NKHANI YOPHUNZILA 21
Mwamene Yehova Oyankhila Mapemphelo Ŵasu
“Tunkhala na cikhulupililo kuti tilandile zinthu zatamusenga.”—1 YOH. 5:15.
NYIMBO 41 Mulungu Mvwani Pemphelo Yangu
ZATI TIPHUNZILE a
1-2. Kansi nthawi ziyakine tingakaikile cinji ponena za mapemphelo ŵasu?
KANSI pa nthawi iyakine mwekaikilako ngati Yehova oyankha mapemphelo ŵanu? Ngati n’tetyo, ni mweo lini mweka. Akwasu na azilongosi anyinji alaŵilapo tetyo makamaka ngati okumana na mavuto. Patukumana na mavuto, payakine nase tingavutike kuzindikila mwamene Yehova oyankhila mapemphelo ŵasu.
2 Mu nkhani ino, tilaŵizhyane cifukwa cake tufunika kunkhala na cidalilo cakuti Yehova oyankha mapemphelo ya atumiki ŵake. (1 Yoh. 5:15) Tilaŵizhyane soti makonsho aŵa: Ndaŵa yanji nthawi ziyakine tingaone kuti Yehova oyankha lini mapemphelo ŵasu? Kansi masiku ŵano Yehova oyankha mapemphelo ŵasu m’njila zotyani?
NTHAWI ZIYAKINE YEHOVA ANGAYANKHE LINI M’NJILA YETENZOGANIZILA
3. Ndaŵa yanji Yehova ofuna kuti tikopemphela kwa yove?
3 Malemba otisimikizhyila kuti Yehova otikonda ngako na kuti nise amtengo wapatali kuli yove. (Hag. 2:7; 1 Yoh. 4:10) Niye cifukwa cake otilimbikisha kuti tikosenga thandizo kuli yove kupitila m’pemphelo. (1 Pet. 5:6, 7) Kuyangizhyila apo, ofuna kutiyavya kuti tinkhale pafupi na yove na kuti tikokwanisha kupilila mavuto yatukumana nayo.
Yehova eyankha mapemphelo a Davide mwa kum’pulumusa kwa adani ŵake (Onani ndime 4)
4. Kansi tuziŵa tyani kuti Yehova oyankha mapemphelo ya atumiki ŵake? (Onani soti cithunzithunzi.)
4 Kanyinji, m’Baibo tuŵelenga kuti Yehova enzoyankha mapemphelo ya atumiki ŵake. Cisanzo cimozi ni ca Mfumu Davide. Yove enze na adani anyinji koma soti oyofya pa umoyo wake ndipo nthawi zonse enzosenga Yehova kuti amuyavye. Pa nthawi iyakine, esenga Yehova kuti: “Mweo Yehova, mvwani pemphelo yangu. Mvwishilani panukucondelelani. Niyankheni mokatizhyana na kukhulupilika kwanu koma soti cilungamo canu.” (Sal. 143:1) Yehova eyankha mapemphelo a Davide osenga kuti am’pulumuse. (1 Sam. 19:10, 18-20; 2 Sam. 5:17-25) Niye cifukwa cake Davide elaŵila mwacidalilo kuti: “Yehova ali pafupi na onse oita pa yove.” Nase tingankhale na cidalilo monga ni ceenze naco Davide.—Sal. 145:18.
Yehova eyankha mapemphelo a Paulo mwa kum’pasa mphamvu kuti akwanishe kupilila (Onani ndime 5)
5. Kansi nthawi zonse mapemphelo ya atumiki a Yehova a m’nthawi zakuvuli yeyankhiwa monga ni mweenzoganizila? Fotokozani cisanzo. (Onani soti cithunzithunzi.)
