1-2. Kansi atumiki a Yehova ayakine okumana na mavuto otyani?

MTUMWI Paulo elimbikisha Timoteyo kuti enzofunika kukwanilisha utumiki wake. (2 Tim. 4:5) Nase tukonkha malangizo a Paulo nocita zilizonse zatingakwanishe potumikila Yehova. Olo n’tetyo, tukumana na mavuto. Akwasu na azilongosi anyinji ofunika kutang’a mtima kuti akolalikila mokwanila. (2 Tim. 4:2) Mwacisanzo, ganizilani za akwasu na azilongosi amene onkhala m’vyalo mwamene nchito yasu ni yoleshewa. Olalikila olo kuti kucita izi kungaike moyo wao pa ngozi.

² Atumiki a Yehova olimbana na mavuto osiyanasiyana amene angaŵafookeshe. Mwacisanzo, anyinji ofunika kuseŵenza mwamphamvu koma soti kwa nthawi itali kuti akwanishe kusamalila mabanja ŵao. Ofuna kucita zinyinji mu utumiki koma onkhala oŵeŵa. Ayakine ocita lini zinyinji cifukwa ca kulwala na ukulukazi cakuti okwanisha lini kufuma pa ng’anda. Ndipo ayakine olimbana na maganizo oziona kuti ni atyalatyala. Mwacisanzo, kalongosi Mary * wa ku Middle East elaŵila kuti: “Nufunika kucita khama kuti niongolele maganizo oziona kuti n’ne watyalatyala. Nthawi zinyinji maganizo aŵa onifookesha. Pavuli pake, nuziimba mlandu cifukwa nuona kuti nucita lini zinyinji mu utumiki.”

3. Kansi tilaŵizhyane cinji m’nkhani ino?

³ Olo kuti tukumana na mavuto, Yehova otipasa mphamvu notiyavya kupilila kuti tikwanishe kum’tumikila. Tikaliyolaŵizhyana mwakutiyavyila Yehova, tiyeni tilaŵizhyane mweciyavyila mtumwi Paulo na Timoteyo kukwanilisha utumiki wao olo kuti enzokumana na mavuto.

4. Kansi Paulo ekumana na mavuto otyani?

⁴ Mtumwi Paulo ekumana na mavuto anyinji. Ndipo enzofunikila ngako thandizo ya Yehova peenzoniatiwa, kutemewa na miyala noikiwa m’jele na adani ŵake. (2 Akor. 11:23-25) Yove elaŵila kuti nthawi ziyakine enzolimbana na maganizo olakwika. (Aro. 7:18, 19, 24) Enzolimbana soti na “munga m’muŵili” wamene enzolakalaka kuti Yehova amucosele.​—2 Akor. 12:7, 8.

5. Kansi Paulo ekwanisha kucita cinji olo kuti enzokumana na mavuto anyinji?

⁵ Yehova epasa mphamvu mtumwi Paulo kuti apitilizhye kucita utumiki olo kuti enzokumana na mavuto. Ganizilani zinthu zecikwanisha kucita. Mwacisanzo, peenze womangiwa pa ng’anda ku Roma, elalikila mwakhama uthenga uweme ku ŵanthu anyinji, kuyangizhyilapo akulu-akulu aboma. (Mac. 28:17; Afil. 4:21,22) Ekwanisha soti kulalikila masoja oteteza mfumu ndipo enzolalikila ŵanthu onse amene enzowela kuzomuona. (Mac. 28:30, 31; Afil. 1:13) Pa nthawi iyi, Paulo elemba makalata ouzhyiliwa amene elimbikisha Akhristu oyambilila. Makalata aŵa opindulisha Akhristu mpaka lelo. Cisanzo ca Paulo cetang’isha mpingo wa ku Roma ndipo akwasu a mumpingo uyu “epitilizhya kulaŵila Mau a Mulungu motang’a mtima.” (Afil. 1:14) Olo kuti nthawi ziyakine Paulo enzokwanisha lini kucita zinyinji, enzocita zaangakwanishe. Izi zemuyavya kuti ‘apitishe pasogolo uthenga uweme.’​—Afil. 1:12.

