1. Kansi ŵanthu onse ofunika kupanga cosankha cofunika ngako cotyani?

 MASIKU ŵano, ŵanthu ofunika kupanga cosankha cofunika ngako. Ofunika kusankha, kaya kunkhala ku mbali ya Yehova Mulungu monga Wolamulila cilengedwe conse, olo kunkhala ku mbali ya mdani wake wamene ni Satana Maleŵania. Cosankha caangapange aliyense niye cingamucitishe kuti akapeze moyo wosasila olo yai. (Mat. 25:31-33, 46) Pa “cisauso cikulu,” aliyense akaikiwe cizindikilo cakuti apulumuke olo yai.​—Chiv. 7:14; 14:9-11; Ezek. 9:4, 6.

2. (a) Kansi Aheberi 10:35-39 yutilimbikisha kucita cinji? (b) Kansi buku ya Chivumbulutso ingatiyavye tyani?

² Ŵelengani Aheberi 10:35-39. Ngati mwasankha kucilikiza ulamulilo wa Yehova, niye kuti mwapanga cosankha cabwino. Lomba mufunika kuyavya ayakine kuti nao apange cosankha cimozimozi. Mungaseŵenzeshe mfundo za m’buku ya Chivumbulutso poŵayavya. Buku iyi yufotokoza zati zikacitikile ŵanthu amene osusha ulamulilo wa Yehova. Ndipo yufotokoza soti madaliso yati akapeze ŵanthu amene ocilikiza ulamulilo wake. Tetyo, tufunika kuphunzila mosamala mfundo zamene izi. Kucita izi kutiyavye kuti tipitilizhye kutumikila Yehova. Kuyangizhyila apo, mfundo izi zingatiyavye kuti tiziŵe zatingacite kuti tiyavye ayakine kupanga cosankha canzelu.

3. Kansi tilaŵizhyane cinji m’nkhani ino?

³ M’nkhani ino tilaŵizhyane makonsho aŵa: Kansi ni madaliso yotyani yati akapeze ŵanthu amene ocilikiza ulamulilo wa Mulungu? N’cinji cati cikacitikile ŵala amene ocilikiza cilombo cisweta cufotokozewa m’buku ya Chivumbulutso?

4. Kansi ni gulu yotyani yeciona mtumwi Yohane yamene yenze pamozi na Yesu kululu?

⁴ M’mensomphenya, mtumwi Yohane eona magulu yaŵili ya ŵanthu amene ocilikiza ulamulilo wa Yehova, ndipo elandila madaliso a moyo wosasila. Gulu yoyamba ili na ŵanthu okwanila 144,000. (Chiv. 7:4) Ŵanthu aŵa otolewa pacalo kuti akapange boma olo kuti Ufumu pamozi na Yesu kululu, ndipo akalamulile calo conse. (Chiv. 5:9, 10; 14:3, 4) Yohane eona ŵanthu aŵa apo n’kuti apanama pafupi na Yesu Palupili ya Ziyoni kululu.​—Chiv. 14:1.

5. N’cinji cati cikacitikile ozozewa ati akankhale na moyo pacalo cisauso cikulu cikayosala patontho kuyamba?

⁵ Kuyambila m’nthawi ya atumwi mpaka lomba, ŵanthu masauzande anyinji ankhala osankhiwa kuti ankhale mbali ya a 144,000. (Luka 12:32; Aro. 8:17) Koma mtumwi Yohane elaŵila kuti ni ozozewa tyala atontho ati akankhale na moyo m’masiku osilizhya. Cisauso cikulu cikayosala patontho kuyamba, ozozewa aŵa akaikiwe “cidindo” coonesha kuti ni ovomelezhyeka kwa Yehova. (Chiv. 7:2, 3; 12:17) Ndipo mkati mwa cisauso cikulu, akatolewe kuluta kululu kuti akakatizhyane na a 144,000 ayao amene ecifwa okhulupilika. Ove akalamulile pamozi na Yesu mu Ufumu wa Mulungu.​—Mat. 24:31; Chiv. 5:9, 10.

6-7. (a) Kansi mtumwi Yohane eona soti gulu iyakine yotyani, ndipo Baibo yulaŵilanji zokhuza gulu iyi? (b) Ndaŵa yanji tufunika kucita cidwi na zayulaŵila Chivumbulutso caputa 7 mosasamala kanthu kuti nise ozozewa olo a “gulu ikulu”?

