1. Kansi anyinji a seo tukumana na vuto yotyani?

 KANSI mweziikilapo colinga cauzimu koma mwevutika kuti mucikwanilishe? b Ngati n’tetyo, muli lini mweka. Mwacisanzo, Philip enzofuna kupemphela nthawi zonse na kuti mapemphelo ŵake akonkhala okonzewa bwino, koma enzovutika kupeza nthawi yopemphela. Erika eziikila colinga cakuti akofwika kamangu pa misonkhano yokonzekela ulaliki, koma nthawi zinyinji enzofwika mocelwa. Tomáš wamene enzoyesayesa kuti aŵelenge Baibo yonse maulwendo osiyanasiyana ekamba kuti: “Nenzosangalala lini na kuŵelenga Baibo. Neyesa katatu konse koma nthawi zonse nenzopelela tyala m’buku ya Levitiko.”

2. Ndaŵa yanji tufunika lini kufooka ngati tikaliyokwanilisha colinga ceteziikila?

² Ngati mweziikila colinga cauzimu koma mukangiwa kucikwanilisha, mufunika lini kufooka. Olo zolinga zamene ni zitontho-zitontho zufuna nthawi na khama. Ngati mukalufuna kukwanilisha colinga canu, muonesha kuti muona kuti ushamwali wanu na Yehova ni wofunika ngako ndipo mufuna kumupasa zonse zamungakwanishe. Yehova oyamikila kuyesayesa kwanu. Yove oyembekezela lini kuti mukomupasa zamene mungakwanishe lini. (Sal. 103:14; Mika 6:8) Tetyo, mukoziikila colinga camene mungacikwanilishe kulingana na mwazilili zinthu pa umoyo wanu. Ngati mwaziikila colinga, kansi mungacitenji kuti mucikwanilishe? Tiyeni tikambilane mfundo ziyakine.

3. Ndaŵa yanji tufunika kunkhala na cifuno kuti tikwanilishe colinga casu?

³ Kuti tikwanilishe zolinga zasu zauzimu, tufunika kunkhala na cifuno . Ngati munthu ali na cifuno oyesayesa mwamphamvu kuti akwanilishe colinga cake. Izi tingazilinganizhye na mphepo yamene yukankha boti kuti ifwike kwaikuya. Ngati mphepo yupitilizhya kukuntha, boti yufwika kwayaimila. Ndipo ngati mphepo yukuntha na mphamvu ingafwike kamangu. Molingana na izi, ngati tili na cifuno tingakwanilishe zolinga zasu. Mkwasu David wa ku El Salvador ekamba kuti, “Ngati uli na cifuno, uyesayesa mwamphamvu. Ulola lini ciliconse kukukangisha kukwanilisha colinga cako.” Lomba kansi n’cinji cingatiyavye kuti tikonkhala na cifuno?

4. Kansi tufunika kupemphelela cinji? (Afilipi 2:13) (Onani soti cithunzithunzi.)

⁴ Mukosenga Yehova kuti akulishe cifuno canu. Yehova angaseŵenzeshe mzimu wake, kuti akupaseni cifuno cakuti mukwanilishe colinga canu. (Ŵelengani Afilipi 2:13.) Nthawi ziyakine, tuziikila colinga cifukwa tuziŵa kuti ndiye zatufunika kucita. Ndipo kucita izi n’kwabwino ngako. Koma tingankhale lini na cifuno cocikwanilisha. Umu ndiye mwezenzele kwa kalongosi Norina wa ku Uganda. Kalongosi uyu enze eziikila colinga cosogoza phunzilo ya Baibo. Koma enzeve cifuno cokwanilisha colinga ici cifukwa enzoona kuti enzeve luso yophunzisa. Kansi n’cinji cemuyavya? Yove ekamba kuti: “Neyamba kusenga Yehova siku iliyonse kuti aniyangizhyile cifuno cosogoza phunzilo ya Baibo. Necita zinthu mokatizhyana na mapemphelo ŵangu mwa kukulisha luso yophunzisa. Pavuli pa miyezi itontho, nezindikila kuti cifuno cangu cekula. M’caka camene ici neyambisha maphunzilo a Baibo aŵili.”