6. Molingana na 2 Akorinto 12:9, 10, kansi n’cinji ceyavya Paulo kukwanilisha utumiki wake?

⁶ Paulo enzoziŵa kuti enzokwanisha kucita utumiki cifukwa Yehova enzomupasa mphamvu. Yove elaŵila kuti mphamvu ya Mulungu ‘yunkhala yokwanila nikankhala wofooka.’ (Ŵelengani 2 Akorinto 12:9, 10.) Poseŵenzesha mzimu utuŵa, Yehova epasa mphamvu Paulo kuti apitilizhye kukwanilisha utumiki wake olo kuti enzokumana na mavuto monga kumangiwa na kunzunziwa.

7. Kansi Timoteyo epilila mavuto otyani kuti akwanilishe utumiki wake?

⁷ Timoteyo wamene enze muyake wapamtima wa Paulo, enzofunika kudalila mphamvu za Mulungu kuti akwanilishe utumiki wake. Timoteyo enzoyenda na Paulo pa maulwendo ŵake aumishonale. Kuyangizhyila apo,  Paulo enzomutuma kuyoyendela mipingo iyakine noilimbikisha. (1 Akor. 4:17) Nthawi ziyakine Timoteyo enzozimvwa kuti ni wosayenelela. Payakine niye cifukwa cake Paulo emulimbikisha kuti: “Osalola kuti aliyense akudelele poona kuti niwe mtontho.” (1 Tim. 4:12) Pa nthawi iyi, Timoteyo enze soti na munga m’muŵili wamene payakine wenze “kulwalalwala.” (1 Tim. 5:23) Koma enzoziŵa kuti mzimu utuŵa ungamuyavye kuti apitilizhye kulalikila notumikila akwasu na azilongosi.​—2 Tim. 1:7.

8. Ni vinthu votyani vawatipasa Yehova kuti tikopeza mphamvu?

⁸ Masiku ŵano, Yehova opasa atumiki ŵake “mphamvu zopambana zacibadwa” kuti apitilizhye kum’tumikila mokhulupilika. (2 Akor. 4:7) Lomba, tiyeni tilaŵizhyane vinthu 4 vawatipasa Yehova vamene vutipasa mphamvu notiyavya kupitilizhya kunkhala okhulupilika. Vinthu ivi ni pemphelo, Baibo, mayanjano acikhristu na ulaliki.

9. Kansi pemphelo ingatiyavye tyani?

⁹ Kupeza mphamvu kupitila m’pemphelo. Pa Aefeso 6:18, Paulo etilimbikisha kuti tufunika kupemphela kwa Mulungu “pa cocitika ciliconse.” Ndipo Mulungu oyankha mapemphelo ŵasu mwa kutiyavya. Pemphelo yeyavya mkwasu Jonnie wa ku Bolivia kuti apeze mphamvu peenzokumana na mavuto osiyanasiyana. Mkazi wake na makolo ŵake enzolwala pa nthawi imozi. Cenze covuta kuti mkwasu Jonnie akwanishe kusamalila onse atatu. Amai ŵake emwalila ndipo zetola nthawi itali kuti ausuwake na mkazi wake apole. Ponena za nthawi iyi, mkwasu Jonnie elaŵila kuti: “Ceniyavya ngako penenzokumana na mavuto aŵa, ni kuuzhya Yehova mwenenzomvwila m’pemphelo.” Yehova emupasa mphamvu zeenzofunikila kuti apilile. Ganizilani za mkwasu Ronald wamene ni mkulu ku Bolivia. Amai ŵake eŵapeza na khansa ndipo pavuli pa mwezi umozi emwalila. Kansi n’cinji cemuyavya kupilila? Elaŵila kuti: “Pemphelo yeniyavya kuuzhya Yehova mwenenzomvwila. Nuziŵa kuti onimvwishisha kupambana mwakucitila ŵanthu ayakine olo mwanuziziŵila neka.” Nthawi ziyakine tingokumvwa kuti tingakwanishe lini kupilila ndipo tingaziŵe lini zofunika kulaŵila m’pemphelo. Zikankhala teti, tufunika kukumbukila kuti Yehova otilimbikisha kupemphela olo pa nthawi yatuona kuti ni yovuta kufotokoza maganizo ŵasu na mwatumvwila.​—Aro. 8:26, 27.