5 Nthawi ziyakine Yehova angayankhe lini mapemphelo ŵasu monga ni mwetenzoganizila. Umu niye mwezenzele kwa mtumwi Paulo. Yove esenga Yehova kuti amucosele “munga m’muŵili.” Katatu konse epemphela za vuto iyi. Kansi Yehova eyankha mapemphelo a Paulo? Eee, koma osati monga ni mweenzoganizila. M’malo momucosela vuto iyi, Yehova emupasa mphamvu kuti akwanishe kum’tumikila mokhulupilika.—2 Akor. 12:7-10.
6. Ndaŵa yanji nthawi ziyakine tingaone monga kuti Yehova oyankha lini mapemphelo ŵasu?
6 Payakine nase pa nthawi iyakine telandilako yankho ya mapemphelo ŵasu mosiyana na mwetenzoganizila. Izi zutisimikizhyila kuti Yehova oziŵa bwino mwaangatiyavyile. Yove “angakwanishe kucita zinthu zikulu ngako kupambana zatumusenga olo kuganiza.” (Aef. 3:20) Niye cifukwa cake yankho yake pa mapemphelo ŵasu ingawele pa nthawi koma soti m’njila yatisayembekezela.
7. Ndaŵa yanji nthawi ziyakine tingafunike kucinja zinthu zatupemphelela? Fotokozani cisanzo.
7 Nthawi ziyakine tingafunike kucinja zatupemphelela tikazindikila zakufuna Yehova kuti ticite. Ganizilani cisanzo ca mkwasu Martin Poetzinger. Nthawi itontho pavuli pakuti walungula, mkwasu Poetzinger eikiwa m’jele ya Nazi. Poyamba, esenga Yehova kuti amuyavye kufuma m’jele na colinga cakuti akosamalila mkazi wake noyamba nchito yolalikila. Olo n’tetyo, pavuli pa mawiki aŵili eona kuti paliye cizindikilo ciliconse coonesha kuti Yehova amuyavye kuti afume. Tetyo, eyamba kupemphela kuti: “Conde Yehova, nionesheni zamufuna kuti nicite.” Pavuli pake eyamba kuganizila zeenzopitamo akwasu ayakine amene enze m’jele. Anyinji mwa akwasu aŵa enzodela nkhaŵa azinakazi koma soti ŵana ŵao. Cifukwa ca izi, mkwasu Poetzinger epemphela kuti: “Zikomo Yehova cifukwa ca nchito yalomba yamwanipasa. Niyavyeni kuti nitang’ishe nolimbikisha akwasu.” Tetyo, enkhala m’jele kwa vyaka 9 okata nchito iyi.
8. Kansi tufunika kukumbukila cinji patupemphela?
8 Tufunika kukumbukila kuti Yehova ali na colinga ndipo akacikwanilishe pa nthawi yake yoikiwa. Colinga ici cuyangizhyilapo kusilizhyilatu mavuto yonse yatukumana nayo masiku ŵano. Mavuto aya yoyangizhyilapo masoka acilengedwe, matenda na imfwa. Yehova akakwanilishe colinga ici kupitila mu Ufumu wake. (Dan. 2:44; Chiv. 21:3, 4) Yehova walola Satana kulamulila calo mpaka pa nthawi yamene iyo. b (Yoh. 12:31; Chiv. 12:9) Ngati pali lomba Yehova angacosepo mavuto yakukumana nayo ŵanthu, zingaoneke monga kuti Satana olamulila bwino. Tetyo, patuyembekezela Yehova kuti akakwanilishe ayakine mwa malonjezo ŵake, zutanthauza lini kuti atilekelele osatiyavya. Lomba, tiyeni tilaŵizhyane njila ziyakine zakutiyavyilamo Yehova.