5. Kansi tufunika kusinkhasinkha pa cinji kuti tikulishe cifuno casu?

⁵ Mukosinkhasinkha pa zinthu zawakucitilani Yehova. (Sal. 143:5) Mtumwi Paulo enzosinkhasinkha pa kuwama mtima kwecimuonesha Yehova ndipo izi zemulimbikisha kuti akotumikila Yehova mwakhama. (1 Akor. 15:9, 10; 1 Tim. 1:12-14) Molingana na izi, ngati tusinkhasinkha pa zawaticitila Yehova, zikotiyavya kuti tikwanilishe colinga casu. (Sal. 116:12) Ganizilani ceyavya kalongosi wa ku Honduras kuti akwanilishe colinga cake conkhala mpainiya wanthawi zonse. Yove ekamba kuti: “Neganizila pa mwakunikondela Yehova. Yove enileta m’gulu yake ndipo onisamalila noniteteza. Kusinkhasinkha koteti kwekulisha cikondi cangu pali yove nokulisha cifuno cangu.”

6. Kansi n’cinthu ciyakine cotyani cingatiyavye kukulisha cifuno casu?

⁶ Mukoika maganizo ŵanu pa madaliso yamungapeze ngati mwakwanilisha colinga canu. Onani zeyavya kalongosi Erika, watomolewa lombapano kuti akwanilishe colinga cake cofwika kamangu pa msonkhano wokonzekela ulaliki. Yove ekamba kuti: “Nezindikila  kuti nenzophonya zinthu zofunika ngako cifukwa cofwika mocelwa. Koma kufwika kamangu kweniyavya kuti nikokwanisha kupasa moni akwasu na azilongosi notandala nao. Nenzokwanisha soti kumvwishila ku ndemanga zoyavya zamene zeniyavya kuti nikosangalala nokulisha luso yangu mu utumiki.” Cifukwa cakuti kalongosi Erika eika maganizo ŵake pa mapindu ofwika kamangu, ekwanilisha colinga cake. Kansi mufunika kuika maganizo pa madaliso otyani? Ngati muli na colinga coŵelenga Baibo olo kupemphela, mukoganizila mwamene kucita izi kungatang’ishile ushamwali wanu na Yehova. (Sal. 145:18, 19) Ngati colinga canu ni kukulisha nkhalidwe yacikhristu, mukoika maganizo pa mwamene colinga ici cingakuyavyileni kutang’isha ushamwali wanu na ayakine. (Akol. 3:14) Mungacite bwino kulemba vifukwa vukupangishani kufuna kukwanilisha colinga canu. Nthawi zonse mukopitulukamo mu zifukwa zamene izo. Tomáš watomolewa lombapano ekamba kuti: “Ngati nili na vifukwa vinyinji vanufunila kukwanilishila colinga cangu, nucita khama kuti nicikwanilishe.”

7. Kansi n’cinji ceyavya mkwasu Julio na mkazi wake kukwanilisha colinga cao?

⁷ Mukotandala na ŵanthu amene angakulimbikisheni. (Miy. 13:20) Onani ceyavya mkwasu Julio na mkazi wake kukwanilisha colinga cao coyangizhyila utumiki. Yove ekamba kuti: “Tesankha ashamwali amene angatilimbikishe kukwanilisha colinga casu ndipo tenzokambilana nao za colinga casu. Anyinji mwa ashamwali aŵa enze ekwanilisha kale colinga cao coyangizhyila utumiki. Tetyo enzotipasa malangizo oyavya. Ashamwali ŵasu enzotikonsha soti mwazuyendela zinthu ndipo enzotilimbikisha patufunika cilimbikiso.”

8. Kansi n’cinji cingacitike ngati tuyesayesa kukwanilisha colinga casu tyala patili na cifuno? (Onani soti cithunzithunzi.)

