ni “ocimwa.” Cifukwa ca izi, ŵanthu amene enzoziona kuti ni olungama, emukana Yesu. Pa nthawi iyakine ekonsha ophunzila ŵake kuti: “Ndaŵa yanji mukumwa nolyela pamozi na okhomesha misonkho koma soti ocimwa?” Yesu eŵayankha kuti: “Ŵanthu osalwala ofuna lini dokota, koma olwala niye omufuna. Newela kuzoita  ŵanthu ocimwa kuti alape osati olungama.”​—Luka 5:29-32.

4. Molingana na ulosi wa Yesaya, kansi Ayuda enzofunika kuyembekezela cinji cokhuza Mesiya?

⁴ Zayolaŵila Malemba. Mesiya akaliyowela, mneneli Yesaya eloselelatu kuti ŵanthu akamukane. Elosela kuti: “Yove enyozewa ndipo ŵanthu enzomupewa . . . Tenzololesha kumbali kuti tisaone cinso cake. Enyozewa ndipo temuona monga munthu watyalatyala.” (Yes. 53:3) Ulosi uyu welaŵililatu kuti Mesiya enze kuzokaniwa “na ŵanthu” anyinji. Tetyo, Ayuda enzofunika kuyembekezela kuti Yesu akakaniwe.

5. Kansi ŵanthu anyinji oziona tyani Mboni za Yehova?

⁵ Kansi izi zucitika masiku ŵano? Eee. Asogoleli a vipembezo olola ŵanthu amene ni ochuka, acuma koma soti amene calo cuŵaona kuti ni anzelu kupitilizyha kunkhala m’machechi ŵao. Ocita izi olo kuti oziŵa kuti minkhalidwe ya ŵanthu aŵa yukatizhyana lini na malamulo a Mulungu. Asogoleli aŵa oona kuti Mboni za Yehova ni ŵanthu osafunika cifukwa ni atuŵa ndipo ni osachuka m’calo ici. Monga ni mwecilaŵilila Paulo, Mulungu esankha ŵanthu amene ooneka monga ni “atyalatyala.” (1 Akor. 1:26-29) Ndipo Yehova oona kuti atumiki ŵake onse okhulupilika ni amtengo wapatali.

6. Kansi Yesu elaŵila cinji pa Mateyu 11:25, 26, ndipo tingatolele tyani cisanzo cake?

⁶ Kansi n’cinji cingatiyavye kupitilizhya kunkhala na cikhulupililo cotang’a? (Ŵelengani Mateyu 11:25, 26.) Osati mukoona atumiki a Mulungu monga ni mwakuŵaonela ŵanthu ayakine. Mufunika kuziŵa kuti Yehova oseŵenzesha tyala ŵanthu olicefya kucita cifunilo cake. (Sal. 138:6) Mukoganizila soti vinthu vawakwanisha kucita poseŵenzesha ŵanthu amene calo cuŵaona kuti aliye nzelu koma soti kuti ni atyalatyala.

7. Ndaŵa yanji Yesu ezuzula Afarisi, ndipo ove ecita cinji?

⁷ Motang’a mtima, Yesu eulula miyambo ya vipembezo m’nthawi yake. Mwacisanzo, ezuzula Afarisi onyenga amene enzoona nkhani yosamba m’manja kunkhala yofunika ngako kupambana kusamalila makolo ŵao. (Mat. 15:1-11) Payakine ophunzila a Yesu edabwa na zecilaŵila. Tetyo, emukonsha kuti: “Kansi muziŵa kuti Afarisi akhumudwa na zamwalaŵila?” Yesu eyankha kuti: “Mbeu iliyonse yamene iliyokomolewe na Atata akululu, ikanyuliwe. Alekeni, ove ni asogoleli aliye menso. Ngati munthu wosalolesha osogolela muyake wosalolesha, onse aŵili aponele m’cisengu.” (Mat. 15:12-14) Olo kuti asogoleli a cipembezo ekalipa na zecilaŵila Yesu, yove aliyoleke kulaŵila cendi.