10. Molingana na Aheberi 4:12, ndaŵa yanji kuŵelenga Baibo nosinkhasinkha n’kofunika ngako?

¹⁰ Kupeza mphamvu kupitila m’Baibo. Molingana na Paulo, nase tufunika kuŵelenga Baibo kuti tipeze mphamvu na cilimbikiso. (Aro. 15:4) Patuŵelenga nosinkhasinkha, Yehova angatiyavye na mzimu utuŵa kuti timvwishishe zatuŵelenga noona mwatingaziseŵenzeshele pa umoyo wasu. (Ŵelengani Aheberi 4:12.) Mkwasu Ronald watatomola lombapano, elaŵila kuti: “Nuyamikila ngako kuti nekulisha ciyoŵelezi coŵelenga Baibo usiku ulionse. Nusinkhasinkha pa minkhalidwe ya Yehova na mwecicitila zinthu mwacikondi na atumiki ŵake akuvuli. Izi zuniyavya kupeza soti mphamvu.”

11. Kansi Baibo yeyavya tyani kalongosi wamene enze na cisoni?

¹¹ Kusinkhasinkha pa zatuŵelenga m’Mau a Mulungu kutiyavya kunkhala na maganizo oyenelela pa mavuto ŵatukumana nao. Onani mwamene Baibo yeyavyila kalongosi  wamasiye wamene enze na cisoni. Mkulu muyakine emulimbikisha kuti akaŵelenge mfundo zoyavya za m’buku ya Yobu. Peciŵelenga nosinkhasinkha nkhani ya Yobu, kalongosi uyu eona kuti Yobu enze na maganizo olakwika. Peenzoona zocitika izi m’maganizo mwake, elaŵila kuti: “Yobu, leka kunkhala na maganizo olakwika!” Pavuli pake ezindikila kuti maganizo ŵake yenzolingana na a Yobu. Izi zemuyavya kucinja kaganizidwe kake koma soti kupilila imfwa ya mulume wake.

12. Kansi Yehova angatipase tyani mphamvu kupitila muli okhulupilila ayasu?

¹² Kupeza mphamvu kupitila m’mayanjano acikhristu. Njila iyakine yakuseŵenzesha Yehova potipasa mphamvu, ni kupitila muli okhulupilila ayasu. Paulo elemba kuti enzocita kulakalaka “kulimbikishana na akwasu na azilongosi auzimu.” (Aro. 1:11, 12) Kalongosi Mary watatomola lombapano, oyamikila ngako kuyanjana na akwasu na azilongosi. Yove elaŵila kuti: “Yehova onilimbikisha poseŵenzesha akwasu na azilongosi amene oziŵa lini za mavuto ŵangu. Akwasu aŵa oniuzhya mau olimbikisha olo kunitumizhyila kakhadi pa nthawi yanufunikila cilimbikiso. Yehova oniyavya soti kupitila muli azilongosi ayakine amene ekumanako na mavuto monga ni ŵanukumana nao. Ndipo akulu oonesha kuti onikonda noniuzhya kuti n’ne wofunika ngako mumpingo. Izi zunilimbikisha ngako.”

13. Kansi tupeza tyani mphamvu pa misonkhano ya mpingo?

¹³ Pa Ng’anda ya Ufumu niye malo aweme olimbikishilanako. Mukapezeka pa misonkhano, mukolimbikisha ayakine mwa kuŵayamikila noŵaonesha kuti muŵakonda. Mwacisanzo, misonkhano ikaliyoyamba, mkulu muyakine wa zina yakuti Peter, euzhya kalongosi wamene mulume wake ni Mboni lini kuti: “Tulimbikishiwa ngako tikakuonani pa misonkhano. Nthawi zonse ŵana ŵanu onse 6 onkhala okonzeka kutwala ndemanga.” Kalongosi uyu elimbikishiwa ngako cakuti eyankha kuti: “Mau ŵanu afwika pa nthawi yake, cifukwa lelo nenzofunikila cilimbikiso.”