MWAMENE YEHOVA OYANKHILA MAPEMPHELO ŴASU MASIKU ŴANO
9. Kansi Yehova otiyavya tyani ngati tufuna kupanga cosankha? Fotokozani cisanzo.
9 Otipasa nzelu. Yehova olonjeza kuti akotipasa nzelu kuti tikwanishe kupanga zosankha zabwino. Tufunikila nzelu zaumulungu patupanga zosankha zamene zingakhuze umoyo wasu wonse, monga kunkhala mbeta olo kunkhala pa banja. (Yak. 1:5) Ganizilani cokumana naco ca kalongosi Maria wamene ni mbeta. c Yove enzotumikila mwacimwemwe monga mpainiya wanthawi zonse akaliyokumana na mkwasu muyakine. Elaŵila kuti: “Ushamwali wasu pewenzokula, teyamba kukondana ngako. Tetyo, nenzofunika kupanga cosankha. Cifukwa cakuti nenzofuna cisogozo ca Yehova, neipemphelela nkhani iyi. Koma nenzoziŵa kuti Yehova anganipangile lini cosankha.” Kalongosi Maria eona kuti Yehova eyankha mapemphelo yake mwa kum’pasa nzelu. Motyani? Pecifufuza m’zofalisa zasu, ekwanisha kupeza nkhani zamene zemuyavya kupeza mayankho a makonsho yeenze nayo. Kuyangizhyila apo, emvwila malangizo anzelu yecimupasa amai ŵake. Izi zemuyavya kuganizila nkhani yonse cakuti posilizhyila pake, ekwanisha kupanga cosankha canzelu.
Kansi ni motyani mwamene Yehova otipasila mphamvu kuti tikwanishe kupilila? (Onani ndime 10)
10. Molingana na Afilipi 4:13, kansi Yehova ocitanji pofuna kuyavya atumiki ŵake? Fotokozani cisanzo. (Onani soti cithunzithunzi.)
10 Otipasa mphamvu kuti tikwanishe kupilila. Monga ni mwecicitila kwa mtumwi Paulo, akotipasa mphamvu zatufunikila kuti tikwanishe kupilila mayeselo. (Ŵelengani Afilipi 4:13.) Ganizilani mwamene Yehova eyavyila mkwasu Benjamin kupilila mavuto. Pa nthawi yonse yeenze mlumbwana, mkwasu Benjamin enzonkhala ku malo kwamene osungilako ŵanthu othaŵa kwao mu Africa. Yove elaŵila kuti: “Nepemphela mowelezhyawelezhya kwa Yehova kuti anipase mphamvu kuti nikwanishe kucita zoyenela pamenso pake. Ndipo Yehova eyankha mapemphelo ŵangu mwa kunipasa mtendele wa mumtima. Eniyavya soti kuti ninkhale wotang’a mtima kuti nipitilizhye kulalikila nopeza zofalisa zamene zeniyavya kuti nipitilizhye kunkhala wotang’a mwauzimu.” Epitilizhya soti kuti: “Kuŵelenga zokumana nazo za akwasu na azilongosi noona mwamene Yehova eŵayavyila kuti apilile, kweniyavya kuti nipitilizhye kunkhala wokhulupilika.”
Kansi mwelandilako thandizo ya Yehova kupitila muli olambila ayanu? (Onani ndime 11-12) d
11-12. Ni motyani mwamene Yehova angaseŵenzeshele olambila ayasu kuti ayankhe mapemphelo ŵasu? (Onani soti cithunzithunzi.)
11 Oseŵenzesha olambila ayasu. Usiku wakuti wasala patontho kupeleka moyo wake, Yesu epemphela mofumila pansi pa mtima. Esenga Yehova kuti osalole ayakine kuganiza kuti ni wonyoza Mulungu. M’malo mocita zecisenga Yesu, Yehova emuyavya mwa kutumizhya m’mozi mwa angelo ŵake kuti amulimbikishe. (Luka 22:42, 43) Nase Yehova angatiyavye kupitila mwa akwasu na azilongosi, amene angawele ku ng’anda kwasu olo kutitumila foni na colinga cakuti atilimbikishe. Tonse tulimbikishiwa kusakila mipata yakuti tiuzhyeko olambila ayasu “mau abwino.”—Miy. 12:25.