8. Kansi Yesu eonesha tyani kuti ni viphunziso lini vonse va cipembezo vamene ni vovomelezhyeka kwa Mulungu?

⁸ Yesu eulula soti viphunziso va cipembezo vamene venze vawenye. Yove aliyolaŵile kuti viphunziso vonse ni vovomelezhyeka kwa Mulungu. M’malomwake, elaŵila kuti ŵanthu anyinji akoyenda pa njila ikulu yamene yuluta ku cionongeko, pamene ŵanthu atontho akoyenda pa njila yopapatizhya yamene yuluta ku moyo. (Mat. 7:13, 14) Elaŵila soti kuti ŵanthu anyinji akooneka monga otumikila Mulungu koma m’cenecene akomutumikila lini. Ndipo eŵauzhya kuti: “Cenjelani na aneneli awenye amene akawele kuli mweo monga ni mbelele koma mkati mwao ni mimbulu yolusa. Mukaŵaziŵe na zocita zao.”​—Mat. 7:15-20.

9. Kansi Yesu eulula viphunziso vawenye votyani va cipembezo?

⁹ Zayolaŵila Malemba. Ulosi welaŵililatu  kuti Mesiya akankhale wolitwala pa ng’anda ya Yehova. (Sal. 69:9; Yoh. 2:14-17) Kulitwala uku niye kwesonkhezela Yesu kuzuzula viphunziso na miyambo yawenye ya cipembezo. Mwacisanzo, Afarisi enzokhulupilila kuti munthu akafwa, pali mbali iyakine yamene yupitilizhya kunkhala na moyo. Koma Yesu ephunzisa kuti akufwa ali monga ni munthu wamene ali mtulo. (Yoh. 11:11) Asaduki enzokhulupilila lini kuti akufwa akauke, koma Yesu eukisha Lazaro wamene enze shamwali wake. (Yoh. 11:43, 44; Mac. 23:8) Afarisi enzophunzisa kuti mphamvu ya Mulungu yosaoneka niye yusogolela zonse zuticitikila olo zatucita. Koma Yesu ephunzisa kuti munthu ali na ufulu wosankha kutumikila Yehova olo yai.​—Mat. 11:28.

10. Ndaŵa yanji ŵanthu anyinji otikana?

¹⁰ Kansi izi zucitika masiku ŵano? Eee. Ŵanthu anyinji otikana cifukwa cakuti viphunziso vasu vozikiwa pa Baibo, vusushana na viphunziso vawenye va vipembezo. Asogoleli a vipembezo ophunzisa ŵanthu ŵao kuti Mulungu olanga ŵanthu aipa ku mulilo wa helo. Oseŵenzesha ciphunziso ici kuti ŵanthu asaleke kuluta ku machechi ŵao. Koma seo tuyavya ŵanthu kuziŵa kuti ciphunziso ici n’cawenye. Asogoleli a cipembezo ophunzisa soti kuti ngati munthu wafwa, pali mbali iyakine yamene yupitilizhya kunkhala na moyo. Seo tuyavya ŵanthu kuziŵa kuti ciphunziso ici ni cawenye. Kuti ciphunziso ici cenze cacendi, sembe tiliye ciyembekezo ca ciukililo. Asogoleli a vipembezo ophunzisa kuti Mulungu ekonzelatu vonse vatucita. Koma seo tuyavya ŵanthu kuziŵa kuti munthu aliyense ali na ufulu wosankha kutumikila Mulungu olo yai. Kansi asogoleli a vipembezo akumvwa tyani ngati taonesha ŵanthu kuti viphunziso vao ni vawenye? Okalipa ngako!

11. Molingana na mau a Yesu opezeka pa Yohane 8:45-47, kansi Mulungu ofuna kuti atumiki ŵake akocita cinji?

¹¹ Kansi n’cinji cingatiyavye kupitilizhya kunkhala na cikhulupililo cotang’a? Ngati tukonda cendi ca m’Baibo, tufunika kuvomelezhya zakutiuzhya Mulungu. (Ŵelengani Yohane 8:45-47.) Mosiyana na Satana Maleŵania,  seo tukana lini cendi. Tucita lini zinthu mosushana na zatukhulupilila. (Yoh. 8:44) Mulungu ofuna kuti atumiki ŵake ‘akonyansiwa na ciipa nomamatila ciweme’ monga ni mwecicitila Yesu.​—Aro. 12:9; Aheb. 1:9.

12. Ndaŵa yanji Ayuda anyinji ekana Yesu cifukwa cakuti efwila pa cimuti conzunzikilapo?

¹² Ni cifukwa ciyakine cotyani cepangisha Ayuda kumukana Yesu? Paulo elaŵila kuti: “Seo tulalikila za Khristu wamene epacikiwa. Koma kwa Ayuda camene ici ni cinthu cokhumudwisha.” (1 Akor. 1:23) Ndaŵa yanji Ayuda anyinji ekana Yesu cifukwa cakuti efwila pa cimuti conzunzikilapo? Cifukwa kwa ove, eoneka monga ni nyankapondo koma soti wocimwa osati Mesiya.​—Deut. 21:22, 23.