⁸ Kulaŵila cendi, nthawi ziyakine tukondonkhala tiliye cifuno. Koma kansi izi zutanthauza kuti tingakwanilishe lini colinga casu? Yai. Mwacisanzo, mphepo yamphamvu ingakankhe boti kuti ikwanishe kufwika kwayaimila. Koma nthawi ziyakine mphepo yukondonkhala iliye mphamvu ngako ndipo nthawi ziyakine kukondonkhala kuliyeletu. Kansi izi zutanthauza kuti boti ingapitilizhye lini kuyenda? Yai. Mwacisanzo, maboti ayakine onkhala na injini ndipo ayakine oseŵenzesha voyendeshela. Oyendesha boti angaseŵenzeshe vinthu ivi, kuti afwike kwaakuya. Cifuno casu tingacilinganizhye na mphepo. Nthawi ziyakine tingankhale na cifuno cakuti tikwanilishe colinga casu koma nthawi ziyakine tingankhale tiliye cifuno. Tetyo, ngati tuyesayesa kukwanilisha colinga casu, tyala patili na cifuno, ndiye kuti tingacikwanilishe lini. Koma monga ni mwakucitila munthu oyendesha boti kuti afwike kumalo kwaakuya, nase tingayeseyese kukwanilisha colinga casu olo kuti tiliye cifuno. Olo kuti kucita izi kungankhale lini kupepu, kungankhale  na zofumapo zabwino. Tikaliyolaŵizhyana zatufunika kucita, tiyeni tilaŵizhyane konsho ingawelepo.

9. Kansi nikulakwa kuyesayesa kukwanilisha colinga ngati tiliye cifuno? Fotokozani.

⁹ Yehova ofuna kuti tikomutumikila mwacimwemwe koma soti mofunishisha. (Sal. 100:2; 2 Akor. 9:7) Kansi izi zutanthauza kuti tufunika kuyesayesa kucita khama kuti tikwanilishe colinga casu olo kuti tiliye cifuno? Ganizilani cisanzo ca mtumwi Paulo. Yove ekamba kuti: “Nuniata muŵili wangu nousogolela monga kapolo.” (1 Akor. 9:25-27) Olo kuti Paulo enzeve cifuno cocita zakufuna Yehova, yove ezikakamizhya. Kansi Yehova esangalala na utumiki wa Paulo? Eee. Yehova emudalisa cifukwa ca kuyesayesa uku.​—2 Tim. 4:7, 8.

10. Kansi ni mapindu otyani yatingapeze ngati tuyesayesa kukwanilisha colinga casu olo kuti tiliye cifuno?

¹⁰ Molingana na izi, Yehova osangalala akationa tucita khama kukwanilisha colinga casu olo kuti tiliye cifuno. Yove osangalala cifukwa oziŵa kuti nthawi ziyakine tingakonde lini kucita zamene izo. Yove oziŵa kuti tucita izi cifukwa cakuti tumukonda. Monga ni mwamene Yehova edalisila Paulo, nase atidalise pa kuyesayesa kwatucita. (Sal. 126:5) Ngati tulandila madaliso ocokela kwa Yehova, tingayambe kunkhala na cifuno. Kalongosi Lucyna wa ku Poland ekamba kuti: “Nthawi ziyakine nukondofuna lini kuluta mu utumiki makamaka nikankhala woŵeŵa. Koma nikaluta nupeza cimwemwe ndipo cimwemwe ici ni mphaso yapadela.” Lomba tiyeni tilaŵizhyane zatingacite ngati tuona kuti tiliye cifuno.