⁶ Pavuli poona gulu yoyamba ya Akhristu ati akalamulile pamozi na Yesu kululu, Yohane eona soti “gulu ikulu.” Mosiyana na gulu ya a 144,000, gulu iyi ili na ŵanthu anyinji cakuti n’zosakwanishika kuŵaŵelenga. (Chiv. 7:9, 10) Kansi Baibo yulaŵilanji zokhuza ŵanthu aŵa? Yohane elaŵila kuti: “Aŵa niye afuma m’cisauso cikulu, ndipo awasha mikanjo yao na kuituŵisha m’milopa ya Mwanawambelele.” (Chiv. 7:14) Pavuli populumuka cisauso cikulu, a “gulu ikulu,” akankhale na moyo wosasila pacalo ndipo akasangalale na madaliso anyinji.​—Sal. 37:9-11, 27-29; Miy. 2:21, 22; Chiv. 7:16, 17.

⁷ Mosasamala kanthu kuti tili na ciyembekezo cakuya kululu olo cakuyonkhala na moyo wosasila pacalo, tufunika kukhulupilila kuti malonjezo opezeka mu Chivumbulutso caputa 7 akakwanilishiwe. Iyi ikankhale nthawi yosangalasa ngako kuli magulu yonse yaŵili ya atumiki a Mulungu. Tikasangalale poziŵa kuti tesankha kucilikiza ulamulilo wa Yehova. Kansi buku ya Chivumbulutso yulaŵila soti zotyani zokhuza cisauso cikulu?​—Mat. 24:21.

8. Kansi cisauso cikulu cikayambe tyani, ndipo ŵanthu anyinji akacitenji?

⁸ Monga ni mwetephunzilila m’nkhani yapita, maboma a cino calo akaukile Babulo Mkulu wamene ni vipembezo vonse vawenye. (Chiv. 17:16, 17) Zocitika izi zikankhale ciyambi ca cisauso cikulu. Kansi izi zikacitishe kuti ŵanthu anyinji akayambe kutumikila Yehova? Yai. Lemba ya Chivumbulutso caputa 6 yuonesha kuti pa nthawi yamene iyo, ŵanthu amene otumikila lini Yehova akayambe kusakila citetezo kufumila kuli azandale koma soti azamalonda a m’calo ici, amene olinganizhyiwa na malupili. Cifukwa cakuti akasankhe lini kucilikiza Ufumu wa Mulungu, Yehova akaŵaone kuti ni osusha.​—Luka 11:23; Chiv. 6:15-17.

9. Pa cisauso cikulu, kansi atumiki a Yehova akaoneke tyani kunkhala osiyana na ŵanthu ayakine, ndipo n’cinji cati cikacitike pavuli pake?

⁹ Pa cisauso cikulu, atumiki a Yehova okhulupilika akaoneke kunkhala osiyana ngako na  ŵanthu ayakine. Ove niye tyala gulu ya ŵanthu yati ikolambila Yehova Mulungu nokana kucilikiza “cilombo.” (Chiv. 13:14-17) Izi zikacitishe adani a Mulungu kukhumudwa ngako. Ndipo cifukwa ca izi vyalo vonse vikakatizhyane kuti viukile atumiki a Yehova pacalo conse. Baibo yufotokoza kuukila uku kuti ni kuukila kwa Gogi wa Magogi.​—Ezek. 38:14-16.

10. Molingana na Chivumbulutso 19:19-21, kansi Yehova akacitenji akayoona kuti atumiki ŵake aukiliwa?

¹⁰ Kansi Yehova akacitenji akayoona kuti atumiki ŵake aukiliwa? Kupitila m’Baibo, yove elaŵila kuti: “Ukali wangu ukacokele m’mphuno.” (Ezek. 38:18, 21-23) Lemba ya Chivumbulutso caputa 19 yufotokoza kuti pavuli pa izi, Yehova akatumizhye Mwana wake kuti akateteze atumiki ŵake nogonjesa adani ŵake. Yesu akachaye nkhondo iyi moyavyiwa na “gulu ya nkhondo ya kululu,” amene ni angelo okhulupilika pamozi na a 144,000. (Chiv. 17:14; 19:11-15) Kansi pakankhale zofumapo zotyani? Ŵanthu onse koma soti magulu amene osusha Yehova akaonongewe.​—Ŵelengani Chivumbulutso 19:19-21.