12 Ganizilani cokumana naco ca kalongosi Miriam. Mawiki atontho pavuli pakuti mulume wake wamwalila, enze pa ng’anda yeka apo n’kuti olila cifukwa ca cisoni ceenze naco. Kalongosi uyu enzofunikila munthu muyakine kuti amutonthoze. Yove elaŵila kuti: “Nenzeve mphamvu kuti nikwanishe kutumila foni aliyense. Tetyo, nepemphela kwa Yehova. Penenzolila apo n’kuti nupemphela, foni yangu yelila. Etuma foni enze mkulu wa mumpingo mwasu.” Kalongosi Miriam elandila citonthozo kufumila kuli mkulu uyu na mkazi wake. Yove ni wosimikizhya kuti Yehova niye ecitisha mkwasu uyu kuti atume foni.
Kansi Yehova angasonkhezele tyani ayakine kuti atiyavye? (Onani ndime 13-14)
13. Fotokozani cisanzo coonesha mwamene Yehova angaseŵenzeshele ŵanthu amene omulambila lini kuti ayankhe mapemphelo ŵasu.
13 Angaseŵenzeshe ŵanthu amene omulambila lini. (Miy. 21:1) Nthawi ziyakine Yehova oyankha mapemphelo ya atumiki ŵake mwa kuseŵenzesha ŵanthu amene omulambila lini kuti aŵayavye. Mwacisanzo, eseŵenzesha Mfumu Aritasasita kulola Nehemiya kuluta ku Yerusalemu kuti akayavye pa nchito yomanga soti mzinda. (Neh. 2:3-6) Olo masiku ŵano, Yehova angaseŵenzeshe ŵanthu amene omulambila lini kuti atiyavye ngati tufunikila thandizo.
14. Kansi cokumana naco ca kalongosi Soo Hing cakulimbikishani tyani? (Onani soti cithunzithunzi.)
14 Kalongosi Soo Hing eona kuti Yehova emuyavya kupitila mwa dokota wao. Mwana wake munalume olwala matenda ya maganizo. Mwana uyu pecipezeka mu ngozi, yove na mulume wake eleka nchito kuti akomusamalila. Izi zecitisha kuti ankhale na vuto ya zacuma. Yove elaŵila kuti ecimvwa monga kuti angakwanishe lini kupilila mavuto yeenzokumana nayo. Tetyo, epemphela kwa Yehova kuti amuyavye. Dokota eganizila njila yaangaŵayavyilemo pamozi na banja yake. Izi zecitisha kuti alandile thandizo ku boma nokwanisha kupeza ng’anda yaangakwanishe kulipila kuti akonkhalamo. Pavuli pake kalongosi Soo Hing elaŵila kuti: “Teona mwamene Yehova etiyavyila pa nkhani iyi. Kulaŵila cendi, yove ni ‘wakumvwa pemphelo.’”—Sal. 65:2.
TUFUNIKILA CIKHULUPILILO KUTI TIKWANISHE KUZINDIKILA NOVOMELEZHYA MAYANKHO A YEHOVA
15. N’cinji ceyavya kalongosi muyakine kuzindikila kuti Yehova enzoyankha mapemphelo ŵake?
15 Ni nthawi lini zonse pamene Yehova oyankha mapemphelo ŵasu m’njila yapadela. Koma mayankho yatingalandile niye tyala yatufunikila kuti tipitilizhye kunkhala okhulupilika kuli Ausuwasu akululu. Tetyo, mukonkhala menso kuona mwamene Yehova oyankhila mapemphelo ŵanu. Kalongosi wa zina yakuti Yoko enzoona kuti Yehova enzoyankha lini mapemphelo ŵake. Tetyo eganiza zolemba zinthu zawasenga Yehova kuti amucitile. Pavuli pakuti papitako nthawi, eganiza zoona m’buku yake. Ndipo ezindikila kuti Yehova eyankha anyinji mwa mapemphelo ŵake, kuyangizhyilapo na yala yamene enze eyaluŵa. Tetyo, nthawi zonse tufunika kuganizila mwamene Yehova oyankhila mapemphelo ŵasu.—Sal. 66:19, 20.