13. Kansi ŵanthu amene ekana Yesu ekangiwa kuzindikila cinji?

¹³ Ayuda amene ekana Yesu ekangiwa kuzindikila kuti enzeve mlandu koma soti kuti ecitiliwa zinthu ziliye cilungamo. Oweluza a Khoti Ikulu ya Ayuda amene enzoweluza mlandu wa Yesu, aliyocite cilungamo. Oweluza aŵa ekumana kamangu noweluza mlandu wake, ndipo ecita izi mosakonkha malamulo okhuza moweluzila milandu. (Luka 22:54; Yoh. 18:24) M’malo momvwishila mosamala maumboni onse, ove emvwila zeenzolaŵila ŵanthu ndipo esakilasakila “umboni wawenye kuti amupase mlandu nomupaya.” Koma ekangiwa kucita zamene izo. Tetyo mkulu wa ansembe eyesayesa kuti acitishe Yesu kulaŵila zinthu zolakwika kuti amupeze mlandu. Izi zenze zosiyana ngako na malamulo okhuza kaweluzidwe ka milandu. (Mat. 26:59; Mko. 14:55-64) Ndipo pavuli pakuti Yesu waukishiwa, oweluza aŵa elipila masoja aciroma amene enzolonda manda kuti asaulule kuti Yesu eukishiwa.​—Mat. 28:11-15.

14. Kansi Malemba yelaŵililatu cinji cokhuza imfwa ya Mesiya?

¹⁴ Zayolaŵila Malemba. Ayuda anyinji  enzoyembekezela lini kuti Mesiya angafunike kufwa. Koma Malemba yenze yeloselelatu kuti: “Ekhutula moyo wake mu imfwa ndipo eonewa monga m’mozi wa ocimwa. Enyamula cimo ya ŵanthu anyinji ndipo ezipeleka kuti ayavye olakwa.” (Yes. 53:12) Tetyo, Ayuda enzeve cifukwa comukanila cifukwa copaiwa monga munthu wocimwa.

15. Kansi ni milandu iyakine yotyani yazupasiwa Mboni za Yehova yamene yucitisha ŵanthu ayakine kuŵakana?

¹⁵ Kansi izi zucitika masiku ŵano? Eee! Yesu epasiwa mlandu wawenye. Masiku ŵano, Mboni za Yehova zinyinji zukumana na zocitika zimozimozi. Mwacisanzo, pakati pa 1930 na 1950, ku United States kwenze nkhani zinyinji m’makhoti zokhuza kuteteza ufulu wasu wolambila. Oweluza ayakine enzoticitila zinthu ziliye cilungamo. Ndipo ku Quebec m’calo ca Canada, asogoleli a vipembezo na boma eseŵenzela pamozi pofuna kulesha nchito yasu. Ofalisa anyinji eikiwa m’jele cifukwa colalikila za Ufumu wa Mulungu. Ndipo mu ulamulilo wa Nazi ku Germany, akwasu anyinji acilumbwana epaiwa. M’vyaka valombapano, akwasu na azilongosi anyinji ku Russia amangiwa cifukwa cofotokozela ayakine za m’Baibo. Kuyangizhyila apo, boma yelesha kufalisiwa kwa Baibulo la Dziko Latsopano la Malemba Opatulika ya m’cilaŵilo ca Cirussia, cifukwa ili na zina yakuti Yehova.

16. Molingana na 1 Yohane 4:1, kansi tingapewe tyani kusoŵeshewa na nkhani zawenye zakulaŵila ŵanthu zokhuza atumiki a Yehova?

¹⁶ Kansi n’cinji cingatiyavye kupitilizhya kunkhala na cikhulupililo cotang’a? Mukoziŵa zinthu zacendi. Pa ulaliki wake wa pa lupili, Yesu ecenjeza ophunzila ŵake kuti “ŵanthu akakunamizhyileni zinthu zinyinji ziipa.” (Mat. 5:11) Wenye uyu ufumila kuli Satana. Yove ocitisha ŵanthu osusha kulaŵila vinthu vawenye vokhuza ŵanthu amene okonda cendi. (Chiv. 12:9, 10) Tufunika kukana nkhani zawenye zamene zulaŵiliwa na ŵanthu osusha. Tufunika lini kulola nkhani izi kutipangisha kutumikila Yehova na wowa olo kufookesha cikhulupililo casu.​—Ŵelengani 1 Yohane 4:1.