11. Kansi ni cocitika cofunika ngako cotyani cufotokozewa m’buku ya Chivumbulutso?

¹¹ Ganizilani tyala cimwemwe cati akankhale naco atumiki a Yehova okhulupilika pavuli pa nkhondo ya Aramagedo. Ove akasangalale ngako poziŵa kuti adani onse a Mulungu aonongewa. Nako kululu, angelo akankhale na cisangalalo cikulu poziŵa kuti Babulo Mkulu waonongewa. Koma pali cocitika ciyakine cati cikaŵapangishe kunkhala na cimwemwe cikulu. (Chiv. 19:1-3) Cocitika ici ni “ukwati wa Mwanawambelele.” Ici niye cocitika cofunika ngako cufotokozewa m’buku ya Chivumbulutso.​—Chiv. 19:6-9.

12. Molingana na Chivumbulutso 21:1, 2, kansi ukwati wa Mwanawambelele ukacitike pa nthawi yotyani?

¹² Kansi ukwati uyu ukacitike pa nthawi yotyani? Nkhondo ya Aramagedo ikaliyoyamba, Akhristu onse ozozewa akankhale kululu. Olo n’tetyo, iyi ikankhale lini nthawi ya ukwati wa Mwanawambelele. (Ŵelengani Chivumbulutso 21:1, 2.) Ukwati wa Mwanawambelele ukacitike pavuli pakuti nkhondo ya Aramagedo yasila, ndipo adani onse a Mulungu aonongewa.​—Sal. 45:3, 4, 13-17.

13. N’cinji cati cikacitike pa nthawi ya ukwati wa Mwanawambelele?

¹³ Kansi n’cinji cati cikacitike pa nthawi ya ukwati wa Mwanawambelele? Pa nthawi ya ukwati, munalume na munakazi okatizhyana nopanga banja. Izi niye zati zikacitike pa ukwati wa Mwanawambelele. Yesu Khristu monga Mfumu akakatizhyane na a 144,000 nopanga boma yalomba, ndipo boma iyi ikalamulile pacalo kwa vyaka 1,000.​—Chiv. 20:6.

14-15. Kansi lemba ya Chivumbulutso caputa 21 yulinganizhya a 144,000 na cinji? (Onani cithunzithunzi ca pacikuto.)

¹⁴ Lemba ya Chivumbulutso caputa 21 yulinganizhya a 144,000 na mzinda wokongola ngako wamene uitiwa kuti “Yerusalemu Walomba.” (Chiv. 21:2, 9) Mzinda uyu wemangiwa pa maziko a miyala 12. Ndipo pa miyala iyi pelembewa “mazina 12 ya atumwi 12 a Mwanawambelele.” Mtumwi Yohane ecita cidwi ngako na mensomphenya aya cifukwa zina yake yenze yolembewa pa umozi mwa miyala iyi. Uyu ni mwai ukulu ngako.​—Chiv. 21:10-14; Aef. 2:20.

¹⁵ Mzinda wophiphilisila uyu wenzooneka wosiyana ngako na mizinda iyakine. Zili teti cifukwa mseu ukulu wa mumzinda uyu wenze wopangiwa na golide woyenga bwino, viseko 12 va pa milyango venze vopangiwa na  ngale, vipupa na faundeshoni yenze yokongoleshewa na miyala yamtengo wapatali, ndipo zinthu zonse zepimiwa molondola. (Chiv. 21:15-21) Koma Yohane ezindikila kuti penze cinthu ciyakine camene mwenzeve mumzinda uyu. Yove elaŵila kuti: “Niliyoone kacisi . . . , pakuti Yehova Mulungu Wamphamvuzonse niye enze kacisi wake, koma soti Mwanawambelele niye kacisi wake. Mzinda uyu wenzofunikila lini kuwala kwa zuŵa olo mwezi, pakuti ulemelelo wa Mulungu wenzouwalisha ndipo lambi yake yenze Mwanawambelele.” (Chiv. 21:22, 23) Ŵala onse amene ali mbali ya Yerusalemu Walomba akankhale na Yehova. (Aheb. 7:27; Chiv. 22:3, 4) Tetyo, Yehova na Yesu niye ati akankhale kacisi wa mumzinda uyu.

16. Ni madaliso yotyani yati tikasangalale nayo m’vyaka 1,000 va Ufumu wa Mulungu?

¹⁶ Akhristu ozozewa osangalala ngako akaganizila za mzinda uyu. Nao amene ali na ciyembekezo cakuyonkhala na moyo wosasila pacalo, ofunika kusangalala. Ndaŵa yanji? N’cifukwa cakuti m’vyaka 1,000 va Ulamulilo wa Ufumu wa Mulungu, Yerusalemu Walomba akalete madaliso anyinji pacalo. M’mensomphenya, mtumwi Yohane eona kuti madaliso aya yenzoyenda monga ni “m’mana wa manzi a moyo.” Ndipo m’mbali ziŵili za m’mana uyu mwenze “vimiti va moyo.” Vimiti ivi venze na matepo yamene “yenzopolesha mitundu ya ŵanthu.” (Chiv. 22:1, 2) Ŵanthu onse ati akankhale na moyo pacalo, akankhale na mwai wolandila madaliso aya. M’kuluta kwa nthawi, ŵanthu onse akankhale angwilo. Paliye aliyense wati akolwala olo kumvwa voŵaŵa, ndipo imfwa ikacosewepo.​—Chiv. 21:3-5.