14. Kansi nchito yolalikila yutiyavya tyani?

¹⁴ Kupeza mphamvu kupitila mu ulaliki. Tikauzhya ŵanthu cendi ca m’Baibo, tulimbikishiwa ngako olo kuti ayakine angakane kumvwishila uthenga wasu. (Miy. 11:25) Kalongosi Stacy elaŵila kuti kulalikila kumulimbikisha ngako. Munthu wa m’banja yake pecicosewa mumpingo, ecita cisoni ndipo enzozikonsha kuti, ‘Kansi sembe necita zinyinji kuti nimuyavye?’ Ndipo cenze covuta kuti aleke kuganizila nkhani iyi. Kansi n’cinji cemuyavya kupilila? Ni kulalikila. Peenzolalikila, enzoganizila za ŵanthu a m’gao yake kuti enzofunika thandizo. Elaŵila kuti: “Pa nthawi iyi, Yehova eniyavya kupeza wophunzila Baibo wamene enzoluta pasogolo kamangu. Izi zenilimbikisha ngako. Cinthu caniyavya ngako pa umoyo wangu ni nchito yolalikila.”

15. Kansi mwaphunzila cinji pa zecilaŵila kalongosi Mary?

¹⁵ Cifukwa ca mavuto yakukumana nayo, anyinji angaone kuti ocita lini zinyinji mu utumiki. Ngati umu niye mwamumvwila, ziŵani kuti Yehova osangalala ngako na zamukwanisha kucita. Mwacisanzo, ganizilani soti za kalongosi Mary. Pecikukila ku dela ya cilaŵilo ciyakine, enzozimvwa kuti ocita lini zinyinji. Elaŵila kuti, “Kwa nthawi itali nenzokwanisha tyala kutwala ndemanga ifupi, kuŵelenga vesi ya m’Baibo, olo kuyaŵila katrakiti  mu ulaliki.” Izi zenzocitisha kuti akozimvwa kuti ocita lini zinyinji polinganizhya na akwasu na azilongosi a ku dela iyi. Olo n’tetyo, yove ecinja maganizo ŵake. Ezindikila kuti Yehova angamuseŵenzeshe olo kuti oziŵa lini kulaŵila luweme cilaŵilo ici. Yove elaŵila kuti, “Cendi ca m’Baibo n’cosavuta kuphunzisa ndipo niye cuyavya ŵanthu kucinja umoyo wao.”

16. Kansi n’cinji cingatiyavye kupilila olo kuti tufuma lini pa ng’anda cifukwa colwala?

¹⁶ Yehova oona noyamikila zatucita mu utumiki olo kuti tufuma lini pa ng’anda cifukwa colwala. Angatiyavye kulalikila ŵanthu amene otisamalila na madokota. Ngati tulinganizhya zetenzocita kale na zatucita lomba, tingafooke. Koma tikaona mwakutiyavyila Yehova, tipeze mphamvu nokwanisha kupilila mwacimwemwe.

17. Molingana na Mlaliki 11:6, ndaŵa yanji tufunika kupitilizhya kulalikila olo kuti tingaone lini zofumapo ziweme nthawi yamene iyo?

¹⁷ Tingaziŵe lini kuti ni mbeu zotyani zacendi zatakomola zamene zingakule. (Ŵelengani Mlaliki 11:6.) Mwacisanzo, Kalongosi Barbara wa vyaka va m’ma 80 okonda kucita ulaliki wa pa foni na wa makalata. Ulwendo uyakine etumizhya kalata pamozi na Nsanja ya Mlonda ya March 1, 2014, ku banja iyakine yamene yenze yozilala kwa vyaka vopitilila 27. Nsanja iyi yenze na nkhani yakuti “Zimene Mulungu Wakucitilani.” Banja iyi yeŵelenga Nsanja iyi mowelezhyawelezhya. Mutu wa banja ecimvwa monga kuti Yehova enzolaŵila naye mwacindunji. Pavuli pake, banja iyi yeyamba soti kupezeka pa misonkhano nolalikila. Kulaŵila cendi, kalongosi Barbara elimbikishiwa ngako ndipo epeza mphamvu peciona zofumapo ziweme za kalata yake.

18. Kansi tufunika kucita cinji kuti Yehova akotipasa mphamvu?

¹⁸ Yehova watipasa mwai woona mphamvu zake zodabwisa. Tetyo, tufunika kuseŵenzesha zinthu zawatipasa zamene ni pemphelo, Baibo, mayanjano acikhristu na ulaliki. Tikacita izi, tioneshe kuti tumudalila ndipo atiyavye. Tiyeni tipitilizhye kudalila Yehova wamene osangalala “kuonesha mphamvu zake ku ŵanthu amene mtima wao ni wamphumbulu kwa yove.”​—2 Mbi. 16:9.