16. Kansi tingaoneshe tyani cikhulupililo pa nkhani yokhuza mapemphelo ŵasu? (Aheberi 11:6)
16 Tuonesha kuti tili na cikhulupililo osati tyala mwa kupemphela kwa Yehova, koma na mwa kuvomelezhya mayankho ya mapemphelo ŵasu mulimonse mwayangawelele. (Ŵelengani Aheberi 11:6.) Ganizilani cisanzo ca mkwasu Mike na mkazi wake Chrissy. Ove enze na colinga cakuyotumikila pa Beteli. Mkwasu Mike elaŵila kuti: “Tekonshela utumiki uyu kwa vyaka vinyinji, ndipo mowelezhyawelezhya tenzopemphela kwa Yehova za colinga ici, koma tiliyoitiwe.” Olo n’tetyo, epitilizhya kunkhala na cidalilo cakuti Yehova oziŵa mwangaŵaseŵenzeshele pomutumikila. Tetyo, epitilizhya kutumikila monga apainiya anthawi zonse ku dela kufunika ofalisa anyinji nocilikiza pa vimango va m’gulu yasu. Pano patukamba, ali m’dela. Mkwasu Mike elaŵila kuti: “Ni nthawi lini zonse pamene Yehova oyankha mapemphelo ŵasu monga ni mwetenzoganizila. Koma oyankha m’njila yabwino ngako kupambana na mwetenzoganizila.”
17-18. Molingana na Salimo 86:6, 7, kansi tufunika kupemphela tili na cidalilo cotyani?
17 Ŵelengani Salimo 86:6, 7. Wamasalimo Davide enze wosimikizhya kuti Yehova ecimvwa noyankha mapemphelo ŵake. Namwe mungankhale na cidalilo coteti. Visanzo vatalaŵizhyana mu nkhani ino vatisimikizhyila kuti Yehova angatipase nzelu na mphamvu kuti tikwanishe kupilila. Nthawi ziyakine angaseŵenzeshe wolambila muyasu olo ŵanthu amene omutumikila lini pali lomba kuti atiyavye.
18 Ni nthawi lini zonse pamene Yehova angayankhe mapemphelo ŵasu monga ni mwetenzoganizila. Olo n’tetyo tuziŵa kuti ayankhe. Yove akotipasa zinthu zatufunikila pa nthawi yatuzifuna. Tetyo, pitilizhyani kupemphela muli na cidalilo cakuti akusamalileni pali lomba koma soti kuti “akakhutilishe vofuna va camoyo ciliconse” m’calo calomba.—Sal. 145:16.
NYIMBO 46 Tukuyamikilani Yehova
a Yehova otisimikizhyila kuti akoyankha mapemphelo ŵasu ngati ni okatizhyana na cifunilo cake. Ngati tukumana na mayeselo, tingankhale osimikizhya kuti atiyavye kuti tipitilizhye kunkhala okhulupilika kwa yove. Lomba, tiyeni tilaŵizhyane mwamene Yehova oyankhila mapemphelo ŵasu.
b Kuti muziŵe cifukwa cake Yehova walola Satana kuti alamulile calo, onani nkhani yakuti “Muziika Maganizo Anu pa Nkhani Yaikulu,” mu Nsanja ya Mlonda ya m’Cinyanja ya June 2017.
c Mazina ayakine acinjiwa.
d MAU OFOTOKOZA CITHUNZITHUNZI: Mzimai na mwana wake munakazi afwika ku malo kwakusungila ŵanthu othaŵa kwao. Ndipo olambila ayao oŵalandila mwacimwemwe noŵapasa thandizo yofunikila.