17. Molingana na Chivumbulutso 20:11-13, kansi ni ŵani ati akapindule na madaliso a mu Ulamulilo wa Vyaka 1,000?

¹⁷ Kansi ni ŵani ati akapindule na madaliso ya mu Ulamulilo wa Vyaka 1,000? Gulu yoyamba ya ŵanthu ati akapindule na madaliso aya ni ŵala ati akapulumuke pa Aramagedo, kuyangizhyilapo ŵana ati akavyalike m’calo calomba. Lemba ya Chivumbulutso caputa 20 yufotokoza soti kuti akufwa akaukishiwe. (Ŵelengani Chivumbulutso 20:11-13.) Ŵanthu “olungama,” kutanthauza Akhristu emwalila okhulupilika na “osalungama” kutanthauza ŵala amene enzeve mwai wophunzila zokhuza Yehova, akaukishiwe nonkhala soti na moyo pacalo. (Mac. 24:15; Yoh. 5:28, 29) Kansi izi zutanthauza kuti ŵanthu  onse ecifwa akaukishiwe mu Ulamulilo wa Vyaka 1,000? Yai. Ŵala amene enze na mwai wotumikila Yehova koma eukana mwadala akaukishiwe lini. Izi zili teti cifukwa cakuti Yehova enze eŵapasa mpata wakuti asankhe kumutumikila, koma eukana. Tetyo, akankhale osayenelela kunkhala m’Paladaiso.​—Mat. 25:46; 2 Ates. 1:9; Chiv. 17:8; 20:15.

18. Kansi vinthu vikankhale tyani pacalo cakosilizhyila kwa vyaka 1,000?

¹⁸ Pofwika kosilizhyila kwa vyaka 1,000, ŵanthu onse ati akankhale pacalo akaŵe angwilo. Paliye aliyense wati akokhuziwa na ucimo wetetolela kwa Adamu. (Aro. 5:12) Tembelelo ya ucimo wa Adamu, ikacosewepo. Izi zutanthauza kuti cakosilizhyila kwa vyaka 1,000, ŵanthu onse ‘akankhale soti na moyo’ kutanthauza kuti onse akankhale angwilo.​—Chiv. 20:5.

19. Pavuli pa vyaka 1,000, ndaŵa yanji pakankhale ciyeso cosilizhyila?

¹⁹ Tuziŵa kuti Yesu epitilizhya kunkhala wokhulupilika kwa Mulungu olo kuti Satana emuyesa m’njila zosiyanasiyana. Kansi ŵanthu ati akankhale na moyo mu Ulamulilo wa Vyaka 1,000 akapitilizhye kunkhala okhulupilika kwa Yehova, Satana akayoŵayesa? Munthu aliyense payeka akayankhe konsho iyi pavuli pakuti Satana wamasuliwa ku mphompho cakosilizhyila kwa vyaka 1,000. (Chiv. 20:7) Ŵala ati akapitilizhye kunkhala okhulupilika olo pavuli pakuti Satana waŵayesa kosilizhyila, akankhale na moyo wosasila, ndipo akapindule na ufulu wenewene. (Aro. 8:21) Koma ŵala ati akapandukile Yehova, akaonongewe pamozi na Maleŵania na viŵanda vake.​—Chiv. 20:8-10.

20. Kansi mukumvwa tyani mukaganizila maulosi ocitisha cidwi opezeka m’buku ya Chivumbulutso?

²⁰ Nkhani ino na nkhani ziŵili zapita, zatiyavya kumvwishisha maulosi opezeka m’buku ya Chivumbulutso. Mosakaikila, izi zufunika kutilimbikisha kuti tikocita khama pa nchito yoitila ŵanthu ayakine kuti nao ayambe kulambila Yehova pamozi na seo. (Chiv. 22:17) Pofwana kuti talaŵizhyana zinthu zati zicitike msogolo, tuyembekezela mwacidwi kukwanilishiwa kwa maulosi aya. Ndipo tulaŵila mau monga ni yecikamba mtumwi Yohane yakuti: “Ame! Welani Asikulu Yesu.”​—Chiv. 22:20.