11. Kansi Yehova angatiyavye tyani kukulisha nkhalidwe yozilesha?

¹¹ Mukosenga Yehova kuti akokuyavyani kunkhala ozilesha. Kuzilesha ni luso yamene yuyavya munthu kuongolela vocita vake. Kanyinji-kanyinji mau aŵa, otanthauza kuzilesha kuti usacite cinthu ciipa. Koma kuzilesha ni kofunika soti kuti tikwanishe kucita cinthu cabwino, makamaka cinthu camene ico cikankhala covuta koma soti ngati tiliye cifuno cocicita. Mukokumbukila kuti kuzilesha ni mbali imozi ya minkhalidwe ya mzimu utuŵa. Tetyo, mukosenga mzimu utuŵa wa Yehova kuti ukokuyavyani kukulisha nkhalidwe iyi yofunika ngako. (Luka 11:13; Aga. 5:22, 23) David watatomola poyamba efotokoza mwamene pemphelo yumuyavyila. Enzofuna kuti akocita phunzilo ya payeka nthawi zonse. Yove ekamba kuti: “Nenzosenga Yehova kuti aniyavye kukulisha nkhalidwe iyi yozilesha. Na thandizo yake, nekwanisha kuyamba kucita phunzilo ya paneka ndipo nuicita monkhazikika.”

12. Kansi mfundo yupezeka pa Mlaliki 11:4 ingatiyavye tyani patukwanilisha zolinga zasu zauzimu?

¹² Mufunika lini kuyembekeza kuti vinthu vinkhaliletu bwino. M’calo cino, vinthu vingankhaliletu lini bwino. Ngati tingayembekeze kuti vinkhale bwino, tingakwanilishe lini colinga casu. (Ŵelengani Mlaliki 11:4.) Mkwasu Dayniel ekamba kuti: “Paliye nthawi yabwino. Tucitisha seka kuti zinthu zinkhale bwino makamaka tikayamba.” Mkwasu Paul wa ku Uganda ekamba cifukwa ciyakine catufunika kupewela kuwayawaya kukwanilisha colinga casu. Yove ekamba kuti: “Tikayamba olo kuti tukumana na mavuto, tupasa mwai Yehova wakuti atidalise.”​—Mal. 3:10

13. Kansi pangankhale mapindu otyani ngati tingayambe mwa kuziikila zolinga zitontho-zitontho?

¹³ Mungayambe na zolinga zitontho-zitontho. Tingankhale tiliye cifuno cifukwa coona kuti zolinga zasu n’zovuta kuzikwanilisha. Ngati umu ndiye mwazilili, mungacite bwino kuziikila zolinga zitontho-zitontho. Mwacisanzo, ngati colinga canu ni kufuna kukulisha nkhalidwe iyakine, mungacite bwino kuyamba kuonesha nkhalidwe yamene iyo m’njila zitontho-zitontho. Ngati colinga canu ni kuŵelenga  Baibo yonse, mungasankhe kuyamba kuiŵelenga kwa nthawi itontho. Tomáš wafotokozewa m’ndime yoyambilila, enzovutika kuti akwanilishe colinga cake coŵelenga Baibo yonse kwa caka cimozi. Yove ekamba kuti: “Nezindikila kuti nesankha kuŵelenga macaputa anyinji pa siku. Tetyo neyesa soti, koma pa nthawi iyi nesankha kuŵelenga mavesi atontho siku iliyonse nosinkhasinkha. Posilizhyila pake neyamba kusangalala na kuŵelenga Baibo.” Cifukwa cakuti Tomáš’ enzosangalala kuŵelenga Baibo, eyamba kuŵelenga kwa nthawi itali. Posilizhyila pake ekwanisha kuŵelenga Baibo yonse. c

14. Kansi ni zofookesha zotyani zatingakumane nazo?

¹⁴ Olo kuti tingankhale na cifuno olo kunkhala ozilesha, tingakumane mphela na zinthu zofookesha. Mwacisanzo, tingakumane na “zinthu zosayembekezeleka” zamene zingationongele nthawi yakuti tikwanilishe colinga casu. (Mla. 9:11) Tingakumane na vuto yamene ingatipangishe kunkhala ofooka. (Miy. 24:10) Kusoŵa ungwilo kwasu kungatipangishe kucita zinthu zamene zingatikangishe kukwanilisha colinga casu. (Aro. 7:23) Olo tingankhale oŵeŵa. (Mat. 26:43) Kansi n’cinji cingatiyavye kugonjesa zofookesha izi?