17. Kansi zecicita atumwi a Yesu sembe zecitisha tyani ayakine kumukana?

¹⁷ Yesu epelekewa m’manja mwa adani na m’mozi wa atumwi ŵake 12. Pa usiku wakuti mailo apaiwe, mtumwi muyakine emukana katatu, ndipo atumwi ayakine onse emuthaŵa. (Mat. 26:14-16, 47, 56, 75) Yesu aliyodabwe cifukwa enze elaŵililatu kuti izi zikacitike. (Yoh. 6:64; 13:21, 26, 38; 16:32) Poona izi, sembe ayakine ekana kunkhala ophunzila a Yesu noganiza kuti, ‘Ngati izi niye zecicita atumwi a Yesu, ningafune lini kunkhala nao m’gulu imozi!’

18. Kansi ni maulosi otyani okhuza Yesu ekwanilishiwa akaliyokufwa?

¹⁸ Zayolaŵila Malemba. Vyaka vinyinji Yesu akaliyowela pacalo, Yehova enze eululilatu kupitila m’Mau ŵake kuti Mesiya akapelekewe na ndalama 30 za siliva. (Zek. 11:12, 13) Womupeleka enze kuzonkhala shamwali wake wapamtima. (Sal. 41:9) Mneneli Zekariya elosela soti kuti: “Paya m’ciŵeta, ndipo mbelele zake zimwazhyikane.” (Zek. 13:7) M’malo mokana Yesu cifukwa ca zemucitikila, ŵanthu oona mtima sembe etang’isha cikhulupililo cao poona kukwanilishiwa kwa maulosi.

19. Kansi ŵanthu oona mtima oziŵa cinji?

¹⁹ Kansi izi zucitika masiku ŵano? Eee. Mboni ziyakine zusiya cendi nonkhala ampatuko.  Ndipo oyesa kupatusha ayakine mwa kufalisa nkhani zawenye zokhuza Mboni za Yehova m’manyuzipepa, pa mawailesi, pa ma TV na pa intaneti. Koma ŵanthu oona mtima osoŵeshewa lini. M’malomwake, oziŵa kuti Baibo yeloselelatu kuti vinthu voteti vikacitike.​—Mat. 24:24; 2 Pet. 2:18-22.

20. N’cinji cingatiyavye kuti tisasoŵeshewe na ŵanthu ampatuko? (2 Timoteyo 4:4, 5)

²⁰ Kansi n’cinji cingatiyavye kupitilizhya kunkhala na cikhulupililo cotang’a? Tufunika kupitilizhya kutang’isha cikhulupililo casu mwa kuphunzila Mau a Mulungu nthawi zonse. Tufunika soti kupemphela mosalekezhya nopitilizhya kukata nchito yecitipasa Yehova. (Ŵelengani 2 Timoteyo 4:4, 5.) Ngati tili na cikhulupililo cotang’a, tikocita lini nkhaŵa tikamvwa nkhani zawenye zokhuza Mboni za Yehova. (Yes. 28:16) Kukonda Yehova, Mau ŵake koma soti akwasu na azilongosi niye kungatiyavye kupewa kusoŵeshewa na ŵanthu ampatuko.

21. Olo kuti ŵanthu anyinji okana uthenga wasu, kansi tingankhale osimikizhya za cinji?

²¹ M’nthawi ya Yesu, ŵanthu anyinji emukana. Koma penze soti anyinji amene emukhulupilila. Ŵanthu amene emukhulupilila oyangizhyilapo m’mozi wa mamembala a Khoti Ikulu ya Ayuda koma soti “gulu ikulu ya ansembe.” (Mac. 6:7; Mat. 27:57-60; Mko. 15:43) Molingana na izi, ŵanthu mamiliyoni anyinji masiku ŵano opitilizhya kutumikila Yehova. Ndaŵa yanji? Cifukwa oziŵa nokonda cendi copezeka m’Mau a Mulungu. Baibo yulaŵila kuti: “Okonda cilamulo canu opeza mtendele, ndipo paliye coŵakhumudwisha.”​—Sal. 119:165.