15. Ngati takumana na zofookesha zamene zutikangisha kukwanilisha colinga casu, kansi zutanthauza kuti nise okangiwa? Fotokozani. (Salimo 145:14)

¹⁵ Mukokumbukila kuti ngati mwakumana na vofookesha vamene vingakukangisheni kukwanilisha colinga canu, zutanthauza lini kuti nimwe okangiwa. Nthawi ziyakine Baibo yufotokoza kuti tingakumane na mavuto mowelezhyawelezhya. Koma yukamba soti momvwika bwino kuti tingakwanilishe colinga casu moyavyiwa na Yehova. (Ŵelengani Salimo 145:14.) Mkwasu Philip watatomola koyambilila elaŵila kuti: “Nuika lini maganizo ŵangu pa nthawi zanakangiwa. M’malo mwake, nuika  maganizo ŵangu pa nthawi zinyinji zanayamba soti kuyesayesa kukwanilisha colinga cangu.” Mkwasu David watafotokoza koyambilila ekamba kuti: “Nuyesa kuona vofookesha osati monga vopinga, koma monga mwai woonesha kuti nukonda Yehova.” Ndipo ngati tupitilizhya kuyesayesa kukwanilisha colinga casu, tuonesha kuti tufuna kukondwelesha Yehova. Yehova osangalala ngako akaona kuti tupitilizhya kuyesayesa kukwanilisha colinga casu.

16. Kansi tingaphunzilepo cinji pa vofookesha vatingakumane navo?

¹⁶ Mukophunzilapo kanthu pa vofookesha vamungakumane navo. Mukoganizila cacitisha nozikonsha kuti, ‘Kansi ningacitenji kuti zisakanicitikile soti?’ (Miy. 27:12) Koma nthawi ziyakine vofookesha vingaoneshe kuti teziikila colinga camene tingacikwanilishe lini. Ngati umu niye mwamumvwila ndipo muona kuti niye mwazilili, mufunika kuganizilapo soti pa colinga canu noona ngati mungacikwanilishe. d Yehova akuoneni lini kuti nimwe okangiwa, tyala cifukwa cakuti mwakangiwa kukwanilisha colinga canu.​—2 Akor. 8:12.

17. Ndaŵa yanji mufunika kukumbukila zinthu zamwakwanilishako kale kucita?

¹⁷ Mukokumbukila zamwakwanishako kale kucita. Baibo yukamba kuti, “Mulungu ni wosalungama lini kuti angaluŵe nchito yanu.” (Aheb. 6:10) Tetyo, olo namwe mufunika lini kuluŵa. Mukoika maganizo ŵanu pa zolinga zamwakwanilishako kale monga kukulisha ushamwali wanu na Yehova, kuuzhyako ayakine zokhuza yove nobatizika. Monga ni mwamwankhala mupitila pasogolo nokwanilisha zolinga kuvuli, mungapitilizhye soti kuluta pasogolo kuti mukwanilishe colinga camuli naco lomba.​—Afil. 3:16.

18. Kansi tufunika kukumbukila cinji patuyesayesa kukwanilisha colinga casu? (Onani soti cithunzithunzi.)

¹⁸ Moyavyiwa na Yehova mungakwanilishe colinga canu monga ni mwamene munthu woyendesha boti osangalalila kufwika kwaakuya. Mukokumbukila kuti oyendesha maboti anyinji osangalala na ulwendo wao. Molingana na izi, pamupitilizhya kuyesayesa kukwanilisha colinga canu, mukoona mwamene Yehova okuyavyilani nokudalisani pamukwanilisha colinga camene ico. (2 Akor. 4:7) Tetyo, mukalandile madaliso anyinji ngati mufooka lini.​—Aga. 6:9.